Zotërimi Doktrinor: 2 Nefi 2:25

“Adami Ra që Njerëzit të Mund të Jenë; dhe Njerëzit Janë, që Ata të Mund të Kenë Gëzim”

Në mësimin “2 Nefi 2:17–26”, mësove rreth Rënies së Adamit dhe Evës. Njohuria rreth Rënies mund të të ndihmojë të mbështetesh te Shpëtimtari ndërsa përballesh me sfidat e vdekshmërisë. Ky mësim mund të të ndihmojë ta mësosh përmendsh fragmentin e zotërimit doktrinor dhe frazën kyç të shkrimit të shenjtë për vargun te 2 Nefi 2:25, ta shpjegosh doktrinën dhe të ushtrosh zbatimin e parimeve të marrjes së njohurisë shpirtërore në situata nga jeta reale.

Ndihma ndaj nxënësve që ta dinë se kontributi i tyre vlerësohet. Shpesh duhet guxim nga ana e nxënësve që t’i tregojnë mendimet ose shqetësimet e tyre në klasë. Falënderimi i nxënësve për kontributin e tyre do t’u tregojë atyre se ju e vlerësoni gatishmërinë e tyre për t’i treguar idetë, pyetjet dhe dëshmitë e tyre. Kjo do t’i inkurajojë ata edhe që të flasin në të ardhmen.

Përgatitja e nxënësve: Ftojini nxënësit të vijnë në klasë të përgatitur ta thonë përmendsh vargun 2 Nefi 2:25 dhe të tregojnë një mënyrë se si përjetojnë gëzim për shkak të Rënies së Adamit dhe Evës.

Veprimtari të Mundshme të të Mësuarit

Ky mësim për fragmentin e zotërimit doktrinor është hartuar për t’u dhënë pas mësimit “2 Nefi 2:17–26”, që është mësimi kontekstual për fragmentin e zotërimit doktrinor te 2 Nefi 2:25. Nëse ky mësim për fragmentin e zotërimit doktrinor nevojitet të zhvendoset në një javë tjetër, sigurohuni që të jepni edhe mësimin përkatës kontekstual gjatë asaj jave.

Shpjego dhe mëso përmendsh

Ftojeni pjesën më të madhe të klasës t’i mbyllë sytë dhe nja dy nga nxënësit që t’i mbajnë sytë hapur. Mbani lart një objekt dhe ftojini nxënësit që i kanë sytë hapur, ta përshkruajnë atë pa e përdorur emrin e objektit. Shihni a mund ta ndihmojnë ata pjesën tjetër të klasës për ta gjetur se çfarë është. Kjo veprimtari mund t’i ndihmojë nxënësit të praktikohen për t’ua shpjeguar konceptet të tjerëve në mënyra të thjeshta.

Disa pjesë të planit të Atit Qiellor mund të jenë të vështira të shpjegohen, përfshirë Rënia e Adamit dhe Evës. Në një mësim të mëparshëm, studiove rreth Rënies. Lexo te 2 Nefi 2:25 duke menduar rreth asaj që mësove. Kujto se Rënia ishte një pjesë thelbësore e planit të Atit Qiellor për lumturinë.

Shkruaj se si do t’ia shpjegoje Rënien e Adamit dhe Evës një tetëvjeçari dhe pse Rënia është e rëndësishme të kuptohet.

Për t’i ndihmuar nxënësit ta përsëritin këtë doktrinë, mund të jetë e dobishme t’i ftoni ata të tregojnë në grupe të vogla atë që shkruan. Ecni nëpër klasë, duke dëgjuar shpjegimet e tyre. Nëse është e nevojshme, përsëriteni materialin nga mësimi i mëparshëm për t’i ndihmuar nxënësit ta kuptojnë Rënien dhe të vërtetën e pohuar më lart.

Ushtrohu për ta mësuar përmendsh fragmentin e zotërimit doktrinor. Një mënyrë për të ushtruar të mësuarit përmendsh, është ta ndash referencën e shkrimit të shenjtë dhe frazën kyç të shkrimit të shenjtë në pesë segmentet vijuese:

• 2 Nefi 2:25

• “Adami ra

• që njerëzit të mund të jenë;

• dhe njerëzit janë,

• që ata të mund të kenë gëzim.”

Nëse është e mundur, merrni parasysh të krijoni pesë grupe dhe t’i caktoni çdo grupi njërin nga segmentet. Kur i drejtoni gishtin një grupi, ai mund të thotë pjesën që i është caktuar. Më pas ndërrojini pjesët që u caktohen grupeve, dhe përsëriteni.

Shkruaji këto segmente në një copë letër dhe përsërite çdo segment teksa i drejton gishtin. Më pas fshi ose mbulo fjalë ose fraza ndërkohë që e përsërit shkrimin e shenjtë. Vazhdo derisa të jetë fshirë gjithçka dhe të mund t’i përsëritësh përmendsh referencën e shkrimit të shenjtë dhe frazën kyç të shkrimit të shenjtë.

Ushtroje vënien në zbatim

Ndihmojini nxënësit të shqyrtojnë parimet e marrjes së njohurisë shpirtërore. Një mënyrë për ta bërë këtë është t’i vini nxënësit të përpiqen t’i shkruajnë përmendsh të tri parimet.

Nëse ke nevojë për ndihmë që t’i mbash mend këto parime, drejtohu te Dokumenti Bazë i Zotërimit Doktrinor (2018).

Përdori këto parime në skenarin vijues:

Ndërkohë që po mëson rreth Rënies së Adamit dhe Evës në orën mësimore të Shkollës të së Dielës, Gideoni habitet kur e dëgjon mësuesin e vet të thotë se Rënia është një pjesë thelbësore e planit të Atit Qiellor për shpëtimin. Ai fillon të mendojë për të gjitha gjërat negative që mund të ndodhin për shkak të Rënies – mëkati, vdekja, sëmundja, paaftësia, sëmundja mendore, sprovat dhe shumë të tjera. Ai e kupton se gjërat për të cilat ankohet më së shumti, janë shpesh pasoja të Rënies. Ai vret mendjen se si Rënia mundet vallë të jetë diçka që Ati Qiellor do të kishte dashur të ndodhte.

Ndërsa përgjigjen nxënësit, mund t’i ndihmoni ata të krijojnë një plan për trajtimin e këtij shqetësimi. Mund të bëni pyetje si ato në vijim: Çfarë do të bënit të parën? Çfarë lloj shënimesh do të mbani në ditarin tuaj të studimit? Për çfarë pyetjesh të tjera mund të doni të kërkoni përgjigje?

Gjeni kohë në përgatitjen tuaj për mësimin, për të marrë parasysh mënyra të tjera që t’i ndihmoni nxënësit të ushtrojnë përdorimin e parimeve të marrjes së njohurisë shpirtërore dhe doktrinën e Rënies.

Gjithashtu mund të diskutoni disa ose të gjitha pyetjet vijuese me nxënësit.

Kërko kuptueshmëri të mëtejshme nëpërmjet burimeve të caktuara në mënyrë hyjnore

Shqyrtoji paragrafët 11–12 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor.

• Si mund ta përdorje këtë parim për të trajtuar shqetësimin e Gideonit?

Mënyra të tjera për ta përdorur këtë parim

• Te cilat burime të caktuara në mënyrë hyjnore do t’i rekomandoje të shihte Gideonit për ndihmë shtesë?

Nëse nxënësit e kanë të vështirë t’i përcaktojnë burimet, mund t’u kujtoni atyre vargjet te 2 Nefi 2:24–26 ose Moisiu 5:9–10. Mund t’i drejtoni ata edhe te zëri “Rënie e Adamit dhe Evës” tek Udhëzuesi për Shkrimet e Shenjta.

• Përse do t’i rekomandoje ato burime?

Shqyrtoji konceptet dhe pyetjet me një këndvështrim të përjetshëm

Shqyrtoji paragrafët 8–10 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor.

• Si mund ta përdorje këtë parim për të trajtuar shqetësimin e Gideonit?

Mënyra të tjera për ta përdorur këtë parim

• Si mund të ndihmojë në këtë situatë kuptueshmëria jote për Rënien dhe vendin e saj në planin e shpëtimit?

• Çfarë di rreth Shpëtimtarit dhe Shlyerjes së Tij që mund të ndihmojë?

• Si mund ta shohim këtë situatë ndryshe me një këndvështrim të përjetshëm?

Vepro me besim

Shqyrtoji paragrafët 5–7 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor.

• Si mund ta përdorje këtë parim për të trajtuar shqetësimin e Gideonit?

Mënyra të tjera për ta përdorur këtë parim

Mendo rreth vetë përvojave të tua me përballimin e sfidave të lidhura me Rënien. Përsiat se çfarë ke bërë për të vepruar me besim e për t’u mbështetur te Shpëtimtari kur je përballur me sfida që lidhen me vdekshmërinë.

• Si mund të ndihmojnë përvojat e tua në situatën e Gideonit?

• Në ç’mënyrë tjetër mund ta tregonte Gideoni besimin te Jezu Krishti?

Përsëritja e zotërimit doktrinor

Në një mësim të ardhshëm, merreni parasysh ta shkruani referencën e shkrimit të shenjtë dhe frazën kyç të shkrimit të shenjtë në një rend të çrregullt në tabelë. (Mund të përdorni segmentet që janë në veprimtarinë e të mësuarit përmendsh në këtë mësim.) Ftojeni çdo nxënës të përpiqet t’i shkruajë ato në rendin e duhur.

Nëse i keni në dispozicion, mund ta shkruani referencën dhe pjesë të frazave në letra të ndryshme që të mund të paraqiten për klasën. Një nxënës mund të dalë përpara klasës dhe, me ndihmën e klasës, t’i vendosë frazat në rendin e duhur.

Veprimtari Plotësuese të të Mësuarit

Skenar i ndryshëm

Një mënyrë tjetër se si mund t’i qaseni skenarit, është t’i vini nxënësit të përcaktojnë një sfidë me të cilën mund të përballen në të ardhmen, që është një rezultat i drejtpërdrejtë i Rënies së Adamit dhe Evës. Kjo mund të përfshijë vdekjen, sëmundjen, problemet mendore, padrejtësinë ose kufizimet fizike. Nxënësit mund të praktikohen për përdorimin e parimeve të marrjes së njohurisë shpirtërore dhe të doktrinës së Rënies për të gjetur paqe, ngushëllim dhe gëzim.