2 Nefia 2:17–26

“Avotana amin’ny Fahalavoana”

Efa nanontany tena ve ianao hoe ahoana no mbola ahafahan’ny safidy nataon’i Adama sy i Eva an’arivo taonany lasa miantraika aminao? Nampianatra ireo zanany momba ny vokatry ny Fahalavoan’i Adama sy i Eva i Lehia ary nampianariny fa rehefa miaraka amin’ny Mpamonjy isika dia afaka mandresy ny fanambin’ny fiainana an-tany rehetra. Ity lesona ity dia afaka manampy anao hankasitraka kokoa ny Mpamonjy sy ny Sorompanavotany rehefa mahatakatra ny Fahalavoan’i Adama sy i Eva ianao.

Manampy ny mpianatra hampivelatra ny fahaizana mifanakalo hevitra momba ireo finoana ara-pilazantsara miaraka amin’ny hafa. Rehefa manazava ny filazantsara ny mpianatra dia mampitombo ny fahatakaran’izy ireo. Mamoròna tontolo izay ahazoan’ny mpianatra aina hizara ny fahatakaran’izy ireo fahamarinana ara-pilazantsara amin’ny hafa.

Fanomanana ny mpianatra: Hevero ny hanasa ny mpianatra hamaky ny fanekem-pinoana faharoa ary hieritreritra ny fomba hanazavany izany amin’olon-kafa. Azon’izy ireo atao ihany koa ny mangataka olona iray na roa itokian’izy ireo mba hizara amin’izy ireo ny fahatakarany ny fanekem-pinoana faharoa.

Ity fanomanana ity dia azo ampiasaina any am-piandohan’ny lesona na amin’ny fotoana izaran’ny mpianatra ny zavatra fantany momba ny Fahalavoan’i Adama sy i Eva.

Ireo asa azo atao ao anatin’ny fianarana

Mitarika mankany amin’ny fankasitrahana ny fahatakarana

Saintsaino ireto fanontaniana manaraka ireto:

• Amina ambaratonga 1 hatramin’ny 10 (ka ny 1 dia “tsia mihitsy” ary ny 10 dia “tena”), ahoana ny fahatsapanao ny fahatakaranao sy fankasitrahanao an’i Jesoa Kristy Mpamonjy sy ny sorona nataony ho anao? Nahoana?

Alohan’ny hanohizana dia omeo fotoana ampy hisaintsainana ireo fanontaniana teo aloha ny mpianatra. Avy eo dia asao izy ireo hizara valinteny amin’ny fanontaniana manaraka:

• Raha misy olona manontany anao hoe inona no tokony hataony mba hahatakarany sy hankasitrahany ny Sorompanavotan’i Jesoa Kristy, dia inona no holazainao?

Ny Loholona Jeffrey R. Holland ao amin’ny Kôlejin’ny Apôstôly Roambinifolo dia nampahafantatra ny dingana tsy maintsy atao hahatakarana tsara kokoa ny Sorompanavotan’ny Mpamonjy. Azonao atao ny mijery ny horonan-tsary hoe “[Fahamarinana,] fitiavana, famindrampo, no tafaraka soa” manomboka eo amin’ny marim-potoana 6:51 hatramin’ny 7:26 na mamaky ity fanambarana manaraka ity:

Ny fahamarinana tsotra anefa dia hoe tsy afaka ny hahatakatra feno ny Sorompanavotana sy ny Fitsanganan’i Kristy tamin’ny maty isika ary tsy afaka ny hankasitraka araka ny tokony ho izy ilay tanjona tsy manan-tsahala nahatonga ny fahaterahany sy ny fahafatesany … raha tsy mahatakatra fa tena nisy izany Adama sy i Eva izany izay lavo ka voaroaka tao amin’ny saha Edena izay tena nisy niaraka tamin’ireo vokatra izay nentin’ny fahalavoana tamin’izany. (Jeffrey R. Holland, “Fahamarinana, fitiavana, famindrampo no tafaraka soa,” Liahona, mey 2015, 105)

Mba hanampiana anao hanombana ny habetsaky ny zavatra fantatrao momba ny Fahalavoan’i Adama sy i Eva, dia eritrereto ireto fanontaniana manaraka ireto:

• Inona ilay Fahalavoan’i Adama sy Eva?

• Inona no vokatr’ilay Fahalavoana teo amin’izao tontolo izao? taminao?

• Inona no anjara toeran’ny Fahalavoana amin’ny drafitry ny famonjen’ny Ray any An-danitra?

• Ahoana no anampian’ilay Fahalavoana anao hahatakatra sy hankasitraka an’i Jesoa Kristy sy ny sorona nataony ho anao?

Rehefa mandalina ianao, dia mitadiava valiny amin’ireo fanontaniana ireo ary saintsaino ny mety hanampian’ny fahatakarana azy ireo anao?

Ny vokatry ny Fahalavoan’i Adama sy i Eva

Ity andiam-pehezan-teny manaraka ity dia natao hanampiana ny mpianatra hahatakatra hoe nanao ahoana ny Saha Edena mba hahafahan’izy ireo mahatakatra lalina kokoa ny vokatry ny Fahalavoana. Hevero ny hanasa ny mpianatra hizara ny zavatra fantatr’izy ireo momba ireo zava-nitranga ireo, ary hameno izay antsipiriany manan-danja rehetra.

Rehefa niomana ny ho faty i Lehia, dia niresaka be tamin’i Jakôba zanany lahy momba ny Fahalavoan’i Adama sy i Eva izy. I Adama sy i Eva ary izay endri-piainana rehetra nisy teto ambonin’ny tany dia nisy tamina endrika tsy mety maty, tsy mbola niharana fahafatesana ary teo amin’ny fanatrehan’ Andriamanitra. Tamin’izany endrika izany, tsy nety lasa narary na maty izy ireo, ary ny saha dia namatsy sakafo azy ireo tsy nila niasa mba hamokatra izany akory. Tsy afaka nanana fianakaviana ihany koa izy ireo. Nampitandrina azy ireo ny Tompo fa raha mihinana ny voan’ilay hazo fahalalana ny tsara sy ny ratsy izy ireo, dia ho faty amin’ny farany (jereo ny Mosesy 3:16–17; Abrahama 5:12–13). Ny fanapahan-kevitr’i Adama sy i Eva hihinana izany voankazo izany sy ny fiantraikany tamin’izy ireo sy ny sisa eo amin’izao tontolo izao dia fantatra amin’ny hoe Fahalavoana.

Vakio ny 2 Nefia 2:19–23 sy ny Almà 42:6–9, hitadiavana ireo vokatry ny Fahalavoana. Hevero ny hanisy marika ny zavatra hitanao.

Mety hanampy ny fanasana ny mpianatra hiaraka hiasa anatina vondrona kely na hanao lisitra eny amin’ny solaitrabe miaraka amin’ny iray kilasy.

Hevero ny hanasa ny mpianatra hamaly ireto fanontaniana roa manaraka ireto tsiroaroa na anaty vondrona kely. Hazavao fa ireo fanontaniana ireo dia fanontaniana manontany hevitra, ka azon’ny mpianatra atao ny mizara malalaka ny eritreritr’izy ireo ary tsy hanahy ny amin’ny fananana “valiny marina”.

• Ahoana no mety ho fahatsapanao raha ianao no Adama sy Eva niaina ireo vokany ireo?

• Mihevitra ve ianao fa ireo vokany ireo dia tsara, na ratsy, na izy roa? Nahoana?

Vakio ny 2 Nefia 2:24–25, ary eritrereto ny fomba hamintinanao ireo andininy ireo amin’ny teninao manokana.

Ny 2 Nefia 2:25 dia andalan-tsoratra masina fifehezana fotopampianarana. Hevero ny hanisy marika ireo andalan-tsoratra masina fifehezana fotopampianarana amin’ny fomba miavaka mba hahafahanao mahita azy ireny mora foana. Ao amin’ny lesona manaraka ianao dia hanana fahafahana hamerimberina fampiharana ny fotopampianarana nampianarina tao amin’io andininy io amina fanontaniana na toe-java-misy iray.

Asao hizara ny fomba mety hamintinan’izy ireo ireo andininy ireo ny mpianatra. Soraty eny amin’ny solaitrabe ny fahamarinana rehetra lazain’izy ireo. Ity manaraka ity dia ohatra amin’ny fahamarinana iray mety ho hitan’izy ireo.

Fahamarinana iray nampianarin’i Lehia ny hoe ny Fahalavoana dia ampahany nanan-danja tamin’ny drafitry ny fahasambaran’ny Ray any An-danitra.

Makà fotoana hisaintsainana ny antony naha-ampahany tena nanan-danja tamin’ny drafitry ny Ray any An-danitra ny Fahalavoana rehefa mamaky ity teny nambaran’ny Loholona Jeffrey R. Holland ao amin’ny Kôlejin’ny Apôstôly Roambinifolo ity ianao:

Ampahany tena nanan-danja tamin’ny drafitra masin’ny Ray any An-danitra ny Fahalavoana. Raha tsy nisy azy io dia tsy ho nisy zanaka mety maty naterak’i Adama sy i Eva, ary tsy ho nisy fianakavian’olombelona mba hiaina ny fifanoherana sy ny fivoarana, ny safidim-pitondran-tena, ny fifaliana avy amin’ny fitsanganana amin’ny maty, ny fanavotana, ary ny fiainana mandrakizay [jereo ny 2 Nefia 2:22–27; Mosesy 5:11]. (Jeffrey R. Holland, “The Atonement of Jesus Christ,” Ensign, mar. 2008, 35)

• Nahoana no ampahany tena nanan-danja tamin’ny drafitry ny Ray any An-danitra ny Fahalavoana?

Ao anatin’io fanontaniana io, azonao atao ny manasa ny mpianatra hanisy marika sy hifanakalo hevitra momba ilay andian-teny hoe “misy ny olona mba hahazo fifaliana” ao amin’ny 2 Nefia 2:25. Afaka mametraka fanontaniana toy ireto manaraka ireto ianao:

Nahoana no zava-dehibe ny mahatakatra fa na dia miatrika ny vokatry ny Fahalavoana aza isika, dia mbola tian’ny Ray any An-danitra hahatsapa fifafliana? Inona no ampianarin’izany anao momba Azy?

Mbola mila fanampiana isika

Na dia ampahany amin’ny drafitry ny Raintsika any An-danitra sy natao hanampiana antsika handroso aza ny vokatry ny Fahalavoana, dia tsy afaka mahatsapa fifaliana marina isika raha tsy misy fanampian’ Andriamanitra.

Azonao atao ny manao lisitra ireo soratra masina eo ambany eny amin’ny solaitrabe ary manasa ny mpianatra handinika azy ireo am-pahanginana sy hisaintsaina tsara azy ireo.

Vakio tsara ny 2 Nefia 2:26, hitadiavana ny maha-azo atao ny hoe mandresy ny vokatry ny Fahalavoana sy mahatsapa fifaliana. Avy eo dia vakio ny Mosesy 5:10–11, hijerena ireo fahamarinana nitarika an’i Adama sy i Eva hifaly.

• Inona no nianaranao?

• Nahoana araka ny hevitrao no nifaly i Adama sy i Eva taorian’ny nahafantarany momba ny Fahalavoana sy ny Sorompanavotan’i Jesoa Kristy?

Rehefa avy mizara ny mpianatra, dia azon’izy ireo atao ny mamerina mijery ireo fanontaniana efatra fanombanan-tena manomboka any amin’ny fanombohan’ny lesona ary hijery ny fahafahan’izy ireo mamaly izany amin’izao fotoana izao. Raha ilaina dia avereno ny tahirin-kevitra rehetra ao amin’ny lesona mba hanampy amin’ny fanazavana ny fahatakaran’izy ireo. Fomba iray hafa hanampiana ny mpianatra hieritreritra ny zavatra nianaran’izy ireo tao amin’io lesona io ny fizarana ity rafi-tantara manaraka ity sy ny fanasana ny mpianatra hizara ny fomba hamalian’izy ireo.

Alaovy sary an-tsaina hoe ao anatina fifanakalozan-kevitra amina namana iray, dia tsikaritrao fa tsy mankasitraka ny Mpamonjy na ny Sorompanavotana nataony izany namana izany.

• Inona no fahalalana momba ny Fahalavoan’i Adama sy i Eva afaka manampy azy hankasitraka ny Mpamonjy sy ny Sorompanavotany?

Hevero ny hitondra ny fijoroanao ho vavolombelona momba ireo fahamarinana nampianarina tamin’ity lesona ity.

Fanamarihana sy fampahalalana voarakitra

Ahoana no tokony hahatsapantsika ny fandraisan’i Eva tamin’ilay voankazo?

Nilaza toy izao ny Filoha Dallin H. Oaks ao amin’ny Fiadidiana Voalohany:

Ny Kristianina sasany dia manameloka an’i Eva tamin’ny zavatra nataony, ka maneho fehin-kevitra fa izy sy ireo zanany vavy dia malemy noho izany. Tsy manao izany ny Olomasin’ny Andro Farany! Raha nahazo fahalalana tamin’ny alalan’ny fanambarana isika, dia mankalaza ny zavatra nataon’i Eva ary midera ny fahendreny sy ny risi-pony tao anatin’ilay fotoan-dehibe antsoina hoe Fahalavoana isika. (Dallin H. Oaks, “The Great Plan of Happiness,” Ensign, nôv. 1993, 73)

Ahoana no ahafahantsika mahita fifaliana ao anatina tontolo mikorontana?

Nampianatra toy izao ny Filoha M. Russell Ballard ao amin’ny Kôlejin’ny Apôstôly Roambinifolo:

Nampianatra i Lehia mpaminany hoe: “Misy ny lehilahy [sy ny vehivavy] mba hahazo fifaliana” [2 Nefia 2:25]. Misy antony maro mahatonga antsika tsy hahazo fiadanana sy fifaliana ary fahasambarana eto amin’ity fiainana ity, ka anisan’izany ny fahantrana, ny ady, ny loza voajanahary, ary ireo fitsapana tsy ampoizina eo amin’ny asa, ny fahasalamana, ary ny fifandraisan’ny mpianakavy.

Kanefa na dia tsy afaka mifehy ireo hery ety ivelany izay misy fiantraikany eo amin’ny fiainantsika eto an-tany ireo aza isika, rehefa miezaka ny ho tonga mpianatra mahatokin’i Jesoa Kristy Tompo, dia afaka mahita fiadanana sy fifaliana ary fahasambarana na dia eo aza ireo olana eo amin’izao tontolo izao izay iainantsika.

… Ry rahalahy sy anabavy, ataovy izay tsara indrindra azonareo atao isan’andro, fa vetivety ihany dia hanjary fantatrareo fa mahafantatra anareo ny Rainareo any An-danitra ary tia anareo Izy. Ary rehefa fantatrareo izany, rehefa tena fantatrareo, dia hanana tanjona sy lanjany marina ny fiainanareo, ary ho feno fifaliana sy fiadanana ianareo. (M. Russell Ballard, “Ny filazantsaran’i Jesoa Kristy izay marina sy madio ary tsotra,” Liahona, mey 2019, 28)

Nilaza toy izao ny Filoha Russell M. Nelson:

Ry rahalahy sy anabaviko malala, misy ifandraisany amin’ny toe-javatra mitranga eo amin’ny fiainantsika ilay fifaliana tsapantsika ary tena mifandray amin’ny fifantohan’ny fiainantsika izany.

Rehefa ny drafitry ny famonjen’ Andriamanitra … sy i Jesoa Kristy ary ny filazantsarany no ifantohan’ny fiainantsika dia afaka mahatsapa fifaliana isika na inona na inona zava-mitranga—na tsy mitranga—eo amin’ny fiainantsika. Tonga avy Aminy sy noho ny Aminy ny fifaliana. Izy no loharanon’ny fifaliana rehetra. Tsapantsika izany amin’ny vanim-potoan’ny Krismasy rehefa hiraintsika ny: [-Oh! Quel bonheur- Cantiques, no. 123]. Ary tsapantsika mandritra ny taona izany. Ho an’ny Olomasin’ny Andro Farany dia i Jesoa Kristy no fifaliana! (Russell M. Nelson, “Fifaliana sy fahavelomana ara-panahy,” Ensign na Liahona, nôv. 2016, 82)

Ireo asa fanampiny atao ao anatin’ny fianarana

Fanombohana ny lesona hafa

Hevero ny hanasa mpianatra vitsivitsy hizara ny zavatra ilain’ny olona iray atao mba hahatakarany sy hankasitrahany zavatra samihafa toy ny zavakanto, ny vatan’izy ireo, na ny ray aman-drenin’izy ireo. Avy eo dia asao hizara ny zavatra ilain’ny olona iray atao mba hahatakarany sy hankasitrahany ny Sorompanavotan’i Jesoa Kristy ny mpianatra.

2 Nefia 2:25. Mahita fifaliana eto amin’ity fiainana ity

I Lehia dia nampianatra fa tian’ny Tompo hahatsapa fifaliana isika eto amin’ity fiainana ity. Hevero ny hanampy ny mpianatra hijery io fahamarinana io ao amin’ny 2 Nefia 2:25. Mba hanampiana azy ireo hahita fomba ahitana fifaliana, dia asao izy ireo hikaroka ny lahateny hoe “Ka ho tanteraka ny fifalianareo” nataon’ny Filoha Jean B. Bingham, Filohan’ny Fikambanana Ifanampiana Maneran-tany (Liahona, nôv. 2017, 85–87). Azonao atao ny mizara ny kilasy ho vondrona telo ary hanendry ny vondrona tsirairay hamaky ny iray amin’ireo soso-kevitra telo narosony hitadiavana fifaliana. Avy eo dia ifanakalozy hevitra ny zavatra novakin’ny mpianatra ary asao izy ireo hanao drafitra hanaovana asa amim-pinoana amin’ny zavatra nianaran’izy ireo. (Fanamarihana: Mety hanana fahafahana hafa handalinana momba ny fitadiavana fifaliana eo amin’ity fiainana ity ny mpianatra rehefa mandalina 2 Nefia 3–5.)

Horonan-tsary mety ho azo atao

Raha mety hanampy dia alefaso ilay horonan-tsary hoe “[Fahamarinana,] fitiavana, famindrampo, no tafaraka soa” manomboka eo amin’ny kaodim-potoana 0:16 hatramin’ny 6:30. Ao amin’io horonan-tsary io, ny Loholona Jeffrey R. Holland ao amin’ny Kôlejin’ny Apôstôly Roambinifolo dia milaza tantara ana zazalahy iray izay namonjy ny ain’ny rahalahiny teo am-pianihana haram-bato. Ampitahain’ny Loholona Holland amin’ny filantsika ny Sorompanavotan’i Jesoa Kristy izany.