2 Nefia 2:26–30

Afaka misafidy

Mandritra ny fiainanao dia hiatrika safidy ianao. Ny sasany amin’ireo safidy ataonao dia hisy vokany maharitra ary indraindray aza mandrakizay. Nampianatra i Lehi noho i Jesoa Kristy, ny olon-drehetra dia “afaka […] hifidy ny fahafahana sy ny fiainana mandrakizay” na “ny fahababoana sy ny fahafatesana” (2 Nefia 2:27). Ity lesona ity dia afaka manampy ny mpianatra hampiasa ny fahafahany misafidy hanaraka an’i Jesoa Kristy.

Mahafantatra ny toe-javatra misy eo amin’ny mpianatra tsirairay. Ny mpianatra rehetra dia manana zavatra niainana sy fifandraisana samy hafa izay misy fiantraikany amin’ny fiheverany sy fahatsapany ireo fahamarinana ara-pilazantsara. Katsaho ny hahatakatra ny mpianatra tsirairay sy ny toe-javatra nandalovan’izy ireo. Rehefa manomana sy mampianatra lesona ianao, dia eritrereto ireo karazan-javatra miovaova izay mety hisy fiantraikany amin’ny fomba fihetsiky ny mpianatra.

Fiomanan’ny mpianatra: Asao ny mpianatra mba hamaky ny 2 Nefia 2:27 ary hihevitra am-bavaka ny hoe safidy inona eo amin’ny fiainan’izy ireo no manampy azy ireo hanakaiky kokoa ny Mpamonjy sy handray ireo fitahiana omeny. Asao ihany koa izy ireo hihevitra ny safidy rehetra azon’izy ireo ovana.

Sahanasa fianarana azo atao

Manao safidy

Soraty eny amin’ny solaitrabe ity lisitra manaraka ity: Asao ny mpianatra hifanakalo hevitra tsiroaroa, na ao anatin’ny vondrona kely, na miaraka amin’ny iray kilasy.

Hevero ny antony mahatonga ny olona samy hafa mety hanapa-kevitra ny hanao na tsy hanao ireto manaraka ireto:

• mivavaka tsy tapaka

• mandeha any am-piangonana

• mibebaka

• mankatò ny Tenin’ny Fahendrena

• mamela heloka

Diniho ireo antony manokana isafidiananao ny hanao na tsy hanao ireo asa ireo. Mieritrereta ihany koa didy hafa tafiditra ao amin’ny filazantsaran’i Jesoa Kristy. Rehefa mandalina ity lesona ity ianao dia katsaho ny fanampian’ny Fanahy Masina hampitomboana ny fahatakaranao ny maha-zava-dehibe ny fampiasana ny fahafahanao misafidy araka ny fomba izay tian’ny Tompo ampiasanao izany sy ny fomba tianao hivoarana.

Afaka misafidy

Talohan’ny nahafatesany ny mpaminany Lehi dia nampianatra ny fianakaviany mikasika ireo ampahany manan-danja ao amin’ny drafitry ny famonjen’ny Ray any An-danitra. Ny fampianarany dia nahitana ny Fahalavoana, ny Sorompanavotan’ny Mpamonjy ary ny fahafahana misafidy.

Vakio ny 2 Nefia 2:26, hitadiavana ny zavatra nampianarin’i Lehia momba ireo ampahany telo ireo.

• Inona no nianaranao?

  Rehefa mizara ny mpianatra, dia mety ilaina ny manantitrantitra ilay andianteny hoe “avotana amin’ny fahalavoana izy” sy ny manontany ny zavatra tadidin’izy ireo momba ny Fahalavoana.

• Ahoana no mahatonga ny Fahalavoana sy ny Sorompanavotan’ny Mpamonjy hahafahantsika manana fahafana misafidy?

Vakio ny 2 Nefia 2:27. Manaova kisary tsotsotra hanehoana ny zavatra ampianarin’ilay andininy, na fintino amin’ny teninao manokana izany.

Asao ireo mpianatra mba hizara ny sary nataony sy ny fomba namintinany an’ilay andininy. Afaka mifampizara tsiroaroa, na ao anatin’ny vondrona kely, na miaraka amin’ny iray kilasy ny mpianatra.

Ny 2 Nefia 2:27 dia andinin-tsoratra masina fifehezana fotopampianarana. Hevero ny hanisy marika ireo andalan-tsoratra masina fifehezana fotopampianarana amin’ny fomba miavaka mba hahafahanao mahita azy ireny mora foana. Ao amin’ny lesona manaraka ianao dia hanana fahafahana hamerimberina fampiharana ny fotopampianarana nampianarina tao amin’io andininy io amina fanontaniana na toe-java-misy iray.

Hevero ny hanao kisary eny amin’ny solaitrabe tahaka ity anankiray aseho eto ambany ity, na mampiasà iray hafa izay noforonin’ny mpianatra. Ampiasao ilay sary rehefa mamaly ireto fanontaniana manaraka ireto ny mpianatra: Azonao tonga dia indray aseho ilay kisary manontolo, na azonao atao ny mampiseho ny tapany ambony aloha ary avy eo dia ampidiro ilay tapany ambany rehefa mifanakalo hevitra amin’ny fanontaniana fahatelo sy fahefatra.

Fomba iray hanehoana io andininy io ity manaraka ity:

Fomba iray mety hahafahanao mamintina ny fampianaran’ny Mpamonjy ao amin’ny andininy 27 ny hoe afaka misafidy fahafahana sy fiainana mandrakizay amin’ny alalan’i Jesoa Kristy isika na misafidy fahababoana sy fahafatesana.

Mariho fa tena eo ambonin’ilay efajoro mitondra ny lohateny hoe “Afaka Misafidy” no manomboka mifanakaiky ny tsilo. Ny olona sasany dia mety hahatsapa fa ny fampiharana ny fahafahantsika misafidy ny hanaraka an’i Jesoa Kristy dia mametra ireo safidintsika ary manala ny fahafahantsika raha ny marina.

• Nahoana no mety hahatsapa ny olona sasany fa ny fanarahana an’i Jesoa Kristy dia mametra ny fahafahantsika?

Mariho ny fomba anehoan’ilay kisary fa rehefa manaraka an’i Jesoa Kristy isika dia misokatra malalaka kokoa ireo tsilo. Ny tena marina, ny fanarahana an’i Jesoa Kristy dia manome antsika safidy bebe kokoa sy fahafahana lehibe kokoa.

• Amin’ny fomba ahoana no mahatonga ny fanarahana an’i Jesoa Kristy hitondra antsika mankany amin’ny fahafahana?

Mariho fa amin’ny ilan’ilay kisary, ireo tsilo dia manomboka misaraka lavitra ary avy eo dia mifanakaiky indray.

• Nahoana no mety hahatsapa ny olona sasany fa ny tsy fankatoavana an’i Jesoa Kristy dia mitarika antsika hanana fahafahana?

• Amin’ny fomba ahoana no mahatonga ny tsy fankatoavana an’i Jesoa Kristy hitondra mankamin’ny fahababoana?

Nampianarin’ny Loholona D. Todd Christofferson, ao amin’ny Kôlejin’ny Apôstôly Roambinifolo ny antony mahatonga ny tsy fankatoavana mitondra mankamin’ny fahababoana:

I Satana … dia manome vahana ny fitondran-tena sy safidy izay mametra ny fahafahantsika misafidy amin’ny alalan’ny fanoloany ny hery mitariky ny Fanahy Masina amin’ny fifehezany (jereo ny F&F 29:40; 93:38–39). Ny fileferana amin’ireo fakampanahiny dia mampihena hatrany ny karazana safidy azo atao, mandrapahatonga izany ho tsy misy intsony sy amin’ny fiankinan-doha izay mahatonga antsika ho tsy manana hery hanoherana izany intsony. (D. Todd Christofferson, “Moral Agency,” Ensign, June 2009, 49)

.

Hevero ny hanasa ny mpianatra hizara tantara maneho ny fitsipika izay hitan’izy ireo.

Vakio ny 2 Nefia 2:28–30, ary makà minitra vitsy hisaintsainana ny fomba isafidiananao hampihatra ny fahafahanao misafidy.

Eritrereto ny valinteny izay homenao amin’ireto fanontaniana manaraka ireto:

• Ahoana no mahatonga ny safidinao hanaraka an’i Jesoa Kristy hitarika anao any amin’ny fahafahana sy fiainana mandrakizay? Ahoana no hitahian’ny Tompo anao noho reo ezaka ataonao?

• Amin’ny fomba ahoana no mety hahatonga ireo safidinao sasantsany mitondra anao ho any amin’ny fahababoana? Inona no mety ho dingana voalohany ataonao hiovana? Amin’ny fomba ahoana no mety hanampian’ny Tompo anao?

Omeo toky ny mpianatra fa izay rehetra mety ho safidy tsy dia nety loatra efa nataon’izy ireo dia azo resena amin’ny alalan’ny finoana an’i Jesoa Kristy sy ny fibebahana. Mijoroa ho vavolombelona momba ny Mpamonjy sy ny Sorompanavotany ary ny fahaizany manatanjaka antsika hanao ireo safidy izay hitarika amin’ny fahasambarana sy fiainana mandrakizay. Raha ilaina, dia mety hanampy ny fampahatsiahivana ny mpianatra fa ny evekan’izy ireo na filohan’ny sampana misy azy ireo dia manana fanalahidin’ny fisoronana hanampiana ny olona rehetra hiverina amin’ny làlan’ny fanekempihavanana.

Fanamarihana sy fampahalalana voarakitra

Nahoana no tokony hiezaka mafy hanao safidy tsara aho raha toa ny hafa manodidina ahy manao safidy ratsy?

“Tompon’andraikitra amin’ny safidy ataonao ianao. Mahafantatra anareo Andriamanitra ary hanampy anareo hanao safidy tsara Izy, na dia mampiasa ny fahafahany misafidy amin’ny fomba tsy mety aza ny fianakavianareo sy ireo namanareo. Manàna herimpo hijoro amin’izay inoanareo amin’ny fankatoavana ny sitrapon’ Andriamanitra, na dia voatery mijoro irery aza ianareo. Raha manao izany ianareo dia mampiseho ohatra hoharahin’ny hafa.

“Na dia afaka misafidy ny lalana tianao haleha aza ianao dia tsy afaka misafidy kosa ny vokany. Na tsara ireo vokatra ireo na ratsy dia manaraka toy ny vokatra tonga ho azy avy amin’ny safidy nataonao izy ireo” (Ho zatovo mahery! [kiboky, 2011], 2).

Nahoana ny fananana fahafahana misafidy sy ny fahafantarana ny fomba fampiasana izany no manan-danja Ray any An-danitra sy i Jesoa Kristy?

Nanazava ny Loholona D. Todd Christofferson ao amin’ny Kôlejin’ny Apôstôly Roambinifolo hoe:

Ny fampiasana ny fahafahantsika misafidy mba hisafidianana ny sitrapon’ Andriamanitra, ka tsy hitakemotra na dia mihasarotra aza izany, dia tsy hahatonga antsika ho saribakolin’ Andriamanitra; fa hahatonga antsika ho tahaka Azy. Nomen’ Andrimanitra fahafahana misafidy ianao, ary nasehon’i Jesoa Kristy antsika ny fomba fampiasana izany mba hahafahantsika any amin’ny farany mianatra ny zavatra hain’ Izy Ireo, manao izay nataon’ Izy Ireo ary ho tonga tahaka Azy Ireo. (D. Todd Christofferson, “Moral Agency,” Ensign, June 2009, 53)

Nahoana no manome didy antsika ny Tompo sy manasa antsika hampiasa ny fahafahantsika misafidy hitandremana azy ireny?

Niteny ny Loholona Robert D. Hales (1932–2017) ao amin’ny Kôlejin’ny Apôstôly Roambinifolo hoe:

Ny didy dia sady tsy enta-mavesatra no tsy faneriterena. Ny didy tsirairain’ny Tompo dia nomena mba hampivelatra, hampandroso ary hampitombo antsika. Nampianatra toy izao ny Mpaminany Joseph Smith: “Mamolavola ny fahasambarantsika Andriamanitra. … Tsy hanorina na hanome ôrdônansy na didy ho an’ny olona mihitsy Izy, raha tsy efa voakajy amin’ny maha ôrdônansy na didy izany mba hanatsara izany fahasambarana novolavolainy izany” (Enseignements du Prophète Joseph Smith, sel. Joseph Fielding Smith [1976], 256). (Robert D. Hales, “If Thou Wilt Enter into Life, Keep the Commandments,” Ensign, mey 1996, 36)

Sahanasa fianarana fanampiny

2 Nephi 2:26–27. Afaka manavotra ny zanak’olombelona i Jesoa Kristy

Mety misy mpianatra na olona fantany manao safidy izay mitarika mankany amin’ny fahababoana.

2 Nefia 2:27. Misafidy fahafahana sy fiainana mandrakizay

Ity sahanasa manaraka ity dia afaka manampy ny mpianatra hisaintsaina ny fitsipika hita tao amin’ny lesona sy ny fomba ahafahan’izy ireo mampihatra izany.

Asao hamorona rafi-tantara momba ny olona iray mila miova ny mpianatra.

Hevero ny hametraka fanontaniana toy izao: Inona no ho asainao ataon’io olona io mba hahafahany miova? Inona no fahafahana hoentin’ireo safidy ireo? Ahoana no ahafahan’io olona io mikatsaka fanampiana avy amin’ny Mpamonjy? Amin’ny fomba ahoana no mety hahafahan’ny Mpamonjy manampy? Ahoana no mety hikatsahan’i Satana hanakivy na hisakana io olona io tsy hiova? Ahoana no mety handresen’io olona io ny ezaka ataon’i Satana?

Rehefa vitan’ny mpianatra izany dia asao izy ireo hisaintsaina ny zavatra mety hilainy ovaina. Azo ampiasaina ihany koa ireo fanontaniana ireo mba hahafahan’ireo mpianatra handinika ny momba azy ireo manokana.