2 Nefia 3

“Mpahita nofinidy iray no hatsangako”

Ny Toko 3 amin’ny 2 Nefia dia mirakitra ireo hafatra farany nataon’i Lehia tamin’i Josefa faralahiny talohan’ny nahafatesany. Talohan’ny nahafatesany, i Lehia dia nilaza faminaniana nataon’i Josefa tany Egypta tany ho any amin’ny 1700 taona talohan’ny nahaterahan’i Kristy. Alaovy sary an-tsaina ny fahagagan’i Joseph Smith rehefa nahita fa izy no noresahan’ny ankabeazan’ny faminaniana nataon’i Josefa tany Egypta. Ny tanjon’ity lesona ity dia ny hanampiana ny mpianatra hampahalalina ny fijoroana ho vavolombelon’izy ireo momba ny antso masina ananan’ny Mpaminany Joseph Smith.

Mampianatra ny soratra masina sy ireo teny faminaniana am-paharesen-dahatra sy amin’ny alalan’ny tanjona. Ny soratra masina sy ireo tenin’ny mpaminany sy apôstôlin’ny andro farany dia loharanom-pahamarinana. Makà antoka fa mifototra amin’ny soratra masina sy ny tenin’ny mpaminany ny zavatra rehetra ampianarinao. Ny fampianarana fahamarinana dia hanasa ny Fanahy Masina ho ao amin’ny efitrano fianarana.

Fanomanana ny mpianatra: Asao ny mpianatra mba hamaky na hijery ny lahatenin’ny Loholona Neil L. Andersen “Joseph Smith,” avy amin’ny fihaonambe maneran-tany tamin’ny ôktôbra 2014 (Liahona, nôv. 2014, 28–31), ary hitady ny antony maha-zava-dehibe ny fananana fijoroana ho vavolombelona manokana fa nantsoin’ Andriamanitra i Joseph Smith.

Sahanasa fianarana azo atao

Mariho fa ity lesona ity dia mifantoka amin’ny iraka masina nataon’i Joseph Smith. Ity lesona ity dia hiresaka momba ny anjara asan’ny soratra masina araka ny voalaza ao amin’ny 2 Nefia 3:12.

Ireo Josefa efatra

Misafidiana iray amin’ireto manaraka ireto: Azonao atao ny mampiseho ireto sary sy andinin-tsoratra masina manaraka ireto, afangaroy izany mba tsy hilahatra ary asao ireo mpianatra mba hampifandray ireo andinin-tsoratra masina amin’ny sary mifanaraka amin’izany. Na asehoy miaraka ireo soaratra masina miaraka amin’ireo andininy mifandray aminy ary asao ireo mpianatra hamantatra hoe iza ireo olona resahina ao ireo. Amporisiho ireo mpianatra mba hanoratra ireo anarana ao amin’ny soratra masin’izy ireo manokana.

Olona efatra voalaza ao amin’ny 2 Nefia 3 no mitovy anarana daholo. Vakio ho an’ny sary tsirairay ny andininy ary fantaro hoe iza no asehon’ireo sary efatra ireo.

2 Nefia 3:3; 2 Nefia 3:4; 2 Nefia 3:11; 2 Nefia 3:15

Ataovy azo antoka hoe azon’ny mpianatra fa ireo sary ireo dia maneho an’i (1) Josefa zanak’i Lehia, (2) Josefa tany Egypta, (3) ny Mpaminany Joseph Smith, ary (4) Joseph Smith rainy, rain’ny Mpaminany.

Ny ankabeazan’ny 2 Nefia 3 dia mifantoka amina faminaniana nataon’i Josefa tany Egypta momba ilay “mpahita” sy ny mpaminany Joseph Smith ary ny iraka ataony amin’ny andro farany.

Ny Filoha Brigham Young (1801–77) dia nanao izao fanambarana manaraka izao momba ny fanomanan’ny Tompo ny iraka hataon’i Joseph Smith:

“Nambara tany amin’ireo filankevitry ny mandrakizay, ela be mialoha ireo fototra izay nanorenana ny tany, fa i Joseph dia ho lehilahy iray hamoaka ny tenin’ Andriamanitra amin’ny olona sy hahazo ny fahafenoan’ireo fanalahidy sy herin’ny Fisoronan’ny Zanakalahin’ Andriamanitra amin’ny fotoampitantanana farany eto amin’ity izao tontolo izao ity. Ny Tompo dia nanara-maso Azy sy ny Rainy ary ny rain’ny rainy sy ireo taranany miverina hatrany … amin’i Adama. Nanara-maso izany fianakaviana izany sy izany ra izany Izy rehefa nikoriana niala avy teo amin’ny loharano nipoirany nankany amin’ny fahaterahan’io lehilahy io izany. Voatendry mialoha tany amin’ny mandrakizay izy mba hiahy ity fotoampitantanana farany ity. (Enseignements des présidents de l’Eglise: Brigham Young [1997], 96, 343)

• Inona no azon’ireo teny ireo ampianarina antsika momba ny antson’i Joseph Smith?

• Inona no ampianarin’ireo antsika momba ny Tompo?

Ireo faminaniana momba an’i Joseph Smith

Ho an’ity sahanasa manaraka ity, hevero ny hizara ny mpianatra ho tsiroaroa ka hampamaky ny mpianatra iray 2 Nefia 3:6–12 ary ny iray hafa ny 2 Nefia 3:13–15, 24. Ny mpianatra tsirairay izany dia afaka mampianatra ny iray hafa momba ny zavatra hitany. Mety hanampy ny fandehandehanana eran’ny trano ka manampy ny mpianatra izay mety manana fanontaniana momba ireo andininy.

Teo am-piresahana tamin’i Josefa zanany, i Lehia dia nilaza ampahany tamin’ny faminaniana nataon’i Josefa tany Egypta avy amin’ireo takela-barahina (jereo ihany koa ny Dikantenin’i Joseph Smith, Genesisy 50:24–38 [ao amin’ny tovan’ny Dikantenin’i Joseph Smith]). Io faminaniana io dia miresaka betsaka momba ny Mpaminany Joseph Smith amin’ny andro farany. Vakio ny 2 Nefia 3:6–15, 24, dia mariho ireo teny na andianteny izay mampianatra anao momba an’i Joseph Smith. (Mariho fa ny hoe “nateraky ny kibonao” dia manondro ny zanaka na ny taranaka.)

• Inona no hitanao ho miavaka indrindra aminao momba an’i Joseph Smith?

  Hevero ny hanasa ny mpianatra hanoratra eny amin’ny solaitrabe ireo teny na andian-teny izay manaitra azy ireo. Azonao atao ny manondro andianteny eny amin’ny solaitrabe ary mangataka ny mpianatra hizara ny antony maha-manan-danja izany andianteny izany.

• Ahoana no hamintinanao ireo fampianarana momba ny Mpaminany Joseph Smith avy amin’ny zavatra novakinao tao amin’ny 2 Nefia 3?

Fahamarinana iray azontsika ianarana ny hoe natsangan’ny Tompo ny Mpaminany Joseph Smith mba handray anjara amin’ny Famerenana ny filazantsaran’i Jesoa Kristy amin’ny laoniny.

• Nahoana araka ny eritreritrao no manan-danja amintsika ny manana fijoroana ho vavolombelona momba io fahamarinana io?

Nampianatra toy izao ny Loholona Neil L. Andersen avy ao amin’ny Kôlejin’ny Apôstôly Roambinifolo:

Hitombo ireo fanaratsiana atao momba ny Mpaminany Joseph Smith arakaraka ny hanakaikezantsika ny Fiavian’ny Mpamonjy fanindroany. Tsy hihena ny filazana zavatra tsy tena marina sy ny famitahana miharo hafetsena. Hisy olona ao amin’ny fianakaviana sy namana izay hila ny fanampianao. …

Ho an’ireo tanora … fanamby voafaritra mazava tsara no omeko: Ataovy izay hahazoana fijoroana ho vavolombelona ho an’ny tenanao manokana momba ny Mpaminany Joseph Smith. (Neil L. Andersen, “Joseph Smith,” Liahona, nôv. 2014, 30)

Mety ho tsara kokoa raha asaina misaintsaina sy mandinika mangina ny valintenin’izy ireo ho an’ny fanontaniana manaraka ny mpianatra. Azonao atao koa aza ny mangataka azy ireo hanoratra ny valin-teniny ao diary fandalinany.

• Ahoana no fahatsapanao ny fahatokisan-tenanao momba ny antso masin’ny Mpaminany Joseph Smith?

Mety hahazo tombontsoa ireo mpianatra amin’ny fametrahana fanontaniana momba an’i Joseph Smith na momba ny fahazoana fijoroana ho vavolombelona mahakasika ny antso ara-paminaniana nananany. Ny lahatenin’ny Loholona Andersen voatondro ao amin’ny fanomanana ny mpianatra dia mety ho loharano manampy hamaliana ny fanontaniana ananan’izy ireo. Ireo mpianatra izay namaky ilay lahateny tamin’ny fanomanan’izy ireo an’ity lesona ity dia mety ho afaka mamaly ny sasany amin’ny fanontanian’ireo namany.

Mahazo fijoroana vavolombelona momba an’i Joseph Smith

Alaivo sary an-tsaina izao rafi-tantara manaraka izao:

Rehefa nahalala i Marcos namanao fa mpikamban’ Ny Fiangonan’i Jesoa Kristy ho an’ny Olomasin’ny Andro Farany ianao, dia nanomboka namaky momba an’i Joseph Smith tao amin’ny tranonkalan’ny Fiangonana izy. Nanaitra azy ilay fanasana hamantatra izy tenany mihitsy fa i Joseph Smith dia mpaminanin’ Andriamanitra. Rehefa nizara taminao ny sasany amin’ny zavatra ianarany izy, dia nanontany hoe “Ahoana no ahafahantsika mahafantatra ho an’ny tenantsika fa mpaminany i Joseph Smith?”

• Inona no holazainao amin’i Marcos?

Mba hahitana hevitra hafa mahakasika ny fahazoana fijoroana ho vavolombelona fa mpaminanin’ny Tompo i Joseph Smith, dia vakio ny zavatra naroson’ny Loholona Andersen:

Mety ho tonga amintsika tsirairay amin’ny fomba samy hafa ny fijoroana ho vavolombelona momba ny Mpaminany Joseph Smith. Mety ho tonga izany rehefa mandohalika mivavaka ianao ary mangataka amin’Andriamanitra mba hanamafisany fa mpaminany marina izy. Mety ho tonga izany rehefa mamaky ny fitantaran’ny Mpaminany ny Fahitana Voalohany. Mety hitsika ao amin’ny fanahinao ny fijoroana ho vavolombelona iray rehefa mamerimberina mamaky ny Bokin’i Môrmôna ianao. … Mety ho tonga izany rehefa mizara ny ny fijoroanao ho vavolombelona manokana mikasika ny Mpaminany ianao, na rehefa mijoro ao amin’ny tempoly ianao ka mahafantatra fa naverina tamin’ny laoniny teto ambonin’ny tany tamin’ny alalan’i Joseph Smith ny hery masin’ny famehezana. Ho mafy orina amin’ny alalan’ny finoana sy ny hitsimpo ny fijoroanao ho vavolombelona momba ny Mpaminany Joseph Smith. (Neil L. Andersen, “Joseph Smith,” Liahona, nôv. 2014, 30)

.

Afaka ny ho fahafahana tsara hanasana ny mpianatra hizara ny fijoroany ho vavolombelona momba an’i Joseph Smith izany. Azonao atao ny manomana ny mpianatra amin’ny fanasana azy ireo hanoratra ny valin-teniny amin’ny sasany amin’ireto fanontaniana ireto ao amin’ny diary fandalinany. Rehefa vita ny fanoratan’ny mpianatra dia asao izay mazoto hamaky amin’ny iray kilasy. Hevero ny hizaranao ny fijoroanao ho vavolombelona manokana momba an’i Joseph Smith. Mety ho tsara ihany koa ny manampy ny mpianatra hahafantatra fa ny safidy hino ny antso masin’i Joseph Smith dia mendri-piderana na dia tsy tena azo antoka aza. Azo hamafisina amin’ny alalan’ny traikefa ny finoan’izy ireo rehefa mandeha eny ny fotoana.

• Inona no nanampy anao hino fa mpaminany i Joseph Smith?

• Amin’ny fomba ahoana no anampian’ny Mpaminany Joseph Smith anao hahatakatra na hahatsapa momba an’i Jesoa Kristy?

• Inona no azo atao hampahalalina ny fijoroana ho vavolombelona momba ny mpaminany Joseph Smith?

• Ahoana no ahafahan’ny fananana fijoroana ho vavolombelona momba an’i Joseph Smith hisy fiantraikany amin’ny fiainanao?

Fanazavana sy fampahalalana avy amin’ny zava-miseho

Miankohoka amin’i Joseph Smith ve isika?

Ny Loholona Gerrit W. Gong ao amin’ny Kôlejin’ny Apôstôly Roambinifolo dia nampianatra toy izao:

Mitsaoka an’ Andriamanitra ilay Ray mandrakizay isika, sy i Jesoa Kristy Zanany, fa tsy ny Mpaminany Joseph Smith na izay mety ho lehilahy na vehivavy mety maty. (Gerrit W. Gong, “Ny firenena sy ny foko ary ny samy hafa fiteny rehetra,” Liahona, nôv. 2020, 39)

Inona no lazain’ireo mpaminany maoderina momba an’i Joseph Smith?

Nijoro ho vavolombelona ny Filoha Russell M. Nelson hoe:

Fantatro fa i Joseph Smith no mpaminany voatendry mialoha izay nofidin’ny Tompo hanokatra ity fotoampitantanana farany ity. Tamin’ny alalany no namerenana tamin’ny laoniny ny Fiangonan’ny Tompo teto an-tany. Nofehezin’i Joseph tamin’ny rany ny fijoroany ho vavolombelona. Tena tiako izy ary tena omeko voninahitra! (Russell M. Nelson, “Henoy Izy,” Liahona, mey 2020, 92)

Ny Filoha Dallin H. Oaks ao amin’ny Fiadidiana Voalohany dia nijoro ho vavolombelona hoe:

Toy ireo Olomasin’ny Andro Farany mahatoky hafa, dia naoriko teo ambonin’ny fijoroana ho vavolombelona sy ny iraka nataon’ny Mpaminany Joseph Smith ny fiainako. Tamin’ny vakiteny rehetra sy ny fikarohana voalohany nataoko, izaho dia tsy mbola kivy tamin’ny fijoroako ho vavolombelona momba ny antsony ara-paminaniana sy ny famerenana amin’ny laoniny, ary ny filazantsara sy ny fisoronana izay natombok’ Andriamanitra taminy. (Dallin H. Oaks, “Joseph, The Man and the Prophet,” Ensign, mey 1996, 73)

Aiza no ianarako misimisy kokoa momba an’i Joseph Smith?

Ny teny iditra hoe “Joseph Smith” ao amin’ny Torolalana ho an’ny Soratra Masina (topics.ChurchofJesusChrist.org) dia ahitana lahatsoratra sy loharano maro hafa manampy amin’ny fahafantarana misimisy kokoa momba ny fiainana sy iraka nataon’ny Mpaminany Joseph Smith.

.

.

Vakio ny Olomasina: Ny tantaran’ny Fiangonan’i Jesoa Kristy amin’izao andro farany izao, boky 1, Ny fanevan’ny fahamarinana, 1815–1846 (2018).

Sahanasa fianarana fanampiny

2 Nefia 3:8. “Ary Izaho hahatonga azy ho lehibe eo imasoko”

Nilaza ny Tompo fa hahatonga an’i Joseph Smith ho lehibe eo imasony satria hanao ny asan’ny Tompo izy. Mety ho azonao atao ny manasa ny mpianatra hamaky io andininy io ary hitady ny zavatra nahatonga an’i Joseph ho lehibe teo imason’ny Tompo. Hevero ny hifanakalo hevitra amin’ny maha-samy hafa ny hoe lehibe eo imason’ny Tompo sy ny hoe lehibe eo imason’izao tontolo izao. Avy eo dia azonao atao ny manasa ny mpianatra hieritreritra ny fomba ahafahan’izy ireo manaraka ny ohatra nataon’ny Mpaminany Joseph Smith tamin’ny fanaovana ny asan’ny Tompo.

2 Nefia 3:12. Ahoana no iarahan’ny Baiboly sy ny Bokin’i Môrmôna miasa

Ampio ny mpianatra hahatakatra fa ny hoe “ny nateraky ny kibonao” dia manondro ireo taranak’i Josefa tany Egypta, izay hanampy amin’ny fipoiran’ny Bokin’i Môrmôna. Ny nateraky ny kibon’i Joda dia manondro ireo taranak’i Joda izay hanampy amin’ny fipoiran’ny Baiboly. Asao ny mpianatra hitady ny fomba iarahan’ny Baiboly sy ny Bokin’i Môrmôna miasa. Hevero ny hanao lisitry ny zavatra hitan’ny mpianatra eny amin’ny solaitrabe. Azon’ny mpianatra atao ny mifanakalo hevitra amin’ny fomba iarahan’ny Baiboly sy ny Bokin’i Môrmôna miasa mba hanatanteraka ireo tanjona ireo sy mitady ohatra manokana. Ohatra, mety ho azon’ny mpianatra atao ny mampitaha ny Lioka 11:9 sy ny 2 Nefia 4:35, momba ny vavaka, na ny Matio 6:14–15 ary ny Môzià 26:30–31, momba ny famelan-keloka.

2 Nefia 3:13. “Ao amin’ny fahalemeny no hanatanjahana azy”

Azonao atao ny manasa ny mpianatra hamaky ny 2 Nefia 3:13 ary hitady ny zavatra ianaran’izy ireo momba an’i Joseph Smith. Azonao atao ny mametraka fanontaniana toy izao manaraka izao:

• Amin’ny lafiny inona no mety ho niheverana an’i Joseph Smith ho malemy?

• Ahoana no nanatanjahan’ Andriamanitra azy?

• Amin’ny lafiny inona no iheveranao ny tenanao ho malemy?

• Ahoana ny fomba hanatanjahan’ny Tompo anao?