2 Nephi 6; 10

Ang Pagtitipon ng Israel

mga missionary na nakikipagkamay sa lalaki

Maraming propesiya sa mga banal na kasulatan ang may kaugnayan sa mga pangyayari sa mga huling araw, o sa mga araw na nabubuhay tayo ngayon. Ang kapatid ni Nephi na si Jacob ay nagbahagi ng mga propesiya tungkol sa ating panahon at sa pagtitipon ng Israel na makatutulong sa atin na maunawaan ang ating tungkulin sa gawain ng Panginoon sa mga huling araw. Ang lesson na ito ay makatutulong sa iyo na mas hangaring makibahagi sa Panginoon sa pagtitipon ng Israel sa mga huling araw.

Pagkakaroon ng aktibong pakikilahok sa pag-aaral at pagkatuto sa klase. Kung minsan, maaaring angkop na dagdagan ang partisipasyon ng mga estudyante at tumuon sa pamamagitan ng pisikal na aktibidad. Maaari mong tulungan ang mga estudyante na sumali sa pamamagitan ng pagkilos. Halimbawa, ang mga estudyante ay maaaring lumipat ng upuan, magsulat sa pisara, tumayo para magbasa ng banal na kasulatan, o magsadula ng isang kuwento sa banal na kasulatan, atbp.

Paghahanda ng estudyante: Sabihin sa mga estudyante na pumasok sa klase na handang magbahagi ng mga karanasan nila sa pakikibahagi sa pagtitipon ng Israel.

Mga Posibleng Aktibidad sa Pag-aaral

Mahahalagang bagay na nangyayari

Maaari mong ipakita ang mga sumusunod na pahayag ni Pangulong Russell M. Nelson nang paisa-isa, at huminto sandali para mapag-isipan ng mga estudyante ang bawat pahayag bago lumipat sa susunod.

Ang mga sumusunod na sipi ay mula sa isang mensaheng ibinahagi ni Pangulong Russell M. Nelson. Habang binabasa mo ang mga ito, mag-isip ng ilang paksa na maaaring tinutukoy ni Pangulong Nelson.

• “Wala nang ibang nangyayari sa daigdig na ito ngayon mismo na mas mahalaga pa kaysa riyan. … Wala nang ibang mas mahalaga ang bunga. Wala talaga” (Russell M. Nelson at Wendy W. Nelson, “Pag-asa ng Israel” [pandaigdigang debosyonal para sa mga kabataan, Hunyo 3, 2018], SimbahanniJesucristo.org).

• “Ito … ay dapat maging napakahalaga sa inyo” (Russell M. Nelson, “Pag-asa ng Israel”).

• “Ito ang misyon ninyo dito sa lupa” (Russell M. Nelson, “Pag-asa ng Israel”).

• Ano sa palagay mo ang ilan sa mga paksang maaaring tinutukoy ni Pangulong Nelson sa mga pahayag na ito?

Maaaring alam mo na tinutukoy ni Pangulong Nelson ang pagtitipon ng Israel. Panoorin ang “Pag-asa ng Israel” mula sa time code na 39:36–40:05, na matatagpuan sa SimbahanniJesucristo.org, o basahin ang sumusunod upang makita ang kumpletong pahayag ni Pangulong Nelson.

Pangulong Russell M. Nelson

Mga mahal kong mahuhusay na kabataan, ipinadala kayo sa mundo sa panahong ito, sa pinakamahalagang bahagi ng kasaysayan ng mundo, upang tumulong na tipunin ang Israel. Wala nang ibang nangyayari sa daigdig na ito ngayon mismo na mas mahalaga pa kaysa riyan. Wala nang ibang mas mahalaga ang bunga. Wala talaga.

Ang pagtitipon na ito ay dapat maging napakahalaga sa inyo. Ito ang misyon ninyo dito sa lupa. (Russell M. Nelson at Wendy W. Nelson, “Pag-asa ng Israel” [pandaigdigang debosyonal para sa mga kabataan, Hunyo 3, 2018], SimbahanniJesucristo.org)

• Ano ang naiisip o nadarama mo tungkol sa pahayag ni Pangulong Nelson?

• Ano ang mga tanong mo tungkol sa pagtitipon ng Israel?

Isaalang-alang ang mga naiisip at nadarama mo tungkol sa pakikibahagi sa pagtitipon ng Israel, na kinabibilangan ng pangangaral ng ebanghelyo sa mga tao sa mundo ngayon at paggawa ng gawain sa family history at sa templo para sa mga pumanaw nang sa gayon ang lahat ay magkaroon ng pagkakataong lumapit sa Ama sa Langit at kay Jesucristo. Gaano kahalaga ang gawaing ito sa iyo? Sa iyong pag-aaral ngayon, maghanap ng mga turo na makatutulong sa iyo na madagdagan ang iyong kahandaan at kakayahang makibahagi sa Panginoon sa pagtitipon ng Israel.

Nangaral si Jacob tungkol sa pagtitipon ng Israel

Inanyayahan ni Nephi ang kanyang kapatid na si Jacob na magbahagi ng isang mahalagang propesiya mula sa propetang si Isaias sa Lumang Tipan tungkol sa pagtitipon ng Israel sa mga huling araw (tingnan sa 2 Nephi 6:4–7).

Upang matulungan ang mga estudyante na maunawaan ang mga talatang babasahin nila, maaari mong ipakita at basahin ang mga sumusunod na kahulugan at isa o mahigit pang larawan na nagpapakita ng isang pamantayan o sagisag.

• Mga Gentil: Sa pagkakagamit sa mga banal na kasulatan, may ilang kahulugan ang mga Gentil. Sa propesiya ni Isaias (tingnan sa 2 Nephi 6:5–7), isa sa mga kahulugan ng salitang mga Gentil ay maaaring tumukoy sa mga taong hindi kabilang sa angkan ni Israel (Tingnan sa Gabay sa mga Banal na Kasulatan, “Mga Gentil,” https://www.churchofjesuschrist.org/study/scriptures/gs/gentiles?lang=tgl).

• Sagisag: “Isang watawat o bandila kung saan ang mga tao ay nagtitipon sa pagkakaisa ng layunin o pagkakakilanlan” (Gabay sa mga Banal na Kasulatan, “Sagisag,” https://www.churchofjesuschrist.org/study/scriptures/gs/ensign?lang=tgl).

Si Kapitan Moroni at ang Bandila ng Kalayaan

Itaas ang Iyong Bandila

Habang nasasaisip ang mga kahulugang ito, basahin ang 2 Nephi 6:5–7. Ilista sa iyong study journal ang mga detalye ng propesiya ni Isaias na tila mahalaga.

Kung kinakailangan, tulungan ang mga estudyante na matukoy ang mahahalagang detalye mula sa propesiya ni Isaias, tulad ng:

• Ang Diyos ay magtatayo ng sagisag.

• Ang mga Gentil ay kakalungin ang mga anak na lalaki at anak na babae ni Israel sa kanilang mga bisig at papasanin nila sila sa kanilang mga balikat.

• Ang mga hari at reyna ng mga Gentil ang magiging mga tagakandiling ina at ama.

• Anong mga detalye ang nakita mo mula sa propesiya ni Isaias na tila mahalaga?

• Ano pa ang mga tanong mo tungkol sa propesiyang ito?

Kapwa ipinahayag nina Nephi at Jacob ang propesiyang ito sa kanilang mga isinulat. Hangaring mas makaunawa tungkol sa propesiya ni Isaias sa pamamagitan ng pagbabasa ng kahit isa man lang sa mga sumusunod na set ng mga talata. Maaari ding makatulong na i-cross-reference o iugnay ang mga talatang ito sa 2 Nephi 6:5–7.

Maaari mong hatiin ang mga estudyante sa maliliit na grupo, kung saan ang kalahati ng mga grupo ay pag-aaralan ang mga salita ni Nephi, at ang kalahati ay pag-aaralan ang mga salita ni Jacob. Pagkatapos ay sabihin sa mga estudyante na ibahagi ang natutuhan nila mula sa mga talatang pinag-aralan nila.

• 1 Nephi 22:6–12 (Mga salita ni Nephi)

• 2 Nephi 10:3–10 (Mga salita ni Jacob)

• Ano ang itinuro ni Nephi o ni Jacob sa mga talatang ito na mas nakatulong sa iyo na maunawaan ang 2 Nephi 6:5–7? Anong mga karagdagang impormasyon ang nalaman mo?

Ang sumusunod na tatlong tanong ay naglalayong tulungan ang mga estudyante na mas maunawaan ang mga talatang binasa nila. Kung nauunawaan na nila nang mabuti ang scripture passage, maaari mong laktawan ang ikaapat at ikalimang tanong sa ibaba.

• Ano sa palagay ninyo ang “kagila-gilalas na gawain” na magaganap sa mga huling araw na “magiging labis na mahalaga” sa maraming tao (1 Nephi 22:8)? Kung kailangan ng mga estudyante ng tulong upang maunawaan kung ano ang kagila-gilalas na gawain, maaari mong ituro sa kanila ang isang footnote o ipaliwanag na tumutukoy ito sa pagpapanumbalik ng ebanghelyo.

• Ayon sa 1 Nephi 22:12, ano ang malalaman ng mga tao ng nakalat na Israel habang sila ay tinitipon?

• Anong tungkulin ang gagampanan ng mga bansa ng mga Gentil sa pagtitipon ng Israel sa mga huling araw (tingnan sa 1 Nephi 22:8–9; 2 Nephi 10:8–9)?

• Ano ang ipinauunawa sa inyo ng mga turong ito tungkol kay Jesucristo at sa nadarama Niya tungkol sa lahat ng tao?

• Ano ang ipinauunawa sa inyo ng mga ito tungkol sa tungkuling ginagampanan ninyo sa pagtulong na tipunin ang Israel?

Ang isang katotohanan na matututuhan natin mula sa propesiya ni Isaias at sa pahayag ni Pangulong Nelson mula sa naunang bahagi ng lesson ay bilang mga miyembro ng ipinanumbalik na Simbahan ng Tagapagligtas, responsibilidad nating makibahagi sa Panginoon sa pagtitipon ng Israel sa mga huling araw.

• Ano ang ipinauunawa sa inyo ng katotohanang ito tungkol sa nadarama ng Panginoon tungkol sa inyo?

• Ano ang nalalaman ninyo tungkol sa Tagapagligtas na nagpapaibayo ng inyong hangaring magtipon sa Kanya? Paano madaragdagan ng pagbabahagi nito sa iba ang kanilang hangaring magtipon sa Tagapagligtas?

Gumawa ng planong tulungan ang Panginoon na tipunin ang Israel

Inilarawan ni Pangulong Nelson kung ano ang magagawa natin upang makatulong sa pagtitipon ng Israel:

Pangulong Russell M. Nelson

Sa tuwing gumagawa tayo ng kahit ano na makatutulong sa kahit sino—sa magkabilang panig ng tabing—para gawin at tuparin ang kanilang mga tipan sa Diyos, tumutulong tayo na tipunin ang Israel. (Russell M. Nelson, “Hayaang Manaig ang Diyos,” Liahona, Nob. 2020, 92–93)

• Habang nasasaisip ang pahayag ni Pangulong Nelson, ano ang ilang partikular na bagay na magagawa mo upang makibahagi sa Panginoon sa pagtulong sa iba na lumapit sa Kanya?

• Ano ang mga naranasan mo sa pagtulong sa iba na magtipon o mas mapalapit sa Ama sa Langit at kay Jesucristo?

Isipin kung paano mo magagawang mas lubos na makibahagi sa Panginoon sa pagtitipon ng Israel.

Kung may oras pa, maaari kang magbahagi ng isa o mahigit pa sa sumusunod na resources upang matulungan ang mga estudyante na mag-isip ng mga partikular na ideya.

1. Ibinahagi ni Russell M. Nelson ang mga ideyang iminungkahi ng mga kabataan ng Simbahan kung paano sila makatutulong sa pagtitipon ng Israel. Panoorin ang “Pag-asa ng Israel” mula sa timecode na 40:29–43:38, na matatagpuan sa SimbahanniJesucristo.org.

2. share.churchofjesuschrist.org

Gumawa ng plano ng pagkilos para sa magagawa mo upang maanyayahan ang iba na magtipon sa Tagapagligtas, o sa madaling salita, upang lumapit kay Cristo sa pamamagitan ng paggawa at pagtupad ng mga tipan sa Kanya. Tiyaking isama ang mga partikular na hakbang na maaari mong gawin. Tutulungan ka nitong kumilos nang may pananampalataya. Ang isang paraan kung paano mo ito magagawa ay kumpletuhin ang mga sumusunod na pangungusap:

• Sa katapusan ng araw, ako ay

• Sa buong linggong ito, ako ay

Komentaryo at Pinagmulang Impormasyon

Paano natutupad ang propesiya ni Isaias sa 2 Nephi 6:6–7?

Bilang bahagi ng katuparan ng propesiyang ito, ang ebanghelyo ay ipinanumbalik sa Estados Unidos ng Amerika, na isang bansang gentil (tingnan sa Doktrina at mga Tipan 109:60). Ang ipinanumbalik na Simbahan ang “sagisag sa mga tao” ng Panginoon (2 Nephi 6:6), kung saan ang mga tao mula sa lahat ng bansa ay magtitipon sa mga huling araw (tingnan sa 1 Nephi 22:11–12; Isaias 2:2–3; 11:12).

Saan ko pa malalaman ang tungkol sa pagtitipon ng Israel?

Paano kung sinisikap kong tipunin ang Israel sa pamamagitan ng pag-anyaya sa isang tao na gawin ang isang bagay pero hindi nila tinatanggap ang paanyaya ko?

Ipinahayag ni Elder Dieter F. Uchtdorf ng Korum ng Labindalawang Apostol:

Pangulong Dieter F. Uchtdorf

Dapat ninyong maunawaan na hindi ninyo trabaho ang i-convert ang mga tao. Iyan ang papel ng Espiritu Santo. Ang papel ninyo ay ibahagi ang nasa puso ninyo at mamuhay nang naaayon sa inyong pinaniniwalaan.

Kaya, huwag masiphayo kung hindi kaagad tatanggapin ng isang tao ang mensahe ng ebanghelyo. Hindi ninyo ito personal na kabiguan.

Ito ay sa pagitan ng tao at ng Ama sa Langit.

Ang sa inyo ay mahalin ang Diyos at inyong kapwa. (Dieter F. Uchtdorf, “Gawaing Misyonero: Pagbabahagi ng Nasa Puso Mo,” Liahona, Mayo 2019, 17)

Mga Karagdagang Aktibidad sa Pag-aaral

Isang sagisag sa mga bansa.

Maaaring makatulong sa mga estudyante na malaman ang iba pa tungkol sa mga propesiyang may kaugnayan sa ipinanumbalik na ebanghelyo ng Tagapagligtas bilang isang sagisag, o pamantayan, sa mundo. Upang makatulong dito, maaari mong basahin ang ilan o lahat ng sumusunod na banal na kasulatan sa klase: Isaias 5:26; 11:12; 2 Nephi 29:2; Doktrina at mga Tipan 45:9; 64:41–43; 113:5–6.

Maaari mo ring basahin at talakayin ang tungkol kay Brigham Young at iba pang mga naunang lider ng Simbahan na nagtataas ng bandila sa Ensign Peak matapos dumating sa Lambak ng Salt Lake (tingnan sa Mga Banal: Ang Kuwento ng Simbahan ni Jesucristo sa mga Huling Araw, Tomo 2, Walang Kamay na Di Pinaging Banal, 1846–1893 [2020], 75–77).

Hindi tayo mahihiya.

Maaari mong anyayahan ang mga estudyante na isipin kung kailan sila nagkaroon ng iba’t ibang damdamin tungkol sa pagiging miyembro ng Simbahan, tulad ng kagalakan, kaligayahan, pag-aalala, o maging ng kahihiyan. Sabihin sa mga estudyante na basahin ang 2 Nephi 6:7, 12–13, at alamin ang itinuro ng Panginoon tungkol sa madarama ng Kanyang mga anak kung maghihintay sila sa Kanya nang may pananampalataya. Maaaring kantahin ng mga estudyante ang awit sa primary na “Ang Simbahan ni Jesucristo” (Aklat ng mga Awit Pambata, 48) at maaari nilang isipin ang mga katotohanan ng ebanghelyo na tumutulong sa kanila na magtiwala sa pagsunod sa Panginoon at tapat na maghintay sa Kanyang pagbabalik.