2 Nephi 9:50–52

“Lumapit sa Banal ng Israel”

Naranasan mo na bang umasa na magdadala sa iyo ng matinding kasiyahan ang isang bagay pero sa huli ay binigo ka lang nito? Tinapos ni Jacob ang kanyang sermon sa pagpapayo sa mga Nephita na iwasang gumugol ng oras o pera sa mga bagay na hindi magbibigay ng pangmatagalang kasiyahan. Inanyayahan niya sila na lumapit kay Jesucristo at magpakabusog sa mga pagpapala ng ebanghelyo. Ang lesson na ito ay naglalayong tulungan kang makadama ng mas matinding pagnanais na hangarin ang mga pagpapala at kasiyahan na tanging si Jesucristo lamang ang makapagbibigay.

Pagtuturo ng doktrina. Iniutos sa atin ng Panginoon na “turuan ninyo ang isa’t isa ng doktrina ng kaharian” (Doktrina at mga Tipan 88:77). Ang doktrinang ito ay binubuo ng mga walang-hanggang katotohanan, na kapag ipinamuhay, ay humahantong sa kadakilaan. Ang pinakamahalaga sa mga katotohanang ito ay ang tungkulin ni Jesucristo sa plano ng kaligtasan. Ang pagtuturo ng totoong doktrina ay nag-aanyaya sa pagpapatotoo ng Espiritu Santo at makahihikayat sa mga estudyante na sundin ang Tagapagligtas.

Paghahanda ng estudyante: Sabihin sa mga estudyante na mag-isip ng mga pagpiling ginawa nila, mga lugar na napuntahan na nila, o mga bagay na natutuhan nila na nagdala ng pangmatagalang kasiyahan sa kanilang buhay.

Mga Posibleng Aktibidad sa Pag-aaral

Pagpawi sa ating gutom at uhaw

Maaari kang magpakita sa mga estudyante ng ilang tasang puno ng mga bagay na hindi makakapawi ng uhaw ng isang tao, tulad ng toyo, mustard, o syrup. Pagkatapos ay magpakita ng isa pang tasa na puno ng malinis na tubig. Sabihin sa mga estudyante na kunwari ay nauhaw sila at nagkaroon ng pagkakataong uminom mula sa isa lamang sa mga tasang ipinakita mo sa kanila. Sabihin sa kanila na pumili at ipaliwanag ang mga posibleng ibubunga ng kanilang pagpili.

Maaari ka ring gumawa ng demonstrasyon gamit ang mga pagkaing hindi nakakapawi ng gutom ng isang tao, tulad ng asin o maliit na mint, kasama ng mas nakakabusog at masustansyang pagkain, tulad ng prutas.

Marahil ay napansin mo na ang ating mga espiritu, tulad ng ating mga katawan, ay nangangailangan ng pangangalaga at kasiyahan.

• Ano ang ilang paraan na makapagbibigay tayo ng pangmatagalang pangangalaga o kasiyahan sa ating espiritu?

• Ano ang mga bagay na binabalingan ng mga tao para sa kasiyahan na maaaring magpadama sa kanila ng kasalatan sa espirituwal?

• Sa iyong palagay, bakit bumabaling kung minsan ang mga tao sa mga bagay na hindi nagdudulot ng pangmatagalang kasiyahan?

Anyayahan ang mga estudyante na suriin ang sarili nilang buhay sa pamamagitan ng pagbibigay sa kanila ng pagkakataong pag-isipan ang mga sumusunod na tanong.

• May mga bagay ka bang binabalingan para sa kaligayahan at katuparan na hindi lubos na nakatutugon sa mga hangaring iyon? Ano ang nakatulong sa iyo para makadama ka ng pangmatagalang kapayapaan at kaligayahan sa iyong buhay?

• Sa pag-aaral mo ngayon, alamin ang mga katotohanan na makatutulong sa iyo na maranasan ang mga pagpapala at kasiyahan na tanging si Jesucristo lamang ang makapagbibigay.

“Magpakabusog doon sa hindi nawawala”

Alalahanin mula sa pag-aaral mo ng 2 Nephi 9:27–49 na binalaan ni Jacob ang kanyang mga tao laban sa masasamang gawain na ginagawa nila. Pagkatapos ay tinapos ni Jacob ang kanyang mensahe sa isang mahalagang paanyaya.

Basahin ang 2 Nephi 9:50–52, at alamin ang paanyaya ni Jacob sa kanyang mga tao.

• Ano ang ilang salita o parirala mula sa mga talatang ito na sa palagay mo ay mahalaga? Bakit?

• Ano ang ipinauunawa sa iyo ng mga talatang ito tungkol sa mga hangarin ni Jesucristo para sa atin? Ano ang itinuturo nito sa iyo tungkol sa iniaalok Niya sa atin?

Sabihin sa mga estudyante na tumukoy ng mga katotohanan mula sa mga turo ni Jacob. Maaari silang makatukoy ng isang katotohanan na katulad ng sumusunod. Maaari mong isulat sa pisara ang katotohanang ito.

Ang isang katotohanan na matututuhan natin mula sa mga talatang ito ay kapag lumapit tayo kay Jesucristo, masisiyahan ang ating mga kaluluwa.

Paggamit ng mga cross-reference upang palalimin ang iyong pag-unawa

Ang paghahanap ng mga scripture passage na nauugnay sa pinag-aaralan mo ay maaaring makatulong upang mapalalim ang iyong pag-unawa at pagpapahalaga sa kung ano ang nasa mga banal na kasulatan.

Gawin ang kasanayang ito sa pamamagitan ng paghahanap ng mga cross-reference na may kaugnayan sa mga turo sa 2 Nephi 9:50–52.

Maaari mong gawin ang prosesong inilarawan sa sumusunod na dalawang talata bilang isang klase, iguhit ang diagram sa pisara, at sama-samang maghanap ng isa o dalawang cross-reference. Ang isang nakatutulong na cross-reference na maaari mong banggitin sa mga estudyante ay ang Alma 5:33–34. Pagkatapos ay maaaring pagpartner-partnerin ang mga estudyante o hatiin sila sa maliliit na grupo para sama-samang maghanap ng mga cross-reference.

Maaari kang gumawa ng diagram na katulad ng sumusunod sa iyong study journal at isulat ang “2 Nephi 9:50–52” sa gitnang bilog. Kapag nakahanap ka ng mga kaugnay na banal na kasulatan na gusto mong tandaan, maaari mong isulat ang mga reperensya sa iba pang mga bilog.

Ang unang hakbang mo sa paghahanap ng mga cross-reference ay hanapin ang mga reperensyang banal na kasulatan at paksa na nakalista sa mga footnote. Pagkatapos, isiping tukuyin ang mahahalagang salita mula sa 2 Nephi 9:50–52 at saliksikin ang mga salita o mga kaugnay na salitang iyon sa Gabay sa mga Banal na Kasulatan, o sa search function sa Gospel Library.

Narito ang ilang salita o parirala na maaari mong hanapin: lumapit; tubig na buhay; nakasisiya; makinig; magpakabusog; panalangin; pasasalamat; magsaya.

Matapos ang sapat na oras na makahanap ang mga estudyante ng mga cross-reference, anyayahan ang ilang boluntaryo na ibahagi ang isa sa mga banal na kasulatan na partikular na makabuluhan sa kanila. Sabihin sa mga estudyante na ipaliwanag kung paano napalawak ng cross-reference na iyon ang kanilang naunawaan sa mga turo sa 2 Nephi 9:50–52. Maaari mong idagdag ang mga reperensyang banal na kasulatan na ibabahagi ng mga estudyante sa diagram sa pisara.

Pagpapamuhay ng natutuhan mo

Isipin ang natutuhan mo tungkol kay Jesucristo ngayon at kung paano ka mapagpapala ng mga turong ito sa iyong kasalukuyang sitwasyon.

Upang matulungan ang mga estudyante na maproseso ang natutuhan nila sa lesson ngayon, maaari mong ipakita ang mga sumusunod na tanong at sabihin sa mga estudyante na isulat ang kanilang mga sagot sa kanilang study journal.

• Ano ang natutuhan o nadama mo tungkol kay Jesucristo ngayon na gusto mong matandaan?

• Paano magbibigay ng pangmatagalang kasiyahan sa iyong kaluluwa ang pagpiling sundin si Jesucristo?

• Ano ang ilang partikular na pagpiling magagawa mo na maghahatid sa iyong buhay ng pangmatagalang kasiyahan na matatamo sa pamamagitan ni Jesucristo?

Anyayahan ang ilang boluntaryo na ibahagi sa klase ang ilan sa kanilang mga sagot. Patotohanan ang mga katotohanang tinalakay ninyo ngayon. Hikayatin ang mga estudyante na suriin ang kanilang buhay at mag-isip ng mga pagbabagong magagawa nila na makatutulong sa kanila na maranasan ang kaligayahan, kapayapaan, at kasiyahan na nagmumula sa pagsunod kay Jesucristo.

Komentaryo at Pinagmulang Impormasyon

2 Nephi 9:50–51. Ano ang ibig sabihin ni Jacob nang sabihin niyang bumili “nang walang salapi at walang bayad”?

Lahat ng tao ay makatatanggap ng mga pagpapalang ibinibigay ni Jesucristo, anuman ang kanilang pinansiyal na sitwasyon o anupamang kwalipikasyon sa mundo. Bagama’t ang mga pagpapalang ito ay hindi nangangailangan ng pisikal na pera, may dapat tayong gawin upang matamo ang mga ito. Saan ko pa malalaman ang tungkol sa pagtitipon ng Israel?

Itinuro ni Elder Jeffrey R. Holland ng Korum ng Labindalawang Apostol:

Kapag ipinagagawa sa atin ang mahihirap na bagay, maging ang mga bagay na salungat sa mga hangarin ng ating puso, alalahanin na ang katapatang ipinangako natin sa layunin ni Cristo ang dapat na maging pinakamahalaga sa ating buhay. Bagama’t tinitiyak sa atin ni Isaias na matatamo ito “nang walang salapi at walang bayad” [Isaias 55:1]—at totoo ito—kailangan tayong maging handa, sabi nga ni T. S. Eliot, upang maibigay “ang lahat ng mayroon tayo” [“Little Gidding,” sa T. S. Eliot: Collected Poems, 1909–1962 (1963), 209]. (Jeffrey R. Holland, “Ang Pinakamahalagang Pag-aari,” Liahona, Nob. 2021, 9)

Itinuro ni Pangulong Marion G. Romney (1897–1988) ng Unang Panguluhan:

Kapag tapos na ang buhay sa mundo at makikita ang mga bagay-bagay kung ano talaga ang mga ito, mas malinaw nating makikita at mauunawaan ang paulit-ulit na sinasabi sa atin ng Panginoon at ng kanyang mga propeta, na ang mga bunga ng ebanghelyo ang tanging layunin na karapat-dapat na lubos na pagsikapan sa buhay. Ang nagmamay-ari ng mga ito ay nagtatamo ng tunay na kayamanan—kayamanan ayon sa pananaw ng Panginoon sa mga pinahahalagahan. (Marion G. Romney, sa Conference Report, Okt. 1949, 39)

Paano naiiba ang iniaalok sa atin ni Jesucristo sa mga kasiyahan ng mundo?

Itinuro ni Elder Ulisses Soares ng Korum ng Labindalawang Apostol:

Lahat ng tao ay may hinahanap na isang bagay. Sa kanilang sariling paraan, ang tunay na hinahanap nila ay ang kaligayahan. Gayunman, katulad ng katotohanan, marami ang napagkaitan ng kaligayan “sapagkat hindi nila alam kung saan ito matatagpuan” (Doktrina at mga Tipan 123:12).

Dahil hindi nila alam kung saan mahahanap ang tunay at tumatagal na kaligayahan, hinahanap nila ito sa mga bagay na sa totoo lang ay naghahatid lang ng panandaliang aliw—pagbili ng mga bagay, paghangad ng karangalan at papuri ng mundo sa pamamagitan ng mga di-wastong asal, o pagtutuon sa pisikal na kagandahan at kariktan.

Ang aliw ay kadalasang inaakalang kaligayahan. Tila habang mas hinahangad ng mga tao ang panandaliang aliw, mas nalulungkot sila. Kadalasan, tumatagal lang nang sandali ang aliw. (Ulisses Soares, “Mga Landas patungo sa Tunay na Kaligayahan,” Liahona, Abr. 2018, 14)

Mga Karagdagang Aktibidad sa Pag-aaral

Kung gusto mong mag-ukol ng ilang oras sa pag-aaral ng mga turo ni Jacob sa 2 Nephi 10, maaaring makatulong ang mga sumusunod na ideya.

2 Nephi 10:20. “Hindi tayo itatakwil”

Mula sa pahina ng pamagat ng Aklat ni Mormon, nalaman natin na isa sa mga layunin ng aklat ay tulungan ang mga miyembro ng sambahayan ni Israel na malaman na “sila ay hindi itatakwil nang habang panahon.” Maaari mong basahin ang 2 Nephi 10:20 kasama ng mga estudyante at itanong ang tulad ng mga sumusunod:

• Ano ang maaaring maging dahilan para madama ng isang tao na “itinakwil” siya mula sa mga pagpapala ng Panginoon?

• Bakit kaya pinayuhan ni Jacob ang kanyang mga tao na huwag iyuko ang kanilang mga ulo?

Sabihin sa mga estudyante na suriin ang 2 Nephi 10:1–22. Maaari silang maghanap ng katibayan ng awa ng Panginoon at kung paano Niya sila maibabalik kapag nadarama nilang itinakwil sila.

2 Nephi 10:23–25. “Makipagkasundo kayo sa kalooban ng Diyos”

Ipaalala sa mga estudyante na bilang bahagi ng kanyang sermon sa 2 Nephi 9, nagsalita si Jacob sa ilan sa mga Nephita na nahulog sa pagkakasala (tingnan sa 2 Nephi 9:27–49). Sabihin sa kanila na basahin ang 2 Nephi 10:23–25, at alamin kung ano ang hamon ni Jacob sa mga Nephita na gawin nila.

Maaaring makatulong sa mga estudyante na mas maunawaan na ang isang kahulugan ng salitang makipagkasundo ay pagkaisahin o pagkasunduin ang mga tao o ang mga bagay-bagay.

Maaari mong anyayahan ang mga estudyante na isipin kung bakit kailangan tayong makipagkasundo sa kalooban ng Diyos kapag nagkasala tayo at ano ang magagawa natin upang makipagkasundo sa kalooban ng Diyos.