2 Nephi 16

“Banal, Banal, Banal, ang Panginoon”

Nagkaroon ka na ba ng karanasan na mahirap ilahad sa mga salita? Maaaring totoo iyan kay Isaias nang isulat niya ang tungkol sa pagkakita niya sa Panginoon sa lahat ng Kanyang kaluwalhatian. Upang makatulong na maiparating ang karanasang ito, gumamit si Isaias ng simbolikong pananalita upang ilarawan ang kapangyarihan at kabanalan ng Panginoon at ang nadaramang sariling kakulangan ni Isaias. Nilinis siya ng Panginoon mula sa kanyang mga kasalanan at tinawag siya na maging propeta. Ang lesson na ito ay makatutulong sa iyo na matukoy ang kakayahan ng Panginoon na patawarin at linisin ka.

Pagtulong sa mga estudyante na maunawaan ang mahihirap na talata sa banal na kasulatan. Ang pagtuturo sa mga estudyante ng kontekstong pangkasaysayan o kultura gamit ang mga diksyunaryo, manwal ng estudyante, at iba pang mga tulong sa pag-aaral ng mga banal na kasulatan ay maaaring magbunsod ng higit na pag-unawa sa mga salita at simbolo sa banal na kasulatan. Hikayatin ang mga estudyante na maging matiyaga at humingi ng tulong sa Panginoon habang hinahangad nilang maunawaan ang Kanyang salita.

Paghahanda ng estudyante. Sabihin sa mga estudyante na pag-isipan ang sumusunod na tanong: Ano ang nais ng mapagmahal na Diyos na maunawaan natin kapag sa palagay natin ay hindi tayo nakasasapat?

Mga Posibleng Aktibidad sa Pag-aaral

Ang kapangyarihan at kaluwalhatian ni Jesucristo

May ilang propeta at iba pa na nagkaroon ng pribilehiyong makita si Jesucristo sa lahat ng Kanyang kagila-gilalas na kaluwalhatian.

• Ano ang ilang dahilan kung bakit dinalaw ng Panginoon ang iba’t ibang tao sa buong kasaysayan ng mundo?

Maaari mong anyayahan ang mga estudyante na maglista ng ilang halimbawa ng mga pagkakataon na nagpakita ang Panginoon sa mga tao. Magpakita ng ilang larawan na makatutulong sa mga estudyante na makaalala. Maaari mo ring sabihin sa mga estudyante na isipin kung aling mga karanasan ang pinakagusto nila na makabilang sila.

The Transfiguration [Ang Pagbabagong-Anyo], ni Carl Bloch

Christ in the Land Bountiful [Si Cristo sa Lupaing Masagana], ni Simon Dewey

First Vision [Unang Pangitain], ni Walter Rane

Jesus Christ Appears to the Prophet Joseph Smith and Oliver Cowdery [Si Jesucristo ay Nagpakita kina Propetang Joseph Smith at Oliver Cowdery], ni Walter Rane

• Ano ang maaaring maisip o madama mo sa presensya ng Panginoon?

Nakita ni Isaias ang Panginoon sa lahat ng Kanyang kaluwalhatian nang tawagin siya bilang propeta. Itinala niya ang karanasang ito at isinama ito ni Nephi sa kanyang mga isinulat. (Tingnan sa Isaias 6 at 2 Nephi 16.)

Bagama’t ang lesson ay isinulat nang may mga banal na kasulatan na mababasa sa maliliit na bahagi, ang isa pang opsiyon ay ipabasa sa mga estudyante ang 2 Nephi 16:1–8 upang mas maraming mabasa tungkol sa pangitain nang minsanan lang.

Basahin ang 2 Nephi 16:1–4, at alamin kung paano inilarawan ni Isaias ang nakita niya. Dahil gumamit si Isaias ng simbolikong pananalita upang ilarawan ang kanyang karanasan, maaaring makatulong ang mga sumusunod na paliwanag:

Ang sumusunod na impormasyon ay maaaring ipakita o ipaliwanag sa klase.

• Laylayan: Ang mas mababang bahagi ng kasuotan ng Panginoon, na maaaring sumisimbolo sa Kanyang kabutihan, kapangyarihan, at kadalisayan. Mahalagang nakita ni Isaias na ito ay “pumuno sa templo” (2 Nephi 16:1).

• Serapin: Mga anghel na naglilingkod sa mga korte ng Diyos. Ang mga pakpak ng serapin ay simbolo ng kanilang kapangyarihang gumalaw o kumilos (tingnan sa Doktrina at mga Tipan 77:4).

• Usok o Ulap: Kadalasan ay simbolo ng presensya ng Diyos (tingnan sa Exodo 19:18; Apocalipsis 15:8).

• Anong mga salita o parirala mula sa mga talatang ito ang makatutulong sa iyo na maunawaan ang kaluwalhatian ng Panginoon?

• Ano kaya ang naging reaksyon mo kung nakita mo ito?

Basahin ang 2 Nephi 16:5 para malaman ang reaksyon ni Isaias sa pagkakita sa Panginoon.

Sabihin sa mga estudyante na ibahagi ang nahanap nila. Kung makatutulong, maaari mong itanong ang mga sumusunod:

• Aling mga salita o parirala ang makatutulong sa inyo na maunawaan na alam ni Isaias ang kanyang mga kasalanan at kahinaan?

• Ano ang ilang dahilan kung bakit maaaring maramdaman ng mga tao ngayon na marumi sila o hindi karapat-dapat sa harapan ng Diyos?

  Ang isang object lesson ay makatutulong sa mga estudyante na pag-isipan kung paano natin maaaring tingnan ang ating sarili kapag lumalapit tayo sa Diyos. Maaari mong ikumpara ang isang matingkad na puting tela sa isang telang nanilaw na sa paglipas ng panahon, o sa isang telang mas halatang marumi. Maaari mo ring pagkumparahin ang malamlam na ilaw at ang napakaliwanag na ilaw. Tulungan ang mga estudyante na maunawaan na nagiging malinaw ang pagkakaiba kapag ang dalawang bagay ay pinagsama at ang isa ay kitang-kitang mas malinis o mas maliwanag kaysa sa isa pa.

• Sa paanong mga paraan makabubuti sa atin na kilalanin ang ating mga kamalian kapag mas napapalapit tayo sa Panginoon?

Kusang aalisin ng Panginoon ang ating mga kasalanan

Basahin ang 2 Nephi 16:6–7, at alamin kung ano ang sumunod na nangyari kay Isaias. Maaaring makatulong na tandaan na ang mga dambana ay ginamit noong unang panahon sa pagsamba sa templo.

• Paano mo ibubuod ang nangyari?

• Ano sa palagay mo ang sinisimbolo nito?

Isipin ang karanasan ni Isaias sa dambana at kung paano ito makapagtuturo tungkol sa kapatawaran ng mga kasalanan at pagiging malinis sa pamamagitan ng Pagbabayad-sala ni Jesucristo.

• Sa iyong palagay, paano nakaapekto kay Isaias ang pag-alis ng Panginoon sa kanyang mga kasalanan?

• Anong mga katotohanan ang ipinauunawa sa iyo ng mga talatang ito tungkol sa Panginoon?

Ang isang katotohanan na matututuhan natin ay may kapangyarihan ang Panginoon na gawin tayong malinis.

Kung minsan, maaaring hindi natin maalala at madama ang kahalagahan ng katotohanang ito. Ibinahagi ni Brother Bradley R. Wilcox ng Young Men General Presidency ang mga salita ng isang binatilyong tinawag niyang Damon. Ibinahagi ng binatilyong ito ang naisip at nadama niya tungkol sa kanyang mga kasalanan.

Isinulat ni Damon: … “Lagi akong nakadarama ng hiya dahil hindi ko magawa ang tama. … Talagang nararapat lang sa akin na magdusa ako sa tuwina. Naisip ko na siguro galit sa akin ang Diyos dahil hindi ako nagsusumikap nang husto na mapaglabanan ito at nang matigil na. Napaglalabanan ko ang tukso nang isang linggo at minsan ay isang buwan, pero umuulit na naman ako at iniisip ko, ‘Hindi ko talaga kaya ito, ano pa ang silbi ng pagsusumikap?’” (Bradley R. Wilcox, “Ang Pagiging Karapat-dapat ay Hindi Pagiging Walang Kamalian,” Liahona, Nob. 2021, 62)

• Bakit kaya ganito ang naisip ng isang binatilyong tulad ni Damon?

Isipin kunwari na nagkaroon ka ng pagkakataong tulungan ang isang taong katulad ni Damon. Isipin ang karanasan ni Isaias. Isipin din kung ano ang personal mong nalalaman tungkol sa Tagapagligtas na maaari mong ibahagi. Isulat kung ano ang makatutulong. Maaari ka ring maghanap ng anumang banal na kasulatan o pahayag mula sa mga lider ng Simbahan na magagamit mo sa iyong paliwanag. Maaaring makatulong ang mga sumusunod na halimbawa:

• Isaias 1:18

• Mosias 26:30

• Eter 12:27

Itinuro ni Elder Dieter F. Uchtdorf ng Korum ng Labindalawang Apostol:

Hindi kailangan ng Diyos ang mga taong walang kasalanan. Hinahanap Niya ang mga maghahandog ng kanilang mga “puso at may pagkukusang isipan” [Doktrina at mga Tipan 64:34], at gagawin Niya silang “ganap kay Cristo” [Moroni 10:32–33]. (Dieter F. Uchtdorf, “Five Messages That All of God’s Children Need to Hear” [Brigham Young University devotional, Ago. 17, 2021], 3, speeches.byu.edu)

Isang bagong pananaw

Basahin ang 2 Nephi 16:8 para malaman kung ano ang ginawa ni Isaias matapos malinis ng Panginoon.

• Sa iyong palagay, paano nakaimpluwensya ang karanasan ni Isaias na siya ay nilinis sa kanyang sagot sa talata 8?

Pagkatapos ng pangitaing ito, kusang naglingkod si Isaias sa Panginoon. Sa loob ng sumunod na ilang dekada, tumulong siya sa paggabay sa mga tao ng Juda. Ang mga turo at isinulat ni Isaias ay nagbigay-inspirasyon sa napakaraming tao, at siya ay binanggit ng Tagapagligtas nang higit kaysa sinumang propeta.

Si Damon ay nagbago rin. Sa tulong ng isang lider ng Simbahan, napagtanto ni Damon na hindi siya hinusgahan ng Panginoon nang may galit kundi nang may awa, sa pagnanais na tulungan siyang magpakabuti. Basahin ang mga salita ni Damon nang magkaroon siya ng bagong pananaw tungkol sa Diyos:

Sinabi ni Damon: … “Sa mga araw na ito, hindi na ako nag-uukol ng panahon na kamuhian ang aking sarili para sa mga nagawa ko at mas nag-uukol ako ng mas maraming oras sa pagmamahal kay Jesus dahil sa Kanyang ginawa.” (Bradley R. Wilcox, “Ang Pagiging Karapat-dapat ay Hindi Pagiging Walang Kamalian,” Liahona, Nob. 2021, 62)

• Paano nakaimpluwensya sa iyong buhay ang naranasan mong Pagbabayad-sala, pagmamahal, at pagpapatawad ng Tagapagligtas?

Pag-isipan ang sumusunod na tanong habang tinatapos mo ang iyong pag-aaral ng kabanatang ito:

• Ano sa palagay mo ang magagawa mo upang mas maranasan ang pagmamahal at pagpapatawad ng Tagapagligtas sa iyong buhay?

Komentaryo at Pinagmulang Impormasyon

2 Nephi 16:1. Sino ang nakita ni Isaias?

Kapwa nagpatotoo sina Juan at Nephi na ang Panginoon na nakita ni Isaias ay ang premortal na Jesucristo (tingnan sa Juan 12:41; 2 Nephi 11:2–3). Dagdag pa rito, nasaksihan din ng iba pang mga propeta ang gayon ding tagpo (tingnan sa Apocalipsis 4:1–11; Doktrina at mga Tipan 110:1–5).

2 Nephi 16:5–8. Bakit inilagay ng anghel ang nagbabagang uling sa mga labi ni Isaias?

Nang sabihin ni Isaias, “Sa aba ko! Sapagkat ako ay napahamak” (2 Nephi 16:5), ipinahayag niya na nadama niyang hindi siya karapat-dapat na humarap sa Panginoon. Ang nagbabagang uling na inilagay ng serapin sa mga labi ni Isaias ay simbolo ng pagiging dalisay, malinis, at pagpapatawad sa pamamagitan ni Jesucristo. Sinabi rin kay Joseph Smith na ang kanyang mga kasalanan ay pinatawad nang tawagin siya ng Panginoon (tingnan sa Doktrina at mga Tipan 20:2, 5–6).

2 Nephi 16:9–10. Ano ang alam natin tungkol sa mga taong pinangaralan ni Isaias na dahilan kaya siya tinawag?

Sinabi ng Panginoon kay Isaias na hindi tatanggapin ng karamihan sa mga tao ang kanyang mga salita. Sinabi nila na naririnig at nakikita nila, ngunit pinili nilang huwag tanggapin ang diwa ng mensahe. Ipinangaral ni Isaias ang mensahe ng Panginoon, na pinananagot ang mga tao para sa nalaman at natutuhan nila ngunit hindi nila tinanggap.

Paano ako hindi panghihinaan ng loob kapag napagtanto ko ang aking mga kahinaan?

Sinabi ni Sister Michelle D. Craig ng Young Women General Presidency:

Dapat nating tanggapin ang pakiramdam na hindi tayo kuntento sa ating espirituwalidad na naghihikayat sa atin na piliin ang mas mataas na landas, habang inaalam at iniiwasan natin ang panlilinlang ni Satanas—ang nakapaparalisang panghihina ng loob. … Maaari nating piliing lumakad sa mas mataas na landas na umaakay sa atin na hanapin ang Diyos at ang Kanyang kapayapaan at biyaya, o maaari tayong makinig kay Satanas, na walang tigil sa pagsasabi sa atin na kailanma’y hindi tayo magiging sapat: sa yaman, sa talino, sa ganda, o sa anupaman. … Ang hindi natin pagiging kuntento ay maaaring [magpalakas]—o [magpahina sa atin]. (Michelle D. Craig, “Hindi Pagiging Kuntento sa Ating Espirituwalidad,” Liahona, Nob. 2018, 53)

Mga Karagdagang Aktibidad sa Pag-aaral

2 Nephi 16:3. Ang buong mundo ay puspos ng kaluwalhatian ng Panginoon

Upang matulungan ang mga estudyante na matalakay ang kaluwalhatian ni Jesucristo, maaaring pag-usapan ninyo ang tungkol sa Kanya bilang Tagapaglikha ng magandang mundong ito. Maaaring ibahagi ng mga estudyante kung sinong mga artist ang hinahangaan nila at maaari nilang ipakita ang ilan sa kanilang sining. Ang sumusunod na pahayag ni Pangulong M. Russell Ballard ng Korum ng Labindalawang Apostol ay magagamit upang pag-usapan kung ano ang hinahangaan ng mga estudyante tungkol sa mga nilikha ng Diyos.

“Kung minsan ay nakadarama tayo ng malaking paggalang at pagpipitagan sa malikhaing henyo tulad ng ipinahayag sa magandang sining o musika. Gaano pa kaya ang kapangyarihan at karingalan ng ating Banal na Lumikha na dapat nating pagpitaganan?” (M. Russell Ballard, “The Handiwork of God,” New Era, Mar. 2006, 5; tingnan din sa M. Russell Ballard, “God’s Love for His Children,” Ensign, Mayo 1988, 58)

2 Nephi 16:8. Kapag nalinis tayo ng Panginoon, nadarama natin ang hangaring maglingkod sa Kanya

Matapos basahin ang 2 Nephi 16:8 isiping itanong, “Sa inyong palagay, bakit nadaragdagan ang kahandaan nating gawin ang ipinagagawa sa atin ng Diyos kapag pinatawad na tayo sa ating mga kasalanan?” Sabihin sa mga estudyante na suriin ang kahandaan nilang gawin ang ipinagagawa sa kanila ng Diyos sa pamamagitan ng tahimik na paglalagay ng rate sa kanilang sarili sa scale na 1 hanggang 10 (kung saan ang 10 ay handang-handa at ang 1 ay hindi talaga handa). Pagkatapos ay sabihin sa kanila na pag-isipan kung paano maaaring makapigil sa kanila ang anumang kasalanan, takot, o iba pang mga dahilan upang maging mas handang gawin ang iniuutos ng Diyos sa kanila.