2 Nefi 27

“Një Punë [e] Mrekullueshme dhe një Çudi”

Mendo për ngjarjet që do t’i konsideroje të mrekullueshme dhe se si këto ngjarje kanë ndikuar tek ti dhe tek ata që ke përreth. Jezu Krishti premtoi të kryente punën e mrekullueshme të rivendosjes së ungjillit të Tij, përfshirë Librin e Mormonit, në tokë në ditët e mëvonshme. Ky mësim mund të të ndihmojë të ndiesh vlerësim më të madh për Zotin për rivendosjen e Librit të Mormonit në tokë.

Mësimdhënia me anë të Shpirtit. Asnjë mësues në vdekshmëri, pavarësisht sa i zoti apo me përvojë është, nuk mund ta zëvendësojë Shpirtin. Por ne mund të jemi mjete në duart e Perëndisë për t’i ndihmuar fëmijët e Tij që të mësojnë me anë të Shpirtit. Presidenti Henri B. Ajring dha mësim: “Studentët tanë nuk mund të dinë për Perëndinë dhe po ashtu të duan siç duhet të duan, përveç nëse mësohen nga Shpirti i Shenjtë” (“The Importance of the Holy Ghost”, Materiali i Mësuesit të Seminarit për Dhiatën e Vjetër [2018], ChurchofJesusChrist.org).

Përgatitja e nxënësve: Ftojini nxënësit të vijnë të përgatitur të tregojnë rreth një personi që ka bërë diçka të mrekullueshme për ta ose për dikë që e njohin. Për shembull, ndoshta dikush i shpëtoi ata nga një situatë e rrezikshme ose u dha atyre një dhuratë bujare.

Veprimtari të Mundshme të të Mësuarit

Diçka e mrekullueshme

Për t’i përgatitur nxënësit të tregojnë sa vijon, merreni parasysh të tregoni rreth një personi që bëri diçka për ju, që e konsideroni të mrekullueshme ose domethënëse.

Mendo për një person që ka bërë diçka të mrekullueshme për ty ose për dikë që e njeh.

• Çfarë bëri ky person?

• Çfarë ndjeve për personin që e bëri këtë? Përse?

Te 2 Nefi 27, Zoti dëshmoi për diçka të mrekullueshme që Ai do të bënte për të na ndihmuar të përballojmë ligësinë dhe braktisjen fetare të ditëve të fundit. Ndërsa studion, përsiat se si ndikon ajo që mëson, tek ajo që ndien ti për Zotin.

Lexo te 2 Nefi 27:25–26, duke kërkuar atë që Zoti premtoi se do të bënte.

Ftojini nxënësit të tregojnë se cilës gjë mendojnë se po i referohet fraza një “punë [e] mrekullueshme dhe një çudi”. Nëse është e nevojshme, tregoni shpjegimin vijues nga Presidenti Rasëll M. Nelson.

Presidenti Rasëll M. Nelson pohoi se kjo “[punë] e mrekullueshme do të përfshinte [daljen në dritë] të Librit të Mormonit dhe Rivendosjen e ungjillit” (“Dëshmi Shkrimesh të Shenjta”, Liahona, nëntor 2007, f. 46).

Një e vërtetë që mund të mësojmë nga kjo profeci, është se Zoti kreu një punë të mrekullueshme dhe një çudi nëpërmjet daljes në dritë të Librit të Mormonit dhe Rivendosjes së ungjillit të Tij.

• Çfarë di rreth Librit të Mormonit dhe ungjillit të rivendosur që mund të të bëjë t’iu referohesh atyre si të “mrekullueshme”?

Libri i Mormonit: Një punë e mrekullueshme dhe një çudi

Shumica e kapitullit te 2 Nefi 27 përqendrohet te dalja në dritë e Librit të Mormonit. Përpara se të studiosh më tej nga ky kapitull, shpenzo një çast për të reflektuar për ndjenjat e tua vetjake rreth Librit të Mormonit. A është ai i mrekullueshëm për ty vetë? Përse po ose përse jo? Çfarë pyetjesh ke? Ndërsa studion, kërko mësime që mund të të ndihmojnë ta shohësh më qartë Librin e Mormonit si “një punë të mrekullueshme dhe një çudi”.

Mund të jetë e dobishme t’i lexoni vargjet e renditura në përmbledhjen vijuese bashkë si klasë.

Nefi profetizoi se Libri i Mormonit do të dilte në dritë për të ndihmuar për problemet e ditëve të fundit (shih te 2 Nefi 27:6). Ai shkroi edhe që Perëndia do t’u lejonte disa dëshmitarëve t’i vështronin fletët nga të cilat u përkthye Libri i Mormonit, dhe t’i dëshmonin botës për vërtetësinë e librit (shih te 2 Nefi 27:12–14). Nefi më pas dha një profeci rreth disa hollësive që lidhen me përkthimin e Librit të Mormonit.

Merreni parasysh t’ua jepni ose t’ua paraqitni nxënësve tabelën vijuese. Nxënësit mund t’i studiojnë vargjet dhe ta plotësojnë tabelën në dyshe ose në grupe të vogla.

	Profecia e asaj që do të bënte njeriu (2 Nefi 27:15–19)	Emri i burrit që e përmbushi profecinë (Joseph Smith – Historia 1:63–65)
Njeriu i parë (“nuk është i mësuar”)
Njeriu i dytë (“një tjetri”)
Njeriu i tretë (“[i] mësuari”)

Pasi nxënësit të kenë pasur kohë të mjaftueshme për të studiuar, ftoni disa vullnetarë të tregojnë atë që mësuan. Merreni parasysh të bëni pyetjen vijuese si pjesë e këtij diskutimi.

• Si mendon, pse Zoti e përdori Jozef Smithin, i cili ishte një njeri i pamësuar, për ta nxjerrë në dritë Librin e Mormonit?

Lexo te 2 Nefi 27:20–23, duke kërkuar arsyet pse Perëndia zgjodhi dikë që nuk ishte i mësuar, për ta përkthyer Librin e Mormonit.

• Çfarë mësove për Zotin nga këto vargje? Si mund të ndikojë tek ti njohja e këtyre gjërave për Të?

• Në ç’mënyrë dalja në dritë e Librit të Mormonit është provë e pohimit të Zotit: “Jam në gjendje të bëj punën time”? (Vargu 21.)

Përveç thënies vijuese, merrni parasysh të tregoni thënien nga Presidenti Rasëll M. Nelson në pjesën “Komente dhe Informacion për Rrethanat”.

Ema Smithi (1804–1879), bashkëshortja e Profetit, dëshmoi për ndihmën hyjnore që mori Jozefi për përkthimin prej tij të Librit të Mormonit:

“Jozef Smithi nuk mund të shkruante dhe as të diktonte një letër me lidhje logjike dhe të formuluar mirë, dhe jo më të diktonte një libër si Libri i Mormonit. Dhe, edhe pse isha pjesëmarrëse aktive në skenat që pasuan … është e mrekullueshme për mua, ‘një mrekulli dhe një çudi’. …

Bindja ime është se Libri i Mormonit ka vërtetësi hyjnore – nuk kam as më të voglin dyshim për të. … Do të kishte qenë e pagjasë që një njeri i mësuar të mund ta bënte atë; dhe, për dikë aq të paditur dhe të pamësuar siç ishte ai, ishte thjesht e pamundur.” (Emma Smith, në “Last Testimony of Sister Emma”, The Saints’ Herald, 1 tetor 1879, f. 290)

• Në bazë të asaj që mësove sot, në ç’mënyrë dalja në dritë e Librit të Mormonit është “një punë [e] mrekullueshme dhe një çudi”?

• Si ndikon njohuria se Zoti na e ka siguruar këtë bekim tek ajo që ndien për Të?

• Çfarë përvojash ke pasur ti ose të tjerët që e ilustrojnë faktin se sa i mrekullueshëm është Libri i Mormonit?

Merreni parasysh të tregoni një përvojë vetjake ose një nga materialet filmike vijuese si pjesë e diskutimit tuaj për pyetjet e mëparshme.

Për të parë shembuj të faktit se sa i mrekullueshëm është Libri i Mormonit, mund të shohësh materialin filmik “Zgjidhja e Problemeve të Jetës me Librin e Mormonit” (01:00) ose “Libri i Mormonit: Si do të Ishte Jeta Juaj pa Të?” nga kodi kohor 05:38 deri në 11:26. Të dyja materialet filmike mund të gjenden në ChurchofJesusChrist.org.

Më herët në mësim, t’u kërkua të mendosh për ndjenjat e tua rreth Librit të Mormonit. Merre parasysh a ka ndikuar ndonjëra nga të vërtetat që ke studiuar sot, te dëshmia jote për këtë libër të shenjtë. Në ditarin tënd të studimit, shëno çfarëdo mendimi ose përshtypje që ke marrë, si dhe veprimet e ardhshme që ke ndier nxitjen të ndërmarrësh.

Merreni parasysh të ftoni disa vullnetarë që të japin mendime ose ide kuptimplota që kanë pasur gjatë mësimit. Dëshmoni për të vërtetat që keni diskutuar sot.

Komente dhe Informacion për Rrethanat

Në ç’mënyrë dalja në dritë e Librit të Mormonit është një punë e mrekullueshme dhe një çudi?

Presidenti Rasëll M. Nelson dha mësim:

“Mendoni për kohën e shkurtër që iu desh Jozefit për ta përkthyer Librin e Mormonit. Duke punuar nga prilli deri në qershor të vitit 1828, Jozefi përktheu 116 faqet që më vonë i humbi Martin Harrisi. Jozefi e filloi përkthimin sërish të martën, më 7 prill 1829, me Oliver Kaudërin si shkrues. Dorëshkrimi u përfundua tetëdhjetë e pesë ditë më vonë, më 30 qershor të atij viti. Sigurisht, jo e gjithë ajo kohë u kalua duke punuar me përkthimin. Profeti dhe shkruesit e tij gjithashtu gjetën kohën për të ngrënë, për të fjetur, për të kërkuar punësim, për të marrë priftërinë Aarone dhe Melkizedeke, për të bërë të paktën një (dhe ndoshta dy) udhëtime drejt Kollsvillit tridhjetë milje [mbi 48 kilometra] larg, për të marrë dhe regjistruar trembëdhjetë zbulesa që tani janë seksione të librit Doktrina e Besëlidhje, për t’u shpërngulur nga Harmonia në Fajet, për të siguruar të drejtën e autorit për Librin e Mormonit dhe për të filluar bërjen e organizimit për botimin e Librit të Mormonit. E vlerësuar në mënyrë të kujdesshme, kjo la gjashtëdhjetë e pesë ditë pune ose më pak, në të cilat profeti dhe shkruesit e tij e përkthyen këtë libër, i cili përmban 531 faqe në botimin e tij të tanishëm. (Shih John W. Welch, Ensign, janar 1988, f. 46–47.) Kjo llogaritet si një mesatare prej tetë faqesh në ditë. Merreni këtë parasysh kur përktheni një libër ose ndërkohë që bëni planin e leximit tuaj të Librit të Mormonit.” (Russell M. Nelson, “A Treasured Testament”, Ensign, korrik 1993, f. 61–62)

Plaku Ulises Soares, i Kuorumit të Dymbëdhjetë Apostujve, dëshmoi:

“Procesi i përkthimit të Librit të Mormonit ishte … një mrekulli. Ky anal i shenjtë, i lashtë nuk u ‘përkthye’ sipas mënyrës tradicionale që studiuesit i përkthe[nin] tekstet e lashta duke mësuar një gjuhë të lashtë. Ne duhet ta shohim procesin më shumë si një ‘zbulesë’ me ndihmën e mjeteve fizike të siguruara nga Zoti, ndryshe nga një ‘përkthim’ prej dikujt me dije gjuhësore. … Ndihma e Zotit për përkthimin e fletëve – ose zbulesa, për ta thënë kështu – është gjithashtu një fakt kur merret parasysh koha mrekullisht e shkurtër që iu desh Jozef Smithit për t’i përkthyer ato.” (Ulises Soares, “Dalja në Dritë e Librit të Mormonit”, Liahona, maj 2020, f. 33)

Shiko materialin filmik “Compelling Witness” [“Dëshmi Shtrënguese”] (07:46) për të parë shembuj të tjerë të mënyrës se si dalja në dritë e Librit të Mormonit qe një punë e mrekullueshme dhe një çudi.

Çfarë ka të mrekullueshme te Rivendosja e Kishës së Krishtit dhe e ungjillit?

Shiko ose lexo tekstin e materialit filmik “Rivendosja e Plotësisë së Ungjillit të Jezu Krishtit: Një Proklamatë në Dyqindvjetor drejtuar Botës” (ChurchofJesusChrist.org), duke kërkuar se çfarë ka të mrekullueshme te Rivendosja e Kishës së Krishtit dhe e ungjillit.

Veprimtari Plotësuese të të Mësuarit

Veprimtari me shpjegim

Merreni parasysh t’i ftoni nxënësit t’i krahasojnë kushtet e përshkruara te 2 Nefi 27:1–5 me premtimet e Zotit te 2 Nefi 27:29–31, 35. Për t’i ndihmuar nxënësit të mendojnë rreth ndikimit që kanë pasur në botë Libri i Mormonit dhe ungjilli i rivendosur, ftojini ata të zgjedhin një ose më shumë nga situatat vijuese (përshtatur nga 2 Nefi 27:1–5). Për secilën nga situatat që zgjedhin, ata mund të gjejnë një të vërtetë që jepet mësim në një fragment të Librit të Mormonit, që ndiejnë se mund të ndihmojë.

• Dikush që është i paqëndrueshëm ose ka varësi

• Dikush që ka nevojë për një strehë nga stuhitë e jetës

• Dikush që ka nevojë të përmbushë urinë ose etjen e vet shpirtërore

• Dikush që ka nevojë të shohë më qartë

Si shembull, dikush me varësi mund të ndihmohet nga e vërteta që jepet mësim tek Alma 7:11–13, që Shpëtimtari e kupton dhe mund të ndihmojë për çdo tundim.

Ftojini nxënësit të tregojnë atë që gjetën.

2 Nefi 27:15–19. Përmbushja e profecisë rreth njeriut të pamësuar

Për t’i ndihmuar nxënësit të mësojnë më shumë rreth përmbushjes së profecisë që gjendet te 2 Nefi 27:15–19 ju mund të lexoni rreth saj së bashku te libri Shenjtorët: Historia e Kishës së Jezu Krishtit në Ditët e Mëvonshme, vëll. 1, Standardi i së Vërtetës, 1815–1846 (2018), f. 44–48 [kapitulli 7].