2 Nefi 32:1–7

“Ushqehuni me Bollëk me Fjalët e Krishtit”

familje duke ngrënë darkë

Përfytyro një gosti kremtuese me bollëk ushqimesh të shijshme. Si e sheh veten duke e shijuar një gosti të tillë? Pasi i dha mësim popullit të tij rreth ndjekjes së Jezu Krishtit përgjatë shtegut të besëlidhjeve, Nefi pati ndjesinë se ata ishin ende të pasigurt rreth asaj që duhej të bënin pas pagëzimit. Ai u përgjigj duke i inkurajuar ata që të “ushqeh[eshin] me bollëk me fjalët e Krishtit” dhe i siguroi ata që fjalët e Shpëtimtarit do t’i udhërrëfenin ata për të shkuar përpara (2 Nefi 32:3). Ky mësim ka për qëllim të të ndihmojë të ushqehesh me bollëk me fjalët e Jezu Krishtit.

Përvoja e Nxënësit. Ndërsa e përmbushim Objektivin e Seminareve dhe Instituteve, ne synojmë ta ndihmojmë çdo nxënës të përjetojë kthim në besim, nderim dhe përkatësi. Kërkoni mënyra për t’i ndihmuar nxënësit të kthehen në besim te Jezu Krishti, ta lidhin atë që po mësojnë me rrethanat e tyre vetjake dhe të ndihen të mbrojtur e të përkrahur gjatë të mësuarit e tyre.

Përgatitja e nxënësve: Ftojini nxënësit ta krahasojnë studimin e tyre vetjak të shkrimeve të shenjta me ngrënien e ushqimit dhe nxitini ata të vijnë të përgatitur për të dhënë idetë e tyre gjatë orës mësimore.

Veprimtari të Mundshme të të Mësuarit

Koha për të ngrënë!

Për ta filluar orën mësimore, në vend që t’i paraqitni figurat më poshtë, merreni parasysh të ftoni dy nxënës t’i interpretojnë veprimet në vijim ndërkohë që pjesa tjetër e klasës gjen atë që po demonstrohet: ngrënien e një ushqimi të lehtë, ngrënien e një vakti dhe të ushqyerit me bollëk në një banket ose kremtim.

Vështroji figurat vijuese dhe mendo rreth ngjashmërive dhe ndryshimeve mes ngrënies së një ushqimi të lehtë, ngrënies së një vakti ose të ushqyerit me bollëk gjatë një rasti të veçantë.

banane

tas me oriz

banket

• Cilat janë disa ngjashmëri dhe ndryshime për të cilat mendove?

• Po ta krahasonim studimin e fjalëve të Krishtit me këto tri mënyra ngrënieje, çfarë mund të përfaqësojë secila?

Ati Qiellor dhe Jezu Krishti dëshirojnë t’ju bekojnë me udhërrëfim, drejtim, ndihmë dhe ngushëllim. Mendo rreth herës së fundit kur i studiove fjalët e Shpëtimtarit. A do ta përshkruajë përvojën si kur hëngre lehtë, hëngre aq sa duhet apo u ushqeve me bollëk? Po gjatë javës ose muajit të fundit? Ndërsa e vazhdon studimin tënd, kërko ndihmën e Frymës së Shenjtë për të ditur se si studimi i fjalëve të Krishtit ka qenë një bekim në jetën tënde. Kërko gjithashtu frymëzim që të të ndihmojë të dish se si t’i përmirësosh përpjekjet e tua për t’u ushqyer me bollëk me fjalët e Krishtit.

Fjalët e Jezu Krishtit

Sill ndër mend se Nefi i dha mësim popullit të tij rreth “shteg[ut] të ngushtë dhe të ngushtuar që të çon në jetën e përjetshme” dhe kualifikimeve për ta filluar atë udhëtim (shih te 2 Nefi 31:17–18). Nefi e kuptoi se njerëzit e tij vrisnin mendjen se çfarë të bënin pasi të merrnin ordinancën e pagëzimit dhe si të vazhdonin në shtegun e besëlidhjeve.

Lexo te 2 Nefi 32:1–3, duke kërkuar këshillën e Nefit rreth studimit të fjalëve të Krishtit. Ndërsa e bën këtë, mendo rreth shqetësimeve, pyetjeve dhe nevojave të tua vetjake dhe se si mund të të sjellin dobi mësimet e Nefit. Mund të jetë e dobishme të dish se fraza “flisnit me gjuhën e engjëjve” (2 Nefi 32:2) “thjesht do të thotë [të] … flisni me fuqinë e Frymës së Shenjtë” (Boyd K. Packer, “The Gift of the Holy Ghost: What Every Member Should Know”, Ensign, gusht 2006, f. 50).

2 Nefi 32:3 është një fragment i zotërimit doktrinor. Merrni parasysh t’i shenjoni fragmentet e zotërimit doktrinor në mënyrë të dallueshme që të mund t’i gjeni me lehtësi. Do të keni mundësinë në mësimin e ardhshëm të ushtroni vënien në zbatim të doktrinës që jepet mësim në këtë fragment për një pyetje ose situatë.

• Çfarë zbulove?

Ndërsa nxënësit të tregojnë atë që gjetën, dëgjoni me kujdes dhe shkruajeni në tabelë çdo parim të vërtetë që ata japin.

Një e vërtetë që mund të kesh zbuluar nga 2 Nefi 32:3 është se kur ushqehemi me bollëk me fjalët e Jezu Krishtit, ato do të na i tregojnë të gjitha gjërat që duhet të bëjmë. Merre parasysh ta shenjosh këtë të vërtetë në shkrimet e tua të shenjta.

• Ku mund t’i gjejmë fjalët e Jezu Krishtit?

• Si mendon, pse Nefi e përdori frazën “ushqehuni me bollëk” kur përshkroi se si ne duhet t’i studiojmë fjalët e Shpëtimtarit (2 Nefi 32:3)?

Lexoje thënien në vijim nga Plaku Takashi Uada, i Të Shtatëdhjetëve. Nëse është në dispozicion, merr parasysh ta shikosh mesazhin e Plakut Uada në ChurchofJesusChrist.org nga kodi kohor 00:53 deri në 01:42.

Plaku Takashi Uada

“Kur isha i vogël, mendoja se ushqyerja me bollëk ishte thjesht pasja e një vakti të bollshëm me oriz, sushi dhe salcë soje. Tani e di se ushqyerja e vërtetë me bollëk është më shumë se të shijosh një vakt të shijshëm. Ajo është një përvojë gëzimi, edukimi, kremtimi, dhënieje, shprehjeje dashurie për familjet e të dashurit, komunikimi të falënderimeve tona Perëndisë dhe ndërtim marrëdhëniesh ndërsa gëzojmë ushqim të bollshëm e tejet të shijshëm. Unë besoj se kur ushqehemi me bollëk me fjalët e Krishtit, ne duhet të mendojmë për të njëjtën lloj përvoje. Ushqyerja me bollëk me shkrimet e shenjta nuk është thjesht t’i lexosh ato. Ajo duhet të na sjellë gëzim të vërtetë dhe të ndërtojë marrëdhënien tonë me Shpëtimtarin.” (Takashi Uada, “Duke u Ushqyer me Bollëk me Fjalët e Krishtit”, Liahona, maj 2019, f. 38–39)

• Çfarë të bëri përshtypje nga thënia e Plakut Uada?

  Merrni parasysh të përdorni disa ose të gjitha pyetjet vijuese për t’i ndihmuar nxënësit ta analizojnë të vërtetën e theksuar me ngjyrë të zezë.

  Ftoni disa nxënës të përgjigjen dhe merrni parasysh t’i renditni ato që ata thotë në tabelë. Nëse është e nevojshme, kujtojuani atyre sa vijon:

• Çfarë të ndihmon, ose mund të të ndihmojë, që jo vetëm t’i lexosh fjalët e Krishtit por të ushqehesh me bollëk me to?

• Duke kujtuar atë që di rreth Jezu Krishtit, pse mund të sjellin fjalët e Tij ndjenja gëzimi, plotësimi dhe dashurie?

• Si mund të sigurojë të ushqyerit me bollëk me fjalët e Shpëtimtarit drejtim për jetën tënde dhe të të tregojë se çfarë duhet të bësh?

ChurchofJesusChrist.org

Marrja parasysh e vetë përvojave të tua mund të të ndihmojë të ushqehesh me bollëk me fjalët e Krishtit.

Ka shumë metoda studimi për ta përmirësuar të ushqyerit me bollëk me fjalët e Krishtit që mund të ndihmojnë, përfshirë lutjen për frymëzim përpara se të studiosh, bërjen e pyetjeve që ke bërë përpara dhe gjatë studimit, përkufizimin e fjalëve, përsiatjen, bërjen e referencave–kryq, mbajtjen e shënimeve, kërkimin e të vërtetave rreth Atit Qiellor dhe Shpëtimtarit dhe përshtatjen e shkrimeve të shenjta me vetë jetën tonë (Shih te 1 Nefi 19:23).

• Çfarë përshtypjesh të përgjithshme ose udhërrëfimi specifik të kanë ardhur ndërkohë që je ushqyer me bollëk me fjalët e Krishtit?

Të ushqyerit me bollëk me fjalët e Krishtit

Jepuni nxënësve kohë të mjaftueshme për veprimtarinë vijuese. Referojini nxënësit tek idetë në tabelë për metodat e studimit që mund të provojnë teksa e përfundojnë veprimtarinë e të ushqyerit me bollëk.

Duke e përdorur atë që ke mësuar sot, gjej disa minuta për të ushtruar të ushqyerit me bollëk me fjalët e Krishtit. Kjo mund të përfshijë studimin e shkrimeve të shenjta ose fjalëve të profetëve. Provo të arrish një ose më shumë nga gjërat në vijim ndërkohë që ushqehesh me bollëk:

• Ndërtoje marrëdhënien tënde me Atin Qiellor dhe Jezu Krishtin.

• Duaji dhe mirëbesoju Atyre më shumë.

• Gjej të vërteta që të sjellin gëzim dhe plotësim.

• Merr udhërrëfim për atë që duhet të bësh në jetën tënde.

Shënoji disa nga gjërat që mësove, ndjeve dhe përjetove ndërkohë që u ushqeve me bollëk me fjalët e Krishtit.

Për minutat e fundit të orës mësimore, ftojini disa nxënës të tregojnë rreth përvojave të tyre me të ushqyerit me bollëk me fjalët e Krishtit. Si të jetë e përshtatshme, nxitini ata të tregojnë të vërtetat që gjetën, si u ndien ose udhërrëfimin që morën. Të dëgjuarit nga moshatarët e tyre mund të jetë një përvojë e fuqishme për nxënësit.

Merreni parasysh të tregoni vetë përvojat tuaja dhe të jepni dëshmi për bekimet që marrim ndërsa ushqehemi me bollëk me fjalët e Krishtit.

Komente dhe Informacion për Rrethanat

2 Nefi 32:2. Si mund të flas me gjuhën e engjëjve?

Plaku Xhefri R. Holland, i Kuorumit të Dymbëdhjetë Apostujve, shpjegoi se, kur u flasim me pozitivitet dhe me dashuri të tjerëve, flasim me gjuhën e engjëjve.

Plaku Xhefri R. Holland

“Vëllezër e motra, në këtë [kërkim] të gjatë e të përjetshëm për [të qenë] më shumë si Shpëtimtari ynë, [u përpjekshim për të qenë] burra dhe gra ‘të përsosur[a]’ tani, të paktën në këtë mënyrë – duke mos [fyer] me fjalë, ose e thënë [në një mënyrë më pozitive], duke folur me një gjuhë të re, gjuhën e engjëjve. Fjalët tona, ashtu si veprat tona, duhet të mbushen me besim, shpresë dhe dashuri hyjnore, tri detyrimet e mëdha të krishtera që nevojiten aq shumë në botën tonë sot. Me fjalë të tilla, të thëna nën ndikimin e Shpirtit, lot mund të thahen, zemra mund të shërohen, jetë mund të inkurajohen, shpresa mund të kthehet dhe besimi në vetvete mund të [triumfojë].” (Xhefri R. Holland, “Gjuha e Engjëjve”, Konferenca e Përgjithshme, prill 2007, f. 17-18)

Si mund të më tregojë se ç’duhet të bëj të ushqyerit me bollëk me fjalët e Jezu Krishtit në shkrimet e shenjta?

Plaku Spenser J. Kondi, i Të Shtatëdhjetëve, dha mësim:

Plaku Spenser J. Kondi

“Ju mund të jeni duke u përballur me vendime lidhur me një mision, karrierën tuaj të ardhshme, dhe, më në fund, me martesën. Ndërsa i lexoni shkrimet e shenjta dhe luteni për drejtim, ju në të vërtetë mund të mos e shihni përgjigjen në formën e fjalëve të shtypura në një fletë, por ndërsa lexoni ju do të merrni përshtypje të qarta, dhe nxitje, dhe, siç është premtuar, Fryma e Shenjtë ‘do t’ju tregojë të gjitha gjërat që duhet të bëni’ [2 Nefi 32:5].” (Spencer J. Condie, “Becoming a Great Benefit to Our Fellow Beings”, Ensign, maj 2002, f. 45)

Pse kam nevojë të ushqehem me bollëk rregullisht me fjalët e Shpëtimtarit?

Veprimtari Plotësuese të të Mësuarit

Udhërrëfim në të gjitha gjërat

Për t’i ndihmuar nxënësit ta kuptojnë lidhjen mes të ushqyerit me bollëk me fjalët e Krishtit dhe marrjes së udhërrëfimit nga Fryma e Shenjtë, merreni parasysh të lexoni te 2 Nefi 32:3, 5 dhe t’i ftoni ata të shenjojnë frazën “tregojnë të gjitha gjërat” te vargu 3 dhe “tregojë të gjitha gjërat” te vargu 5. Pyetjet vijuese mund të përdoren për diskutim:

• Si mund të të sigurojnë udhërrëfim vetjak dhe ndihmë fjalët e Jezu Krishtit?

• Si ju ndihmon të përgatiteni për të marrë udhërrëfim dhe ngushëllim nga Fryma e Shenjtë të ushqyerit me bollëk me fjalët e Krishtit?

• Për çfarë përvojash jeni në dijeni ku Fryma e Shenjtë i ka treguar dikujt se ç’duhet të bëjë ose si të reagojë në situata të caktuara?

Shembujt në shkrimet e shenjta

Merreni parasysh t’i ftoni nxënësit të mendojnë për shembuj në shkrimet e shenjta ose nga historia e Kishës kur fjalët e Krishtit e udhërrëfyen dikë në vendimet e veta. Nëse nxënësve u nevojitet ndihmë për të menduar për shembuj, mund t’i renditni referencat vijuese në tabelë dhe të ftoni grupe të ndryshme nxënësish ta lexojnë fragmentin dhe t’i tregojnë klasës se çfarë mësuan.

• Joseph Smith – Historia 1:11–14

• Jozueut 1:7–8

• 2 Mbretërve 23:1–3

• Mateu 4:1–11

Vlerësimi i vetes

Merreni parasysh ta shkruani listën vijuese në tabelë dhe t’i ftoni nxënësit të mendojnë rreth mënyrës se si i studiojnë fjalët e Jezu Krishtit në secilin nga mjediset vijuese. Ata mund ta vlerësojnë veten duke përdorur fjalët ha ushqim të lehtë, ha sa duhet, ose ushqehem me bollëk. Nëse nuk po i studiojnë ose nuk po përpiqen t’i dëgjojnë aktualisht në njërin prej këtyre mjediseve, ata mund të përdorin fjalën kapërceje.

1. Studimi vetjak i shkrimeve të shenjta

2. Studimi me familjen i ungjillit të përqendruar te shtëpia

3. Mbledhja e sakramentit

4. Konferenca e përgjithshme

5. Seminari

6. Shkolla e së Dielës

7. Klasa e Të Rejave ose mbledhja e kuorumit të Priftërisë Aarone

Ftojini nxënësit të japin disa nga idetë e tyre për mënyrën se si mund të ushqehen më mirë me bollëk me fjalët e Krishtit në një mjedis të caktuar. Mund t’i ftoni nxënësit edhe të tregojnë se si të ushqyerit me bollëk në një mjedis të caktuar u ka sjellë përfitim. Nxënësit mund të vendosin një synim për t’u përmirësuar në njërën nga këto fusha.