Zotërimi Doktrinor: 2 Nefi 32:3

“Ushqehuni me Bollëk me Fjalët e Krishtit; Pasi, Vini Re, Fjalët e Krishtit do t’ju Tregojnë të Gjitha Gjërat që Ju Duhet të Bëni”

Në një mësim të mëparshëm, te “2 Nefi 32:1–7”, ti mësove për rëndësinë e të ushqyerit me bollëk me fjalët e Krishtit. Ky mësim mund të të ndihmojë të mësosh përmendsh referencën e zotërimit doktrinor dhe frazën kyç të shkrimit të shenjtë për vargun te 2 Nefi 32:3, të shpjegosh doktrinën dhe t’i zbatosh parimet e marrjes së njohurisë shpirtërore në situata nga jeta reale.

Fuqi nëpërmjet studimit të shkrimeve të shenjta. Studimi kuptimplotë dhe vetjak i shkrimeve të shenjta do të të ndihmojë ta rritësh kuptueshmërinë për ungjillin e Shpëtimtarit dhe Shlyerjen e Tij, si dhe që të japësh mësim dhe të dëshmosh me fuqi më të madhe. Nxënësit do të bekohen dhe frymëzohen nga dëshmia juaj vetjake për mënyrën se si shkrimet e shenjta e bekojnë jetën tuaj.

Përgatitja e nxënësve: Nxënësit mund të kenë pasur mundësinë për të ushtruar të “ushq[yerit] me bollëk me fjalët e Krishtit” në fund të mësimit të mëparshëm. Ftojini ata të vazhdojnë të ushtrohen me studimin e tyre vetjak të shkrimeve të shenjta dhe të vijnë në orën mësimore të përgatitur për të treguar rreth përvojës së tyre.

Veprimtari të Mundshme të të Mësuarit

Ky mësim për fragmentin e zotërimit doktrinor është hartuar për t’u dhënë pas mësimit “2 Nefi 32:1–7”, që është mësimi kontekstual për fragmentin e zotërimit doktrinor te 2 Nefi 32:3. Nëse ky mësim për fragmentin e zotërimit doktrinor duhet të zhvendoset në një javë tjetër, sigurohuni që të jepni edhe mësimin përkatës kontekstual gjatë asaj jave.

Shpjego dhe mëso përmendsh

Përdorni çfarëdo metode të efektshme për t’i ndihmuar nxënësit ta mësojnë përmendsh referencën dhe frazën kyç të shkrimit të shenjtë për vargun te 2 Nefi 32:3 dhe të shpjegojnë të vërtetat që gjenden në këtë fragment.

Veprimtaritë vijuese janë sugjerime për mënyrën se si mund të arrihet kjo.

Imagjino sikur të jetë kërkuar të japësh një mendim të shkurtër shpirtëror në seminar rreth rëndësisë së studimit të shkrimeve të shenjta. Lexo te 2 Nefi 32:3 dhe sill ndër mend parimin: Kur ushqehemi me bollëk me fjalët e Jezu Krishtit, ato do të na i tregojnë të gjitha gjërat që duhet të bëjmë.

• Si mund ta përdorësh atë që mësove në mësimin e mëparshëm dhe përvojën tënde vetjake, për të shpjeguar se çfarë do të thotë të “ushqeh[esh] me bollëk me fjalët e Krishtit”? (2 Nefi 32:3.)

• Çfarë ndryshimi mund të sjellë të ushqyerit me bollëk me fjalët e Krishtit në jetën e të rinjve dhe të rejave?

Ky mund të jetë një rast i mirë për t’i ftuar nxënësit që të përfshijnë përvojat e tyre vetjake ndërsa japin mendimet e tyre nga veprimtaria e përgatitjes.

Merreni parasysh të siguroni materiale që t’i ndihmoni nxënësit ta plotësojnë veprimtarinë vijuese. Ata mund të ftohen ta bëjnë këtë në ditarët e tyre të studimit. Mund ta përshtatni këtë veprimtari për t’i lejuar nxënësve të bëjnë një vizatim që e pasqyron më tepër kulturën e tyre.

Për të të ndihmuar ta mësosh përmendsh dhe ta vësh në zbatim këtë fragment, vizato një tryezë të shtruar në një copë letre. Ajo mund të jetë e ngjashme me figurën më poshtë. Mund të bësh edhe vizatime ushqimesh ose shkrimesh të shenjta mbi pjatë. Shkruaje frazën “2 Nefi 32:3 – Ushqehuni me bollëk me fjalët e Krishtit; pasi, vini re, fjalët e Krishtit do t’ju tregojnë të gjitha gjërat që ju duhet të bëni” diku në faqen tënde. Lexoje këtë frazë shumë herë derisa ta kesh mësuar përmendsh. Merre parasysh ta afishosh vizatimin tënd diku në shtëpinë tënde ose mbi frigorifer ku mund ta rishikosh sa herë që ha.

Pas një kohe të mjaftueshme, ftojini nxënësit t’i tregojnë vizatimet e tyre në grupe të vogla ose në klasë.

Ushtroje vënien në zbatim

Ndajeni klasën në grupe me nga tre veta, ku çdo nxënës përzgjedh një parim të ndryshëm të marrjes së njohurisë shpirtërore (shih te Dokumenti Bazë i Zotërimit Doktrinor [2020], “Marrja e Njohurisë Shpirtërore”, paragrafët 5–12). Kërkojuni nxënësve ta rishikojnë shkurtimisht parimin dhe më pas t’ia shpjegojnë atë grupit të tyre.

Më pas tregoni skenarin vijues. Ose nëse do të kishte më tepër lidhje me nxënësit tuaj, merreni parasysh t’u kërkoni atyre të bëjnë një listë arsyesh pse një person mund ta ketë të vështirë t’i studiojë shkrimet e shenjta. Nxënësit më pas mund të ftohen të përzgjedhin një vështirësi nga lista dhe të punojnë për ta kapërcyer ata duke përdorur parimet e marrjes së njohurisë shpirtërore.

• Si do t’ia shpjegoje shkurtimisht parimin që zgjodhe dikujt që mund të mos ketë njohuri për të?

Imagjino sikur pas një mësimi në seminar rreth rëndësisë së studimit të përditshëm të shkrimeve të shenjta, shoku ose shoqja jote të thotë: “E di që studimi i shkrimeve të shenjta është diçka e mirë për t’u bërë, por me të gjitha gjërat që po më ndodhin në jetën time tani, thjesht nuk kam kohë, aq më tepër përditë”.

Mund të jetë e efektshme t’i pyesni nxënësit a e gjejnë veten te kjo situatë dhe pse.

Shqyrtoji konceptet dhe pyetjet me një këndvështrim të përjetshëm

• Çfarë do të doje që të dinte shoku ose shoqja jote rreth Jezu Krishtit ose planit të shpëtimit që mund ta ndihmojë atë të dëshirojë të përpiqet për t’u ushqyer me bollëk me fjalët e Tij çdo ditë?

• Si mund të ndikojë te ne të ushqyerit rregullisht me bollëk me fjalët e Krishtit me kalimin e kohës, madje përjetësisht?

Kërko kuptueshmëri të mëtejshme nëpërmjet burimeve të caktuara në mënyrë hyjnore

Imagjino sikur pasi diskutuat një këndvështrim të përjetshëm, shoku ose shoqja jote të thotë: “Faleminderit. Kjo më ndihmon pak. Por ende mendoj se do ta kem të vështirë të gjej kohë çdo ditë për t’i studiuar shkrimet e mia të shenjta.”

• Si mendon se vargu te 2 Nefi 32:3 mund ta ndihmojë shokun ose shoqen tënde?

• Cilat shkrime të shenjta ose thënie nga profetët mund ta ndihmojnë shokun ose shoqen tënde?

Merreni parasysh t’u jepni nxënësve kohë për të gjetur shkrime të shenjta dhe thënie.

Disa shembuj mund të përfshijnë vargun te Doktrina e Besëlidhje 26:1 si dhe thënien vijuese nga Plaku Riçard G. Skot (1928–2015), i Kuorumit të Dymbëdhjetë Apostujve:

“Mos iu dorëzoni gënjeshtrës së Satanit se ju nuk keni kohë për t’i studiuar shkrimet e shenjta. Zgjidhni që ta gjeni kohën për t’i studiuar ato. Ushqyerja me bollëk me fjalën e Perëndisë çdo ditë është më e rëndësishme sesa gjumi, shkolla, puna, shfaqjet televizive, videolojërat apo mediat shoqërore. Mund t’ju duhet të riorganizoni reorganize përparësitë tuaja për të siguruar kohë për studimin e fjalës së Perëndisë. Nëse ju duhet, bëjeni atë!” (Riçard G. Skot, “Bëjeni Ushtrimin e Besimit Përparësinë Tuaj Parësore”, Liahona, nëntor 2014, f. 93)

• Si mund të ndihmojnë këto mësime?

Vepro me besim

Jepuni nxënësve kohë që t’i përsiatin sugjerimin dhe pyetjet vijuese. Pas një kohe të mjaftueshme, ftojini disa nxënës t’ia tregojnë përgjigjet e tyre klasës. Mund edhe t’i jepni klasës dëshminë tuaj vetjake rreth studimit të shkrimeve të shenjta.

Imagjino sikur shoku ose shoqja jote reagon mirë ndaj asaj që i ke treguar, por ti e di se ai ose ajo nuk do ta kapërcejë vërtet shqetësimin e vet derisa të veprojë me besim, duke mirëbesuar te Zoti.

Gjej kohë për t’i marrë parasysh përvojat vetjake që ke pasur me fjalët e Krishtit dhe atë që di rreth Shpëtimtarit që mund ta motivojnë shokun ose shoqen tënde që të ushqehet me bollëk me fjalët e Tij përditë.

• Çfarë përvojash ose dëshmie mund të japësh që mund ta ndihmojnë shokun ose shoqen tënde të veprojë me besim?

• Çfarë ke mësuar që ndien se mund të të ndihmojë për ta përmirësuar studimin tënd vetjak të shkrimeve të shenjta?

Përsëritja e zotërimit doktrinor

Gjatë një mësimi të ardhshëm, kaloni pak minuta duke përsëritur referencën dhe frazën kyç të shkrimit të shenjtë për 2 Nefi 32:3. Një mënyrë për ta bërë këtë është të paraqitni fragmentin vijues dhe frazën kyç të shkrimit të shenjtë të cilëve u janë ndërruar vendet e fjalëve dhe ftojini nxënësit ta vendosin në rendin e duhur:

fjalët duhet 32: vini re, Krishtit fjalët Ushqehuni me bollëk që 2 Krishtit; me t’ju tregojnë e Nefi të 3 pasi e do të gjitha të bëni. gjërat

Një mundësi tjetër mund të jetë ta shkruani secilën nga këto fjalë në një copë të vogël letre dhe t’i jepni një ose më shumë secilit nxënës. Ftojini nxënësit të punojnë së bashku për ta rregulluar renditjen.

Përgjigjja: 2 Nefi 32:3 Ushqehuni me bollëk me fjalët e Krishtit; pasi, vini re, fjalët e Krishtit do t’ju tregojnë të gjitha gjërat që ju duhet të bëni.