2 Nephi 32:1–7

“Magpakabusog Kayo sa mga Salita ni Cristo”

Larawan ng isang piging ng pagdiriwang na may maraming masasarap na pagkain. Paano mo nakikita ang iyong sarili na nasisiyahan sa ganoong piging? Matapos niyang turuan ang kanyang mga tao tungkol sa pagsunod kay Jesucristo sa landas ng tipan, nadama ni Nephi na hindi pa rin sila nakatitiyak kung ano ang gagawin pagkatapos ng binyag. Tumugon siya sa pamamagitan ng paghihikayat sa kanyang mga tao na “magpakabusog kayo sa mga salita ni Cristo” at tiniyak niya sa kanila na gagabayan sila ng mga salita ng Tagapagligtas sa pagsulong (2 Nephi 32:3). Layunin ng lesson na ito na tulungan kang magpakabusog sa mga salita ni Jesucristo.

Ang Karanasan ng Mag-aaral. Habang tinutupad natin ang Layunin ng Seminaries and Institutes, layunin naming tulungan ang bawat estudyante na makaranas ng pagbabalik-loob, pagiging kaugnay, at pagiging kabilang. Maghanap ng mga paraan upang matulungan ang mga estudyante na magbalik-loob kay Jesucristo, iugnay ang natututuhan nila sa kanilang personal na kalagayan, at madamang ligtas at sinusuportahan sila sa kanilang pag-aaral.

Paghahanda ng estudyante: Sabihin sa mga estudyante na ikumpara ang kanilang personal na pag-aaral ng mga banal na kasulatan sa pagkain at hikayatin silang pumasok na handang ibahagi ang kanilang mga ideya sa klase.

Mga Posibleng Aktibidad sa Pag-aaral

Kainan na!

Upang simulan ang klase, sa halip na ipakita ang mga larawan sa ibaba, maaari kang mag-anyaya ng dalawang estudyante na isadula ang sumusunod habang huhulaan ng natitirang bahagi ng klase ang ipinapakita: pagmimiryenda, pagkain, at pagpapakabusog sa isang piging o pagdiriwang.

Tingnan ang mga sumusunod na larawan at isipin ang mga pagkakatulad at pagkakaiba ng pagmimiryenda, pagkain, o pagpapakabusog sa isang espesyal na okasyon.

• Ano ang ilang pagkakatulad at pagkakaiba na naisip mo?

• Kung ikukumpara natin ang pag-aaral ng mga salita ni Cristo sa tatlong paraan ng pagkain na ito, ano kaya ang kinakatawan ng bawat isa?

Nais ng Ama sa Langit at ni Jesucristo na pagpalain ka sa pamamagitan ng pagbibigay ng patnubay, gabay, tulong, at kapanatagan. Isipin ang huling pagkakataon na pinag-aralan mo ang mga salita ng Tagapagligtas. Ilalarawan mo ba ang karanasang ito bilang pagmemeryenda, pagkain, o pagpapakabusog? Paano ka nag-aral noong nakaraang linggo o buwan? Sa iyong patuloy na pag-aaral, hingin ang tulong ng Espiritu Santo upang malaman kung paano naging pagpapala sa buhay mo ang pag-aaral ng mga salita ni Cristo. Maghangad din ng inspirasyon na tutulong sa iyo na malaman kung paano pagbubutihin ang iyong mga pagsisikap na magpakabusog sa mga salita ni Cristo.

Ang mga salita ni Jesucristo

Alalahanin na itinuro ni Nephi sa kanyang mga tao ang tungkol sa “makipot at makitid na landas na patungo sa buhay na walang hanggan” at ang mga kwalipikasyon upang simulan ang paglalakbay na iyon (tingnan sa 2 Nephi 31:17–18). Nahiwatigan ni Nephi na iniisip ng kanyang mga tao kung ano ang gagawin nila matapos matanggap ang ordenansa ng binyag at kung paano magpapatuloy sa landas ng tipan.

Basahin ang 2 Nephi 32:1–3, at alamin ang ipinayo ni Nephi tungkol sa pag-aaral ng mga salita ni Cristo. Habang ginagawa mo ito, isipin ang sarili mong mga alalahanin, tanong, at pangangailangan at kung paano ka makikinabang sa mga turo ni Nephi. Maaaring makatulong na malaman na ang pariralang “makapagsasalita sa wika ng mga anghel” (2 Nephi 32:2) “ay nangangahulugan lamang [na] … magsalita nang may kapangyarihan ng Espiritu Santo” (Boyd K. Packer, “The Gift of the Holy Ghost: What Every Member Should Know,” Ensign, Ago. 2006, 50).

Ang 2 Nephi 32:3 ay isang doctrinal mastery passage. Maaari mong markahan ang mga doctrinal mastery passage sa natatanging paraan upang madali mong mahanap ang mga ito. Magkakaroon ka ng pagkakataon sa susunod na lesson na magsanay na gamitin ang doktrinang itinuturo sa scripture passage na ito sa isang tanong o sitwasyon.

• Ano ang natuklasan mo?

Habang ibinabahagi ng mga estudyante ang nalaman nila, pakinggang mabuti at isulat sa pisara ang anumang totoong alituntunin na ibabahagi nila.

Ang isang katotohanan na maaaring natuklasan mo mula sa 2 Nephi 32:3 ay kapag nagpapakabusog tayo sa mga salita ni Jesucristo, sasabihin sa atin ng mga ito ang lahat ng bagay na dapat nating gawin. Maaari mong markahan ang katotohanang ito sa iyong mga banal na kasulatan.

• Saan natin makikita ang mga salita ni Jesucristo?

• Sa iyong palagay, bakit ginamit ni Nephi ang salitang “magpakabusog” kapag inilalarawan kung paano natin dapat pag-aralan ang mga salita ng Tagapagligtas (2 Nephi 32:3)?

Basahin ang sumusunod na pahayag ni Elder Takashi Wada ng Pitumpu. Kung mayroon, maaari mong panoorin ang mensahe ni Elder Wada sa ChurchofJesusChrist.org mula sa time code na 0:53 hanggang 1:42.

Noong bata pa ako, inakala ko na ang pagpapakabusog ay simpleng pagkain lang nang marami na may kanin, sushi, at toyo. Alam ko na ngayon na ang totoong pagpapakabusog ay higit pa sa pagkain ng masarap. Ito ay kagalakan, kalusugan, pagdiriwang, pagbabahagi, pagpapahayag ng pagmamahal sa pamilya at mga mahal sa buhay, pagpapasalamat sa Diyos, at pagpapatibay ng ugnayan habang kumakain ng sagana at napakasarap na pagkain. Naniniwala ako na kapag nagpapakabusog tayo sa mga salita ni Cristo, dapat nating isipin na ganoon din ang ating nararanasan. Ang pagpapakabusog sa mga banal na kasulatan ay hindi pagbabasa lamang nito. Dapat na nagbibigay ito sa atin ng tunay na galak at nagpapatibay ng kaugnayan natin sa Tagapagligtas. (Takashi Wada, “Pagpapakabusog sa mga Salita ni Cristo,” Liahona, Mayo 2019, 38–39)

• Ano ang pinakanapansin mo sa pahayag ni Elder Wada?

  Maaari mong gamitin ang ilan sa o ang lahat ng sumusunod na tanong upang matulungan ang mga estudyante na suriin ang katotohanan na nakasulat sa bold letter.

  Anyayahan ang ilang estudyante na sumagot at maaari mong ilista sa pisara ang sasabihin nila. Kung kinakailangan, ipaalala sa kanila ang mga sumusunod:

• Ano ang nakatutulong sa iyo, o makatutulong sa iyo, kapag hindi mo lang basta binasa ang mga salita ni Cristo kundi nagpakabusog ka sa mga ito?

• Habang inaalala ang nalalaman mo tungkol kay Jesucristo, bakit kaya naghahatid ang Kanyang mga salita ng kagalakan, kalusugan, at pagmamahal?

• Paano nagbibigay ng patnubay sa iyong buhay ang pagpapakabusog sa mga salita ng Tagapagligtas at paano ito nagsasabi ng dapat mong gawin?

ChurchofJesusChrist.org

Ang pag-iisip ng sarili mong mga karanasan ay makatutulong sa iyo na magpakabusog sa mga salita ni Cristo.

Maraming pamamaraan sa pag-aaral na makatutulong upang mas lalong mapagbuti ang pagpapakabusog sa mga salita ni Cristo, kabilang ang pagdarasal para humingi ng inspirasyon bago ka mag-aral, pagtatanong ng mga tanong na mayroon ka bago mag-aral at habang nag-aaral, pagpapakahulugan sa mga salita, pagninilay, pag-cross-reference, pagtatala, paghahanap ng mga katotohanan tungkol sa Ama sa Langit at sa Tagapagligtas, at paghahalintulad ng mga banal na kasulatan sa sarili nating buhay (Tingnan sa 1 Nephi 19:23).

• Anong mga pangkalahatang impresyon o partikular na patnubay ang naisip mo habang nagpapakabusog ka sa mga salita ni Cristo?

Pagpapakabusog sa mga salita ni Cristo

Bigyan ng sapat na oras ang mga estudyante para sa sumusunod na aktibidad. Patingnan sa mga estudyante ang mga ideya sa pisara para sa mga pamamaraan sa pag-aaral na masusubukan nila habang ginagawa nila ang aktibidad sa pagpapakabusog.

Gamit ang natutuhan mo ngayon, maglaan ng ilang minuto upang magsanay sa pagpapakabusog sa mga salita ni Cristo. Maaaring kabilang dito ang pag-aaral ng mga banal na kasulatan o mga salita ng mga propeta. Sikaping isakatuparan ang isa o mahigit pa sa mga sumusunod habang nagpapakabusog ka:

• Patibayin ang iyong ugnayan sa Ama sa Langit at kay Jesucristo.

• Mas lalo Silang mahalin at pagkatiwalaan.

• Maghanap ng mga katotohanan na naghahatid sa iyo ng kagalakan at kalusugan.

• Tumanggap ng patnubay para sa dapat mong gawin sa iyong buhay.

Isulat ang ilan sa mga bagay na natutuhan, nadama, at naranasan mo habang nagpapakabusog ka sa mga salita ni Cristo.

Sa huling ilang minuto ng klase, sabihin sa ilang estudyante na magbahagi ng tungkol sa kanilang mga karanasan sa pagpapakabusog sa mga salita ni Cristo. Kung naaangkop, hikayatin silang ibahagi ang mga katotohanang natuklasan nila, ang nadama nila, o ang patnubay na natanggap nila. Ang pakikinig sa kanilang mga kaklase ay maaaring maging mabisang karanasan para sa mga estudyante.

Maaari kang magbahagi ng sarili mong mga karanasan at magpatotoo tungkol sa mga pagpapalang natatanggap natin kapag nagpapakabusog tayo sa mga salita ni Cristo.

Komentaryo at Pinagmulang Impormasyon

2 Nephi 32:2. Paano ako makapagsasalita sa wika ng mga anghel?

Ipinaliwanag ni Elder Jeffrey R. Holland ng Korum ng Labindalawang Apostol na kapag nagsasalita tayo nang positibo at may pagmamahal sa kapwa natin, nagsasalita tayo sa wika ng mga anghel.

Mga kapatid, sa matagal at walang hanggang mithiin nating maging higit na katulad ng ating Tagapagligtas, nawa’y sikapin nating maging “sakdal” na kalalakihan at kababaihan kahit man lang sa paraang ito ngayon—sa pamamagitan ng hindi paggamit ng masakit na salita, o sa mas positibong paraan, sa pagsasalita gamit ang bagong wika, ang wika ng mga anghel. Ang ating mga salita, tulad ng ating mga gawa, ay dapat puno ng pananampalataya at pag-asa at pag-ibig sa kapwa, ang tatlong alituntunin ng Kristiyanismo na lubhang kailangan sa daigdig ngayon. Sa gayong mga salita, na binibigkas sa ilalim ng impluwensya ng Espiritu, mapapahid ang mga luha, mapagagaling ang mga puso, mapasisigla ang buhay, maibabalik ang pag-asa, mapananatili ang tiwala. (Jeffrey R. Holland, “Ang Wika ng mga Anghel,” Liahona, Mayo 2007, 18)

Paano ipinapakita sa akin ng pagpapakabusog sa mga salita ni Jesucristo sa mga banal na kasulatan kung ano ang gagawin ko?

Itinuro ni Elder Spencer J. Condie ng Pitumpu:

Maaaring kailanganin ninyong magpasiya tungkol sa pagmimisyon, magiging trabaho, at, sa huli’y pag-aasawa. Sa pagbabasa ninyo ng mga banal na kasulatan at pagdarasal para sa patnubay, maaaring hindi ninyo makita ang kasagutan sa mga nakasulat sa pahina, ngunit habang nagbabasa kayo tatanggap kayo ng kakaibang mga impresyon, at pahiwatig, at, tulad ng ipinangako, ang Espiritu Santo “ang magbibigay-alam sa inyo ng lahat ng bagay na nararapat ninyong gawin” [2 Nephi 32:5]. (Spencer J. Condie, “Becoming a Great Benefit to Our Fellow Beings,” Ensign, Mayo 2002, 45)

Bakit kailangan kong palaging magpakabusog sa mga salita ng Tagapagligtas?

Mga Karagdagang Aktibidad sa Pag-aaral

Pinapatnubayan sa lahat ng bagay

Upang matulungan ang mga estudyante na maunawaan ang kaugnayan ng pagpapakabusog sa mga salita ni Cristo at patnubay ng Espiritu Santo, maaari mong basahin ang 2 Nephi 32:3, 5 at anyayahan silang markahan ang pariralang “magsasabi sa inyo ng lahat ng bagay” sa talata 3 at “magbibigay-alam sa inyo ng lahat ng bagay” sa talata 5. Ang mga sumusunod na tanong ay magagamit para sa talakayan:

• Paano ka personal na mapapatnubayan at matutulungan ng mga salita ni Jesucristo?

• Paano nakatutulong ang pagpakabusog sa mga salita ni Cristo upang maihanda kang tumanggap ng patnubay at kapanatagan mula sa Espiritu Santo?

• Anong mga karanasan ang alam mo kung saan ipinakita ng Espiritu Santo sa isang tao kung ano ang gagawin o kung paano tutugon sa ilang partikular na sitwasyon?

Mga halimbawa sa mga banal na kasulatan

Maaari mong anyayahan ang mga estudyante na mag-isip ng mga halimbawa sa mga banal na kasulatan o mula sa kasaysayan ng Simbahan kung saan ginabayan ng mga salita ni Cristo ang isang tao sa kanilang mga desisyon. Kung kailangan ng mga estudyante ng tulong sa pag-iisip ng mga halimbawa, maaari mong ilista sa pisara ang mga sumusunod na reperensya at anyayahan ang iba’t ibang grupo ng mga estudyante na basahin ang scripture passage at ibahagi sa klase ang natutuhan nila.

• Joseph Smith—Kasaysayan 1:11–14

• Josue 1:7–8

• 2 Mga Hari 23:1–3

• Mateo 4:1–11

Pagsusuri sa sarili

Maaari mong isulat sa pisara ang sumusunod na listahan at sabihin sa mga estudyante na pag-isipan kung paano nila pinag-aaralan ang mga salita ni Jesucristo sa bawat isa sa mga sumusunod na sitwasyon. Maaari nilang i-rate ang kanilang sarili gamit ang salitang nagmiryenda, kumain, o nagpakabusog. Kung hindi sila kasalukuyang nag-aaral o hindi nila sinusubukang makinig sa isa sa mga sitwasyong ito, maaari nilang gamitin ang salitang pass.

1. Personal na pag-aaral ng banal na kasulatan

2. Pag-aaral ng ebanghelyo na nakasentro sa tahanan kasama ang pamilya

3. Sacrament meeting

4. Pangkalahatang kumperensya

5. Seminary

6. Sunday School

7. Klase ng Young Women o miting ng korum ng Aaronic Priesthood

Sabihin sa mga estudyante na ibahagi ang ilan sa kanilang mga ideya tungkol sa kung paano sila mas magpapakabusog sa mga salita ni Cristo sa isang partikular na sitwasyon. Maaari mo ring anyayahan ang mga estudyante na ibahagi kung paano nakatulong sa kanila ang pagpapakabusog sa isang partikular na sitwasyon. Maaaring magtakda ang mga estudyante ng mithiin na mas umunlad sa isa sa mga aspetong ito.