Enosi

Besimi te Jezu Krishti Mund të Sjellë Falje të Mëkateve

A e ke pyetur ndonjë veten si të marrësh falje për mëkatet e tua? Enosi, biri i Jakobit dhe nipi i Lehit, iu lut Perëndisë “në lutje të fuqishme” (Enosi 1:4) për faljen e mëkateve të tij. Ky mësim ka për qëllim të të ndihmojë të ushtrosh besim te Jezu Krishti dhe të pendohesh për të marrë falje.

Lutja. Si pjesë e përgatitjes për të dhënë mësimet, merreni parasysh t’i luteni Atit Qiellor, duke i kërkuar Atij t’i ndihmojë nxënësit tuaj. Është e përshtatshme të luteni që ata të mund të dinë se çfarë të bëjnë për ta forcuar besimin e tyre te Jezu Krishti dhe për t’i ndihmuar ata të mbajnë vesh për mbresa nga Fryma e Shenjtë.

Përgatitja e nxënësve: Ftojini nxënësit të lexojnë tek Enosi 1:1–8 përpara orës mësimore, duke reflektuar për mënyrën se si u ndje Enosi dhe ato që ai mësoi rreth Zotit dhe të qenit i falur për mëkatet e tij. Merreni parasysh t’u kërkoni nxënësve të përsiatin se si ata mendojnë se mund t’ia ketë ndryshuar jetën Enosit kjo përvojë.

Veprimtari e Mundshme e të Mësuarit

Të menduarit rreth asaj që falja do të thotë për ty

Merreni parasysh të bëni veprimtarinë vijuese për t’i ndihmuar nxënësit të përgatiten për të studiuar rreth Enosit dhe faljes.

Imagjino sikur ke një shok që të pyet rreth pendimit dhe faljes. Merr parasysh si mund t’u përgjigjesh pyetjeve vijuese:

• Si do ta dije nëse ke nevojë të marrësh falje për diçka?

• Si mund të marrësh falje për mëkatet?

• Si mund ta dijë dikush a është falur pasi është përpjekur të pendohet?

Përsiat se çfarë mund t’i thuash shokut tënd. Mendo rreth asaj që di dhe ke përjetuar duke kërkuar falje, si dhe atë që mund të dëshirosh ta dish më mirë.

Merreni parasysh t’i ftoni disa nxënës të tregojnë atë që mund të thonë.

Ndërsa e studion rrëfimin e Enosit në këtë mësim, kërko atë që bëri ai për të marrë falje për mëkatet e veta dhe si mund të gjejë zbatim kjo në jetën tënde.

Falja fillon me komunikim të thellë midis teje dhe Perëndisë

Enosi, biri i Jakobit dhe nipi i Lehit, iu lut Perëndisë “në lutje të fuqishme” për falje të mëkateve.

Lexo tek Enosi 1:1–8 dhe shenjo fjalë dhe fraza që të ndihmojnë ta kuptosh më mirë se si të kërkosh dhe të marrësh falje.

Merreni parasysh t’i ftoni nxënësit të shkruajnë në tabelë frazat që u bënë përshtypje.

Gjetja e kohës për të përsiatur fraza domethënëse mund të jetë një aftësi e dobishme për studimin e shkrimeve të shenjta. Ajo e lejon Frymën e Shenjtë t’ju frymëzojë me kuptueshmëri më të madhe. Për të përsiatur, mund të mendosh se çfarë do të thotë një frazë dhe të kërkosh cilëndo fjalë që do të doje ta kuptoje më mirë tek Udhëzuesi për Shkrimet e Shenjta. Mund të përsiatësh mbi atë pse Enosi përdori një frazë të caktuar dhe a ke përjetuar ndonjëherë ndonjë gjë të ngjashme.

Përzgjidh pak nga frazat vijuese ose të tjera që përcaktove dhe gjej ca kohë për të përsiatur se çfarë mund të mësosh prej tyre.

Merreni parasysh ta shtoni çdonjërën nga frazat vijuese në tabelë. Ndërsa nxënësit i tregojnë këto fraza, mund të bëni pyetje për ndjekjen e ecurisë si: “Çfarë mendoni se mund të ketë nënkuptuar Enosi me frazën ‘shpirti im ishte i uritur’?” “Si mundet që reflektimi mbi mësimet rreth jetës së përjetshme dhe gëzimit të shenjtorëve ta bëjnë shpirtin e një personi të jetë i uritur?” “Përse mëkati na bën të ndihemi shpirtërisht të zbrazët?” “Përse është përleshja një fjalë e mirë për të përshkruar përpjekjet tona për t’u penduar?”

• “Përleshjen që unë pata para Perëndisë” (vargu 2)

• “Hynë thellë në zemrën time” (vargu 3)

• “Shpirti im ishte i uritur” (vargu 4)

• “Lutje të fuqishme dhe kërkesë” (vargu 4)

• “Mëkatet e tua të janë falur” (vargu 5)

• “Fajësia ime u fshi” (vargu 6)

• “Zot, si u bë ajo?” (vargu 7)

• “Për shkak të besimit tënd në Krishtin” (vargu 8)

Merreni parasysh t’i ndani nxënësit në dyshe dhe t’i ftoni ata të tregojnë se çfarë kanë mësuar. Ata mund të përgjigjen për pyetjet vijuese së bashku:

• Çfarë fjalësh dhe frazash të bënë më shumë përshtypje? Pse?

• Çfarë mësove ndërsa i përsiate këto fraza?

• Çfarë ndien se po të mëson Perëndia nga përvoja e Enosit?

Nëse nxënësit iu përgjigjën këtyre pyetjeve në grupe të vogla, ftojini disa nxënës t’i tregojnë klasës atë që mësuan ose atë që pëlqyen nga ajo që dëgjuan nga partneri i tyre. Ndërsa ata tregojnë parime të vërteta, merreni parasysh t’i shkruani ato në tabelë.

Nëse nxënësit e kanë të vështirë t’i tregojnë të vërtetat, merreni parasysh të bëni pyetje si ato në vijim: “Çfarë arsyesh dha Enosi për fshirjen e fajësisë së tij?” “Çfarë mësoi Enosi nga Zoti rreth arsyes pse ai u fal për mëkatet e tij?”

Një parim i rëndësishëm që mësojmë tek Enosi është se ndërsa pendohemi dhe e ushtrojmë besimin tonë te Jezu Krishti, mund të falemi për mëkatet tona dhe mund të shërohemi. Nëse dëshiron, mund ta shkruash këtë parim në ditarin tënd të studimit.

Lexoje thënien vijuese nga Plaku Diter F. Uhtdorf, i Kuorumit të Dymbëdhjetë Apostujve.

“Kur ne pendohemi me të vërtetë, Krishti do ta heqë barrën e fajit për mëkatet tona. Ne mund të dimë vetë se ne jemi falur dhe bërë të pastër. Fryma e Shenjtë do të na e vërtetojë këtë; Ai është Shenjtëruesi. Asnjë dëshmi tjetër për faljen nuk mund të jetë më e madhe.” (Diter F. Uhtdorf, “Pikë Kthimi të Sigurt”, Liahona, maj 2007, f. 101; Konferenca e Përgjithshme, prill 2007, f. 125)

Nëse nxënësit e shkruan parimin në ditarët e tyre të studimit, merreni parasysh t’i ftoni ata të rrethojnë një pjesë të parimit që do të donin ta kuptonin më mirë. Pastaj kërkojuni që të tregojnë atë që rrethuan. Kërkojuni nxënësve të tjerë të tregojnë atë që dinë që mund t’i ndihmojë shokët e tyre të klasës. Ata mund të përdorin shkrimet e shenjta, përvoja ose thënie nga udhëheqësit e Kishës për t’i ndihmuar. Pyetjet vijuese mund të jenë të dobishme gjithashtu:

• Çfarë mendon se do të ndodhte po të përpiqej dikush të kërkonte falje pa u penduar dhe pa ushtruar besim te Jezu Krishti? Pse?

• Cilat janë disa nga mënyrat se si Enosi u pendua dhe ushtroi besim te Jezu Krishti?

• Çfarë mendon se do të thotë të shërohesh?

Mund të jetë e dobishme të shohësh se cilat pyetjeve nga situata në fillim të mësimit mund t’u përgjigjesh duke përdorur rrëfimin e Enosit.

Ne mund të kemi përvoja si të Enosit sot

Shumica e njerëzve nuk marrin falje në një mënyrë aq të menjëhershme ose dramatike sa Enosi. Megjithatë, ndërsa kërkojmë të ushtrojmë besim te Jezu Krishti dhe të pendohemi siç bëri Enosi, edhe ne mund të marrim falje dhe të shërohemi.

Ndihmojini nxënësit të përsiatin për mënyrën se si ata mund të ushtrojnë besim te Jezu Krishti dhe të pendohen. Mund t’i paraqitni këto ide ose të tjera që mund të mendoni për t’i ndihmuar nxënësit.

• Përsiat mbi atë që di rreth Jezu Krishtit dhe dëshirës së Tij për të të falur dhe ndihmuar. Çfarë ndien se Ai dëshiron që ti të bësh për të ushtruar besim tek Ai dhe për t’u penduar?

• Mendo për herën e fundit që ndjeve se ushtrove besim te Jezu Krishti dhe u pendove. A ka ndodhur kjo kohët e fundit? Përse po ose përse jo?

• Merr parasysh të planifikosh një kohë për t’u lutur me besim më të madh te Jezu Krishti. Si mund t’i qasesh lutjes sate ndryshe nga sa bën zakonisht? Si mund të demonstrosh se e dëshiron faljen e Zotit në mënyrë të ngjashme me Enosin?

Merreni parasysh t’i ftoni nxënësit të tregojnë mbresat dhe të japin dëshminë për Shpëtimtarin Jezu Krisht dhe atë që mësuan nga Enosi. Merreni parasysh të jepni edhe mendimet dhe dëshminë tuaj.

Komente dhe Informacion për Rrethanat

Çfarë tjetër duhet të di rreth besimit te Jezu Krishti?

Presidenti Dallin H. Ouks, i Presidencës së Parë, tregoi:

“Besimi te Zoti është mirëbesim te Zoti. Ne nuk mund të kemi besim të vërtetë te Zoti, pa pasur edhe mirëbesim të plotë në vullnetin e Zotit e në kohën që zgjedh Zoti. Si rrjedhojë, pavarësisht se sa i fortë është besimi ynë, nuk mund të prodhojë një rezultat në kundërshtim me vullnetin e Atij tek i cili kemi besim. Mbajeni mend atë kur lutjet tuaja nuk duket se marrin përgjigje në mënyrën ose në kohën që dëshironi. Ushtrimi i besimit në Zotin Jezu Krisht i nënshtrohet përherë rendit të qiellit, mirësisë dhe vullnetit e urtësisë së Zotit dhe kohës së caktuar nga Ai. Kur kemi atë lloj besimi dhe i mirëbesojmë Zotit, ne kemi siguri dhe qetësi të vërtetë në jetën tonë.” (Dallin H. Oaks, “The Atonement and Faith” [fjalim i mbajtur në seminarin për presidentët e rinj të misioneve, qershor 2001])

Çfarë mund të bëj për ta përmirësuar mënyrën se si lutem?

Plaku Dejvid A. Bednar, i Kuorumit të Dymbëdhjetë Apostujve, tha:

“Objekti i lutjeve tona nuk duhet të jetë paraqitja e një liste dëshirash apo serie kërkesash por sigurimi për vete dhe për të tjerët i bekimeve që Perëndia është i etur të na dhurojë, sipas vullnetit dhe kohës së Tij. Çdo lutje e sinqertë dëgjohet dhe merr përgjigje nga Ati ynë Qiellor, por përgjigjet që marrim mund të mos jenë ajo që presim apo të mos vijnë kur ne duam apo në mënyrën që parashikojmë. …

Lutja është një privilegj dhe dëshira e sinqertë e shpirtit. Ne mund të shkojmë përtej lutjeve rutinë e stereotipe dhe të angazhohemi në lutje kuptimplote kur ne kërkojmë si duhet me besim dhe veprojmë, kur me durim ngulmojmë në prova të besimit tonë dhe kur ne njohim e pranojmë me përulësi ‘mos u bëftë vullneti im, por yti’.” (Dejvid A. Bednar, “Kërkoni me Besim”, Liahona, maj 2008, f. 97)

Veprimtari Plotësuese të të Mësuarit

Si mund ta di a jam falur?

Nëse ndieni se nxënësit tuaj mund të marrin dobi nga të kuptuarit më mirë e pyetjes së mësipërme, merreni parasysh t’i ftoni ata të lexojnë te Mosia 4:1–3 dhe të shfaqni materialin filmik “How Do We Know the Lord Has Forgiven Us” [“Si e Dimë se Zoti na Ka Falur”] (03:18). Plaku Nil L. Andersen, i Kuorumit të Dymbëdhjetëve Apostujve, tregoi rëndësinë e lutjes kuptimplotë ndërsa ushtrojmë besim te dëshira e Perëndisë për të na falur nëpërmjet pendimit të sinqertë dhe qëllimit të vërtetë.

Çfarë ndikimi pati përvoja e Enosit tek ai?

Mund të jetë e dobishme që nxënësit ta dinë se çfarë bëri Enosi pasi mori falje nga Zoti. Lexo tek Enosi 1:9–18, duke kërkuar se për kë u lut Enosi më pas dhe pse. Përsiat për atë që mëson nga përvoja e tij. Gjithashtu, merr parasysh të lexosh vargjet te 2 Nefi 26:33 dhe të përsiatësh se si lidhet ajo me këto vargje. Mendo se për kë mund të lutesh dhe të kërkosh ta ndihmosh.

Çfarë mund të mësosh nga përvoja e Enosit me lutjen?

Në vend që të përqendrohen te falja, ftojini nxënësit të lexojnë librin e Enosit, duke kërkuar ide për lutjen. Ftojini ata të tregojnë se si e ndihmoi lutja Enosin, ndoshta duke treguar se si ndryshoi zemra e Enosit nëpërmjet përvojës. Gjithashtu, ftojini nxënësit të tregojnë atë që mund të bëjnë për t’i bërë lutjet e tyre më kuptimplota.