Jaromi – Omni

Dhurojani Tërë Shpirtin Tuaj Jezu Krishtit

Ku drejtohesh për udhërrëfim kur bën zgjedhje të rëndësishme për jetën? Ati Qiellor dhe Jezu Krishti kanë dhënë shkrimet e shenjta si një burim parësor për udhërrëfim dhe ndihmë për të gjithë. Librat e Jaromit dhe Omnit përmbajnë mësime të ndryshme që mund të ta bekojnë jetën. Ky mësim ka për qëllim të të ndihmojë të ushtrosh përcaktimin dhe zbatimin e parimeve nga shkrimet e shenjta që mund të ta bekojnë dhe udhërrëfejnë jetën tënde.

Ndihmojini nxënësit të zbulojnë doktrinën dhe parime të ungjillit. Doktrina është një e vërtetë themelore e pandryshueshme e ungjillit të Jezu Krishtit. Një parim është një e vërtetë e qëndrueshme që i udhërrëfen individët në marrjen e vendimeve. Parimet e ungjillit janë të përbotshme dhe i ndihmojnë njerëzit ta zbatojnë doktrinën e ungjillit në jetën e tyre.

Përgatitja e nxënësve: Ftojini nxënësit të ushtrojnë përcaktimin e parimeve që do t’u sjellin dobi në jetën e tyre ndërkohë që i studiojnë shkrimet e shenjta çdo ditë. Inkurajojini ata të vijnë të përgatitur për të treguar të paktën një parim që gjetën.

Veprimtari e Mundshme e të Mësuarit

Drejtimi i anijes

Për ta filluar orën mësimore, merreni parasysh të paraqitni një figurë të një anijeje ose ta vizatoni një të tillë në tabelë. Përndryshe, mund ta vini një nxënës të vizatojë një anije në tabelë. Mund t’i pyesni ata se cilat pjesë të anijes janë të nevojshme për ta ndihmuar një ekuipazh të lundrojë drejt një vendmbërritjeje.

Imagjino sikur udhëtimi yt përgjatë jetës është si një anije që lundron në oqean. Cilat janë disa gjëra që mund t’i krahasoni me timonin që e udhërrëfen anijen në udhëtim?

Merreni parasysh t’i renditni përgjigjet e nxënësve në tabelë.

Plaku Dejvid A. Bednar, i Kuorumit të Dymbëdhjetë Apostujve, dha një përgjigje të mundshme:

“Parimet e ungjillit janë për mua dhe për ju ashtu siç është timoni për një anije. Parimet e sakta na mundësojnë të gjejmë udhën tonë dhe të qëndrojmë të vendosur, të palëkundur dhe të patundur, me qëllim që të mos e humbasim baraspeshimin dhe të biem në stuhitë e furishme të errësirës e pështjellimit në ditët e mëvonshme.” (Dejvid A. Bednar, “Parimet e Ungjillit Tim”, Liahona, maj 2021, f. 126)

• Si mund të jetë një parim i ungjillit si timoni i një anijeje?

• Në një shkallë nga 1 te 10, sa i sigurt je se mund t’i përcaktosh parimet e vërteta nga shkrimet e shenjta dhe t’i përdorësh ato për të udhërrëfyer jetën tënde? Pse?

• Çfarë ke bërë në të shkuarën që të ka ndihmuar të gjesh parime në shkrimet e shenjta?

Dëgjojini me kujdes përgjigjet e nxënësve. Merreni parasysh ta shkruani atë që thonë ata në tabelë për të ndihmuar shokët e tyre të klasës.

Nëse do të doje të përsërisje se si t’i përcaktosh parimet, merr parasysh të rishikosh mësimet vijuese: “2 Nefi 1” dhe “Jakobi [LiM] 4”.

Gjej një çast për të reflektuar mbi një parim të kohëve të fundit që përcaktove gjatë seminarit ose studimit tënd vetjak të shkrimeve të shenjta.

• Çfarë parimi gjete? Si e ka bekuar ai parim jetën tënde?

Merreni parasysh të ftoni disa nxënës që të flasin. Dëgjoni me kujdes për të vlerësuar se sa mirë i përcaktojnë ata parimet dhe si mund t’i ndihmoni ata ta rritin aftësinë e tyre gjatë këtij mësimi. Gjithashtu shihni që t’i përgëzoni ata për studimin e tyre dhe t’i inkurajoni të vazhdojnë.

Përcaktimi i parimeve të ungjillit

Librat e Jaromit dhe Omnit përmbajnë shkrimet e fundit në fletët e vogla të Nefit dhe përfshijnë parime të shumta që mund ta bekojnë jetën tonë. Jaromi i mori fletët nga i ati, Enosi, dhe shënoi vështirësitë dhe bekimet e nefitëve gjatë një periudhe prej afro 40 vjetësh. Më pas, ai ia kaloi fletët të birit, Omnit. Libri i Omnit përmban shkrimet e pesë mbajtësve të ndryshëm nefitë të analeve dhe mbulon afërsisht 190 vjet.

Vendosni se çfarë është më e mira për nxënësit tuaj që të kenë një përvojë kuptimplote me përcaktimin e parimeve të ungjillit. Nxënësit mund të punojnë individualisht ose të ndahen në grupe të vogla dhe të punojnë së bashku për të përcaktuar parimet në një ose më shumë referenca të shkrimeve të shenjta.

Lexoji fragmentet vijuese të shkrimit të shenjtë dhe ushtro përcaktimin e parimeve të ungjillit që mund ta përdorësh në jetën tënde. Mund të ketë disa parime që përmbahen në secilin grup vargjesh. Përcakto së paku një parim nga secili fragment i shkrimit të shenjtë.

1. Jaromi 1:3–4

2. Jaromi 1:5–9

3. Jaromi 1:10–12

4. Omni 1:12–16

5. Omni 1:25–26

Merreni parasysh t’i ftoni disa nxënës që t’i shkruajnë në tabelë disa nga parimet që përcaktuan.

Të japësh veten për Shpëtimtarin dhe punën e Tij

Pasi të përcaktosh një parim, është e rëndësishme të gjesh kohë të përsiatësh se çfarë do të thotë ajo dhe si mund të zbatohet në jetën tënde. Për shembull, tek Omni 1:26 mund të kesh përcaktuar parimin vijues: Nëse vijmë te Krishti dhe i dhurojmë Atij tërë shpirtin tonë, ne do të shpëtohemi.

• Cilat janë disa mënyra se si mund të kërkosh ta kuptosh dhe zbatosh më mirë këtë parim?

Sa vijon është një ide:

Mund të jetë e dobishme ta krahasosh këtë parim me diçka që mund t’u ofrosh të tjerëve në jetën e përditshme.

• Çfarë mund t’i ofrosh dikujt tjetër?

• A ka mënyra se si mund të ofrosh vetëm një pjesë të asaj që mund të japësh? Pse?

• Kur mund të ofrosh gjithçka që mund të japësh? Pse?

• Si mund të gjejë zbatim kjo për dhurimin e tërë shpirtit tonë Jezu Krishtit?

Ndërsa i dëgjoni përgjigjet e nxënësve, pyetjet vijuese mund të jenë të dobishme: Si mendoni, çfarë do të thotë t’ia jepni tërë shpirtin tuaj Jezu Krishtit? Çfarë mund ta pengojë dikë që të mos ia përkushtojë veten plotësisht Jezu Krishtit?

• Si mendon, çfarë do të thotë t’ia dhurosh tërë shpirtin tënd Jezu Krishtit?

• Përse mendon se Zoti na kërkon t’i japim Atij tërë shpirtin tonë?

• Kë njeh që është një shembull i mirë i dikujt që po përpiqet t’ia japë tërë shpirtin e vet Jezu Krishtit? Si është bekuar ai ose ajo ngaqë e bën këtë?

ChurchofJesusChrist.org

Merre parasysh të vizatosh një rreth që përfaqëson jetën tënde. Ngjyrose pjesën e rrethit që ndien se e përfaqëson më së miri se sa po i jep aktualisht Zotit nga vetja jote. Gjej një çast për të përsiatur se si mund t’ia japësh më plotësisht tërë shpirtin tënd Jezu Krishtit. Shkruaj një ose dy mënyra se si do të përpiqesh ta bësh këtë dhe se si mund t’i sjellë dobi bërja e këtyre gjërave jetës sate.

Të Kuptuarit dhe Zbatimi i Parimeve

Silli ndër mend parimet që përcaktove më herët nga librat e Jaromit dhe Omnit.

• Cili nga parimet që përcaktove është më kuptimploti për ty? Pse?

• Si mund ta kuptosh dhe zbatosh më mirë këtë parim?

• Si mund të të ndihmojë të jetuarit e këtij parimi për ta drejtuar më mirë jetën tënde për te Jezu Krishti?

Komente dhe Informacion për Rrethanat

Omni 1:12–22. Cilat janë grupet e ndryshme të njerëzve që përmenden në librin e Omnit?

Në librin e Omnit, ne mësojmë për tre grupe njerëzish të cilët Zoti i solli në tokën e premtimit. Grupi i parë që përmendet ishte familja e Lehit dhe pasardhësit e tyre. Një grup i dytë, i quajtur populli i Zarahemlës, ose mulekitët, u larguan nga Jerusalemi dhe udhëtuan drejt kontinentit amerikan rreth së njëjtës kohë si familja e Lehit. Ata u bashkuan me nefitët nën sundimin e mbretit Mosia (shih tek Omni 1:19). Grupi i tretë ishin jareditët, të cilët erdhën në tokën e premtimit shumë kohë përpara dy grupeve të para. Ata e shkatërruan veten në luftëra civile diku mes viteve 600 dhe 300 pr.K. Mbreti i fundit i jareditëve, një burrë i quajtur Koriantumri, i mbijetoi shkatërrimit dhe me sa duket u end derisa gjeti popullin e Zarahemlës përpara se të vdiste (shih tek Omni 1:21). Libri i Ethërit përmban përmbledhjen e Moronit për analin e jareditëve.

Omni 1:26. Si mund t’ia dhuroj tërë shpirtin tim Jezu Krishtit?

Plaku Xhefri R. Holland, i Kuorumit të Dymbëdhjetë Apostujve, dha mësim:

“Secili prej nesh duhet të vijë te Krishti me … zotim të paepur ndaj ungjillit të Tij. … Në të folurën e përditshme të rinisë së sotme, ne duhet ta shpallim vetveten ‘të përfshirë kokë e këmbë’.” (Xhefri R. Holland, “Pasuria më e Madhe”, Liahona, nëntor 2021, f. 8)

Plaku Nil A. Maksuell (1926–2004), i Kuorumit të Dymbëdhjetë Apostujve, e dha mësim kuptimin e ofrimit të vetes sonë ndaj Zotit:

“Flijimi i vërtetë, vetjak nuk ishte kurrë vendosja e një kafshe mbi altar. Në vend të kësaj, ajo është gatishmëria për ta vendosur kafshën që kemi brenda vetes mbi altar dhe ta lëmë atë të digjet!” (Neal A. Maxwell, “Deny Yourselves of All Ungodliness”, Ensign, maj 1995, f. 68)

Për të njëjtën temë, Plaku Maksuell më vonë dha mësim:

“Kur ia nënshtroni vullnetin tuaj Perëndisë, ju po i jepni Atij gjënë e vetme që ju mund t’ia jepni aktualisht Atij, e cila është vërtet juaja për ta dhënë.” (Neal A. Maxwell, “Remember How Merciful the Lord Hath Been”, Ensign, maj 2004, f. 46)

Vëllai Rasëll T. Osguthorp, dikur President i Përgjithshëm i Shkollës të së Dielës, shtoi:

“Të dhënit e vullnetit tonë Zotit është diçka që e bëjmë çdo ditë. Nuk është një veprim i izoluar. Nuk është fundi, por veçse fillimi. Ne të gjithë mund të themi atë që Ai dëshiron të thuhet. Ne mund të bëjmë atë që Ai dëshiron të bëhet. Ne mund t’i jemi një dëshmitar botës për Birin e dashur të Perëndisë – e gjitha ngaqë dëshirojmë t’i bëjmë këto gjëra. Kur ky ndryshim ndodh në zemrat tona, mirënjohja jonë për Shlyerjen rritet aq shumë sa ne forcohemi prej saj vazhdimisht.” (Rasëll T. Osguthorp, “Veten do t’ia Jap Atij” [takim shpirtëror i Sistemit Arsimor të Kishës për të rinjtë në moshë madhore, 3 nëntor 2013])

Veprimtari Plotësuese të të Mësuarit

Jaromi 1:9. “Fjala e Zotit u vërtetua”

Nëse nxënësit mund të marrin dobi nga të mësuarit më shumë rreth përmbushjes së premtimeve të Zotit në jetën e tyre, ftojini ata të lexojnë tek Jaromi 1:5–9, duke kërkuar mësime që mund të mësojnë gjatë kohës së Jaromit. Ndihmoji nxënësit të përcaktojnë një parim nga Jaromi 1:9, si: Kur i mirëbesojmë Zotit dhe i zbatojmë urdhërimet e Tij, do të marrim bekimet e premtuara prej Tij. Merri parasysh pyetjet që vijojnë:

• Pse është e rëndësishme të mbajmë mend se premtimet e Perëndisë nuk përmbushen menjëherë?

• Çfarë ke mësuar rreth Zotit që të ka dhënë siguri në premtimet e Tij?

• Cilët janë disa shembuj të tjerë nga shkrimet e shenjta ku fjalët e Perëndisë përfundimisht u përmbushën?

• Kur të ka bekuar Zoti ty ose dikë që njeh për zbatimin e urdhërimeve të Tij?

Omni 1:14–19. Vlera e shkrimeve të shenjta

Merreni parasysh t’i ftoni nxënësit të mendojnë për dobitë dhe bekimet që kanë vënë re nga studimi i rregullt i shkrimeve të shenjta. Nxënësit mund të studiojnë vargjet tek Omni 1:14–19, duke kërkuar atë që u ndodhi mulekitëve për shkak se “nuk kishin sjellë anale me vete” nga Jerusalemi (Omni 1:17). Kujtojuani nxënësve atë që Shpirti i tha Nefit – që një komb i tërë do të bjerë në mosbesim nëse ai nuk ia merrte Labanit fletët prej tunxhi (shih te 1 Nefi 4:13). Populli i Zarahemlës – ata ishin dëshmitarët e gjallë të atij paralajmërimi. Merreni parasysh t’u kërkoni nxënësve të renditin disa nga gjërat që i ndihmon të kujtojnë ose mendojnë studimi i rregullt i shkrimeve të shenjta dhe t’i renditin këto në tabelë.