Fjalët e Mormonit

“Për një Synim të Urtë”

A je bekuar ndonjëherë nga përgatitja paraprake e dikujt? Si ndikoi përgatitja e tij ose e saj te përvoja vetjake? Mormoni i zbuloi fletët e vogla të Nefit pasi e kishte bërë tashmë një përmbledhje të një pjese të analeve nefite. I udhërrëfyer nga Shpirti i Zotit, Mormoni përfshiu fletët e vogla “për një synim të urtë”, në përputhje me vullnetin e Zotit (shih tek Fjalët e Mormonit 1:3–7). Ky mësim mund të të ndihmojë të ndihesh i sigurt se Zoti i di të gjitha gjërat dhe se puna e Tij do të përmbushet.

Bëni pyetje që ftojnë përfshirjen. Pyetjet e efektshme mund t’i ndihmojnë nxënësit të përfshihen në mësim dhe të ndërveprojnë me njëri-tjetrin. Pyetjet mund t’i nxitin gjithashtu nxënësit që ta ftojnë Frymën e Shenjtë në përvojën e tyre të të mësuarit ndërsa e ushtrojnë lirinë e tyre të zgjedhjes dhe e përmbushin rolin e tyre në procesin e të mësuarit. Bëni pyetje që përfshijnë edhe mendjen dhe zemrën.

Përgatitja e nxënësve: Nxënësit mund ta pyesin një prind ose një udhëheqës të Kishës se si është udhërrëfyer ose bekuar nga reagimi ndaj një mbrese ose nxitjeje shpirtërore.

Veprimtari e Mundshme e të Mësuarit

Bindjet rreth Perëndisë

Mund të merrni parasysh t’i vini nxënësit të përgjigjen për pyetjet vijuese në ditarët e tyre të studimit ose të përdorin një program digjital anketimi anonim për të mbledhur përgjigjet e nxënësve.

Duke përdorur një shkallë nga 0–5 (0 = Nuk besoj, 5 = Besoj fort), gjej një çast për ta vlerësuar sinqerisht nivelin e besimit tënd për secilin nga pohimet vijuese:

• Unë besoj te Perëndia.

• Unë besoj se Ai i di të gjitha gjërat dhe ka të gjithë fuqinë.

• Unë besoj se Ai përgatit një mënyrë që unë të kem sukses në jetën time.

• Unë ndiej se mund të mirëbesoj te këshilla dhe nxitjet që Ai më jep nëpërmjet Frymës së Shenjtë.

Mund të jetë e dobishme të përsiatësh pse beson në mënyrën që beson.

Ndërsa studion sot, kërko të vërteta që mund ta rritin ose të të sigurojnë për bindjen dhe besimin tënd te Perëndia, te fuqia e Tij dhe te mënyra se si Ai e përmbush punën e Tij.

Përmbledhja e fletëve nga Mormoni

Merreni parasysh ta jepni informacionin në vijim me vetë fjalët tuaja:

Imagjino se si mund të ketë qenë të ishe profeti Mormon, i cili jetoi pothuajse 1 000 vjet pasi familja e Lehit u largua nga Jerusalemi. Ai ishte njëri nga mbajtësit e fundit të analeve nefite dhe punoi për ta shkurtuar një mijëvjeçar të historisë së nefitëve në një grup të vetëm fletësh. Si do të vendosje se cilat ngjarje të përfshije dhe cilat t’i lije pa përfshirë?

Kur puna e tij për përmbledhjen e fletëve nefite arriti kohën e mbretit Beniamin, Mormoni bëri një zbulim të rëndësishëm. Ai vendosi një shpjegim të shkurtër të përvojës së tij në librin e titulluar Fjalët e Mormonit.

Lexoji vargjet te Fjalët e Mormonit 1:3–6, duke kërkuar atë që gjeti Mormoni dhe atë që bëri për shkak të kësaj.

Mund të jetë e dobishme të dimë se fraza “këto fletë” (Fjalët e Mormonit 1:3–4) u referohet fletëve të vogla që Nefi u urdhërua të bënte (shih te 1 Nefi 9:2–4). Fletët e vogla ritregonin shumë nga e njëjta periudhë kohore si fletët e mëdha të Nefit që Mormoni kishte përmbledhur tashmë, por ato përqendroheshin më shumë te çështjet shpirtërore që ndodhën. Nëse dëshiron të kuptosh më shumë rreth këtyre analeve, merr parasysh të lexosh pjesën “Një Shpjegim i Shkurtër mbi Librin e Mormonit” që gjendet në fillim të Librit të Mormonit.

Mund të merrni parasysh t’i ftoni nxënësit të lexojnë vargjet vijuese të shkrimeve të shenjta dhe t’i diskutojnë pyetjet shoqëruese si një dyshe.

Edhe Mormoni, edhe Nefi morën nxitje specifike nga Zoti në lidhje me fletët e vogla. Lexo te 1 Nefi 9:5–6 dhe Fjalët e Mormonit 1:7–8, duke kërkuar ngjashmëri midis atyre që përjetuan këta dy profetë.

• Çfarë fjalësh ose frazash të bënë më shumë përshtypje?

• Çfarë na tregojnë këto vargje rreth Nefit dhe Mormonit?

• Çfarë të vërtetash mund të na mësojnë fjalët e tyre rreth Zotit?

Mund t’i inkurajoni nxënësit t’i shënojnë të vërtetat që përcaktojnë në tabelë.

Mes të vërtetave të tjera, mund të kesh vënë re se Zoti i di të gjitha gjërat, ka të gjithë fuqinë dhe përgatit një udhë për tʼi përmbushur punët e Tij.

Pyetjet vijuese kanë për qëllim tʼi ndihmojnë nxënësit të mendojnë rreth këtyre karakteristikave të Zotit. Mund të jetë diçka kuptimplotë që nxënësit tʼi shënojnë mendimet e tyre në ditarët e tyre të studimit.

• Pse është e rëndësishme që ti të dish se Zoti i di të gjitha gjërat dhe ka të gjithë fuqinë?

• Si mund të të ndihmojë kjo njohuri në jetën tënde?

• Si mund të ndikojë kuptueshmëria për këto të vërteta te gatishmëria jote për tʼi ndjekur nxitjet e Zotit?

Merreni parasysh të ftoni një ose më shumë nxënës që të japin përgjigjet e tyre për njërën nga pyetjet e mëparshme. Nëse dëshironi mund të tregoni edhe një përvojë vetjake.

Zoti përgatiti udhën

Prova të njohurisë paraprake dhe fuqisë së Zotit mund të shihen te fakti që e Ai urdhëroi Nefin të përgatiste fletët e vogla dhe e nxiti Mormonin tʼi përfshinte ato anale në përmbledhjen e tij.

Qindra vjet më vonë, kur Jozef Smithi po përkthente fletët e Librit të Mormonit, ai e filloi me përmbledhjen e fletëve të mëdha të Nefit nga Mormoni. Martin Harrisi, i cili po ndihmonte si shkrues i Jozefit, kërkoi në mënyrë të përsëritur tʼia tregonte faqet e përkthyera bashkëshortes dhe pjesëtarëve të tjerë të familjes. Ndonëse Zoti e kishte hedhur poshtë kërkesën e Martinit, Jozefi vazhdoi të kërkonte leje nga Zoti. Në fund, me udhëzime dhe paralajmërime të prera, Martinit iu lejua tʼi merrte 116 faqet e dorëshkrimit në shtëpinë e tij në Palmira të Nju-Jorkut. Ai u zotua që tʼia kthente dorëshkrimin Jozefit në Harmoni të Pensilvanisë, pas dy javësh.

Pikat historike më poshtë mund tʼi ndihmojnë nxënësit ta kuptojnë kontekstin e këtyre ngjarjeve.

ChurchofJesusChrist.org Ose mund tʼi lexosh pikat vijuese që përshkruajnë atë që përjetoi Jozefi dhe Martini. (Shih edhe Shenjtorët: Historia e Kishës së Jezu Krishtit në Ditët e Mëvonshme, vëll. 1, Standardi i së Vërtetës, 1815–1846 [2018], f. 51–53.)

1. Bashkëshortja e Jozefit, Ema, solli në jetë djalin e tyre të parë, i cili vdiq vetëm pas pak orësh. Jozefi shpenzoi dy javë duke u kujdesur për Emën, më pas udhëtoi drejt Palmirës kur Martini nuk u kthye në Harmoni.

2. Martini rrëfeu se e kishte humbur dorëshkrimin e Librit të Mormonit. Jozefi u qortua nga Zoti dhe nuk iu lejua ta vazhdonte përkthimin.

3. Pasi Jozefi përfundoi një periudhë të sinqertë pendimi dhe u përgjërua për falje, Zoti e lejoi Jozefin të vazhdonte tʼi përkthente fletët. Megjithatë, ai u udhëzua të mos e ripërkthente pjesën që kishte humbur.

4. Zoti zbuloi se, nën ndikimin e Satanit, individë të ligj e kishin vjedhur dorëshkrimin. Ata kishin për qëllim tʼi ndryshonin fjalët dhe ta bënin të dukej sikur Jozefi thjesht shtirej se përkthente, duke e shkatërruar kështu punën e Zotit (shih te Doktrina e Besëlidhje 10:10–19, 29–33).

5. Zoti e urdhëroi Jozefin ta përkthente analin e Nefit në fletët e vogla, të cilat Mormoni i kishte përfshirë në përmbledhjen e tij dhe ritregonte shumë nga e njëjta periudhë kohore dhe ngjarjet e pjesës së humbur. Zoti dëshmoi: “Urtësia ime është më e madhe se djallëzia e djallit” (Doktrina e Besëlidhje 10:43).

Diskutoni pyetje si ato në vijim ose të tjera që mendoni, për tʼi ndihmuar nxënësit të vlerësojnë se si Zoti mund ta përdorë njohurinë dhe fuqinë e Tij për të na bekuar dhe për ta përmbushur punën e Tij.

• Në çfarë mënyrash e demonstron ky shembull nga historia e Kishës njohurinë dhe fuqinë e Zotit?

• Si mund të të sigurojë ky incident që Zoti mund ta përgatitë udhën në jetën tënde?

• Kur të ka ndihmuar ty ose dikë që e njeh përgjigjja ndaj një nxitjeje shpirtërore për të përmbushur punën e Zotit?

• Si mund të ndikojnë të vërtetat që mësove sot te marrëdhënia jote me Atin Qiellor dhe Jezu Krishtin?

Ndjekja e nxitjeve

Të gjitha shkrimet që ke studiuar deri më tani këtë vit në Librin e Mormonit (1 Nefi – Omni) janë në dispozicionin tënd për shkak se Mormoni besoi se Zoti i dinte të gjitha gjërat dhe ndoqi mbresat shpirtërore për tʼi përfshirë fletët e vogla.

Ashtu si Nefi, mund të duash të krijosh një pjesë me “fletë të vogla” në ditarin tënd të studimit për të shënuar përvoja që janë të shenjta për jty. Nëse dëshiron, mund të përsiatësh dhe shënosh atë që di dhe beson rreth Perëndisë dhe mënyrën se si Ai mund të të ndihmojë të veprosh me besim për ta përmbushur punën e Tij.

Po ta lejojë koha, merreni parasysh tʼi ftoni nxënësit të tregojnë fragmente ose histori kuptimplota që kujtojnë nga 1 Nefi – Omni. Nëse dëshironi, mund të jepni dëshminë tuaj për ta mbyllur mësimin.

Komente dhe Informacion për Rrethanat

Si mund ta shtoj dëshirën time për tʼu përgjigjur ndaj nxitjeve shpirtërore?

Plaku Ronald A. Rasband, i Kuorumit të Dymbëdhjetë Apostujve, dha mësim:

“Ne duhet të kemi besim në nxitjet tona të para. Nganjëherë ne arsyetojmë, ne e pyetim veten a jemi duke ndier një mbresë shpirtërore apo janë thjesht mendimet tona. Kur fillojmë të hamendësojmë për herë të dytë, madje për herë të tretë për ndjenjat tona – diçka që të gjithë e kemi bërë – ne po e largojmë Shpirtin; ne po e vëmë në pikëpyetje këshillën hyjnore. …

Nëse tregojmë vëmendje ndaj nxitjeve që na vijnë, ne do të rritemi në shpirtin e zbulesës dhe do të marrim gjithnjë e më shumë këndvështrim dhe drejtim prej Shpirtit. Zoti ka thënë: ʻVëre besimin tënd në atë Shpirt që drejton për të bërë mirëʼ [Doktrina e Besëlidhje 11:12].” (Ronald A. Rasband, “Shpirti i Shenjtë na Udhëzoftë”, Liahona, maj 2017, f. 95–96)

Veprimtari Plotësuese të të Mësuarit

Fletët e mëdha dhe fletët e vogla (1 Nefi 9)

Merreni parasysh tʼu tregoni nxënësve dy ditarë, një me shumë më tepër faqe se tjetri. Ftojini ata ta krahasojnë sasinë e hapësirës për të shkruar që nevojitet për të treguar me hollësi ngjarjet e një dite të tërë me hapësirën që nevojitet për të shënuar vetëm përvoja të veçanta ose të shenjta. Në mënyrë të ngjashme, fletët e mëdha të Nefit siguruan një anal më të plotë të historisë laike, të përditshme të popullit. Tregimet e shënuara në fletët e vogla të Nefit qenë përzgjedhur me më shumë kujdes, duke u përqendruar në çështje shpirtërore dhe te mësimet e profetëve.

Kur nxënësit të lexojnë te Fjalët e Mormonit 1:3–6, mund të merrni parasysh ta ftoni një nxënës të lexojë urdhërimin e Zotit për Nefin që të bënte fletët e vogla te 1 Nefi 9:2–4. Pyetini nxënësit se pse mund të jetë me vlerë bërja e një anali më vete të ndodhive shpirtërore në jetën e dikujt. Inkurajojini nxënësit të krijojnë “fletët e vogla” të tyre dhe të shënojnë përvojat e tyre të shenjta vetjake.

Fillim alternativ i mësimit

Merreni parasysh tʼu kërkoni nxënësve tʼi renditin urdhërimet ose standardet e Zotit për të cilat disa të rinj dhe të reja mund të mos e kenë kuptuar arsyen. Diskutoni pse Zoti mund të na kërkojë tʼi zbatojmë urdhërimet që nuk i kuptojmë ende.