Môzià 1

“Raha tsy teo ireto takelaka ireto”

zatovolahy mamaky soratra masina

Inona no mety ho fiantraikan’ny soratra masina eo amin’ny fihazonana finoana an’i Jesoa Kristy mandritra ny fiainanao? I Benjamina Mpanjaka dia nampianatra ny zanany ny anjara asa manan-danjan’ny soratra masina eo amin’ny finoan’izy ireo. Ity lesona ity dia afaka manampy anao hampitombo ny fanirianao handalina ny soratra masina.

Mamporisika ny mpianatra hanana fahazarana mandalina soratra masina isan’andro. Zavatra vitsivitsy ihany no hanana fitaomana mahery vaika sy maharitra kokoa any amin’ny tsara eo amin’ny fiainan’ireo mpianatra noho ny fanampiana azy ireo hianatra hitia ny soratra masina sy handalina izany isan’andro. Fomba iray hanaovana izany ny fanasana ny mpianatra hametraka tanjona sy hanao drafitra ho an’ny tenan’izy ireo manokana handalinana isan’andro.

Fanomanana ny mpianatra: Asao ny mpianatra mba hanao ny fandalinana soratra masina ataon’izy ireo manokana sy hisaintsaina ny fiantraikan’izany amin’izy ireo, indrindra fa ny fahatsapan’izy ireo an’i Jesoa Kristy sy ny fitokian’izy ireo Aminy.

Sahanasa fianarana azo atao

Inona no tena ilaina amin’ny finoantsika an’i Jesoa Kristy?

Hevero ny hihazona ambony ny tahadikan’ny Bokin’i Môrmôna sy soratra masina hafa ary avy eo dia hanala azy ireo rehefa manontany ity manaraka ity ianao:

• Mety hanao ahoana ny fiainantsika raha tsy nisy ny Bokin’i Môrmôna sy ny soratra masina hafa?

ChurchofJesusChrist.org

Saintsaino ireto fanontaniana manaraka ireto, na valio ao anatin’ny diary fandalinanao:

Raha manoratra ny valintenin’izy ireo ao amin’ny diary fandalinan’izy ireo ny mpianatra, dia mety hanampy azy ireo ny famerenana mijery ny valintenin’izy ireo any aoriandriana ao amin’ny lesona na any aoriandriana amin’ity taona ity.

• Inona no zavatra tsapanao momba ny soratra masina? Nahoana?

• Raha manohy ny fahazaranao amin’izao fotoana izao eo amin’ny fandalinanao ianao mandritra ny taona maro manaraka, dia inona no ho fiantraikan’izany aminao raha ny eritreritrao?

• Raha tsy manana fahazarana mandalina soratra masina ianao amin’izao fotoana izao, inona no ilainao ho takarina na ho tsapa mba hanombohana mandalina izany?

Manohiza mieritreritra momba ireo fanontaniana ireo rehefa mandalina ity lesona ity ianao. Hamaky torohevitra momba ny soratra masina avy amin’i Benjamina Mpanjaka izay nomeny an’ireo zanakalahiny ianao. Katsaho ny hianatra amin’ny alalan’ny Fanahy Masina ny fomba ahafahan’ny soratra masina mitahy ny fiainanao.

Torohevitra avy amin’i Benjamina Mpanjaka

I Môzià, rain’i Benjamina Mpanjaka, dia nampitandreman’ny Tompo fa tokony hiala eo amin’ny tanindrazany ny olony. Rehefa nankatò izy ireo dia nahita ny vahoakan’i Zarahemlà (jereo ny Ômnia 1:12–19). Ireo vondron’olona roa ireo dia niara-nivondrona teo ambanin’ny fitarihan’i Môzià, izay notendrena ho mpanjaka, ary tamin’ny farany i Benjamina dia tonga mpanjaka taorian’ny rainy. Mety hanampy ny famantarana kokoa ny momba an’i Benjamina Mpanjaka mialoha ny handalinanao ny zavatra nampianariny ireo zanany.

Vakio ny Tenin’i Môrmôna 1:12–18 sy ny Môzià 1:1 hitadiavana ireo fahasarotana natrehin’i Benjamina Mpanjaka sy ny zavatra nataony nanaitra anao.

• Inona no hitanao?

  Avelao hizara eritreritra sy hevitra samihafa ny mpianatra.

• Inona no antony mety hanirianao handre torohevitra avy amin’i Benjamina Mpanjaka?

Vakio ny Môzià 1:2–7 hitadiavana ny zavatra nampianarin’i Benjamina Mpanjaka ireo zanakalahiny momba ny soratra masina. Mety hanampy ny mahafantatra fa “ny misterin’ Andriamanitra dia ireo fahamarinana ara-panahy tsy hay fantarina afa-tsy amin’ny alalan’ny fanambarana” (Torolalana ho an’ny soratra masina, “Misterin’ Andriamanitra,” scriptures.ChurchofJesusChrist.org). ChurchofJesusChrist.org

• Inona no nianaranao avy amin’i Benjamina Mpanjaka momba ny soratra masina?

Soraty eny amin’ny solaitrabe ny zavatra zarain’ny mpianatra. Raha tsy mizara fitsipika toy ireto manaraka ireto izy ireo, dia hevero ny hampiditra izany.

Ireo dia ny sasantsasany amin’ireo fitsipika azontsika ianarana avy amin’i Benjamina Mpanjaka:

• Raha tsy mandalina ny soratra masina tsy tapaka sy amim-pahazotoana isika, dia mety ho very tsikelikely ny finoantsika.

• Hahazo tombontsoa amin’ny alalan’ny fandalinana ny soratra masina amim-pahazotoana isika.

• Nahoana araka ny eritreritrao no mety ho very tsikelikely ny finoantsika raha tsy mandalina ny soratra masina isika?

Ny Tompo dia nampanantena fa hitahy antsika amin’ny lafiny maro rehefa mamaky ny soratra masina isika. Halalino ny vitsivitsy amin’ireto andinin-tsoratra masina manaraka ireto ary tadiavo ny sasantsasany amin’ireo fitahiana ireo:

• Josoa 1:8

• Salamo 119:105

• Lioka 24:27–32

• 1 Nefia 1:12

• 1 Nefia 15:24

• 2 Nefia 32:3

• Jakoba 2:8

• Almà 17:2

• Helamàna 15:7–8

• Fotopampianarana sy Fanekempihavanana 11:21–22

Asao hizara ny zavatra hitan’izy ireo ny mpianatra.

• Inona amin’ireo fitahiana ireo no irinao indrindra eo amin’ny fiainanao?

• Ahoana no hampitomboan’ireo fitahiana ireo ny finoantsika ny Tompo sy ny filazantsarany?

Soratra masina sy ny finoantsika

Nampianatra toy izao ny Loholona D. Todd Christofferson ao amin’ny Kôlejin’ny Apôstôly Roambinifolo:

Loholona D. Todd Christofferson

Ny tanjona fototry ny soratra masina rehetra dia ny hameno ny fanahintsika amin’ny finoana an’ Andriamanitra Ray sy ny Zanany, i Jesoa Kristy—finoana fa misy Izy Ireo; finoana ny drafitry ny Ray ho an’ny tsy fahafatesantsika sy ny fiainantsika mandrakizay; finoana ny Sorompanavotana sy ny Fitsanganan’i Jesoa Kristy tamin’ny maty, izay mamelona ity drafitry ny fahasambarana ity; finoana mba hahatonga ny filazantsaran’i Jesoa Kristy ho fomba fiainantsika; ary finoana mba hahalalana “ilay hany Andriamanitra marina, sy Jesoa Kristy, izay [nirahiny] ” (Jaona 17:3). (D. Todd Christofferson, “Ny fitahian’ny soratra masina,” Liahona, mey 2010, 34)

1. Soraty ny toko sy andinin-tsoratra masin’andininy roa na telo izay nisy fiantraikany lehibe teo amin’ny fiainanao na ny fijoroana ho vavolombelona anananao, indrindra fa momba an’i Jesoa Kristy na ny Ray any An-danitra. Ahoana no nanampian’ireo soratra masina ireo anao? Mety hanao ahoana ny fahasamihafan’ny fiainanao raha tsy mbola namaky ireny andininy ireny mihitsy ianao?

2. Halalino mandritra ny dimy minitra ny soratra masinao. Tadiavo ny fahamarinana rehetra izay mety hanampy hanao hitoetra ho mahatoky amin’ny Tompo sy ny filazantsarany. Ifantohy izay fahatsapana mety hanampy ihany koa. Manorata momba ny zavatra niainanao.

3. Mandefasa hafatra an-tsoratra na miresaha amin’olona iray izay heverinao fa mahatoky tanteraka amin’i Jesoa Kristy Tompo. Anontanio izany olona izany hoe inona no anjara asan’ny soratra masina amin’ny fanampiana azy hitoetra ho mahatoky.

4. ChurchofJesusChrist.org.

Manasà mpianatra maro hizara ny eritreritr’izy ireo na zavatra niainan’izy ireo. Ny fahenoana hevi-baovao sy fijoroana ho vavolombelona avy amin’ireo mitovy amin’ny tena dia afaka ny ho zavatra iainana mahery vaika. Hevero ihany koa ny hizara ny eritreritra sy ny fijoroana ho vavolombelona anananao manokana.

Ny fandalinana soratra masina ataonao manokana

Saintsaino ny fandalinanao soratra masina. Amin’ny fomba ahoana no itomboan’ny finoanao ny Ray any An-danitra sy i Jesoa Kristy rehefa mandalina amim-pahazotoana ny tenin’ Andriamanitra ianao? Misy zavatra tsapanao fa tian’ny Tompo hataonao ve mba hanatsarana ny fandalinanao? Hevero ny hanoratra izay tanjona rehetra mety hapetrakao ao anatin’ny diary fandalinanao.

Mety hahomby ny manontany ny mpianatra raha toa ka vonona hizara ireo tanjom-pandalinany izy ireo.

Fanazavana sy fampahalalana avy amin’ny zava-miseho

Ahoana no ahafahan’ny soratra masina manamafy orina sy manohana ny finoantsika?

Nampianatra toy izao ny Loholona D. Todd Christofferson ao amin’ny Kôlejin’ny Apôstôly Roambinifolo:

Loholona D. Todd Christofferson

Ny finoana dia azo avy amin’ny fijoroan’ny Fanahy Masina ho vavolombelona amin’ny fanahintsika, izany hoe Fanahy mankany amin’ny fanahy rehefa mandre na mamaky ny tenin’ Andriamanitra isika. Ary mihamafy orina ny finoana rehefa manohy mamoky ny tenantsika amin’ny teny isika.

Ny fitantarana ao amin’ny soratra masina ny finoan’ny hafa dia natao hanamafy ny antsika. …

Satria manazava ny fotopampianaran’i Kristy ny soratra masina, dia miaraka amin’ny Fanahy Masina izay manana anjara asa hijoro ho vavolombelona momba ny Ray sy ny Zanaka izy ireo (jereo ny 3 Nefia 11:32). Noho izany, fomba iray andraisantsika ny Fanahy Masina ny maha ao anatin’ny soratra masina antsika. Mazava ho azy fa ny soratra masina dia omena amin’ny alalan’ny Fanahy Masina voalohany indrindra (jereo ny 2 Petera 1:21; F&F 20:26–27; 68:4), ary izany Fanahy izany ihany dia afaka manamarina ny fahamarinan’ny soratra masina aminao sy amiko. Halalino tsara sy amim-pahamalinana ny soratra masina. Saintsaino izany ary mivavaha mikasika izany. Ny soratra masina dia fanambarana ary mbola hitondra fanambarana fanampiny. (D. Todd Christofferson, “Ny fitahian’ny soratra masina,” Liahona, mey 2010, 35)

Ahoana raha sahirana mafy aho mandalina soratra masina?

Tao amina gazetibokin’ny Fiangonana iray, dia nisy zatovo nanoratra hoe: “Sahirana mafy aho mandalina soratra masina. Nahoana no manan-danja lehibe tokoa ny mandalina azy ireo?”

Sahanasa fianarana fanampiny

Fomba hafa hanombohana ny lesona

Hevero ny hanasa ny mpianatra haka sary an-tsaina hoe handeha hanao dia lavitra ho any an’ala. Asaivo manome anarana zavatra telo izay tsapan’izy ireo fa ilainy mba hahatafavoahana velona izy ireo ary ny anton’izany. Avy eo dia ampitahao amin’ny fanaovana dia hahatafavoahana velona ara-panahy ny fiainantsika ary manasà mpianatra hizara zavatra telo tsapan’izy ireo fa manampy antsika hahazo sy hihazona finoana an’i Jesoa Kristy sy ny antony. Hazavao fa iray amin’ireo fitaovana tena tsara nomen’ny Tompo antsika mba hahatafavoahana velona ara-panahy ny soratra masina, ary asao ny mpianatra mba hisaintsaina ireo fanontaniana fanaovana fanombanana netsy ambony.

Ny ohatry ny vahoakan’i Zarahemlà

Mba hanehoana ireo fampianaran’i Benjamina Mpanjaka, dia asao handinika ny ohatry ny vahoakan’i Zarahemlà ny mpianatra. I Môzià Mpanjaka (rain’i Benjamina Mpanjaka) dia nanaraka ny fitaomam-panahy avy amin’ny Tompo ary nitarika ny vahoakany hiala tao amin’ny tanindrazan’izy ireo mandra-pahitan’izy ireo ny vahoakan’i Zarahemlà. Nanana zavatra betsaka nitoviana ireo vondrona roa ireo: izy ireo dia taranak’olona niala tany Jerosalema tamina fotoana mitovitovy ary nandeha nankany Amerika. Na izany aza, i Lehia sy ny fianakaviany dia nitondra soratra masina niaraka tamin’izy ireo, fa ireo razamben’ny vahoakan’i Zarahemlà kosa dia tsy nitondra. Asao hamaky ny Ômnia 1:14–17 ny mpianatra mba hahitana ny fiantraikan’ny tsy fisian’ny soratra masina teo amin’ny vahoakan’i Zarahemlà.

Lisitr’ireo soratra masina mahery vaika ataon’ny kilasy

Rehefa atsyo ambony ny mpianatra, dia azon’izy ireo atao ny manao lisitra an’ireo soratra masina izay mampatanjaka ny finoan’izy ireo. Azon’ny mpianatra tsirairay atao ny manoratra andininy iray na roa amina taratasy kely, izay azo apetaka amin’ny rindrina iray na ny solaitrabe. Na, azon’ny mpampianatra atao ny manambatra ny valintenin’ny mpianatra rehetra amina lisitra lava iray. Avy eo ny mpianatra afaka mahita andininy tian’ny mpiara-mianatra amin’izy ireo indrindra sy mamaky izany.

Taratasy kely mifono famporisihana

Any amin’ny fiafaran’ny lesona, ny mpianatra tsirairay dia afaka manoratra taratasy kely mba hamporisihana ny mpianatra hafa hamaky ny soratra masina. Afaka ny hatao ao anatin’ilay taratasy kely ireo fitsipika nianaran’ny mpianatra avy amin’io lesona io sy ireo fitahiana niainan’izy ireo teo amin’ny fiainan’izy ireo manokana.