Mosia 3:19

Zhveshja e Njeriut të Natyrshëm

A ndihesh ndonjëherë i acaruar nga gabimet e tua ose nga pamundësia për t’i zbatuar të gjitha urdhërimet e Perëndisë? Mbreti Beniamin iu referua natyrës sonë të papërsosur si “njeriu i natyrshëm”. Ai dha mësim se ne mund ta mposhtim këtë nëpërmjet Shlyerjes së Jezu Krishtit. Qëllimi i këtij mësimi është të të ndihmojë të kërkosh ndihmën e Shpëtimtarit për ta mposhtur natyrën tënde të rënë.

Krijimi një mjedisi që zgjeron të mësuarit. Të mësuarit zgjerohet kur mësuesit dhe nxënësit e duan dhe e respektojnë Zotin, njëri-tjetrin dhe fjalën e Perëndisë. Pranimi dhe dashuria që nxënësit ndiejnë nga të tjerët, mund t’i zbutin zemrat, ta pakësojnë frikën dhe të shtojnë dëshirën e tyre dhe sigurinë për t’i treguar ndjenjat dhe përvojat.

Përgatitja e nxënësve: Ftojini nxënësit të lexojnë vargun te Mosia 3:19 dhe ta përsiatin domethënien e tij. Mund t’i ftoni ata edhe që të gjejnë një shkrim të shenjtë ose thënie nga një udhëheqës i Kishës që e rrit kuptueshmërinë e tyre për një pjesë të këtij vargu.

Veprimtari të Mundshme të të Mësuarit

Natyra jonë e rënë

Merreni parasysh të paraqitni figurën e një ujku ndërsa tregoni rrëfimin nga Presidenti Dallin H. Ouks.

Presidenti Dallin H. Ouks, i Presidencës së Parë, tregoi historinë vijuese:

“Një çeroki i urtë, një nga fiset autoktone në Shtetet e Bashkuara, i tregoi nipit të tij një shëmbëlltyrë për jetën. ‘Brenda meje ka një luftë të tmerrshme midis dy ujqërve’, tha gjyshi. ‘Njëri është i lig: i mbushur me zemërim dhe smirë, me vetëmëshirim dhe brengë, me lakmi dhe me gënjeshtra. Tjetri është i mirë: i mbushur me dashamirësi dhe dhembshuri, përulësi dhe të vërtetë, dashuri dhe gëzim. Ajo luftë po ndodh brenda secilit prej nesh.’ ‘Cili ujk do të fitojë?’ pyeti nipi.” (Dallin H. Ouks, “Zgjedhjet”, Për Forcën e Rinisë, shtator 2021, f. 13; histori e përshtatur nga Shayne M. Bowen, “Agency and Accountability”, New Era, shtator 2012, f. 8)

• Po të ishe gjyshi, si mund t’i përgjigjeshe pyetjes së nipit tënd?

  Ftojini nxënësit të përsiatin përgjigjen e tyre për pyetjen vijuese:

• Në ç’mënyrë e ke vënë re këtë luftë mes “dy ujqërve” te vetja jote?

Te historia që tregoi Presidenti Ouks, përgjigjja e gjyshit për pyetjen e nipit të tij se cili nga ujqërit do të fitonte, ishte: “Ai që ti ushqen”.

Si pjesë të fjalimit të tij të fundit drejtuar nefitëve, mbreti Beniamin dha mësim të vërteta që një engjëll ia zbuloi atij rreth natyrës sonë të rënë dhe mënyrës se si ajo ndikon te marrëdhënia jonë me Perëndinë.

Lexo te Mosia 3:19, duke kërkuar se si e përshkroi mbreti Beniamin dikë që ka karakteristika si ato të ilustruara nga ujku i parë në histori.

Merreni parasysh t’i vini nxënësit të lexojnë vetëm pjesën e parë te Mosia 3:19 (duke mbaruar te fjalët “gjithmonë e përgjithmonë”) në këtë pikë të mësimit.

Mosia 3:19 është një fragment i zotërimit doktrinor.  Merre parasysh t’i shenjosh dallueshëm fragmentet e zotërimit doktrinor që të mund t’i gjesh me lehtësi. Do të kesh mundësi në mësimin e ardhshëm që ta ushtrosh zbatimin e doktrinës që jepet mësim në këtë fragment, për një pyetje ose situatë.

• Çfarë zbulove?

Merreni parasysh të shkruani fjalët Njeriu i Natyrshëm në tabelë si një krye. Ftojini nxënësit të mendojnë fjalë ose fraza që mund t’i ndihmonin ata ta kuptojnë domethënien e termit. Më pas vërini ata t’i renditin përgjigjet e tyre poshtë kreut.

Plaku Dejvid A. Bednar, i Kuorumit të Dymbëdhjetë Apostujve, dha mësim:

“Në njëfarë shkalle, njeriu i natyrshëm, i përshkruar nga Mbreti Beniamin, është gjallë dhe mirë brenda çdonjërit prej nesh. Burri apo gruaja e natyrshme është i/e papenduar, është prej mishi dhe epshor/e, është tolerues/e dhe i/e ekzagjeruar, dhe është krenar/e dhe egoist/e.” (Dejvid A. Bednar, “Ne Besojmë në Qenien të Dëlirë”, Liahona, maj 2013, f. 42)

• Si mendon, pse njeriu i natyrshëm është një armik ndaj Perëndisë?

• Çfarë mund të thotë ta “ushqejmë” burrin ose gruan e natyrshme brenda të gjithëve ne?

Për t’i ndihmuar nxënësit ta kuptojnë më tej njeriun e natyrshëm, merreni parasysh të paraqitni disa nga skenarët vijues ose mendoni për disa tuajt. Ftojini nxënësit të tregojnë se si mund t’i përgjigjet njeriu i natyrshëm secilit rast:

1. Dikush të fyen.

2. Po bën një provim dhe mund t’i shohësh përgjigjet e një nxënësi tjetër.

3. Një figurë e papërshtatshme del në pajisjen tënde elektronike.

Mendo për disa nga mënyrat se si i vë re qëndrimet ose sjelljet e burrit ose gruas së natyrshme në jetën tënde. Ndërsa vazhdon të studiosh, kërko mësimet që mund të të ndihmojnë në përpjekjet e tua për t’i mposhtur këto qëndrime dhe sjellje.

Mposhtja e njeriut të natyrshëm

Lexo përsëri te Mosia 3:19, këtë herë duke kërkuar atë që dha mësim mbreti Beniamin rreth mënyrës se si mund ta mposhtim njeriun e natyrshëm.

• Çfarë mësove nga ky varg që mund të të ndihmojë ta mposhtësh njeriun e natyrshëm?

Nëse shkruat më parë Njeriu i Natyrshëm në tabelë, merreni parasysh të bëni një titull të dytë duke përdorur fjalën Shenjtor. Ndërsa nxënësit zbulojnë të vërteta rreth mposhtjes së njeriut të natyrshëm dhe bërjes shenjtor nëpërmjet Shlyerjes së Shpëtimtarit, renditini ato në tabelë poshtë titullit të dytë.

Nga Mosia 3:19, mësojmë se nëse u jepemi shtysave të Shpirtit të Shenjtë, ne mund ta mposhtim njeriun e natyrshëm dhe të bëhemi shenjtorë nëpërmjet Shlyerjes së Jezu Krishtit.

• Si mendon se mund të na ndihmojë Jezu Krishti ta zhveshim njeriun e natyrshëm dhe të bëhemi një shenjtor nëpërmjet Shlyerjes së Tij?

• Çfarë mendon se do të thotë t’u jepemi shtysave të Shpirtit të Shenjtë? Si mendon se bërja e kësaj mund të të ndihmojë ta mposhtësh njeriun e natyrshëm?

Përdorimi i referencave‑kryq për ta thelluar kuptueshmërinë tënde

Merreni parasysh t’u jepni kohë nxënësve për ta thelluar kuptueshmërinë e tyre për mësimet te Mosia 3:19 duke përdorur aftësinë e studimit të shkrimeve të shenjta të referencave-kryq.

Përdorimi i referencave‑kryq është një aftësi e studimit të shkrimeve të shenjta që mund të ndihmojë të thellohet kuptueshmëria jote për një fragment të shkrimit të shenjtë. Ushtroje këtë aftësi duke gjetur referenca‑kryq që e thellojnë kuptueshmërinë tënde për mësimet te Mosia 3:19.

Merre parasysh të gjesh referenca-kryq duke kërkuar fjalët “njeri i natyrshëm” ose fjalë të tjera kyç nga Mosia 3:19 në programin Gospel Library [Biblioteka e Ungjillit]. Mund të shohësh edhe disa nga referencat e shkrimeve të shenjta dhe temat e renditura te poshtëshënimet për vargun te Mosia 3:19.

Mund t’i renditni në tabelë referencat vijuese të shkrimeve të shenjta. Më pas caktoni grupe të ndryshme që të lexojnë një ose më shumë prej tyre dhe të tregojnë atë që mësuan. Mund t’u jepni kohë nxënësve edhe që të gjejnë shkrime të shenjta ose thënie nga udhëheqësit e Kishës të lidhura me to.

• Galatasve 5:16–17

• Mosia 27:25–26

• Alma 22:13–14

• Ethëri 12:27

• Doktrina e Besëlidhje 11:12–13

Pasi nxënësit të kenë pasur kohë të mjatueshme për të studiuar, ftojini ata që t’ia tregojnë klasës atë që mësuan. Mund t’u kërkoni nxënësve të tregojnë atë që atyre iu duk më kuptimplotë dhe se si lidhet ajo me mësimet te Mosia 3:19. Ata mund të tregojnë edhe atë që mësuan rreth mënyrës se si Jezu Krishti na ndihmon ta mposhtim njeriun e natyrshëm. Ftoni nxënës të shumtë të japin idetë e tyre.

• Çfarë mësove rreth mënyrës se si Shpëtimtari mund të na ndihmojë ta mposhtim njeriun e natyrshëm dhe të bëhemi një shenjtor?

Zbatimi i kësaj në jetën tënde

Tani që ke mësuar më shumë rreth asaj se çdo të thotë të zhveshësh njeriun e natyrshëm dhe të bëhesh një shenjtor nëpërmjet Shlyerjes së Shpëtimtarit, mendo rreth mënyrës se si mund t’i zbatosh këto mësime në jetën tënde. Çfarë është një gjë që ndihesh i/e frymëzuar ta bësh ose të ndalosh së bëri? Shënoji mendimet dhe mbresat e tua në ditarin tënd të studimit.

Komente dhe Informacion për Rrethanat

Pse është e rëndësishme për mua që të përpiqem ta zhvesh njeriun e natyrshëm?

Plaku Dejvid A. Bednar, i Kuorumit të Dymbëdhjetë Apostujve, dha mësim:

“Natyra e saktë e provës së vdekshmërisë, atëherë, mund të përmblidhet në pyetjen vijuese: A do t’u përgjigjem prirjeve të njeriut të natyrshëm, apo do t’u jepem shtysave të Shpirtit të Shenjtë dhe do ta zhvesh njeriun e natyrshëm e do të bëhem shenjtor përmes Shlyerjes së Krishtit, Zotit (shih [te] Mosia 3:19)? Kjo është prova. Çdo oreks, dëshirë, prirje dhe shtysë e njeriut të natyrshëm mund të mposhtet nga Shlyerja e Jezu Krishtit dhe nëpërmjet saj. Jemi këtu në tokë për të zhvilluar cilësi të perëndishme dhe për t’i frenuar të gjitha pasionet e mishit.” (Dejvid A. Bednar, “Ne Besojmë në Qenien të Dëlirë”, Liahona, maj 2013, f. 43)

Po sikur të ndihem i/e shkurajuar në përpjekjet e mia për ta mposhtur njeriun e natyrshëm?

Plaku Xhefri R. Holland, i Kuorumit të Dymbëdhjetë Apostujve, dha mësim:

“Vetëm [Satani] do të thoshte: ‘Ti nuk mund të ndryshosh. Nuk do të ndryshosh. Është diçka tepër e gjatë dhe tepër e vështirë të ndryshosh. Hiq dorë. Dorëzohu. Mos u pendo. Kjo është natyra jote.’ Ajo, miqtë e mi, është një gënjeshtër e lindur nga dëshpërimi. Mos e besoni atë.” (Jeffrey R. Holland, “How to Change”, Liahona, shkurt 2017, f. 60)

Vëllai Bredli R. Uilkoks, i Presidencës së Përgjithshme të Shkollës të së Dielës, dha mësim:

“Perëndia na do siç jemi, por Ai gjithashtu na do aq shumë sa të mos na lërë siç jemi. Të rritemi për Zotin është gjithë qëllimi i vdekshmërisë. Ndryshimi është gjithë qëllimi i Shlyerjes së Krishtit. Krishti jo vetëm që mund të na ringjallë, pastrojë, ngushëllojë dhe shërojë, por nëpërmjet këtyre të gjithave, Ai mund të na shndërrojë që të bëhemi më shumë si Ai.” (Bredli R. Uilkoks, “Denjësia Nuk Është të Jesh i Patëmetë”, Liahona, nëntor 2021, f. 61)

Veprimtari Plotësuese të të Mësuarit

Mosia 3:19. T’u Jepemi Shtysave të Shpirtit të Shenjtë

Studiojini mësimet e mbretit Beniamin se si t’u jepemi shtysave të Shpirtit të Shenjtë. Mund të ndaloni dhe t’i ftoni nxënësit të mendojnë rreth kuptimit të fjalës jepem. Ftojini ata të mendojnë për kontekste të ndryshme në jetën e tyre ku ata e shohin ose përdorin atë fjalë, dhe të mendojnë rreth mënyrës se si mund t’u jepen shtysave të Shpirtit të Shenjtë në jetën e tyre. Shpirti e bën drejtësinë më tërheqëse. Merreni parasysh të ftoni disa nxënës të tregojnë se si Fryma e Shenjtë i ka ndihmuar ata në përpjekjet e tyre për ta zhveshur njeriun e natyrshëm.

Mosia 3:19. Cilësi si të Krishtit dhe cilësi si të një fëmije

Merreni parasysh t’i analizoni dhe diskutoni cilësitë si të një fëmije të renditura te Mosia 3:19. Si pjesë e këtij diskutimi, mund t’i ndihmoni nxënësit të mendojnë rreth mënyrës se si Jezu Krishti është shembull për secilën nga këto cilësi. Mund t’i ftoni nxënësit edhe që të kërkojnë në shkrimet e shenjta për shembuj ku Shpëtimtari demonstroi një ose më shumë nga këto cilësi. Merreni parasysh t’i ftoni nxënësit të diskutojnë rreth arsyes se përse mendojnë se bërja si një fëmijë është pjesë e procesit të zhveshjes së njeriut të natyrshëm.

Mosia 3:21. “Veçse nëpërmjet pendimit”

Për t’i theksuar më tej mësimet e mbretit Beniamin rreth zhveshjes së njeriut të natyrshëm dhe bërjes si një fëmijë nëpërmjet Jezu Krishtit, merreni parasysh t’i ftoni nxënësit të lexojnë te Mosia 3:16–23. Mund t’i ftoni nxënësit të shenjojnë frazën “veçse nëpërmjet pendimit” te Mosia 3:21. Ftojini nxënësit të japin ide për mënyrën se si pendimi mund t’i ndihmojë ata ta mposhtin natyrën e tyre të rënë dhe të qëndrojnë shpirtërisht të pastër.