Môzià 4

“Hitana mandrakariva ny famelana ny fahotanareo”

Mety ho hafa toy ny ahoana ny fiainanao raha mahatsapa fitomboana fifaliana sy fiadanan-tsaina ianao? Ireo Nefita izay voakasika tamin’ireo fampianaran’i Benjamina Mpanjaka, dia “feno fifaliana” sy nahatsapa “fiadanan-tsaina” rehefa nibebaka sy nandray famelana ny fahotan’izy ireo (Môzià 4:3). Nampianatra azy ireo hitana izany famelana ny helok’izy ireo izany i Benjamina Mpanjaka. Ity lesona ity dia afaka manampy anao hahatakatra ny zavatra azonao atao mba handraisana sy hitanana ny famelana ny fahotanao.

Mampianatra amin’ny alalan’ny Fanahy. Ny Fanahy Masina dia mijoro ho vavolombelona momba ny fahamarinana sy momba an’i Kristy ary manova ny fo. Amin’ny alalan’ny Fanahy Masina ihany no ahafahantsika manatanteraka ilay tanjona faratampon’ny fampianarana ny filazantsara—dia ny hanorina finoana an’i Jesoa Kristy sy hanampy ny hafa ho tonga tahaka Azy bebe kokoa. Mitadiava fomba hanasana ny Fanahy Masina hanao ny anjara asany.

Fanomanana ny mpianatra: Asao hamaky ny Môzià 4 ny mpianatra ka hitady ny fomba niantraikan’i Jesoa Kristy tamin’ny olona sy ny zavatra nanasan’i Benjamina Mpanjaka ny olona hatao taorian’ny nandraisan’izy ireo famelana ny fahotan’izy ireo.

Sahanasa fianarana azo atao

Mitoetra ho matanjaka ara-panahy

Jereo ity sary manaraka ity ary hevero ny zavatra ilaina ataon’ny olona iray mba hihazonana io zavamaniry io ho salama tsara sy hitombo.

Hevero ny hitondra zavamaniry maniry tsara ao am-pianarana na hampiseho ilay sary eo ambany.

• Inona no hitranga amin’io zavamaniry io raha avela ao amina efitrano maizina na tsy tondrahana mihitsy?

• Ahoana no mety hifandraisan’izany amin’ny fahasalamantsika ara-ara-panahy sy ireo zavatra ilaintsika ara-panahy?

Tahaka ny fikarakarana zavamaniry, ny fihazonana ny tenantsika ho salama ara-panahy dia mitaky ezaka tsy miovaova. Ao amin’ny Môzià 4, i Benjamina Mpanjaka dia nampianatra ny olony ny zavatra ilain’izy ireo atao mba hatanjaka ara-panahy hatrany. Rehefa mandalina ianao, dia saintsaino ireo fampianarana izay hanampy anao amin’ny ezaka ataonao mba hijanona hatanjaka ara-panahy mandritra ny fiainanao sy hitombo mba ho tonga kokoa tahaka ny Mpamonjy.

Mitana ny famelana ny fahotantsika

Tsarovy fa tao anatin’ny lahateny nataony, i Benjamina Mpanjaka dia nizara hafatra iray noraisiny avy amina anjely momba ny fahatongavan’i Jesoa Kristy sy ny maha-zava-dehibe ny fandresena ny fahalavoantsika amin’ny alalan’ny Sorompanavotan’ny Mpamonjy (jereo ny Môzià 3).

Vakio ny Môzià 4:1–3, hitadiavana ireo fitahiana sy fahatsapana niainan’ny vahoakan’i Benjamina Mpanjaka.

• Inona no manan-danja aminao ao amin’ireo andininy ireo?

• Inona no heverinao fa mety hilain’ny olona atao mba hitoerana amin’io toetra voadio sy feno fifaliana io?

Hevero ny hanasa ny mpianatra hanakimpy ny mason’izy ireo sy hisaintsaina ity manaraka ity. Rehefa avy misaintsaina izy ireo, dia azon’izy ireo atao ny mirakitra an-tsoratra ny valin-tenin’izy ireo amin’ilay fanontaniana ao amin’ny diary fandalinan’izy ireo.

Alaovy sary an-tsaina hoe mety ho toy ny ahoana izany hoe anisan’ireo vahoakan’i Benjamina Mpanjaka tamin’izany andro izany. Diniho hoe ahoana, araka ny eritreritrao, no fomba niantraikàn’izany tamin’ny fahatsapanao momba an’i Jesoa Kristy ary, avy amin’izay zavatra niainana izay, inona no zavatra tianao hotanana miaraka aminao mandrakizay.

• Mety ho hafa toy ny ahoana ny fiainanao raha mahatsapa famelana ny helokao matetika kokoa ianao?

Ny ambin’ireo fampianaran’i Benjamina Mpanjaka ao amin’ny Môzià 4 dia manampy antsika hahatakatra fa rehefa avy mandray famelan-keloka avy amin’i Jesoa Kristy isika, dia tsy maintsy manao ezaka hitanana ny famelana ny fahotantsika.

• Inona araka ny eritreritrao no mahasamihafa ny mandray sy ny mitana ny famelana ny fahotantsika?

• Nahoana araka ny eritreritrao no zava-dehibe amintsika ny mitana ny famelana ny fahotantsika mandritra ny fiainantsika?

Ity andiam-pehezanteny manaraka ity dia natao hanampiana ny mpianatra hisaintsaina sy handinika fa tsy hizara ny eritreritra na fahatsapan’izy ireo amin’ny iray kilasy.

Hevero ny fomba iharan’io fahamarinana io amin’ny fiainanao manokana. Manao ahoana ny fahatsapanao ny fihazonanao ny famelana ny fahotanao? Rehefa manohy mandalina ianao, dia mitadiava fahamarinana izay afaka manampy anao hahatakatra ny zavatra azonao atao mba handraisana sy hitanana ny famelana ny fahotanao.

Hevero ny hanao lisitra ity lohateny manaraka ity eny amin’ny solaitrabe: Ny zavatra azontsika atao mba hitanana ny famelana ny fahotantsika. Azon’ny mpianatra atao lisitra eny amin’ny solaitrabe ny zavatra hitan’izy ireo rehefa mandalina izy ireo. Azo atao ny manao lisitra mitovitovy amin’izany ao amin’ny diary fandalinan’izy ireo.

Vakio ny Môzià 4:9–16 ary mitadiava fampianaran’i Benjamina Mpanjaka izay manampy antsika hahatakatra ny fomba ahafahantsika mitana ny famelana ny fahotantsika.

Ao anatin’ity sahanasa fianarana manaraka ity, hevero ny hamela ny mpianatra ho eny amin’ny solaitrabe ka hanoratra andian-teny maromaro avy ao amin’ny Môzià 4:9–16 izay tsapan’izy ireo fa manan-danja indrindra amin’izy ireo. Ny fanontaniana toy ireto manaraka ireto araka izany dia azo ampiasaina hanampiana ny mpianatra hifanakalo hevitra amin’ny zavatra hitan’izy ireo avy amin’ireo andininy ireo.

• Inona no zavatra telo farafahakeliny nampianarin’i Benjamina Mpanjaka fa tsy maintsy ataontsika mba hitanana ny famelana ny fahotantsika ka manan-danja indrindra aminao?

• Mety hanao ahoana araka ny eritreritrao raha mampihatra ireo fanasana avy amin’i Benjamina Mpanjaka ireo eo amin’ny fiainanao ianao?

• Ahoana no mety hahafahan’ny fanaovana ireny zavatra ireny manampy anao hitana ny famelana ny fahotanao?

Raha misy fotoana dia azon’ny mpianatra atao ny mandalina ny fanasongadinan’i Benjamina Mpanjaka ny fikarakarana ny hafa ao amin’ny Môzià 4:17–26. Misy hevitra maromaro hita eo ambanin’ny hoe “Ny andraikitsika hikarakara ny hafa” ao amin’ny fizarana hoe “Sahanasa fianarana fanampiny”.

Ireo dingana ataoko manaraka

Saintsaino ny hoe vitanao tsara toy ny ahoana ny mampihatra ireo fampianaran’i Benjamina Mpanjaka ao amin’ireo andininy ireo. Azonao atao ny manao izany amin’ny alalan’ny fifantohana amina fitondrantena telo na efatra vao avy hitanao sy ny fametrahana fanontaniana toy izao amin’ny tenanao:

• Manao ahoana ny habetsahan’ny ezaka ataoko amin’izany?

• Matetika toy ny ahoana no hanaovako izany?

• Inona avy no fahatsapana nananako androany ka mety hampiseho sehatra ahafahako mivoatra?

Manaova drafitra manokana ombam-bavaka mba hivoarana amina sehatra iray. Diniho ny sakana rehetra mety hatrehinao rehefa miezaka ny hivoatra amin’izany sehatra izany ianao sy ny zavatra mety hataonao mba handraisana ny fanampian’ny Tompo handresena izany olana izany. Mety hanampy raha zaraina amin’ny olona iray ao amin’ny fianakaviana na olona akaiky iray izay afaka manohana anao amin’izany ny tanjonao. Mety ho azonao atao ihany koa ny hampiditra izany tanjona izany ao amin’ny tanjon’ny Ankizy sy Zatovo napetrakao.

Fanazavana sy fampahalalana avy amin’ny zava-miseho

Môzià 4:2. Inona no hevitry ny hoe “nahita ny tenany … [ho] ambany kokoa noho ny vovon-tany” ny vahoakan’i Benjamina Mpanjaka?

Mety ho nandray ny tenany ho “ambany kokoa noho ny vovon-tany” ny vahoakan’i Benjamina Mpanjaka (Môzià 4:2) satria ny vovon-tany dia mankatò ny baikon’ny Tompo mandrakariva, fa ny zanak’ Andriamanitra dia matetika no tsy manao izany (jereo ny Helamàna 12:4–8). Tadidio fa ny Ray any An-danitra dia manome lanja ny zanany ary ny fahotantsika dia tsy misy fiantraikany amin’ny lanja avy amin’ Andriamanitra ananantsika (jereo ny Fotopampianarana sy Fanekempihavanana 18:10).

Ny Rahavavy Joy D. Jones, izay efa Filohan’ny Kilonga maneran-tany, dia nampianatra toy izao:

Raha toa isika ka manota dia mihena ny fahamendrehantsika kanefa tsy ho latsa-danja na oviana na oviana isika! Manohy mibebaka sy milofo ny ho toa an’i Jesoa isika miaraka amin’ny lanjantsika tsy misy tomíka. (Joy D. Jones, “Fananana lanja tsy hay refesina,” Liahona, nôv. 2017, 14)

Inona no anjara asa hazonin’ny ôrdônansin’ny filazantsara amin’ny fihazonana ny famelana ny fahotantsika?

Nampianatra toy izao ny Loholona David A. Bednar ao amin’ny Kôlejin’ny Apôstôly Roambinifolo:

Amin’ny maha-mpikamban’ny Fiangonan’ny Tompo naverina tamin’ny laoniny antsika dia voatahy amin’ny alalan’ny fanadiovana voalohany amin’ny fahotana izay mifandray amin’ny batisa sy amin’ny alalan’ilay fahafahana mahazo fanadiovana amin’ny fahotana eo am-pandehanana izay tanteraka noho ny fananana ny Fanahy Masina ho namana sy ny heriny isika. …

Indraindray ny Olomasin’ny Andro Farany dia maneho faniriana mba ho azo atao batisa indray—amin’izay dia ho lasa madio sy mendrika toy ny tamin’ilay andro nandraisan’izy ireo ny ôrdônansin’ny filazantsara voalohany izay mitondra famonjena. Mamelà ahy hanoro hevitra amim-panajana fa ny Raintsika any An-danitra sy ny Zanany Malalany dia tsy mikasa ny hampiaina antsika fahatsapana fanavaozana sy filaminana ary fanarenana ara-panahy toy izany indray mandeha ihany eo amin’ny fiainantsika. Ireo fitahian’ny fahazoana famelana ny fahotantsika sy ny fitanana mandrakariva izany amin’ny alalan’ireo ôrdônansin’ny filazantsara dia manampy antsika hahatakatra fa ny batisa dia toerana iaingana eo amin’ilay diantsika ara-panahy eto an-tany. Tsy toerana hivantanana izay hoe tokony hirintsika hiverimberenana. (David A. Bednar, “Hitana mandrakariva ny famelana ny fahotanareo,” Liahona, mey 2016, 61–62)

Inona no azoko atao mba hikarakarana ny mahantra sy ny sahirana?

Nampianatra toy izao ny Loholona Dieter F. Uchtdorf ao amin’ny Kôlejin’ny Apôstôly Roambinifolo:

Ny fomba fikarakaran’ny Tompo ny sahirana dia tsy mitovy amin’ny fomban’izao tontolo izao. Nilaza ny Tompo hoe “Tsy maintsy ilaina ny hanaovana izany araka ny fombako” [Fotopampianarana sy Fanekempihavanana 104:16]. Tsy ny zavatra ilaintsika eo no ho eo ihany no mahaliana Azy; fa tena miahiahy ny amin’ny fivoarantsika mandrakizay ihany koa Izy. Noho izany antony izany, ny fomban’ny Tompo dia tsy maintsy ahitana ny fizakan-tena sy ny fanompoana ny namantsika ho fanampin’ny fikarakarana ireo mahantra. (Dieter F. Uchtdorf, “Manome araka ny fomban’ny Tompo,” Liahona, nôv. 2011, 54)

Hevero ny hizaha ilay tranonkala JustServe.org mba hahitana lala-misokatra hikarakarana ny mahantra sy ny sahirana any amin’ny faritra misy anao.

Sahanasa fianarana fanampiny

Mampitaha ny Môzià 4 amin’ny 2 Nefia 31

Rehefa mandalina ny Môzià 4 ny mpianatra, dia hevero ny hanasa azy ireo hanamarika ny fifandraisana misy eo amin’io toko io sy ireo fampianarana ao amin’ny 2 Nefia 31:17–21. Ahoana no ahafahan’ireo fampianaran’i Benjamina Mpanjaka ao amin’ny Môzià 4 manampy olona iray hahatakatra tsara kokoa ny dikan’ny hoe maharitra hatramin’ny farany amin’ny lalana ety sy tery? Inona avy no fitovitoviana hitan’ny mpianatra eo amin’ireo fampianaran’i Nefia ao amin’ny 2 Nefia 31:17–21 sy ireo fampianaran’i Benjamina Mpanjaka ao amin’ny Môzià 4?

Mitandrina ny eritreritrareo sy ny teninareo ary ny ataonareo (Môzià 4:30)

Hazavao fa taorian’ny nampianaran’i Benjamina Mpanjaka ny olony ny fomba hitanana ny famelana ny fahotan’izy ireo sy hahavoavonjy azy ireo, dia nampitandrina azy ireo izy momba ny zavatra mety hahatonga azy ireo “ho faty” na ho tonga very ara-panahy sy tafasaraka amin’ Andriamanitra. Hevero ny hanasa ny mpianatra hamaky ny Môzià 4:29–30, ka hitady ny fomba ahafahantsika misoroka ny fahafatesana ara-panahy. Inona no ifandraisan’ny eritreritsika sy ny tenintsika ary ny ataontsika? Inona no azontsika atao mba hitandremantsika ny tenantsika?

Ny andraikitsika hikarakara ny hafa

Teo am-pampianarana momba ireo fihetsika tsy maintsy ataontsika mba hitanana ny famelana ny fahotantsika, i Benjamina Mpanjaka dia nanantitrantitra fa tsy maintsy manome ny hafa izay mangataka ny fanampiantsika isika. Azo atao ny mangataka ny mpianatra hamaky ny Môzià 4:16–26, hitadiavana ireo fampianaran’i Benjamina Mpanjaka momba ny fikarakarana ny mahantra sy ny sahirana. Asao hizara ny zavatra manan-danja amin’izy ireo avy amin’ireo andininy ireo ny mpianatra. Ao anatin’ny fanontaniana azonao eritreretina hifanakalozan-kevitra ny hoe: Ahoana no ahafahan’ny fahatsiarovana ny fifandraisantsika amin’ Andriamanitra manova ny fomba amaliantsika ny hafa sahirana? Nahoana araka ny eritreritrao no manantitrantitra ireo fampianarana ireo ao amina toko iray momba ny fandraisana sy fitanana ny famelana ny fahotantsika i Benjamina Mpanjaka?