Mosia 27:1–24

“Ai Është Lutur me Besim të Madh në Lidhje me Ty”

një engjëll duke ndaluar Alma të Riun

A e di se si është të shohësh njerëzit e tu të dashur ta refuzojnë të vërtetën? Alma dhe mbreti Mosia e njihnin pikëllimin që vjen kur i sheh pjesëtarët e familjes të rebelohen kundër Shpëtimtarit dhe Kishës së Tij. Nëpërmjet mëshirës së Krishtit, ata u bekuan në fund që të ndienin gëzimin e të parit të këtyre njerëzve të dashur të pendoheshin. Ky mësim mund të të ndihmojë të zbulosh mënyra për t’i ndihmuar ata që i refuzojnë mësimet e Jezu Krishtit të kthehen tek Ai.

Ftesa ndaj nxënësve që t’i shqyrtojnë ndjenjat e tyre. Bëni pyetje që i ndihmojnë nxënësit të reflektojnë për përvojat shpirtërore dhe të kujtojnë kur e kanë ndier vërtetësinë e një parimi të ungjillit. Të kujtuarit e këtyre ndjenjave mund t’i ndihmojë nxënësit të dëshirojnë ta jetojnë ungjillin dhe ta lënë atë t’ju depërtojë. Sigurojini nxënësit se nuk ka problem nëse nuk kanë pasur ose nuk kanë dalluar ende përvoja me një parim të dhënë.

Përgatitja e nxënësve: Merreni parasysh t’i ftoni nxënësit të përgatiten për të treguar histori nga shkrimet e shenjta në të cilat Zoti e ndihmoi dikë të humbur ose rebel që të ndryshonte.

Veprimtari të Mundshme të të Mësuarit

Ka shpresë nëpërmjet Krishtit

Ftojini nxënësit të përsiatin në heshtje për sa vijon:

A ka ndonjë për të cilin je i/e shqetësuar ngaqë ka vështirësi shpirtërore ose edhe rebelim kundër Perëndisë? Nëse po, mbaje këtë person në mendje teksa studion sot. Në të njëjtën mënyrë, nëse ke vështirësi shpirtërore, mund të mbash vetë situatën tënde në mendje gjatë gjithë mësimit.

Paraqiteni vlerësimin vijues të vetes. Ftojini nxënësit të japin mendimet e tyre, duke përfshirë shembuj nga veprimtaria përgatitja e nxënësve.

Përsiat se sa me saktësi të përshkruajnë thëniet vijuese:

1. Unë besoj se nuk është tepër vonë për ata që kanë vështirësi shpirtërore ose rebelim për t’u shëruar nga Jezu Krishti.

2. Unë kam parë shembuj në shkrimet e shenjta dhe te njerëzit rreth meje që më japin shpresë për njerëzit që kanë vështirësi shpirtërore ose rebelim.

3. Unë e di se çfarë mund të bëj për t’i ndihmuar njerëzit që kanë vështirësi shpirtërore ose rebelim.

Teksa studion kapitullin te Mosia 27 sot, kërko arsyet për të pasur shpresë dhe se çfarë mund të bësh për t’i ndihmuar ata që kanë vështirësi shpirtërore ose rebelim.

Ndihma ndaj të humburve shpirtërisht

Lexo te Mosia 27:1, 8–10 për të parë se për kë u shqetësuan profeti Alma dhe mbreti Mosia.

• Si mendon se mund të kenë ndikuar zgjedhjet e këtyre të rinjve te prindërit, motrat e vëllezërit dhe shokët e tyre?

Lexo te Mosia 27:11–16, 19 për të parë atë që bëri Zoti për ta ndihmuar Alma të Riun ta ndryshonte jetën e tij dhe arsyen. Nëse dëshiron, mund të shohësh edhe materialin filmik “Alma i Riu Kthehet në Besim te Zoti” nga kodi kohor 03:06 deri në 06:59.

• Cilat fraza nga mesazhi i engjëllit mendon se do të kishin pasur më shumë ndikim se të tjerat te këta të rinj?

• Si mund ta tregojë kjo përvojë dashurinë dhe dëshirën e Perëndisë për t’i shpëtuar këta të rinj (si edhe të tjerë që janë të humbur shpirtërisht)?

• Sipas vargut te Mosia 27:14, si tha engjëlli, pse kishte ardhur tek Alma i Riu dhe bijtë e Mosias? (Merre parasysh ta shenjosh përgjigjen për këtë pyetje në shkrimet e tua të shenjta.)

Gjej një çast për të përsiatur se çfarë parimesh mund të mësosh nga këto vargje.

Ftojini nxënësit të tregojnë parime të ndryshme. Merreni parasysh t’i shkruani në tabelë parimet që ata përmendin. Nëse nxënësit nuk e përmendin në mënyrë të natyrshme, merreni parasysh ta shkruani parimin vijues në tabelë:

Një parim që mund të mësojmë është se lutja me besim të madh për ata që kanë vështirësi shpirtërore ose rebelim, e fton Zotin t’i ndihmojë ata të arrijnë në një njohuri të së vërtetës.

Mbaj mend se Zoti nuk do ta shkelë lirinë morale të zgjedhjes të atyre për të cilët lutemi. Pavarësisht se u vizituan nga një engjëll, Alma dhe bijtë e Mosias mund ta kishin përdorur gjithsesi lirinë e tyre të zgjedhjes për të mos u penduar. Megjithëse Ati Qiellor mund të mos dërgojë një engjëll tek njerëzit tanë të dashur, Ai do t’u përgjigjet lutjeve tona në mënyrën dhe kohën e Tij. Ne mund të besojmë se Ai do të na ndihmojë. Në mësimin e radhës do të mësosh më shumë rreth rolit të Zotit në ndryshimin e Almës.

• Si përfytyron se mund të kenë qenë lutjet e Alma Plakut? Si mendon, çfarë do të thotë të lutesh “me besim të madh” (Mosia 27:14)?

  Ka pyetje të tjera të mundshme për ndjekjen e ecurisë: Si mendon, pse mund të kemi besim se Zoti do të bëjë atë që është më e mira për ata që po kalojnë vështirësi? Pse mund të jetë mirë të lutesh që ata të mund “të sille[n] në njohurinë e së vërtetës” (Mosia 27:14)?

• Si mendon, përse Zoti dëshiron që ne të lutemi për ata që kanë vështirësi shpirtërore ose rebelim?

  Nxitni vullnetarë të tregojnë përvoja si përgjigje ndaj pyetjeve vijuese. Nëse dëshironi, mund edhe të tregoni një përvojë vetjake.

• Kur e ke ndier se lutjet e tua kanë sjellë një ndryshim në jetën e dikujt tjetër? Kur mendon se të kanë ndihmuar lutjet e dikujt tjetër?

Përsiat për gjëra specifike për të cilat mund të lutesh kur i kërkon Atit Qiellor ta ndihmojë dikë që ka vështirësi shpirtërore. Mundesh madje ta ndërpresësh studimin tënd për t’u lutur për të tani.

Çfarë mund të bëj më shumë?

Merreni parasysh t’i ndani nxënësit në dyshe, me secilin partner që studion njërin nga fragmentet vijuese të shkrimit të shenjtë. Ftojini që t’ia tregojnë njëri-tjetrit atë që mësojnë.

Lexoji fragmentet vijuese të shkrimit të shenjtë duke kërkuar atë që bëri Alma dhe të tjerët, përveçse u lutën, për ta ndihmuar djalin e tij të kthehej te Zoti.

Mosia 27:20–24

Alma 36:17–19 (Përshkrimi i mëvonshëm i Alma të Riut për atë që babai i tij i kishte mësuar dhe se si e ndihmoi kjo atë)

• Çfarë bëri Alma, përveçse u lut, për ta ndihmuar djalin e tij?

Merreni parasysh t’i lejoni dyshet e bashkëpunimit të zgjedhin se cilën nga sa vijon dëshirojnë ta studiojnë së bashku.

Studioje njërën nga gjërat vijuese që bëri Alma dhe mbaji shënim mendimet e tua. Teksa studion, mund të mbash në mendje një njeri të dashur që ka vështirësi shpirtërore ose madje rebelim:

1. Agjërimi – Mëso më shumë rreth agjërimit duke kërkuar te ChurchofJesusChrist.org, programi Gospel Library [Biblioteka e Ungjillit], Udhëzuesi për Shkrimet e Shenjta ose fragmente të tjera të shkrimeve të shenjta si Marku 9:17–18, 25–29. Si mund të të ndihmojë agjërimi ty ose njeriun tënd të dashur? A ka të tjerë që mund t’i ftosh të të bashkohen në agjërim?

2. Dëshmimi – Krahasoje përvojën e Almës të përshkruar tek Alma 36:17–19 me përvojën e Enosit tek Enosi 1:1–5. Përsiat për aftësinë e Frymës së Shenjtë për t’ua kujtuar njerëzve atë që kanë dëgjuar kur u nevojitet (shih te Gjoni 14:26). Kjo mund të na japë kurajë për t’ua dhënë dëshminë tonë për Krishtin edhe atyre që duken të pandjeshëm. Mund të na ndihmojë gjithashtu të kujtojmë atë që dimë dhe besojmë rreth Shpëtimtarit kur mund të na nevojitet më së shumti. Si mund ta japësh dëshminë tënde për Shpëtimtarin?

Ftojini dyshet e bashkëpunimit t’ia tregojnë klasës atë që mësuan dhe të tregojnë përvojat që kanë pasur me agjërimin ose me Frymën e Shenjtë që u ka kujtuar gjëra kur u nevojitej.

Merreni parasysh t’i paraqitni pyetjet vijuese dhe t’u jepni nxënësve kohë që të përgjigjen në ditarët e tyre të studimit.

• Çfarë mësove nga ky tregim rreth mënyrës se si t’i ndihmosh ata që kanë vështirësi shpirtërore?

• Çfarë këshille do t’i jepje dikujt, njeriu i dashur i të/së cilit/ës nuk ndryshon shpejt?

• Cili është roli i Shpëtimtarit te ndihma ndaj atyre që duam? Përse mund të mirëbesosh se Ai do t’i ndihmojë ata?

• Çfarë gjërash specifike ndien nxitjen të bësh ose të thuash për ta ndihmuar dikë të kthehet te Shpëtimtari?

Komente dhe Informacion për Rrethanat

Çfarë ndien Ati Qiellor për ata që janë të humbur apo rebeluar?

Plaku Xhefri R. Holland, i Kuorumit të Dymbëdhjetë Apostujve, dha mësim:

Plaku Xhefri R. Holland

“Imazhi i dhembshur i babait [të djalit plëngprishës] plot ankth e besnik, që vrapon për ta takuar atë dhe e mbulon me të puthura, është një nga skenat më prekëse dhe më mallëngjyese në gjithë shkrimet e shenjta. Ai i tregon çdo fëmije të Perëndisë, i pabindur apo jo, se sa shumë Perëndia dëshiron që ne të kthehemi në krahët e Tij mbrojtës.” (Jeffrey R. Holland, “The Other Prodigal”, Ensign, maj 2002, f. 62)

Përse po zgjat kaq shumë ndryshimi te njeriu im i dashur (ose tek unë) krahasuar me përvojën e Alma të Riut?

Presidenti Ezra Taft Benson (1899–1994), shpjegoi:

Presidenti Ezra Taft Benson

“Shkrimet e shenjta shënojnë tregime mbresëlënëse për njerëz jeta e të cilëve ndryshoi ndjeshëm, në çast, siç i ndodhi: Alma të Riut, Palit në rrugën për në Damask, Enosit duke u lutur deri natën vonë, mbretit Lamoni. Shembuj të tillë të mahnitshëm të fuqisë për t’i ndryshuar edhe ata që ishin zhytur në mëkat, japin siguri se Shlyerja mund të arrijë edhe tek ata që janë në dëshpërimin më të thellë.

Por duhet të jemi të kujdesshëm kur i diskutojmë këta shembuj mbresëlënës. Ndonëse janë të vërtetë dhe të fuqishëm, ata janë përjashtimi më tepër sesa rregulli. Për çdo Pal, për çdo Enos dhe për çdo mbret Lamoni, ka qindra e mijëra njerëz të cilëve procesi i pendimit u duket shumë më delikat, shumë më i paperceptueshëm. Ditë pas dite ata i shkojnë më pranë Zotit, duke mos e kuptuar se po ndërtojnë një jetë të perëndishme. Ata jetojnë jetë të heshtur me mirësi, shërbim dhe zotim.” (Ezra Taft Benson, “A Mighty Change of Heart”, Ensign, tetor 1989, f. 5)

Çfarë bekimesh vijnë nëpërmjet agjërimit?

Plaku Shein M. Bouen, i Të Shtatëdhjetëve, dha mësim:

Plaku Shein M. Bouen

“Po sikur të kishte një mënyrë për t’i mposhtur zakonet, varësitë dhe barrët tona? Po sikur të kishte një mënyrë për të fituar siguri të mjaftueshme te Zoti sa të mund të thërritnit që të zbritnin fuqitë e qiellit? Po sikur të kishte parime që mund t’jua mësonit njerëzve tuaj të dashur që, nëse zbatohen, do t’u lejonin atyre t’i mposhtnin dobësitë vetjake dhe të afroheshin më shumë me Perëndinë?

Teksa e kuptojmë dhe e jetojmë siç duhet ligjin e agjërimit, këto bekime të dëshiruara mund të bëhen tonat.” (Shayne M. Bowen, “Fasting with Power”, Ensign, prill 2009, f. 64)

Veprimtari Plotësuese të të Mësuarit

Fuqia dhe autoriteti i Perëndisë

Një engjëll u dërgua tek Alma i Riu pjesërisht për ta “bind[ur] … për fuqinë dhe autoritetin e Perëndisë” (Mosia 27:14). Ka shumë mënyra të tjera për ta dalluar fuqinë dhe autoritetin e Perëndisë. Disa mund ta ndiejnë atë duke parë krijimet e Tij, të tjerët nëpërmjet lutjeve që marrin përgjigje. Ftojini nxënësit të tregojnë mënyra se si kanë arritur ta dallojnë fuqinë dhe autoritetin e Perëndisë.

Agjërimi

Ftojini nxënësit të tregojnë atë që dinë rreth agjërimit dhe çfarë bekimesh kanë përjetuar nëpërmjet agjërimit. ChurchofJesusChrist.org

Engjëjt e Perëndisë

Plaku Xhefri R. Holland, i Kuorumit të Dymbëdhjetë Apostujve, dha mësim: “Unë dëshmoj për engjëjt, ata të llojit qiellor dhe ata të vdekshëm. … Gjenden ata engjëj që vijnë e shkojnë kudo rreth nesh, të shikuar e të pashikuar, të njohur e të panjohur, të vdekshëm dhe të pavdekshëm” (“Shërbesa e Engjëjve”, Ensign ose Liahona, nëntor 2008, f. 31).

Ndonëse një engjëll nga qielli u shfaq për ta ndihmuar Alma të Riun, Perëndia shpesh i dërgon shërbëtorët e Tij të vdekshëm për të bërë punën e Tij. Në njëfarë kuptimi, këta lajmëtarë të vdekshëm të Perëndisë mund të konsiderohen engjëj. Ftojini nxënësit të tregojnë se kë ka dërguar Perëndia për t’i bekuar, korrigjuar, ngushëlluar ose për t’u dhënë atyre mesazhe. Ju mund të tregoni edhe një përvojë vetjake të dikujt që ishte si një engjëll në jetën tuaj ose një përgjigje për një lutje që keni bërë ju ose dikush tjetër.