Mosia 26

“Në Qoftë se i Rrëfen Mëkatet e Tij … dhe Pendohet”

një i ri duke folur me peshkopin ose presidentin e tij të degës

Si mund të na ndihmojë pendimi në jetën tonë të përditshme? Përse është e nevojshme t’i rrëfejmë mëkatet tona si pjesë e pendimit tonë? Si kryeprift në Kishën e Shpëtimtarit, Alma donte t’i ndihmonte ata që kishin kryer mëkate të rënda. Zoti i dha atij drejtim të qartë për sa i përket asaj që ai duhej të bënte. Ky mësim ka për qëllim të të ndihmojë ta kuptosh natyrën e dashur dhe falëse të Atit Qiellor dhe Jezu Krishtit dhe arsyen përse duhet të pendohemi për mëkatet tona.

Duajini ata, të cilëve u jepni mësim. Nëpërmjet fuqisë së Frymës së Shenjtë, ne mund të mbushemi me dashurinë e Atit Qiellor dhe Jezu Krishtit. Lutuni që të mund të mbusheni me këtë dashuri për nxënësit tuaj dhe kërkoni mundësi për ta shprehur dashurinë tuaj në mënyra të përshtatshme teksa jepni mësim.

Përgatitja e nxënësve: Ftojini nxënësit të mendojnë për pyetjet që kanë rreth pendimit. Nxitini ata të lexojnë te Mosia 26, duke kërkuar përgjigjet për këto pyetje.

Veprimtari të Mundshme të të Mësuarit

Çfarë do të bëje?

Përfytyro sikur e dëgjove dikë të përmendte pyetjet dhe shqetësimet vijuese rreth pendimit:

Merreni parasysh t’i shkruani thëniet dhe pyetjet vijuese në tabelë përpara fillimit të orës mësimore.

• Nuk jam i/e sigurt a ia vlen të pendohesh.

• Përse duhet t’i rrëfej mëkatet e mia? Përse disa mëkate duhet t’i rrëfehen një udhëheqësi të priftërisë?

• Kam mëkatuar aq shumë sa Zoti nuk mund të më falë.

Ndihmojini nxënësit të reflektojnë rreth mënyrës se si ndihen për pendimin. Veprimtaria vijuese është një mënyrë për ta bërë këtë.

Mendo për një çast nëse njeh ndonjë që mund ta gjejë veten te ndonjëri nga këto shqetësime.

• Çfarë pyetjesh ose shqetësimesh të tjera mund të ketë dikush rreth pendimit?

Merreni parasysh ta shtoni në tabelë cilëndo nga pyetjet ose shqetësimet që nxënësit përmendin.

Përsiat për një ose dy nga këto pyetje ose shqetësime që do të ishin më kuptimplota për t’u përqendruar teksa e studion këtë mësim. Kërko udhërrëfim nga Ati Qiellor për të të ndihmuar t’i gjesh përgjigjet dhe ta shtosh kuptueshmërinë tënde për pendimin.

Problemet në Kishë

Pasi Zoti e çliroi Almën dhe popullin e tij nga robëria, ata u bashkuan me nefitët dhe popullin e Limhit në Zarahemla. Atje, mbreti Mosia e caktoi Almën si udhëheqës të Kishës. Disa njerëz nën drejtimin e Almës po kryenin mëkate të rënda dhe nuk po pendoheshin (shih te Mosia 26:1–6). Ata u çuan përpara Almës, por Alma e pati të vështirë të dinte si të përgjigjej.

Lexo te Mosia 26:13–15, 19–24, 28–31 dhe kërko udhërrëfimin që Zoti i dha Almës.

Nxitini disa nxënës të tregojnë atë që mësuan. Nëse ata përmendin parime të vërteta, shkruajini ato në tabelë. Nëse është e dobishme, merreni parasysh të bëni disa nga pyetjet në vijim ose të gjitha:

• Çfarë tha Zoti se njerëzit duhet të bëjnë për t’u pranuar dhe për të marrë falje prej Tij?

• Sipas vargut 23, përse është Shpëtimtari i kualifikuar për të përcaktuar se kush mund të marrë falje dhe jetë të përjetshme?

• Çfarë mësove tjetër rreth Zotit nga këto vargje?

Nëse pendohemi

Ti mund të kesh përcaktuar parime si ato në vijim: Nëse i rrëfejmë mëkatet tona dhe pendohemi me çiltërsinë e zemrës sonë, Zoti do të na falë. Aq herë sa të pendohemi, Zoti do të na falë.

• Çfarë do të thotë t’i rrëfejmë mëkatet tona?

• Çfarë mendon se do të thotë të “pendohe[sh] me çiltërsinë e zemrës [tënde]” (Mosia 26:29)?

• Si ndikon njohja e natyrës falëse të Zotit në qëndrimin tënd kundrejt pendimit?

Këto parime mund të ndihmojnë për pyetjet dhe shqetësimet rreth pendimit nga fillimi i mësimit.

Merreni parasysh a është më mirë t’i trajtoni të katra shqetësimet apo të përqendroheni te një ose dy shqetësime që mund të jenë më të rëndësishmit për nxënësit tuaj. Mund të jetë gjithashtu e efektshme t’i ndani nxënësit në grupe të vogla dhe t’u jepni përgjegjësinë që të përgatiten për t’u përgjigjur për shqetësime të ndryshme.

Mund të ftoni edhe peshkopin ose presidentin tuaj aktual të degës ta vizitojë klasën për t’iu përgjigjur pyetjeve rreth pendimit dhe faljes.

Pendimi

Manual i Mësuesit për Librin e Mormonit (2024) – “Mosia 26: ‘Në Qoftë se i Rrëfen Mëkatet e Tij … dhe Pendohet’”

Shqetësimi A

Nuk jam i/e sigurt a ia vlen të pendohesh.

• Çfarë shkrimesh të shenjta dhe parimesh nga Mosia 26 ose shkrime të tjera të shenjta mund të tregosh që mund të ndihmojnë për këtë shqetësim?

Nëse është e dobishme, merreni parasysh t’i ftoni nxënësit të shqyrtojnë vargjet te Mosia 26:23, 29–30, si edhe të lexojnë disa nga vargjet vijuese: 2 Nefi 9:23; 3 Nefi 9:22; 3 Nefi 27:19–20; Doktrina e Besëlidhje 18:10–12; 19:15–20; 58:42–43.

Mos harro që vetë Alma kishte kryer mëkate të rënda më herët në jetën e tij dhe ishte penduar dhe kishte marrë falje nëpërmjet Shpëtimtarit Jezu Krisht (shih te Mosia 11:5–7; 18:1–3; 26:15, 20).

• Çfarë mendon se mund t’i tregojë Alma dikujt që e ka këtë shqetësim?

Përsiat për atë që ti ose ata që njeh, kanë përjetuar kur u ktheve te Shpëtimtari Jezu Krisht nëpërmjet pendimit.

Shqetësimi B

Përse duhet t’i rrëfej mëkatet e mia? Përse disa mëkate duhet t’i rrëfehen një udhëheqësi të priftërisë?

Zoti i tha Almës se ata që kishin mëkatuar do të duhet t’i “rrëfen[in] mëkatet e [tyre] para teje [Almës, udhëheqësit të tyre të priftërisë] dhe meje [Zotit]” (Mosia 26:29).

• Përderisa Zoti i di tashmë mëkatet tona, përse është e rëndësishme që t’ia rrëfejmë ato Atij? Si do ta bekojë kjo gjë jetën tonë?

Disa ide mund të përfshijnë se kjo na ndihmon të jemi përgjegjës për veprimet tona, na shton përulësinë dhe i forcon marrëdhëniet vetjake me Zotin teksa lutemi për falje dhe e marrim atë.

Lexoji thëniet vijuese nga broshura Për Forcën e Rinisë dhe Plaku C. Skot Grou, Autoritet i Përgjithshëm i Shtatëdhjetë nderi, dhe kërko ide rreth kohës dhe arsyes përse ne duhet të rrëfehemi te një peshkop ose president dege.

“Peshkopi juaj mban çelësat e priftërisë dhe dhuntitë shpirtërore për t’ju ndihmuar që të pendoheni. Ju mund ta kërkoni ndihmën dhe këshillën e tij në çdo kohë. Nëse keni bërë gabime të rënda, të tilla si shkelja e ligjit të dëlirësisë, takohuni me peshkopin tuaj. Ai nuk do t’ju dënojë. Ai është një përfaqësues i Jezu Krishtit dhe do t’ju ndihmojë të dini se si të pendoheni plotësisht dhe të merrni fuqinë shëruese dhe forcuese të Shpëtimtarit.” (Për Forcën e Rinisë, f. 8–9)

Plaku C. Skot Grou

“Peshkopi ka të drejtë për zbulesë nga Fryma e Shenjtë lidhur me anëtarët e lagjes së tij, duke ju përfshirë juve. [Ai] mund t’ju ndihmojë përmes procesit të pendimit në mënyra që prindërit ose udhëheqësit e tjerë nuk janë në gjendje t’i ofrojnë. …

[Nëse nuk rrëfehemi, ne] vazhdo[jmë] ta mbaj[m]ë [të] vetëm barrën e mëkatit, në vend që ta lejoj[m]ë Shpëtimtarin [ta] largojë atë.” (C. Skot Grou, “Përse dhe Çfarë Duhet t’i Rrëfej Peshkopit Tim?” New Era, tetor 2013, f. 28–29 ose Liahona, tetor 2013, f. 58, 59)

• Si mund ta ndihmojë kjo thënie dikë për shqetësimet rreth rrëfimit para udhëheqësit të tij ose të saj të priftërisë?

Shqetësimi C

Kam mëkatuar aq shumë sa Zoti nuk mund të më falë.

• Si mund të ndihmojnë fjalët e Zotit te Mosia 26:29–30 për këtë shqetësim? (Mund të marrësh parasysh gjithashtu studimin e vargjeve te 1 Timoeut 1:15; 1 Gjon 1:9 ose Doktrina e Besëlidhje 18:10–12; 58:42–43.)

• Cilat tregime nga shkrimet e shenjta rreth Shpëtimtarit i ilustrojnë ndjenjat e Tij rreth atyre që përpiqen të pendohen dhe gatishmërisë së Tij për të falur?

Disa shembuj mund të përfshijnë gruan që i lau këmbët e Shpëtimtarit me lotët e saj (shih te Lluka 7:36–50), shëmbëlltyrën e djalit plëngprishës (shih te Lluka 15:11–32) dhe faljen e Palit nga Zoti (shih te 1 Timoteut 1:15–16).

Shqetësimi D

Zgjedhja jote

Mendo për një tjetër shqetësim ose pyetje nga jeta reale që dikush mund të ketë rreth pendimit. Studioji përkufizimet e fjalëve “Pendohem, Pendim” ose “Rrëfej, Rrëfim” tek Udhëzuesi për Shkrimet e Shenjta (scriptures.ChurchofJesusChrist.org), duke kërkuar të vërteta që mund të ndihmojnë. Ti mund të shqyrtosh gjithashtu shkrimet e shenjta që lidhen me fjalët “Pendohem, Pendim” ose “Rrëfej, Rrëfim” tek Udhëzuesi për Shkrimet e Shenjta (ChurchofJesusChrist.org). Mund të jetë gjithashtu e dobishme të studiosh temën “pendimi” në broshurën Për Forcën e Rinisë dhe të përsiatësh për atë që di rreth Zotit që mund të të ndihmojë.

Ftojini nxënësit të tregojnë atë që mësuan dhe se si ajo mund ta ndihmojë dikë për atë pyetje ose shqetësim. Kërkoni mënyra për ta theksuar dashurinë dhe dëshirën e Zotit për të na falur teksa pendohemi.

Çfarë ndodhi?

Lexo te Mosia 26:34–37, duke kërkuar atë që ndodhi ndërsa Alma ndoqi udhëzimet e Zotit.

Shkruaje në ditarin tënd të studimit atë që mund të duash të kujtosh ose të bësh për shkak të këtij mësimi. Ky reflektim mund të përfshijë mënyrën se si ti dëshiron ta kujtosh gatishmërinë e Zotit për të falur ose mënyrën se si ti mund të duash të përpiqesh t’i rrëfesh dhe të pendohesh për mëkatet e tua.

Merreni parasysh të jepni dëshminë tuaj për parimet e dhëna në këtë mësim.

Komente dhe Informacion për Rrethanat

Si mund të na tundojë Satani që të mos i rrëfejmë mëkatet tona?

Motra Linda S. Rivs, ish‑Këshilltare në Presidencën e Përgjithshme të Shoqatës së Ndihmës, dha mësim:

Motra Linda S. Rivs

“Kur ne kemi mëkatuar, Satani shpesh përpiqet të na bindë se gjëja vetëmohuese që duhet bërë, është që t’i mbrojmë të tjerët nga rrënimi prej njohurisë së mëkateve tona, që përfshin rrëfimin te peshkopi ynë, i cili mund të na e bekojë jetën nëpërmjet çelësave të tij të priftërisë si një gjykatës i përbashkët në Izrael. Sidoqoftë, e vërteta është se gjëja vetëmohuese dhe si e Krishtit që duhet bërë, është të rrëfehemi dhe të pendohemi. Ky është plani i madh i Atit Qiellor për shëlbimin.” (Linda S. Rivs, “Plani i Madh i Shëlbimit”, Ensign ose Liahona, nëntor 2016, f. 88)

Mosia 26:32. Çfarë do të thoshte të mos numëroheshe më mes popullit të Zotit?

Zoti e udhëzoi Almën që, nëse njerëzit refuzonin të pendoheshin për mëkatet e tyre, “a[ta] nuk do të numërohe[shin] mes popullit [të Tij]” (Mosia 26:32). Lexoje thënien vijuese për të parë se si me raste udhëheqësit e priftërisë mund të veprojnë në situata të ngjashme sot dhe përse:

“Nëse një anëtar/e kryen një mëkat të rëndë, peshkopi ose presidenti i kunjit e ndihmon atë që të pendohet. Si pjesë e këtij procesi, ai mund të ketë nevojë që t’i kufizojë disa privilegje të anëtarësisë në Kishë për njëfarë kohe. Në disa situata, mund të nevojitet që ai ta heqë anëtarësinë e një personi për njëfarë kohe.

Kufizimi ose heqja e anëtarësisë së një personi nuk ka për qëllim që të ndëshkojë. Përkundrazi, këto veprime nganjëherë janë të nevojshme për ta ndihmuar një person që të pendohet dhe të përjetojë një ndryshim të zemrës. Gjithashtu i japin kohë një personi për t’u përgatitur shpirtërisht që t’i ripërtërijë dhe t’i mbajë sërish besëlidhjet e tij ose të saj.” (Manuali i Përgjithshëm: Shërbimi në Kishën e Jezu Krishtit të Shenjtorëve të Ditëve të Mëvonshme, 32.2, ChurchofJesusChrist.org)

Veprimtari Plotësuese të të Mësuarit

Parimet te Mosia 25

Shpjegoni se pasi populli i Limhit dhe populli i Almës shpëtuan nga robëria dhe u bashkuan me popullin që jetonte në Zarahemla, mbreti Mosia ua lexoi analet e tyre të gjithë njerëzve.

Ftojini nxënësit të lexojnë te Mosia 25:7–11 ose Mosia 25:19–24, duke kërkuar parime të vërteta. Diskutoni përse janë të rëndësishme parimet që ata përcaktuan për t’u kuptuar dhe se si ato mund të na ndihmojnë sot.

Brezi i ri që doli nga udha

Të kuptuarit e arsyeve përse njerëzit mund të largohen nga Kisha ose fillojnë të kryejnë mëkat, mund të na ndihmojë të parandalojmë që kjo të na ndodhë neve. Ftojini nxënësit të lexojnë te Mosia 26:1–6, duke kërkuar zgjedhjet që i shtynë shumë veta nga brezi më i ri të largoheshin nga Kisha ose të mëkatonin. Kërkojuni atyre të tregojnë se si mund të krahasohen këto vargje me ngjarjet që ndodhin sot. Diskutoni se si ne mund të parandalojmë që të rinjtë të largohen ose të kryejnë mëkat në të ardhmen.

Parime të tjera rreth faljes

Ftojini nxënësit të lexojnë te Mosia 26:31–32 dhe të kërkojnë parime të tjera rreth faljes. Ata mund të gjejnë parime si ato në vijim: Nëse zgjedhim të mos i falim të tjerët, atëherë ne e çojmë veten nën dënim (shih te Mosia 26:31). Nëse zgjedhim të mos pendohemi për mëkatet tona, atëherë ne nuk do të numërohemi mes popullit të Zotit (shih te Mosia 26:32). Merreni parasysh të pyesni përse është e rëndësishme që t’i falim të tjerët dhe si janë të lidhur pendimi dhe falja e të tjerëve (shih te 3 Nefi 13:14–15; DeB 64:8–11).

handout concerns about repentance