Alma 1:1–18

Ligësitë e Intrigave të Priftërinjve

Ne jetojmë në një botë ku njerëzit iu bëjnë reklamë vetes dhe ideve të tyre për lavdi dhe përfitim vetjak. Besimi në këto praktika të rreme bën që shumë njerëz të mëkatojnë dhe ta refuzojnë Shpëtimtarin e tyre, Jezu Krishtin. Kjo ishte e vërtetë edhe për nefitët. Një njeri i quajtur Nehor dha mësim doktrinë të rreme që bëri që njerëz në kohën e tij dhe të tjerë në vitet e ardhshme, ta refuzonin Shpëtimtarin e tyre. Ky mësim mund të të ndihmojë t’i dallosh dhe refuzosh mësimet e rreme që mund të të largojnë nga Jezu Krishti.

Përqendrohuni te Jezu Krishti. Drejtojini nxënësit te Shpëtimtari dhe ungjilli i Tij dhe mos e tërhiqni vëmendjen tek vetja juaj. Plaku Pol V. Xhonson, i Kuorumit të Të Shtatëdhjetëve, vërejti: “Nëse mësuesit tanë janë të çliruar nga intrigat e priftërinjve, nxënësit do t’i duan ata, por ata nuk do të jenë të varur prej tyre. Ata do t’ju duan dhe do të jenë mirënjohës për atë që ju u mësoni, por ata do të drejtohen te Zoti” (Paul V. Johnson, “The Dangers of Priestcraft”, Religious Educator 9, nr. 3 [2008]: f. 11).

Përgatitja e nxënësve: Nxënësit mund të studiojnë përvijimin “Fjala e Perëndisë mund të më ndihmojë ta dalloj dhe refuzoj doktrinën e rreme” në përvijimin “ 3–9 Qershor. Mosia 29 – Alma 4: ‘Ata Qenë të Paepur dhe të Palëvizshëm ’” tek Eja, Më Ndiq – Për Individët dhe Familjet: Libri i Mormonit 2024.

Veprimtari të Mundshme të të Mësuarit

Mësimet e rreme

Vërini nxënësit ta plotësojnë veçmas veprimtarinë vijuese të vlerësimit të vetes. Paraqitini pohimet ose lexojini ato me zë të lartë dhe kërkojuni nxënësve të mendojnë për përgjigjet e tyre.

• Në një shkallë nga 1 deri në 5 (ku 1 është “nuk jam aspak dakord” dhe 5 është “jam shumë dakord”), sa shumë bie dakord ose nuk bie dakord me pohimet vijuese? Përse?

Pjesa më e madhe e informacionit që më paraqitet çdo ditë, është e vërtetë. (Për shembull, në mediat shoqërore, në reklama, nga udhëheqësit dhe personat me ndikim në shoqëri.)

Informacioni që marr, ndikon në besimin tim te Jezu Krishti.

Perëndia më ka siguruar ndihmë që ta dalloj të vërtetën nga e gabuara.

Ne jetojmë në një botë me shumë mesazhe të rreme që mund ta dobësojnë besimin tonë në Jezu Krishtin. Ndërsa studion kapitullin Alma 1, kërko udhërrëfimin e Shpirtit për të të ndihmuar t’i dallosh mësimet e rreme në botën që të rrethon, të cilat mund të të largojnë nga Jezu Krishti.

Përpara vdekjes së tij, mbreti Mosia vendosi një formë të re qeverisjeje. Në vend që të kishte mbretër, populli zgjodhi gjykatës për zbatimin e ligjeve. Alma i Riu u zgjodh si kryegjykatësi ose guvernatori i parë (shih tek Alma 2:16). Ai gjithashtu ishte kryeprifti dhe udhëheqësi i Kishës (shih te Mosia 29). Njerëzit filluan ta matnin kohën që nga koha kur qeveria e tyre ndryshoi.

Në vitin e parë të mbretërimit të gjykatësve, një njeri i lig i quajtur Nehor, filloi të ndikonte te nefitët. Plaku D. Tod Kristoferson, i Kuorumit të Dymbëdhjetë Apostujve, dha mësim se përse historia e Nehorit është e përfshirë në Librin e Mormonit.

“Libri i Mormonit përmban rrëfim për një njeri të quajtur Nehor. Është e lehtë të kuptohet përse Mormoni, duke përmbledhur një mijë vite të dokumentimeve nefite, e mendoi si të rëndësishme të përfshinte diçka lidhur me këtë njeri dhe ndikimin e zgjatur të doktrinës së tij. Mormoni po kërkonte të na paralajmëronte, duke e ditur që kjo filozofi do të rishfaqej në kohën tonë.” (D. Tod Kristoferson, “Dhurata Hyjnore e Pendimit”, Liahona, nëntor 2011, f. 38)

Lexo tek Alma 1:2–6, duke kërkuar atë që Nehori i dha mësim popullit. Bëj një listë të mësimeve të Nehorit. Emërtoji ato “E vërtetë”, “E rreme”, ose “E përzier”.

Për të ndihmuar në përfshirjen e nxënësve, ju mund t’i vini ata t’i renditin dhe emërtojnë mësimet e Nehorit në tabelë. Ftoni disa nxënës të japin mendimet e tyre.

Mund të kesh vënë re se Nehori i përzjeu mësimet e tij të rreme me pohime të vërteta. Kjo ilustron një taktikë që edhe Satani e përdor. Ndërsa e krahasojmë Nehorin me Satanin, ne mësojmë se Satani përdor gënjeshtra të përziera me të vërtetën për t’i mashtruar njerëzit dhe për t’i larguar ata nga Jezu Krishti.

• Çfarë provash të kësaj sheh ti sot?

Plaku Dejll G. Renland, i Kuorumit të Dymbëdhjetë Apostujve, e ilustroi mënyrën se si idetë e rreme të Nehorit ndikojnë te disa njerëz sot:

“[Një mësim i rremë që na pengon të pendohemi,] është të mendosh se mëkatet tona nuk kanë rëndësi ngaqë Perëndia na do pavarësisht nga çfarë bëjmë. Është tunduese t’i besosh asaj që i dha mësim Nehori mashtrues popullit të Zarahemlës: ‘I gjithë njerëzimi duhet të shpëtohet ditën e fundit dhe se ata nuk duhej të kishin frikë, as të dridheshin, … dhe në fund të gjithë njerëzit do të kishin jetë të përjetshme’. [Alma 1:4.] Por kjo ide joshëse është e gënjeshtërt. Perëndia vërtet na do. Sidoqoftë, ajo që bëjmë, ka rëndësi për Të dhe për ne. Ai ka dhënë udhëzime të qarta se si duhet të sillemi. Ne i quajmë urdhërime këto. Miratimi i Tij dhe jeta jonë e përjetshme varen nga sjellja jonë, përfshirë gatishmërinë për të kërkuar me përulësi pendim të vërtetë.” (Dejll G. Renland, “Pendimi: Një Zgjedhje e Gëzueshme”, Liahona, nëntor 2016, f. 123.)

Dallimi i mësimeve të rreme

Dallimi i mësimeve të rreme, si ato të Nehorit, ndonjëherë mund të jetë i vështirë. Fatmirësisht, ti mund t’i dallosh ato. Mormoni dha mësim se nëse një mesazh ose mësim na bind “të bëj[m]ë keq dhe të mos besoj[m]ë në Krisht, dhe ta mohoj[m]ë atë, dhe të mos i shërbej[m]ë Perëndisë”, ne mund ta dimë se është i rremë dhe vjen nga djalli (Moroni 7:17).

• Cili nga mësimet e Nehorit mund ta bëjë dikë të ndihet se nuk ka nevojë për Shpëtimtarin?

  Pyetja vijuese mund t’i ndihmojë nxënësit t’i dallojnë mësimet e rreme. Nxitini nxënësit që t’i japin mendimet e tyre.

• Cilat janë mësime të tjera të rreme sot që i largojnë njerëzit nga Jezu Krishti?

Pyetjet vijuese janë menduar për vetëreflektim dhe nuk janë për diskutim në orën mësimore.

Mendo për mesazhet që dëgjon ose lexon rregullisht. Si ndikojnë ato tek ti? A po ndikon ndonjë prej tyre negativisht në besimin tënd te Jezu Krishti?

Nëse po konsumon mesazhe të rreme të medias që ndikojnë negativisht në besimin tënd te Jezu Krishti, fike ose largoje burimin e këtyre mesazheve nga jeta jote. Zëvendësoji ato me mesazhe që do ta ndërtojnë besimin tënd në Jezu Krishtin. Për shembull, revistat Për Forcën e Rinisë dhe Liahona, që janë në dispozicion te ChurchofJesusChrist.org, kanë përmbajtje që ndërtojnë besim.

Mund të jetë e dobishme të vini në dukje se mësimet e Nehorit patën një ndikim të rëndësishëm për keq. Gjatë gjithë Librit të Almës, grupe të ndryshme njerëzish e refuzuan Shpëtimtarin për shkak të mësimeve të Nehorit. Nëse e ndieni se nxënësit mund të përfitojnë nga të mësuarit më shumë rreth kësaj, shihni te “Ndikimi i mësimeve të Nehorit” në pjesën Veprimtari Plotësuese të të Mësuarit.

Intrigat e priftërinjve

Merreni parasysh ta diskutoni besnikërinë e Gideonit në mbrojtje të Krishtit. Ju mund të theksoni vargun Alma 1:7. Ju mund t’i drejtoni gjithashtu tek Alma 1:8 dhe t’u kujtoni nxënësve veprimet besnike të Gideonit te Mosia 22:3–9.

Një ditë, Nehori u takua me një udhëheqës të moshuar të Kishës, i quajtur Gideon. Kur Nehori u mundua t’i largonte njerëzit nga Kisha, Gideoni “i bëri ballë [Nehorit], duke e qortuar me fjalët e Perëndisë” (Alma 1:7). Nehori u zemërua me Gideonin dhe e vrau atë. Nehorin e çuan përpara Almës dhe e dënuan me vdekje sipas ligjit (shih tek Alma 1:9–15).

Lexo tek Alma 1:12, duke kërkuar se si Alma i përshkroi mësimet e Nehorit.

Mund të doni t’i ndihmoni nxënësit të ushtrojnë përdorimin e poshtëshënimeve. Nxënësit mund të tregojnë një larmi mënyrash për të mësuar se çfarë është intriga e priftërinjve. Nëse askush nuk e përmend, drejtojini nxënësit te poshtëshënimi 12 a.

Lexo tek Alma 1:16 dhe 2 Nefi 26:29, duke kërkuar një përshkrim të intrigës së priftërinjve.

• Si e sheh predikimin e Nehorit si një shembull të intrigës së priftërinjve?

• Si mendon, pse disa ide të rreme janë të njohura?

• Si mendon, pse intrigat e priftërinjve janë kaq të rrezikshme?

Refuzimi i mësimeve të rreme

Si Gideoni, ne mund t’i përdorim fjalët e Perëndisë për të na ndihmuar t’i refuzojmë mësimet e rreme (shih tek Alma 1:7, 9). Përzgjidh një ose më shumë mësime të rreme të Nehorit ose disa që i ke dëgjuar nga koha jonë. Më pas, gjej një shkrim të shenjtë që e ndreq të rremen. Për shembull, ti mund t’u kundërvihesh mësimeve të Nehorit tek Alma 1:3 me mësimin e Shpëtimtarit te Mateu 23:11.

Disa shembuj të shkrimeve të shenjta që nxënësit mund t’i përdorin, përfshijnë vargjet Mateu 7:15–23; 2 Nefi 26:29–31; Mosia 18:24–26; Helamani 12:25–26; dhe Doktrina e Besëlidhje 1:31–32.

1. Trego mësimin/et e rremë/e që përzgjodhe dhe shkrimin/et e shenjtë/a që ti e ndien se e korrigjon/jnë atë.

2. Trego se çfarë ke mësuar nga Alma 1 rreth mënyrës se si t’i dallosh dhe refuzosh mësimet e rreme.

Komente dhe Informacion për Rrethanat

Çfarë mund të më ndihmojë t’i dalloj mësimet e rreme?

Presidenti Henri B. Ajring, i Presidencës së Parë, dha mësim:

“Shoqërimi i Frymës së Shenjtë e bën atë që është e mirë më tërheqëse dhe tundimin më pak bindës. Kjo e vetme duhet të mjaftojë që të na bëjë të vendosur për t’u kualifikuar për Shpirtin që të jetë me ne gjithmonë.

Ashtu sikurse Fryma e Shenjtë na forcon kundër ligësisë, Ai gjithashtu na jep fuqinë për ta dalluar të vërtetën nga gënjeshtra. E vërteta që ka më shumë rëndësi vërtetohet vetëm me anë të zbulesës nga Perëndia. Arsyeja jonë njerëzore dhe përdorimi i ndjenjave tona fizike nuk do të jenë të mjaftueshme. Ne jetojmë në një kohë kur edhe njerëzit më të urtë do ta kenë të vështirë për ta dalluar të vërtetën nga mashtrimi me zgjuarsi.” (Henri B. Ajring, “Fryma e Shenjtë si Shoqëruesi Juaj”, Liahona, nëntor 2015, f. 104‑105)

Plaku Ulises Soares, i Kuorumit të Dymbëdhjetë Apostujve, dha mësim:

“Nuk mund ta lejojmë veten tonë që të pështjellohet nga mesazhet e shumënjohura, të cilat pranohen lehtësisht nga bota dhe të cilat bien në kundërshtim me doktrinën dhe parimet e vërteta të ungjillit të Jezu Krishtit. Shumë prej këtyre mesazheve të botës nuk përfaqësojnë asgjë më shumë sesa një përpjekje të shoqërisë sonë për ta justifikuar mëkatin. Na nevojitet të kujtojmë që, në përfundim, ne të gjithë do të qëndrojmë përpara Krishtit që të gjykohemi për veprat tona, qofshin ato të mira ose qofshin ato të liga (3 Nefi 27:14). Kur ndeshemi me këto mesazhe të botës, kurajë e madhe dhe një dituri e qëndrueshme për planin e Atit tonë Qiellor do të kërkohen për të zgjedhur të drejtën.” (Ulises Soares, “Po, Ne Mund dhe Do Të Fitojmë!”, Liahona, maj 2015, f. 75)

Cili është qëndrimi i Kishës për dënimin me vdekje?

Kisha e Jezu Krishtit e Shenjtorëve të Ditëve të Mëvonshme e shikon çështjen se a duhet dhe në çfarë rrethanash ta vendosë shteti dënimin me vdekje, si një çështje që duhet të vendoset vetëm nga proceset e parashkruara prej ligjit civil. Ne as nuk e përkrahim, as nuk e kundërshtojmë dënimin me vdekje. (Shih te https://newsroom.churchofjesuschrist.org/article/capital-punishment-in-utah.)

Veprimtari Plotësuese të të Mësuarit

Pohime të rreme të përziera me të vërtetën

Është e zakonshme që mësuesit e rremë t’i përziejnë mësimet e tyre të rreme me pohime të vërteta. Për shembull, Nehori dha mësim në mënyrë të pasaktë se “të gjithë njerëzit do të kishin jetë të përjetshme” së bashku me të vërtetën se “Zoti kishte krijuar të gjithë njerëzit” (Alma 1:4). Nxënësit mund të përcaktojnë mësime të tjera të rreme të zakonshme të përziera me të vërtetën. Merreni parasysh të tregoni sa vijon nga Presidenti Dallin H. Ouks, i Presidencës së Parë: “Satani është mashtruesi i madh, ati i gënjeshtrave (shihni te Gjoni 8:44). Kjo jo sepse Satani thotë vetëm gënjeshtra. Gënjeshtrat e tij më të efektshme janë gjysmë të vërteta ose gënjeshtra të shoqëruara nga e vërteta” (Dallin H. Oaks, “Reading Church History” [bisedë drejtuar mësuesve të fesë të Sistemit Arsimor të Kishës, 16 gusht, 1985], f. 3).

Ballafaqojini mësimet e Nehorit me veprimet e anëtarëve të Kishës

Nxënësit mund t’i ballafaqojnë mësimet dhe veprimet e Nehorit (shihni tek Alma 1:2–6) me veprime si të Krishtit të anëtarëve besnikë të Kishës (shihni tek Alma 1:19–20, 25–30). Ftojini nxënësit të tregojnë shembuj të anëtarëve besnikë të Kishës në kohën tonë. Ju gjithashtu mund të theksoni aftësinë e krahasimit dhe ballafaqimit të studimit të shkrimeve të shenjta.

Ndikimi i mësimeve të Nehorit

Kjo ide mund t’i ndihmojë nxënësit të shohin se si mësimet e Nehorit ndikuan në shumë ndodhi në Librin e Mormonit. Nxënësit mund të lexojnë një ose më shumë nga rrëfimet vijuese, duke parë ndikimin negativ të mësimeve të Nehorit: Alma 2:1–4; 14:8–18; 15:15; 21:2–12; 24:20–30. Nxënësit mund ta bëjnë këtë në grupe të vogla, me secilin grup që raporton për fragmentet e përzgjedhura.

Mosia 29

Për t’i ndihmuar nxënësit të kenë një përvojë me kapitullin Mosia 29, ju mund të përmblidhni vargjet 1–25. Më pas, mund t’i vini nxënësit të lexojnë te Mosia 29:26–27, 30–34, 37–39, duke kërkuar përgjegjësinë e popullit në qeverinë e propozuar nga mbreti Mosia. Nxënësit mund të diskutojnë përfitimet e marrjes së vendimeve nga zëri i popullit dhe pasojat që do të vinin nëse njerëzit do të zgjidhnin paudhësinë. Ju mund të diskutoni njërën ose të dy të vërtetat vijuese: Nëse zëri i popullit zgjedh paudhësinë, atëherë gjykimet e Perëndisë do të bien mbi të (vargu 27). Çdo person e ka për detyrë që t’i përkrahë parimet, ligjet dhe udhëheqësit e drejtë.