Alma 4

Pengesa e Krenarisë

Krenaria është mungesa e përulësisë dhe i shtyn njerëzit ta vendosin vetveten mbi të tjerët dhe Perëndinë ose në kundërshtim me ta (shih tek Udhëzuesi për Shkrimet e Shenjta, “Kryelartësi, Krenari”,.scriptures.ChurchofJesusChrist.org). Mendo për krenarinë që shikon në botë sot, dhe ndikimet negative që ajo ka tek ti dhe tek njerëzit përreth teje. Krenaria dhe grindja e demonstruar nga disa anëtarë të Kishës së Shpëtimtarit në kohën e Almës, bëri që Kisha të dështonte në përparimin e saj. Si rrjedhim, Alma u ndje i frymëzuar të jepte dorëheqjen si kryegjykatës për t’ia kushtuar veten predikimit të fjalës së Perëndisë. Ky mësim mund të të ndihmojë ta përdorësh fjalën e Perëndisë për ta mposhtur krenarinë dhe grindjen.

Ndihmojini nxënësit të zbulojnë doktrina dhe parime të ungjillit. Doktrina dhe parimet duhet të shpallen në mënyrë të qartë dhe të përmbledhur. Ato mund t’iu mësojnë nxënësve rëndësinë e shkrimeve të shenjta dhe se si historitë dhe mësimet nga shkrimet e shenjta gjejnë zbatim në jetën e tyre të përditshme. Të kuptuarit e doktrinës dhe parimeve mund t’u japë shtysë nxënësve t’i mësojnë dhe zbatojnë mësimet e ungjillit.

Përgatitja e nxënësve: Ftojini nxënësit të vijnë të përgatitur të tregojnë një shkrim të shenjtë ose pohim nga një udhëheqës/e i/e Kishës rreth përulësisë.

Veprimtari të Mundshme të të Mësuarit

Një pengesë

Te pragu i derës së klasës në dysheme ngjitni një copë letër me fjalën “pengesë” të shkruar në të. Pyesni se sa nxënës shkelën pa dashje mbi të përpara se ta vinin re se ishte aty kur hynë në klasë. Nëse dëshirohet, nxënësit mund të tregojnë gjithashtu përvojat e një rasti kur u rrëzuan ose u penguan.

Sill ndër mend një rast kur je rrëzuar ose penguar. A e mban mend se çfarë ishte ajo që të bëri të rrëzoheshe? Në jetë, ne ndonjëherë rrëzohemi nga gjëra që mund të quhen “pengesa”. Kjo është gjithashtu e vërtetë shpirtërisht.

Ushtrimi vijues i sugjeruar me vizatim mund të bëhet si klasë në tabelë. Ose nxënësit mund ta plotësojnë atë individualisht.

Vizato disa blloqe dhe emërtoji me gjëra që mund ta bëjnë rininë të pengohet shpirtërisht. Për shembull, disa mund ta kenë të vështirë t’ia vënë veshin profetit ose t’i binden Fjalës së Urtësisë.

Mendo për pasojat e të penguarit nga këto gjëra. Përsiat përse ke nevojë për ndihmën e Perëndisë për t’i dalluar, shmangur dhe kapërcyer këto pengesa.

Populli i Almës kishte përjetuar së fundi humbje të mëdha në luftën me lamanitët. Për shkak të pikëllimeve të tyre, ata “u zgjuan që ta kujtonin detyrën e tyre”, dhe shumë njerëz u pagëzuan (shih tek Alma 4:1–5). Megjithatë, paqja e tyre nuk zgjati shumë për shkak se ata filluan të pengoheshin shpirtërisht.

Lexo tek Alma 4:6–8, duke kërkuar pse udhëheqësit e Kishës ishin të shqetësuar.

Ftojini nxënësit të tregojnë se çfarë gjetën dhe ndihmojini ata të shohin se krenaria mund të jetë një pengesë shpirtërore.

• Pse mendon se udhëheqësit e Kishës ishin “shumë të brengosur” (Alma 4:7) nga krenaria në rritje e popullit?

Presidenti Ezra Taft Benson (1899–1994) dha mësim:

“Krenaria është blloku i madh pengues për në Sion. E përsëris: Krenaria është blloku i madh pengues për në Sion.” (Ezra Taft Benson, “Beware of Pride”, Ensign, maj 1989, f. 7)

Vizato një bllok të madh që përfaqëson pengesën e krenarisë. Mbi bllok, rendit përgjigjet për pyetjet vijuese:

• Si mendon se krenaria mund të bëjë që dikush të pengohet shpirtërisht?

• Në ç’mënyra krenaria na pengon të bëhemi më të ngjashëm me Shpëtimtarin?

Ndërsa vazhdon të studiosh tek Alma 4, mendo se si krenaria mund të jetë një pengesë për ty dhe çfarë mund të bësh për ta kapërcyer atë.

Lexo tek Alma 4:8–12, duke kërkuar pasojat e krenarisë në Kishë. Vër re që zënie do të thotë mosmarrëveshje ose grindje me zemërim ose hidhërim. Shpirtligësi është dëshira për të bërë të ligën ose vullneti i keq.

Ftojini nxënësit të renditin në tabelë pasojat e krenarisë në Kishë. Kësaj liste do t’i drejtoheni më vonë në mësim. Nëse keni mjete të mjaftueshme për të shkruar, lini nxënës të shumtë të vijnë në tabelë në të njëjtën kohë. Më pas, ftojini nxënësit t’u përgjigjen pyetjeve vijuese:

• Cilat ishin pasojat e krenarisë në Kishë?

• Në ç’mënyra këto veprime janë të pahijshme për anëtarët e Kishës së Shpëtimtarit?

• Si u ndikuan ata që nuk ishin të Kishës?

Shmangia e krenarisë dhe e grindjes

Presidenti Ezra Taft Benson dha mësim:

“Kundërhelmi për krenarinë është përulësia – butësia, nënshtrimi [shih tek Alma 7:23].” (Ezra Taft Benson, “Beware of Pride”, Ensign, maj 1989, f. 6)

Lexo tek Alma 4:13–14, duke kërkuar atë që bënë disa anëtarë të Kishës për ta shmangur krenarinë dhe për të qëndruar besnikë. Vër re që përuleshin te vargu 13 i drejtohet të bërit më i përulur dhe më zemërbutë.

Ftojini nxënësit t’i shkruajnë veprimet e përulura të anëtarëve të Kishës në tabelë.

• Çfarë veprimesh dhe qëndrimesh te vargjet 13–14 të kujtojnë Jezu Krishtin?

• Si mund të na ndihmojë zhvillimi i këtyre qëndrimeve dhe ndërmarrja e këtyre veprimeve të bëhemi më të ngjashëm me Të?

• Si i ke parë të tjerët t’i jetojnë këto qëndrime ose veprime si të Krishtit dhe si ndikoi ajo tek ti?

Jepuni kohë nxënësve të përsiatin në heshtje për çdo rast krenarie ose grindjeje që mund të ekzistojë në jetën e tyre dhe se si ata mund ta ndjekin shembullin e Shpëtimtarit.

Alma vendosi se ai kishte nevojë ta kalonte kohën e tij duke i ndihmuar njerëzit shpirtërisht. Ai ia dorëzoi fronin e gjykimit Nefihas ndërkohë që vetë mbajti detyrën e kryepriftit (shih tek Alma 4:15–18).

Lexo tek Alma 4:19 dhe kërko atë që Alma e dinte se mund ta “zhdukte” krenarinë dhe grindjen mes popullit. Ti mund të shohësh gjithashtu “Alma Predikon Fjalën e Perëndisë” nga kodi kohor 00:36 deri në 01:59, që është në dispozicion te ChurchofJesusChrist.org [ose te https://www.youtube.com/@kishaejezukrishtiteshenjto9199/videos].

• Në çfarë mënyrash Alma u soll si Jezu Krishti?

• Çfarë mund të mësojmë nga shembulli i Almës?

Një e vërtetë nga Alma 4:19 është që fjala e Perëndisë dhe dëgjimi i dëshmisë së pastër mund të na ndihmojnë ta kapërcejmë krenarinë dhe grindjen.

Kërko atë që Presidenti Ezra Taft Benson dha mësim rreth fjalës së Perëndisë në pohimin vijues.

“Fjala e Perëndisë, siç gjendet në shkrimet e shenjta, në fjalët e profetëve të gjallë dhe në zbulesën vetjake, ka fuqinë për t’i fortifikuar shenjtorët dhe për t’i armatosur ata me Shpirtin në mënyrë që të mund t’i bëjnë ballë së ligës, të kapen fort pas së mirës dhe të gjejnë gëzim në këtë jetë.” (Ezra Taft Benson, “The Power of the Word”, Ensign, maj 1986, f. 80)

• Në ç’mënyra fjala e Perëndisë dhe dhënia e dëshmisë së pastër mund të na ndihmojnë ta shkatërrojmë krenarinë dhe grindjen?

Ftojini nxënësit të zgjedhin dy ose tri nga pasojat e krenarisë që renditën në tabelë më herët, dhe jepuni kohë atyre të studiojnë në grupe të vogla se si t’i kapërcejnë ato probleme.

Nxënësit mund të bëjnë gjithashtu kërkim për tema si “Përul, Përulësi” tek Udhëzuesi për Shkrimet e Shenjta. Mund të jetë gjithashtu e dobishme t’u tregoni atyre se si të bëjnë një kërkim në programin kompjuterik Gospel Library [Biblioteka e Ungjillit] për të gjetur informacion.

Ftojini grupet t’ia tregojnë klasës atë që mësojnë, duke përfshirë mënyrat se si ne mund t’i trajtojmë të tjerët më shumë siç do t’i trajtonte Shpëtimtari. Përndryshe, pasi të studiojnë, ata mund të shkruajnë një bisedë të shkurtër që trajton problemet me krenarinë dhe grindjen.

Nxitini nxënësit të veprojnë sipas ndonjë mbrese që morën rreth mënyrës se si ata mund ta zbatojnë atë që mësuan në këtë mësim.

• Rendit dy ose tri probleme që vijnë si rezultat i krenarisë dhe grindjes.

• Rendit shkrimet e shenjta dhe mësimet e profetëve bashkëkohorë që ti e ndien se mund të ndihmojnë për këto probleme.

• Përcakto pse ose si gjërat që rendite, do të të ndihmonin t’i trajtoje të tjerët ashtu siç do t’i trajtonte Shpëtimtari.

Kërko të vësh re dhe të dallosh nxitjet nga Fryma e Shenjtë për mënyrën se si ti mund ta zbatosh atë që mësove në këtë mësim. Kërko mundësi për t’i realizuar ato mbresa.

Komente dhe Informacion për Rrethanat

Alma 4:8. Në ç’mënyra e tallim ose e përqeshim ndonjëherë njëri-tjetrin?

Presidenti Dallin H. Ouks, i Presidencës së Parë, shpjegoi:

“Shumë mësues në kishë dhe shkolla dëshpërohen nga mënyra se si disa adoleshentë, përfshirë të rinj shdm e trajtojnë njëri-tjetrin. Urdhërimi për ta dashur njëri-tjetrin sigurisht përfshin dashuri e respekt midis besimeve të ndryshme dhe gjithashtu midis racave, kulturave e niveleve ekonomike të ndryshme. Ne i ftojmë të gjithë të rinjtë të shmangin nëpërkëmbjen, fyerjet apo të folurit dhe praktikat që në mënyrë të drejtpërdrejtë shkaktojnë dhembje tek të tjerët. Të gjitha këto cenojnë urdhërimin e Shpëtimtarit për ta dashur njëri-tjetrin.” (Dallin H. Ouks, “Dashuria për të Tjerët dhe të Jetuarit me Ndryshimet”, Liahona, nëntor 2014, f. 27)

Shikoni “Zemra të Thurura në Bashkim”, nga kodi kohor 07:03 deri në 08:15 për të parë Plakun Geri E. Stivenson, të Kuorumit të Dymbëdhjetë Apostujve, të japë këshillë për trajtimin e të tjerëve me dashuri dhe respekt.

Alma 4:10. Në ç’mënyrë Kisha “filloi të dështonte në përparimin e saj” si pasojë e krenarisë?

Presidenti Dallin H. Ouks, i Presidencës së Parë, shpjegoi:

“Libri i Mormonit na tregon për një kohë kur Kisha e Perëndisë ‘filloi të dështonte në përparimin e saj’ (Alma 4:10) sepse ‘njerëzit e kishës filluan … t’i vinin zemrat e tyre mbi pasuritë dhe gjërat e kota të botës’ (Alma 4:8). Kushdo që ka bollëk gjërash materiale, është në rrezik të të qenit shpirtërisht ‘i joshur’ nga pasuria dhe gjërat e tjera të botës.” (Dallin H. Ouks, “Shëmbëlltyra e Mbjellësit”, Liahona, maj 2015, f. 34)

Plaku Kuentin L. Kuk, i Kuorumit të Dymbëdhjetë Apostujve, dha mësim:

“Doktrina lartësuese e Rivendosjes i bën anëtarët të gëzohen në ungjill dhe të gjejnë gëzim dhe kënaqësi në Kishë. Ne shihemi pozitivisht kur [i] jetojmë mësimet e ungjillit të rivendosur të Jezu Krishtit. Kur anëtarët nuk i jetojnë mësimet, mund të krijohet një pengesë e madhe për ata që nuk janë anëtarë të Kishës (Alma 4:10).” (Kuentin L. Kuk, “Plani i Atit Tonë – Mjaft i Madh për të Gjithë Fëmijët e Tij”, Liahona, maj 2009, f. 35)

Përse krenaria është kaq e dëmshme?

Plaku Geri E. Stivenson, i Kuorumit të Dymbëdhjetë Apostujve, tregoi sa vijon:

“Kur jemi krenarë, ne priremi t’i japim nderim vetvetes në vend që t’u japim nderim të tjerëve, përfshirë Zotin. Krenaria shpesh është konkurruese; është një prirje për t’u përpjekur që të fitojmë më shumë dhe të hamendësojmë se jemi më të mirë se të tjerët. Krenaria shpesh përfundon në ndjenja zemërimi dhe urrejtjeje; e bën dikë që të mbajë mëri ose të mos falë.” (Geri E. Stivenson, “Eklipsi Shpirtëror”, Liahona, nëntor 2017, f. 47)

Veprimtari Plotësuese të të Mësuarit

Shembuj të mirë dhe të këqij

Nëse nxënësit do të përfitonin nga një ilustrim i një shembulli pozitiv dhe negativ i ndikimit që anëtarët e Kishës mund të kenë tek të tjerët, merreni parasysh të lexoni bisedën e Presidentit Gordon B. Hinkli (1910–2008) “Nevoja për më Shumë Mirësi” [shih te Konferenca e Përgjithshme, prill 2006].

Shqyrtoni se si t’ju kundërviheni pasojave të krenarisë

Nëse nxënësit do të përfitonin nga puna me një skenar ku krenaria mund të jetë një shqetësim, ju mund t’u tregoni skenarin vijues dhe t’i vini nxënësit të krijojnë dy variante të pjesës tjetër të historisë. Kjo mund të bëhet si klasë. Një variant mund të jetë se zgjedhjet e të riut çuan në pengimin e tij për shkak të krenarisë. Tjetri mund të jetë mënyra se si i riu e përdor fjalën e Perëndisë për të qëndruar i përulur.

“Rauli është një i ri i jashtëzakonshëm. Ndërkohë që ishte ende në shkollë të mesme, ai u punësua për një punë të mrekullueshme ku paguhet së paku sa dyfishi i asaj që të tjerët në moshën e tij fitojnë zakonisht.”

Krahaso dhe ballafaqo

Ftojini nxënësit të tregojnë ngjashmëritë dhe dallimet ndërmjet grupit të njerëzve të përshkruar tek Alma 1:19–24 dhe atyre të përshkruar tek Alma 1:25–31. Bëni të njëjtën gjë me ata të përshkruar tek Alma 4:1–5 dhe ata tek Alma 4:6–10. Ftojini nxënësit t’i tregojnë cilësitë si të Krishtit që gjetën në këto fragmente, dhe se si ne mund t’i ndjekim këta shembuj për t’u bërë më të ngjashëm me Atin Qiellor dhe Jezu Krishtin dhe për të qenë dishepuj më të mirë.

Alma 4:19. Fuqia e dëshmisë së pastër

Ftojini nxënësit të tregojnë shembuj të mënyrës se si dëshmia e tyre për Krishtin është ndikuar nga dëshmitë e të tjerëve dhe nxitini ata të kërkojnë mundësi për t’ua treguar dëshmitë e tyre të tjerëve për të ndikuar tek ata për mirë.