Alma 1:1–18

Ang mga Kasamaan ng Huwad na Pagkasaserdote

Nabubuhay tayo sa isang mundo kung saan itinataguyod ng mga tao ang kanilang sarili at ang kanilang mga ideya para sila mapuri at makinabang. Ang paniniwala sa mga maling gawaing ito ay nagiging dahilan upang magkasala ang maraming tao at hindi nila tanggapin ang kanilang Tagapagligtas na si Jesucristo. Nangyari din ito sa mga Nephita. Isang lalaking nagngangalang Nehor ang nagturo ng maling doktrina na naging dahilan para hindi tanggapin ng mga tao sa kanyang panahon, at ng iba pa sa darating na mga taon, ang kanilang Tagapagligtas. Ang lesson na ito ay makatutulong sa iyo na matukoy at tanggihan ang mga maling turo na maaaring magtulak sa iyong tumalikod kay Jesucristo.

Tumuon kay Jesucristo. Ituon ang mga estudyante sa Tagapagligtas at sa Kanyang ebanghelyo, at huwag sa iyo. Ipinahayag ni Elder Paul V. Johnson ng Korum ng Pitumpu: “Kung ang ating mga guro ay hindi gumagamit ng huwad na pagkasaserdote, mamahalin sila ng mga estudyante, ngunit hindi sila aasa sa kanila. Mamahalin nila kayo, at magpapasalamat sila sa itinuro ninyo sa kanila, ngunit sila ay babaling sa Panginoon” (Paul V. Johnson, “The Dangers of Priestcraft,” Religious Educator 9, blg. 3 [2008]: 11).

Paghahanda ng estudyante: Maaaring pag-aralan ng mga estudyante ang outline na “Matutulungan ako ng salita ng Diyos na matukoy at tanggihan ang maling doktrina” sa outline na “ Hunyo 3–9. Mosias 29–Alma 4: ‘Sila ay Naging Matatag at Hindi Natitinag ’” sa Pumarito Ka, Sumunod Ka sa Akin—Para sa mga Indibiduwal at Pamilya: Aklat ni Mormon 2024.

Mga Posibleng Aktibidad sa Pag-aaral

Mga maling turo

Sabihin sa mga estudyante na kumpletuhin nang mag-isa ang sumusunod na aktibidad para sa self-assessment. Ipakita ang mga pahayag o basahin ang mga ito nang malakas at sabihin sa mga estudyante na pag-isipan ang kanilang mga sagot.

• Mula 1 hanggang 5 (kung saan ang 1 ay lubos na hindi sumasang-ayon at ang 5 ay lubos na sumasang-ayon), gaano katindi ang iyong pagsang-ayon o hindi pagsang-ayon sa mga sumusunod na pahayag? Bakit?

Karamihan sa impormasyong inihahayag sa akin sa bawat araw ay totoo. (Halimbawa, sa social media, sa mga advertisement, mula sa mga lider at influencer sa lipunan.)

Ang impormasyong natatanggap ko ay nakakaimpluwensya sa aking pananampalataya kay Jesucristo.

Naglaan ang Diyos ng tulong para malaman ko ang katotohanan laban sa kamalian.

Nabubuhay tayo sa mundong maraming maling mensahe na makapagpapahina sa ating pananampalataya kay Jesucristo. Sa pag-aaral mo ng Alma 1, hingin ang patnubay ng Espiritu upang matulungan kang matukoy ang mga maling turo sa mundo sa paligid mo na maaaring magtulak sa iyong tumalikod kay Jesucristo.

Bago siya namatay, nagtatag si Haring Mosias ng bagong uri ng pamahalaan. Sa halip na magkaroon ng mga hari, ang mga tao ay naghalal ng mga hukom na magpapatupad ng mga batas. Ang Nakababatang Alma ay hinirang bilang unang punong hukom, o gobernador (tingnan sa Alma 2:16). Siya rin ang mataas na saserdote at pinuno ng Simbahan (tingnan sa Mosias 29). Sinimulang subaybayan ng mga tao ang panahon mula sa panahong binago ang kanilang pamahalaan.

Sa unang taon ng panunungkulan ng mga hukom, isang masamang lalaking nagngangalang Nehor ang nagsimulang mang-impluwensya sa mga Nephita. Itinuro ni Elder D. Todd Christofferson ng Korum ng Labindalawang Apostol kung bakit isinama ang kuwento ni Nehor sa Aklat ni Mormon.

Ang Aklat ni Mormon ay naglalaman ng salaysay tungkol sa isang taong nagngangalang Nehor. Madaling maunawaan kung bakit naisip ni Mormon, nang paikliin niya ang libu-libong taon nang mga talaan ng mga Nephita, na mahalagang isama ang tungkol sa lalaking ito at ang nagtagal na impluwensya ng doktrina nito. Hangad ni Mormon na balaan tayo, dahil alam niya na muling lilitaw ang pilosopiyang ito sa ating panahon. (D. Todd Christofferson, “Ang Banal na Kaloob na Pagsisisi,” Liahona, Nob. 2011, 38)

Basahin ang Alma 1:2–6, at alamin ang itinuro ni Nehor sa mga tao. Ilista ang mga turo ni Nehor. Lagyan ang mga ito ng label na “Tama,” “Mali,” o “Magkahalo.”

Para matulungan ang mga estudyante na makibahagi, maaari mong ipalista at palagyan ng label sa kanila ang mga turo ni Nehor sa pisara. Sabihin sa maraming estudyante na ibahagi ang kanilang mga naisip.

Maaaring napansin ninyo na hinaluan ni Nehor ang kanyang mga maling turo ng mga totoong pahayag. Inilalarawan nito ang isang taktika na ginagamit din ni Satanas. Sa pagkukumpara natin kay Nehor kay Satanas, nalaman natin na gumagamit si Satanas ng mga kasinungalingan na may kahalong katotohanan upang linlangin ang mga tao at maudyukan sila na tumalikod kay Jesucristo.

• Anong katibayan nito ang nakikita ninyo ngayon?

Inilarawan ni Elder Dale G. Renlund ng Korum ng Labindalawang Apostol kung paano nakakaapekto ang mga maling ideya ni Nehor sa ilang tao ngayon:

[Ang isang maling turo na humahadlang sa atin na magsisi] ay ang isipin na hindi naman mahalaga kahit magkasala tayo dahil mahal naman tayo ng Diyos kahit ano pa man ang ating gawin. Nakakatuksong paniwalaan ang itinuro sa mga tao sa Zarahemla ng mapanlinlang na si Nehor: “Na ang buong sangkatauhan ay maliligtas sa huling araw, at na hindi nila kailangang matakot ni manginig, … at, sa katapusan, ang lahat ng tao ay magkakaroon ng buhay na walang hanggan.” [Alma 1:4] Ngunit ang nakakatukso na ideyang ito ay mali. Talagang mahal tayo ng Diyos. Gayunman, mahalaga sa Kanya ang mga ginagawa natin. Nagbigay siya ng malilinaw na direksiyon kung paano tayo dapat kumilos. Ang mga ito ay tinatawag na mga kautusan. Ang Kanyang pagsang-ayon at ang ating buhay na walang hanggan ay nakadepende sa ating pagkilos, kabilang na ang ating kahandaang mapagpakumbabang hangarin na tunay na magsisi. (Dale G. Renlund, “Pagsisisi: Isang Pagpiling Puno ng Kagalakan,” Liahona, Nob. 2016, 123)

Pagtukoy sa mga maling turo

Ang pagtukoy sa mga maling turo, tulad ng mga turo ni Nehor, ay maaaring mahirap kung minsan. Sa kabutihang-palad, matutukoy mo ang mga ito. Itinuro ni Mormon na kung ang isang mensahe o turo ay nanghihikayat sa atin na “gumawa ng masama at huwag maniwala kay Cristo, at itinatatwa siya, at huwag maglingkod sa Diyos,” malalaman natin na ito ay mali at nagmumula sa diyablo (Moroni 7:17).

• Alin sa mga turo ni Nehor ang makapagpapadama sa isang tao na hindi niya kailangan ang Tagapagligtas?

  Ang sumusunod na tanong ay makatutulong sa mga estudyante na matukoy ang mga maling turo. Hikayatin ang mga estudyante na ibahagi ang kanilang mga ideya.

• Ano ang iba pang mga maling turo ngayon na nagtutulak sa mga tao na tumalikod kay Jesucristo?

Ang mga sumusunod na tanong ay nilayon para sa sariling pagninilay-nilay at hindi para sa talakayan sa klase.

Isipin ang mga mensaheng regular mong naririnig o nababasa. Paano nakakaimpluwensya ang mga ito sa iyo? Mayroon ba sa mga ito na negatibong nakakaimpluwensya sa iyong pananampalataya kay Jesucristo?

Kung tumatanggap ka ng mga maling mensahe sa media na negatibong nakakaimpluwensya sa iyong pananampalataya kay Jesucristo, i-turn off o alisin ang pinagmumulan ng mga mensaheng iyon sa iyong buhay. Palitan ang mga ito ng mga mensaheng magpapalakas ng iyong pananampalataya kay Jesucristo. Halimbawa, ang mga magasin na Para sa Lakas ng mga Kabataan at Liahona na makikita sa ChurchofJesusChrist.org, ay may nilalaman na nagpapalakas ng pananampalataya.

Maaaring makatulong na ipaliwanag na ang mga turo ni Nehor ay may malaking impluwensya sa kasamaan. Sa buong Aklat ni Alma, iba’t ibang grupo ng mga tao ang hindi tumanggap sa Tagapagligtas dahil sa mga turo ni Nehor. Kung sa palagay mo ay makikinabang ang mga estudyante sa pag-aaral pa tungkol dito, tingnan sa “Ang epekto ng mga turo ni Nehor” sa bahaging Mga Karagdagang Aktibidad sa Pag-aaral.

Huwad na pagkasaserdote

Pag-isipang talakayin ang katapatan ni Gedeon sa pagtatanggol kay Cristo. Maaari mong bigyang-diin ang Alma 1:7. Maaari mo ring ituro ang Alma 1:8 at ipaalala sa mga estudyante ang matatapat na ginawa ni Gedeon sa Mosias 22:3–9.

Isang araw, nakasalubong ni Nehor ang isang matandang lider ng Simbahan na nagngangalang Gedeon. Habang tinatangka ni Nehor na maakay palayo ang mga tao ng simbahan, isang matwid na lalaki na nagngangalang Gedeon ang “nangatwiran [kay Nehor], at [pinaalalahanan] siya sa pamamagitan ng mga salita ng Diyos” (Alma 1:7). Nagalit si Nehor kay Gedeon at pinatay niya ito. Pagkatapos ay dinala si Nehor kay Alma at hinatulan ito ng kamatayan ayon sa batas (tingnan sa Alma 1:9–15).

Basahin ang Alma 1:12, at alamin kung paano inilarawan ni Alma ang mga turo ni Nehor.

Maaari mong tulungan ang mga estudyante na magsanay na gumamit ng mga footnote. Maaaring magbahagi ang mga estudyante ng iba’t ibang paraan para malaman kung ano ang huwad na pagkasaserdote. Kung walang nagbahagi, ituon ang pansin ng mga estudyante sa footnote 12a.

Basahin ang Alma 1:16 at 2 Nephi 26:29, at maghanap ng talatang naglalarawan sa huwad na pagkasaserdote.

• Paano mo nakikita ang pangangaral ni Nehor bilang halimbawa ng huwad na pagkasaserdote?

• Sa iyong palagay, bakit popular ang ilang maling ideya?

• Sa iyong palagay, bakit napakadelikado ng huwad na pagkasaserdote?

Pagtanggi sa mga maling turo

Tulad ni Gedeon, magagamit natin ang mga salita ng Diyos upang tulungan tayong tanggihan ang mga maling turo (tingnan sa Alma 1:7, 9). Pumili ng isa o mahigit pa sa mga maling turo ni Nehor o ng ilan na posibleng narinig mo mula sa ating panahon. Pagkatapos ay maghanap ng banal na kasulatan na nagtatama sa kamalian. Halimbawa, maaari mong salungatin ang mga turo ni Nehor sa Alma 1:3 gamit ang turo ng Tagapagligtas sa Mateo 23:11.

Kabilang sa ilang halimbawa ng mga banal na kasulatan na maaaring gamitin ng mga estudyante ay ang Mateo 7:15–23; 2 Nephi 26:29–31; Mosias 18:24–26; Helaman 12:25–26; at Doktrina at mga Tipan 1:31–32.

1. Ibahagi ang (mga) maling turo na pinili mo at ang (mga) banal na kasulatan na sa palagay mo ay nagtatama nito.

2. Ibahagi ang natutuhan mo mula sa Alma 1 kung paano tukuyin at tanggihan ang mga maling turo.

Komentaryo at Impormasyon ng Konteksto

Ano ang makatutulong sa akin na matukoy ang mga maling turo?

Itinuro ni Pangulong Henry B. Eyring ng Unang Panguluhan:

Ang patnubay ng Espiritu Santo ay ginagawang mas kaakit-akit ang mabuti at hindi tayo madaling matukso. Dapat ay sapat na ang dahilang iyan para maging determinado tayong maging karapat-dapat na makasama ang Espiritu sa tuwina.

Tulad sa pagpapalakas sa atin ng Espiritu laban sa kasamaan, binibigyan Niya rin tayo ng kakayahang makahiwatig sa pagitan ng katotohanan at kabulaanan. Ang katotohanang pinakamahalaga sa lahat ay napapatunayan lamang sa paghahayag ng Diyos. Ang ating katalinuhan at paggamit ng ating mga pandama ay hindi sasapat. Nabubuhay tayo sa panahon na maging ang pinakamatalino ay nahihirapang makita ang kaibhan ng katotohanan sa tusong panlilinlang. (Henry B. Eyring, “Ang Espiritu Santo Bilang Inyong Patnubay,” Liahona, Nob. 2015, 104)

Itinuro ni Elder Ulisses Soares ng Korum ng Labindalawang Apostol:

Huwag nating hayaang lituhin tayo ng popular na mga mensaheng madaling tinanggap ng mundo at salungat sa doktrina at mga tunay na alituntunin ng ebanghelyo ni Jesucristo. Walang ibang kinakatawan ang marami sa mga makamundong mensaheng ito maliban sa pagtatangka ng ating lipunan na pangatwiranan ang kasalanan. Kailangan nating alalahanin na, sa huli, lahat ay tatayo sa harapan ni Cristo upang mahatulan sa ating mga gawa, mabuti man ang mga iyon o masama (3 Nephi 27:14). Kapag naharap tayo sa mga makamundong mensaheng ito, kailangan natin ng matinding katapangan at matibay na kaalaman tungkol sa plano ng ating Ama sa Langit para mapili ang tama. (Ulisses Soares, “Oo, Kaya at Mapagtatagumpayan Natin!,” Liahona, Mayo 2015, 75)

Ano ang pananaw ng Simbahan tungkol sa parusang kamatayan?

Sa pananaw ng Ang Simbahan ni Jesucristo ng mga Banal sa mga Huling Araw, ang tanong kung sa anong mga sitwasyon ba nararapat ipatupad ng batas ang parusang kamatayan ay isang bagay na dapat lang pagpasiyahan batay sa itinakdang mga proseso ng batas sibil. Hindi natin hinihikayat ni tinututulan ang parusang kamatayan. (Tingnan sa https://newsroom.churchofjesuschrist.org/article/capital-punishment-in-utah.)

Mga Karagdagang Aktibidad sa Pag-aaral

Mga maling pahayag na hinaluan ng katotohanan

Karaniwan sa mga bulaang guro na ihalo ang kanilang mga maling turo sa mga totoong pahayag. Halimbawa, maling itinuro ni Nehor na “ang lahat ng tao ay magkakaroon ng buhay na walang hanggan” kasama ang katotohanan na “nilikha ng Panginoon ang lahat ng tao” (Alma 1:4). Maaaring matukoy ng mga estudyante ang iba pang karaniwang maling turo na hinaluan ng katotohanan. Maaari mong ibahagi ang sumusunod mula kay Pangulong Dallin H. Oaks ng Unang Panguluhan: “Si Satanas ang tusong manlilinlang, ang ama ng kasinungalingan (tingnan sa Juan 8:44). Ito ay hindi lamang dahil nagsasabi ng mga kasinungalingan si Satanas. Ang kanyang pinakamabisang kasinungalingan ay mga kasinungalingang may kasamang katotohanan” (Dallin H. Oaks, “Reading Church History” [mensahe sa Church Educational System religious educators, Ago. 16, 1985], 3).

Ikumpara ang mga turo ni Nehor sa mga ginawa ng mga miyembro ng Simbahan

Maaaring ikumpara ng mga estudyante ang mga turo at ginawa ni Nehor (tingnan sa Alma 1:2–6) sa mga ginawa na katulad ng kay Cristo ng matatapat na miyembro ng Simbahan (tingnan sa Alma 1:19–20, 25–30). Anyayahan ang mga estudyante na magbahagi ng mga halimbawa ng matatapat na miyembro ng Simbahan sa ating panahon. Maaari mo ring bigyang-diin ang kasanayan sa pag-aaral ng mga banal na kasulatan na pagkukumpara at paglalahad ng pagkakaiba.

Ang epekto ng mga turo ni Nehor

Ang ideyang ito ay makatutulong sa mga estudyante na makita kung paano nakaimpluwensya ang mga turo ni Nehor sa maraming salaysay sa Aklat ni Mormon. Maaaring basahin ng mga estudyante ang isa o mahigit pa sa mga sumusunod na salaysay, habang hinahanap ang negatibong epekto ng mga turo ni Nehor: Alma 2:1–4; 14:8–18; 15:15; 21:2–12; 24:20–30. Magagawa ito ng mga estudyante sa maliliit na grupo, kung saan ang bawat grupo ay magbabahagi tungkol sa mga piniling scripture passage.

Mosias 29

Upang matulungan ang mga estudyante na matutuhan ang Mosias 29, maaari mong ibuod ang talata 1–25. Pagkatapos ay maaari mong ipabasa sa mga estudyante ang Mosias 29:26–27, 30–34, 37–39, at ipahanap sa kanila ang responsibilidad ng mga tao sa pamahalaan na iminungkahi ni Haring Mosias. Maaaring talakayin ng mga estudyante ang mga pakinabang ng paggawa ng mga desisyon sa pamamagitan ng tinig ng mga tao at ang mga ibubunga kung pipiliin ng mga tao ang kasamaan. Maaari mong talakayin ang isa o lahat ng sumusunod na katotohanan: Kung pipiliin ng tinig ng mga tao ang kasamaan, sasapit sa kanila ang mga kahatulan ng Diyos (talata 27). Bawat tao ay may tungkuling sundin ang mga matwid na alituntunin, batas, at lider.