Alma 4

Ang Batong Katitisuran ng Kapalaluan

Ang kapalaluan ay kawalan ng kababaang-loob at nag-uudyok sa mga tao na ituring ang kanilang sarili nang mas mataas o salungat sa iba at sa Diyos (tingnan sa Gabay sa mga Banal na Kasulatan, “Kapalaluan,” scriptures.ChurchofJesusChrist.org). Isipin ang kapalaluang nakikita mo sa mundo ngayon at ang negatibong epekto nito sa iyo at sa mga nasa paligid mo. Ang kapalaluan at pagtatalo na ipinakita ng ilang miyembro ng Simbahan ng Tagapagligtas noong panahon ni Alma ay naging dahilan ng pagkaantala ng Simbahan sa pag-unlad nito. Dahil dito, nabigyang-inspirasyon si Alma na magbitiw bilang punong hukom upang ilaan ang kanyang sarili sa pangangaral ng salita ng Diyos. Ang lesson na ito ay makatutulong sa iyo na gamitin ang salita ng Diyos upang madaig ang kapalaluan at pagtatalo.

Tulungan ang mga estudyante na tuklasin ang doktrina at mga alituntunin ng ebanghelyo. Ang doktrina at mga alituntunin ay dapat ipahayag nang malinaw at eksakto. Maituturo ng mga ito sa mga estudyante ang kahalagahan ng mga banal na kasulatan at kung paano naaangkop ang mga kuwento at turo sa banal na kasulatan sa kanilang buhay sa araw-araw. Ang pag-unawa sa doktrina at mga alituntunin ay makahihikayat sa mga estudyante na matutuhan at maipamuhay ang mga turo ng ebanghelyo.

Paghahanda ng estudyante: Sabihin sa mga estudyante na dumating sa klase na handang magbahagi ng isang banal na kasulatan o pahayag mula sa isang lider ng Simbahan tungkol sa pagpapakumbaba.

Mga Posibleng Aktibidad sa Pag-aaral

Isang batong katitisuran

Sa sahig sa pasukan ng silid-aralan, magdikit ng isang papel na may nakasulat na salitang “batong katitisuran.” Itanong kung ilang estudyante ang nakatapak dito bago nila napansin na nandoon ito pagpasok nila sa silid-aralan. Kung nais nila, maaari ding magbahagi ang mga estudyante ng mga karanasan tungkol sa isang pagkakataon na sila ay natisod o nadapa.

Alalahanin ang isang pagkakataon na natisod o nadapa ka. Naaalala mo ba kung ano ang nakatisod sa iyo? Sa buhay, kung minsan ay natitisod tayo sa mga bagay na maaaring tawaging “mga batong katitisuran.” Ito rin ay totoo sa espirituwal na paraan.

Ang sumusunod na iminungkahing aktibidad sa pagdrowing ay maaaring gawin ng buong klase sa pisara. O maaari itong gawin ng mga estudyante nang mag-isa.

Magdrowing ng ilang bato at lagyan ng label ang mga ito ng mga bagay na maaaring maging dahilan para espirituwal na matisod ang mga kabataan. Halimbawa, maaaring nahihirapan ang ilan na makinig sa propeta o sundin ang Word of Wisdom.

Isipin ang mga mangyayari kapag natisod sa mga bagay na ito. Pag-isipang mabuti kung bakit kailangan mo ang tulong ng Diyos para mapansin, maiwasan, at madaig ang mga batong katitisuran na ito.

Ang mga tao ni Alma ay nakaranas ng malalaking pagkatalo sa digmaan sa mga Lamanita. Dahil sa kanilang mga paghihirap, sila ay “nagising sa pag-alaala sa kanilang tungkulin,” at maraming tao ang nabinyagan (tingnan sa Alma 4:1–5). Gayunpaman, hindi nagtagal ang kanilang kapayapaan dahil nagsimula silang espirituwal na matisod.

Basahin ang Alma 4:6–8, at alamin kung bakit nag-aalala ang mga lider ng Simbahan.

Sabihin sa mga estudyante na ibahagi ang nalaman nila at tulungan silang makita na ang kapalaluan ay maaaring maging espirituwal na batong katitisuran.

• Sa inyong palagay, bakit “labis na nagdalamhati” ang mga lider ng Simbahan (Alma 4:7) sa tumitinding kapalaluan ng mga tao?

Itinuro ni Pangulong Ezra Taft Benson (1899–1994):

Ang kapalaluan ay ang malaking hadlang sa Sion. Inuulit ko: Ang kapalaluan ay ang malaking hadlang sa Sion. (Ezra Taft Benson, “Beware of Pride,” Ensign, Mayo 1989, 7)

Magdrowing ng malaking bato na kumakatawan sa batong katitisuran ng kapalaluan. Sa bato, maglista ng mga sagot sa mga sumusunod na tanong:

• Sa iyong palagay, paano nagiging sanhi ng espirituwal na pagkatisod ng isang tao ang kapalaluan?

• Sa paanong paraan nakahahadlang sa atin ang kapalaluan na maging higit na katulad ng Tagapagligtas?

Habang patuloy mong pinag-aaralan ang Alma 4, isipin kung paano mo maaaring katisuran ang kapalaluan at kung ano ang magagawa mo para madaig ito.

Basahin ang Alma 4:8–12, at alamin ang mga epekto ng kapalaluan sa Simbahan. Pansinin na ang ibig sabihin ng sigalutan ay galit o matinding pagtatalo o alitan. Ang masamang hangarin ay kagustuhang gumawa ng masama, o masamang intensyon.

Sabihin sa mga estudyante na ilista sa pisara ang mga epekto ng kapalaluan sa Simbahan. Ang listahan ay gagamitin kalaunan sa lesson. Kung may sapat kang mga panulat, papuntahin ang maraming estudyante sa pisara nang sabay-sabay. Pagkatapos ay sabihin sa mga estudyante na sagutin ang mga sumusunod na tanong:

• Ano ang mga epekto ng kapalaluan sa Simbahan?

• Sa paanong paraan hindi nararapat ang mga asal na ito sa mga miyembro ng Simbahan ng Tagapagligtas?

• Paano naaapektuhan ang mga hindi miyembro ng Simbahan?

Pag-iwas sa kapalaluan at pagtatalo

Itinuro ni Pangulong Ezra Taft Benson:

Ang lunas sa kapalaluan ay pagpapakumbaba—kaamuan, pagkamasunurin [tingnan sa Alma 7:23]. (Ezra Taft Benson, “Beware of Pride,” Ensign, Mayo 1989, 6)

Basahin ang Alma 4:13–14, at alamin ang ginawa ng ilang miyembro ng Simbahan upang maiwasan ang kapalaluan at manatiling tapat. Tandaan na ang [pagpapakababa] sa talata 13 ay tumutukoy sa pagiging mas mapagpakumbaba at maamo.

Sabihin sa mga estudyante na isulat sa pisara ang mga mapagpakumbabang ginawa ng mga miyembro ng Simbahan.

• Anong mga asal at pag-uugali sa talata 13–14 ang nagpapaalala sa iyo kay Jesucristo?

• Paano makatutulong sa atin ang pagkakaroon ng ganitong mga pag-uugali at asal na maging higit na katulad Niya?

• Paano mo nakita na ginagawa ng iba ang mga pag-uugali o asal na ito na katulad ng kay Cristo, at paano iyon nakaapekto sa iyo?

Bigyan ng oras ang mga estudyante na tahimik na pag-isipan ang anumang kapalaluan o pagtatalo na maaaring nasa kanilang buhay at kung paano nila matutularan ang halimbawa ng Tagapagligtas.

Ipinasiya ni Alma na kailangan niyang gugulin ang kanyang oras sa pagtulong sa mga tao sa espirituwal na paraan. Ibinigay niya ang hukumang-luklukan kay Nefihas habang pinanatili ang katungkulan ng mataas na saserdote sa kanyang sarili (tingnan sa Alma 4:15–18).

Basahin ang Alma 4:19 at hanapin kung ano ang alam ni Alma na “[makakahila] pababa” sa kapalaluan at pagtatalo sa mga tao. Maaari mo ring panoorin ang “Ipinangaral ni Alma ang Salita ng Diyos” mula sa time code na 0:36 hanggang 1:59, na matatagpuan sa ChurchofJesusChrist.org.

• Sa paanong mga paraan kumilos si Alma na katulad ni Jesucristo?

• Ano ang matututuhan natin mula sa halimbawa ni Alma?

Ang isang katotohanan mula sa Alma 4:19 ay ang salita ng Diyos at ang pakikinig sa dalisay na patotoo ay makatutulong sa atin na madaig ang kapalaluan at pagtatalo.

Alamin ang itinuro ni Ezra Taft Benson tungkol sa salita ng Diyos sa sumusunod na pahayag.

Ang salita ng Diyos, na matatagpuan sa mga banal na kasulatan, sa mga salita ng buhay na mga propeta, at sa personal na paghahayag, ay may kapangyarihang patatagin ang mga Banal at protektahan sila ng Espiritu upang mapaglabanan nila ang kasamaan, makapanangan sila sa mabuti, at magkaroon ng kagalakan sa buhay na ito. (Ezra Taft Benson, “The Power of the Word,” Ensign, Mayo 1986, 80)

• Sa paanong paraan makatutulong ang salita ng Diyos at ang pagbabahagi ng dalisay na patotoo para mahilang pababa o maiwaksi ang kapalaluan at pagtatalo?

Sabihin sa mga estudyante na pumili ng dalawa o tatlong epekto ng kapalaluan na inilista nila sa pisara kanina, at bigyan sila ng oras upang pag-aralan kung paano daigin ang mga problemang iyon sa maliliit na grupo.

Maaaring saliksikin ng mga estudyante ang mga paksang tulad ng “Mapagpakumbaba, Pagpapakumbaba” sa Gabay sa mga Banal na Kasulatan. Maaari ding makatulong na ipakita sa kanila kung paano magsaliksik sa Gospel Library app para makahanap ng impormasyon.

Anyayahan ang mga grupo na ibahagi sa klase ang natutuhan nila, kabilang na ang mga paraan kung paano natin mapapakitunguhan ang iba nang higit na katulad ng gagawin ng Tagapagligtas. Bilang alternatibo, pagkatapos mag-aral, maaari silang sumulat ng maikling mensahe na tumutugon sa mga problema sa kapalaluan at pagtatalo.

Hikayatin ang mga estudyante na kumilos ayon sa anumang impresyong natanggap nila tungkol sa kung paano nila maipamumuhay ang natutuhan nila sa lesson na ito.

• Maglista ng dalawa o tatlong problema na bunga ng kapalaluan at pagtatalo.

• Ilista ang mga banal na kasulatan at mga turo ng mga makabagong propeta na sa palagay mo ay makatutulong sa mga problemang ito.

• Tukuyin kung bakit o paano makatutulong sa iyo ang mga bagay na inilista mo para pakitunguhan mo ang iba tulad ng gagawin ng Tagapagligtas.

Sikaping mapansin at matukoy ang mga pahiwatig mula sa Espiritu Santo kung paano mo maipamumuhay ang natutuhan mo sa lesson na ito. Humanap ng mga pagkakataong maisakatuparan ang mga impresyong iyon.

Komentaryo at Impormasyon ng Konteksto

Alma 4:8. Sa paanong paraan natin kung minsan nilalait o nililibak ang isa’t isa?

Ipinaliwanag ni Pangulong Dallin H. Oaks ng Unang Panguluhan:

Maraming guro sa simbahan at paaralan ang nalulungkot sa paraan ng pakikitungo sa isa’t isa ng ilang kabataan, kabilang na ang mga kabataang LDS. Kabilang sa utos na mangag-ibigan sa isa’t isa ang mahalin at igalang ang lahat anuman ang kanilang relihiyon at lahi, kultura, at katayuan sa buhay. Hinihikayat namin ang lahat ng kabataan na iwasan ang pananakot, pang-iinsulto, o pagsasalita ng masama at pagkilos na sadyang nakasasakit sa iba. Lahat ng ito ay labag sa utos ng Tagapagligtas na magmahalan. (Dallin H. Oaks, “Pagmamahal at Pakikisalamuha sa mga Taong Naiiba,” Liahona, Nob. 2014, 27)

Panoorin ang “Mga Pusong Magkakasama,” mula sa time code na 7:03 hanggang 8:15 para makita at mapakinggan si Elder Gary E. Stevenson ng Korum ng Labindalawang Apostol na nagpapayo tungkol sa pakikitungo sa iba nang may pagmamahal at paggalang.

Alma 4:10. Bakit “nagsimulang maantala ang simbahan sa pag-unlad nito” dahil sa kapalaluan?

Ipinaliwanag ni Pangulong Dallin H. Oaks ng Unang Panguluhan:

Ikinuwento sa Aklat ni Mormon ang isang pagkakataon na ang Simbahan ng Diyos ay “nagsimulang maantala … sa pag-unlad nito” (Alma 4:10) dahil “ang mga tao ng simbahan ay nagsimulang … [ilagak] ang kanilang mga puso sa mga kayamanan at sa mga walang kabuluhang bagay ng daigdig” (Alma 4:8). Ang sinumang sagana sa materyal na bagay ay nanganganib na espirituwal na “mapakalma” ng mga kayamanan at ng iba pang mga bagay ng mundo. (Dallin H. Oaks, “Ang Talinghaga ng Manghahasik,” Liahona, Mayo 2015, 34)

Itinuro ni Elder Quentin L. Cook ng Korum ng Labindalawang Apostol:

Dahil sa nakasisiglang doktrina ng Panunumbalik, ang mga miyembro ay nagagalak sa ebanghelyo at nakakatagpo ng kaligayahan at kasiyahan sa Simbahan. Maganda ang masasabi sa atin kapag ipinamumuhay natin ang mga turo ng ipinanumbalik na ebanghelyo ni Jesucristo. Kapag hindi ipinamumuhay ng mga miyembro ang mga turo, maaari itong maging batong katitisuran sa mga hindi kabilang sa Simbahan (Alma 4:10). (Quentin L. Cook, “Plano ng Ating Ama—Sapat para sa Lahat ng Kanyang mga Anak,” Liahona, Mayo 2009, 35)

Bakit lubhang nakapipinsala ang kapalaluan?

Ibinahagi ni Elder Gary E. Stevenson ng Korum ng Labindalawang Apostol ang sumusunod:

Kapag mayabang, may tendensiya tayong angkinin ang karangalan sa halip na ibigay ito sa iba, pati na sa Panginoon. Ang kayabangan kadalasan ay mapagkumpitensya; iyon ay ang tendensiya na hangaring magtamo ng mas marami at ipalagay na mas magaling tayo kaysa iba. Ang kayabangan kadalasan ay humahantong sa galit at pagkamuhi; nagiging dahilan ito para magkimkim ng sama-ng-loob o hindi magpatawad ang isang tao. (Gary E. Stevenson, “Espirituwal na Eklipse,” Liahona, Nob. 2017, 47)

Mga Karagdagang Aktibidad sa Pag-aaral

Mabubuti at masasamang halimbawa

Kung makikinabang ang mga estudyante sa paglalarawan ng isang positibo at negatibong halimbawa ng impluwensya ng mga miyembro ng Simbahan sa iba, maaari ninyong basahin ang mensahe ni Pangulong Gordon B. Hinckley (1910–2008) na “Ang Pangangailangan sa Malaking Kabutihan.”

Pagtuklas kung paano paglabanan ang mga epekto ng kapalaluan

Kung makikinabang ang mga estudyante sa paggawa ng isang sitwasyon kung saan maaaring problema ang kapalaluan, maaari mong ibahagi ang sumusunod na sitwasyon at sabihin sa mga estudyante na gumawa ng dalawang bersiyon ng natitirang bahagi ng kuwento. Maaari itong gawin ng buong klase. Maaaring ang isang bersiyon ay ang mga piniling gawin ng binatilyo na humantong sa kanyang pagkatisod dahil sa kapalaluan. Maaaring ang isa pa ay kung paano ginamit ng binatilyo ang salita ng Diyos para manatiling mapagpakumbaba.

“Si Raul ay isang kahanga-hangang binata. Habang nasa high school pa, napasok siya sa trabaho na halos doble ang laki ng suweldo kumpara sa karaniwang kinikita ng mga kaedad niya.”

Pagkukumpara at paglalahad ng pagkakaiba

Sabihin sa mga estudyante na ibahagi ang mga pagkakatulad at pagkakaiba ng grupo ng mga taong inilarawan sa Alma 1:19–24 at ng mga taong inilarawan sa Alma 1:25–31. Gawin din ito sa mga taong inilarawan sa Alma 4:1–5 at sa mga tao sa Alma 4:6–10. Sabihin sa mga estudyante na ibahagi ang mga katangiang tulad ng kay Cristo na matatagpuan sa mga scripture passage na ito at kung paano natin matutularan ang mga halimbawang ito upang maging higit na katulad ng Ama sa Langit at ni Jesucristo at maging mas mabubuting disipulo.

Alma 4:19. Ang kapangyarihan ng dalisay na patotoo

Sabihin sa mga estudyante na magbahagi ng mga halimbawa kung paano naimpluwensyahan ng patotoo ng iba ang kanilang patotoo kay Cristo, at hikayatin silang maghanap ng mga pagkakataong ibahagi sa iba ang kanilang patotoo para maimpluwensyahan nila sila sa kabutihan.