Alma 5:1–32

Pyetjet e Almës për Vlerësimin e Vetes

një ndryshim i zemrës

Çastet e vlerësimit të vetes mund të na ndihmojnë ta shohim forcën e marrëdhënies sonë me Jezu Krishtin më qartësisht. Alma, duke e ditur se si krenaria dhe grindja ishin bërë pjesë e Kishës, u bëri anëtarëve të Kishës në Zarahemlë një seri pyetjesh që i nxitën ata të reflektonin mbi përqendrimin e zemrave të tyre dhe qëndrimin e tyre përpara Perëndisë. Ky mësim ka për qëllim të të ndihmojë ta vlerësosh përparimin tënd shpirtëror dhe të forcosh kthimin tënd në besimin te Jezu Krishti.

Ofrimi i ndihmës që nxënësit të kërkojnë zbulesë vetjake. Dhënia e kohës nxënësve që të studiojnë dhe të reflektojnë në heshtje mbi shkrimet e shenjta, mund të ndihmojë për të ftuar Frymën e Shenjtë. Kur nxënësit shohin brenda vetes për ta vlerësuar kuptueshmërinë dhe bindjen e tyre për ungjillin, ata mund të bëhen të vetëdijshëm për atë që tashmë e dinë, dhe ta ftojnë Frymën e Shenjtë t’i ndihmojë ata të përcaktojnë atë që iu duhet të dinë, ndiejnë dhe bëjnë për t’iu afruar më shumë Jezu Krishtit.

Përgatitja e nxënësve: Ftojini nxënësit t’i hedhin një sy kapitullit Alma 5 dhe t’i shenjojnë të gjitha pikëpyetjet në kapitull. Nxënësit gjithashtu mund t’i bëjnë vetes disa nga pyetjet që Alma i bëri popullit të tij në këtë kapitull.

Veprimtari të Mundshme të të Mësuarit

Vlerësimi i vetes

Mendo për mundësitë që ti ke pasur për t’u intervistuar nga dikush tjetër, duke përfshirë intervistat për rekomandimin e tempullit, intervistat vjetore me peshkopin ose presidentin tënd të degës dhe intervistat e punës.

• Cili është qëllimi i intervistave?

• Si mund të bësh një intervistë me veten?

Presidenti M. Rasëll Ballard, i Kuorumit të Dymbëdhjetë Apostujve, tregoi disa nga përfitimet e gjetjes së kohës rregullisht për të vlerësuar përparimin tonë shpirtëror. Mund të duash të shohësh materialin filmik “Të Kthehemi dhe të Marrim” në dispozicion te ChurchofJesusChrist.org, nga kodi kohor 8:14 deri në 8:58 ose të lexosh tekstin e mëposhtëm.

Presidenti M. Rasëll Ballard

“Kam zbuluar se, që të qëndroj i përqendruar në kthimin [në praninë e Perëndisë] dhe marrjen e bekimeve të premtuara, unë duhet të gjej kohë rregullisht që ta pyes veten time: ‘Si po ia kalon?’

Është si të kesh një intervistë personale, vetjake me veten tënde. Dhe nëse kjo tingëllon e pazakontë, mendoni këtë: Kush në këtë botë ju njeh më mirë sesa e njihni ju veten tuaj? Ju i dini mendimet tuaja, veprimet tuaja vetjake, dëshirat tuaja dhe ëndrrat, synimet e planet tuaja. Dhe ju e dini më mirë se çdokush tjetër mënyrën se si po përparoni.” (M. Rasëll Ballard, “Të Kthehemi dhe të Marrim”, Liahona, maj 2017, f. 64)

Mendo se sa shpesh ti gjen kohë për të vlerësuar përparimin tënd shpirtëror.

• Çfarë lloj përfitimesh mund të vijnë nga bërja e kësaj rregullisht?

Një aftësi që mund ta përdorësh kur studion shkrimet e shenjta, është të gjesh kohë për të ndaluar dhe vlerësuar se sa mirë po i jeton mësimet ose parimet që po studion. Sot do të kesh një mundësi për ta ushtruar atë aftësi ndërsa studion kapitullin Alma 5. Ky kapitull përmban shumë pyetje që Alma i bëri popullit të tij. Ti gjithashtu mund t’ia bësh vetes këto pyetje për të vlerësuar përparimin tënd shpirtëror. Ndërsa studion, kërko udhërrëfim nga Ati Qiellor për të të ndihmuar të dish se çfarë po bën mirë dhe se si Ai dëshiron që ti të përmirësohesh.

Për t’i ndihmuar nxënësit të shohin numrin e madh të pyetjeve që përmbahen tek Alma 5, merreni parasysh t’i ftoni nxënësit t’i hedhin një vështrim të shpejtë këtij kapitulli dhe të vënë re pikëpyetjet e shumta. Ju gjithashtu mund t’i ftoni nxënësit t’i kushtojnë pak kohë gjatë studimit vetjak të shkrimeve të shenjta, shenjimit ose qarkimit të të gjitha pikëpyetjeve në këtë kapitull nëse nuk e kanë bërë tashmë.

Alma i predikon popullit të Zarahemlës

Sill ndër mend se pasi pa krenarinë dhe lakminë mes popullit të tij, Alma dha dorëheqjen si kryegjykatës i nefitëve për t’iu kushtuar më plotësisht mësimdhënies së fjalës së Perëndisë (shih tek Alma 4:19).

Alma e filloi predikimin e tij në tokën e Zarahemlës. Ai u kujtoi këtyre njerëzve robërinë shpirtërore dhe fizike që nefitët kishin përjetuar gjatë ditëve të Mbretit Noe (shih tek Alma 5:3–5).

Lexo tek Alma 5:6–13, duke kërkuar atë që Alma donte që populli i tij të kujtonte rreth brezit të mëparshëm të nefitëve.

• Përse mendon se Alma donte që populli i tij t’i kujtonte këto gjëra?

• Çfarë donte Alma që populli i tij të dinte rreth Jezu Krishtit te vargu 7?

Lexo tek Alma 5:14, 26, duke kërkuar pyetjet që Alma i bëri popullit të tij pasi u kujtoi njerëzve trashëgiminë e tyre shpirtërore.

• Si mendon, çfarë donte Alma që populli i tij të kuptonte duke ia bërë këto pyetje?

  Nxënësit mund të përgjigjen duke pohuar të vërtetat si në vijim: Zoti dëshiron që ne të përjetojmë një ndryshim të madh të zemrës dhe pasi të kemi lindur shpirtërisht nga Perëndia, ne duhet të punojmë për ta mbajtur ndryshimin tonë të zemrës.

• Si mendon se mund të ndikojë në jetën tënde bërja e pyetjeve ndaj vetes tënde si ato nga vargjet 14 dhe 26?

Përdorimi i mësimeve të Almës për të kryer një vetëvlerësim

Paraqitini udhëzimet vijuese dhe jepuni nxënësve kohën e përshtatshme (rreth 10–15 minuta nëse është e mundur) për të punuar më vete me këtë veprimtari. Mund të merrni parasysh të vini himne ose muzikë shpirtërore të luajtura me zë të ulët ndërkohë që nxënësit e plotësojnë veprimtarinë.

Gjej kohë për t’i studiuar fjalët e Almës drejtuar popullit të Zarahemlës tek Alma 5:14–30 dhe reflekto nëse e ke përjetuar ose po e përjeton ndryshimin që Alma përshkroi. Ndërsa studion, kryeje vetëvlerësimin tënd duke përdorur disa ose të gjitha pyetjet që Alma bëri në këto vargje. Këtu janë disa mënyra se si ti mund ta bësh atë.

1. Ndalo dhe reflekto çdo dy deri në tre vargje, duke vlerësuar se si pyetjet e Almës në ato vargje lidhen me jetën tënde.

2. Përzgjidh disa nga pyetjet e Almës që ti e ndien se janë më kuptimplota dhe të rëndësishme për ty. Shkruaji këto pyetje në ditarin tënd të studimit dhe mbaji shënim përgjigjet e tua për çdo pyetje, si edhe çfarëdo mendim ose përshtypje tjetër që mund të kesh.

3. Pasi t’i përcaktosh pyetjet që bëri Alma në këto vargje, formulo dy ose tri pyetje që mund t’i përdorësh për ta vlerësuar përparimin tënd shpirtëror. Shënoji përgjigjet e tua në ditarin tënd të studimit.

Pasi nxënësit ta kenë plotësuar këtë veprimtari të studimit, diskutoni me ta se çfarë mësuan dhe ndien ndërsa i kryen vetëvlerësimet e tyre. Pyetjet vijuese mund të përdoren si pjesë e këtij diskutimi.

• Cilat nga pyetjet e Almës ndjeve se ishin më kuptimplota për ty? Përse?

• Cilat fjalë ose fraza gjete nga këto vargje që mund të të japin dëshirën dhe kurajën për t’u penduar?

• Çfarë mësove rreth Perëndisë dhe dëshirave të Tij për ty nga ajo që ke studiuar?

Mendo për atë që ke mësuar ose ndier sot, teksa ke përdorur fjalët e Almës për të vlerësuar përparimin tënd shpirtëror. Përcakto një ose dy gjëra për të cilat do të doje të punoje si rezultat i asaj që ke studiuar. Mendo për atë që do të fillosh të bësh sot, me cilat pengesa mund të përballesh dhe se si mund të kërkosh ndihmën e Perëndisë në kapërcimin e pengesave të tua. Shënoji mendimet dhe mbresat e tua në ditarin tënd të studimit.

Komente dhe Informacion për Rrethanat

Alma 5:9, 26. Çfarë mund të na pengojë ta ruajmë një ndryshim të zemrës?

Plaku Uilford W. Andersen, i Të Shtatëdhjetëve, dha mësim:

Plaku Uilford W. Andersen

“Kur e marrim dhuratën e Frymës së Shenjtë pas pagëzimit, ne mbushemi me muzikën qiellore që e shoqëron kthimin në besim. Zemrat tona ndryshohen dhe ne ‘nuk kemi më prirje të bëjmë keq, por të bëjmë mirë vazhdimisht’ (Mosia 5:2). Por Shpirti nuk do ta durojë mosmirësinë apo krenarinë ose lakminë. Nëse e humbasim atë ndikim të brishtë në jetën tonë, harmonitë e çmuara të ungjillit mund të bëhen shpejt joharmonike dhe më së fundi mund të heshten. Alma bëri pyetjen tejpërshkruese: ‘Në qoftë se ju keni ndier të këndoni këngën e dashurisë shëlbuese, unë do t’ju pyesja, a ndiheni kështu tani?’ (Alma 5:26).” (Uilford W. Andersen, “Muzika e Ungjillit”, Liahona, maj 2015, f. 55)

Alma 5:14. Çfarë do të thotë të lindësh nga Perëndia?

Plaku Dejvid A. Bednar, i Kuorumit të Dymbëdhjetë Apostujve, shpjegoi:

Plaku Dejvid A. Bednar

“Shërbëtorët e autorizuar të Zotit përsërisin mësimin se një nga qëllimet parësore të të qenit tonë në vdekshmëri, është që të ndryshojmë e të shndërrohemi shpirtërisht përmes Shlyerjes së Jezu Krishtit. …

Ne udhëzohemi të ‘[vijmë] te Krishti dhe [të] përsos[emi] në të dhe [t’i] moho[jmë] vetes çdo ligësi’ (Moroni 10:32), të bëhemi ‘krijes[a të] re[ja]’ në Krishtin (shih te 2 Korintasve 5:17), të zhveshim ‘njeriu[n e] natyrshëm’ (Mosia 3:19) dhe të përjetojmë ‘një ndryshim të madh te ne, ose në zemrat tona, që ne [të mos] kemi më prirje të bëjmë keq, por të bëjmë mirë vazhdimisht’ (Mosia 5:2). Ju lutem të vini re se shndërrimi që përshkruhet në këto vargje, është i fuqishëm, jo i pakët – [një] rilindje shpirtërore dhe ndryshim themelor për atë që ndiejmë dhe dëshirojmë, për atë që mendojmë dhe bëjmë si dhe për atë që jemi. Në të vërtetë, thelbi i ungjillit të Jezu Krishtit shkakton një ndryshim themelor e të përhershëm në vetë natyrën tonë, i mundësuar nga mbështetja mbi ‘merita[t] dhe mëshirë[n] dhe hiri[n e] Mesias së Shenjtë’ (2 Nefi 2:8). Kur zgjedhim që t’i shkojmë pas Mësuesit, zgjedhim të ndryshojmë – të rilindim shpirtërisht.” (Dejvid A. Bednar, “Duhet të Lindni Sërish”, Liahona, maj 2007, f. 19–20; Konferenca e Përgjithshme, prill 2007, f. 20)

Veprimtari Plotësuese të të Mësuarit

Alma 5:4–13. “A keni mbajtur mjaftueshëm në kujtesë robërinë e etërve tuaj?”

Merreni parasysh t’i ftoni nxënësit të vijnë në orën mësimore të përgatitur të tregojnë për një paraardhës që u la një trashëgimi për ta ndjekur. Ndërkohë që diskutoni vargjet tek Alma 5:4–13, ju mund t’i ftoni nxënësit të tregojnë historitë e tyre. Ju gjithashtu mund të merrni parasysh ta përdorni thënien vijuese nga Plaku Uilliam R. Uolker, i Të Shtatëdhjetëve, si pjesë e këtij diskutimi:

“Do të ishte një gjë e mrekullueshme nëse çdo shenjtor i ditëve të mëvonshme do t’i njihte historitë e kthimit në besim të paraardhësve të [vet]. …

Sa më shumë që ndihemi të lidhur me paraardhësit tanë të drejtë, aq më shumë gjasa ka që do të bëjmë zgjedhje të mençura e të drejta.

Dhe kështu ndodh. Secili prej nesh do të bekohet shumë nëse i njohim historitë e besimit dhe të sakrificës që i bënë paraardhësit tanë të bashkoheshin me Kishën e Zotit” (Uilliam R. Uolker, “Jeto i Vërtetë ndaj Besimit”, Liahona, maj 2014, f. 97, 99).

Kardiograma shpirtërore

Shpjegoni se një kardiogramë është një grafik që mjekët nganjëherë e përdorin për të vlerësuar gjendjen e zemrës sonë fizike. Në një mënyrë të ngjashme, pyetjet që bëri Alma tek Alma 5 u hartuan për t’i ndihmuar njerëzit e popullit të tij ta vlerësonin gjendjen shpirtërore të zemrave të tyre.

Merreni parasysh t’i paraqitni vargjet vijuese: Alma 5:27, 28, 29, 30–31. Ftojini nxënësit ta studiojnë më vete çdo varg ose grup vargjesh dhe të përgjigjen se sa mirë pyetjet e Almës i përshkruajnë ata duke përdorur shkallën vijuese: “Gjithmonë”, “Pothuajse gjithmonë”, “Zakonisht”, “Ndonjëherë”, ose “Rrallëherë, në mos kurrë”. Ju mund të doni të sugjeroni që nxënësit duhet t’i përgjigjen pyetjes te vargu 29 sikur të thoshte: “A keni hequr dorë nga zilia?”

Pasi nxënësit të kenë pasur kohë të mjaftueshme për ta plotësuar veprimtarinë, ftojini ata të mbajnë shënim në ditarët e tyre të studimit çfarëdo mendim ose mbresë që mund të kenë pasur.

Mësimet e Almës për lindjen përsëri

Nxënësit mund të përfitonin nga studimi i kapitullit Alma 5 me një mendësi që të përpiqen për ta kuptuar më mirë kthimin në besim. Për shembull, nxënësit mund t’i studiojnë vargjet Alma 5:2–7 duke i kushtuar vëmendje rolit që Jezu Krishti mund të luajë për të na ndihmuar të lindim përsëri dhe të përjetojmë një ndryshim të zemrës. Ata mund të studiojnë vargjet Alma 5:8–16, 21, duke kërkuar ndikimin që Shpëtimtari mund të ketë tek ata që lindin përsëri dhe ushtrojnë besimin tek Ai.

Material filmik nga Libri i Mormonit

Si pjesë e studimit prej nxënësve të kapitullit Alma 5, merreni parasysh të shfaqni “Alma Predikon Fjalën e Perëndisë” nga kodi kohor 02:00 deri në 04:38.