Alma 5:33–62

“Bariu i Mirë Ju Thërret”

Pasi i nxiti anëtarët e Kishës në Zarahemlë të reflektonin thellësisht mbi qëndrimin e tyre me Atin Qiellor dhe Jezu Krishtin (shih tek Alma 5:1–32), Alma i ftoi ata të vinin tek Krishti duke përdorur gjuhë të figurshme të dhembshur si “krahët e [Tij të] mëshirës janë shtrirë” (Alma 5:33), “pendohuni dhe unë do t’ju pranoj” (Alma 5:33) dhe “bariu i mirë ju thërret” (Alma 5:38). Ky mësim mund të të ndihmojë në përpjekjet e tua për të ardhur te Jezu Krishti dhe për të marrë bekimet që Ai të ofron.

Përqendrohuni te rolet e Jezu Krishtit. Ndihmojini nxënësit të arrijnë ta njohin dhe ta duan Shpëtimtarin duke dalluar se si Ai i përmbush rolet e Tij si Shpëtimtari dhe Shëlbuesi i tyre. Nxitini ata të reflektojnë për mënyrën se si Jezu Krishti e ka demonstruar dashurinë dhe kujdesin e Tij për ta personalisht.

Përgatitja e nxënësve: Ftojini nxënësit të studiojnë vargjet tek Alma 5:33–34 dhe të vijnë në klasë të përgatitur për të treguar atë që mësuan rreth Shpëtimtarit nga këto vargje.

Veprimtari të Mundshme të të Mësuarit

Pendohuni dhe unë do t’ju pranoj

Merreni parasysh të paraqitni nja dy figura që mund të jenë interesante për nxënësit dhe ftojeni klasën të diskutojë përse thënia vijuese mund të jetë e vërtetë.

Një thënie e lashtë thotë: “Një fotografi vlen sa një mijë fjalë”.

Tani paraqitini figurat vijuese dhe ftojini nxënësit të tregojnë se çfarë shprehin ato.

Ti mund të kujtosh se Alma 5 përmban mësimet e Almës ndaj anëtarëve të Kishës në Zarahemlë, disa prej të cilëve ishin bërë krenarë dhe kishin rënë në mëkat (shih tek Alma 4:8–12). Pasi u bëri këtyre njerëzve një seri pyetjesh për t’i ndihmuar ata të vlerësonin përparimin e tyre shpirtëror, Alma dha mësim të vërteta të rëndësishme rreth Shpëtimtarit.

Lexo tek Alma 5:33–34 duke kërkuar atë që Alma donte që populli i tij të kuptonte rreth Jezu Krishtit.

Kjo mund të jetë një mundësi e mirë për t’i ftuar nxënësit të tregojnë atë që mësuan gjatë përgatitjes së nxënësve.

• Cilat fjalë ose fraza nga këto vargje ishin më kuptimplota për ty? Përse?

• Çfarë ngjashmërish vure re ndërmjet këtyre vargjeve dhe figurave të Shpëtimtarit që pe?

• Si mund ta ndryshojë kuptueshmëria e parimeve në këto vargje mënyrën se si dikush e sheh Jezu Krishtin?

Nëse nxënësit mund të përfitonin nga një studim më i thellë i ftesës së Shpëtimtarit për të ardhur tek Ai, merreni parasysh t’i ftoni ata të studiojnë disa ose të gjitha shkrimet e shenjta vijuese, mbase me një partner ose një grup të vogël: Mateu 11:28–30; 2 Nefi 26:33; 3 Nefi 9:14; dhe Ethëri 12:27. Nxënësit gjithashtu mund t’i shtojnë këto fragmente si referenca-kryq tek Alma 5:33–34 në shkrimet e tyre të shenjta. Pasi nxënësit ta kenë mbaruar studimin e këtyre fragmenteve shtesë, ftoni vullnetarë të japin ide të tjera që i fituan rreth Jezu Krishtit nga këto vargje.

Mendo për dëshirat e tua të tanishme për ta pranuar ftesën e Jezu Krishtit për t’u penduar dhe për të ardhur tek Ai dhe nëse ti përballesh me pengesa që e bëjnë të vështirë të jesh ndjekës i Tij. Ndërsa e vazhdon studimin, kërko mësimet që mund të të ndihmojnë në përpjekjet e tua për t’i kapërcyer ato pengesa dhe për ta ndjekur Jezu Krishtin.

Mbajtja vesh e zërit të Bariut të Mirë

Pasi dha mësim rreth ftesës së Shpëtimtarit për t’u penduar dhe ardhur tek Ai, Alma dha mësime shtesë rreth Jezu Krishtit për ta bindur popullin e tij ta ndiqte Shpëtimtarin.

Lexo tek Alma 5:37–39 dhe kërko mesazhin e Almës për popullin e tij.

Merreni parasysh t’i ftoni nxënësit të diskutojnë për pyetjet në vijim me një partner.

• Si mendon, çfarë donte Alma që populli i tij të dinte dhe ndiente rreth Jezu Krishtit (Bariut të Mirë) nga kjo analogji?

• Si mendon, çfarë donte Alma që populli i tij të dinte dhe ndiente rreth vetes së tij (deles) nga kjo analogji?

Një e vërtetë që mund të mësojmë nga këto vargje, është se ne duhet të mbajmë vesh për zërin e Bariut të Mirë në mënyrë që të jemi delet e Tij.

Presidenti Rasëll M. Nelson dha përkufizimin vijues për fjalën mbaj vesh:

“Do të thotë ‘t’ia vini veshin me qëllimin që të bindeni’. Të mbajmë vesh do të thotë ta ‘dëgjojmë Atë’ – ta dëgjojmë atë që thotë Shpëtimtari dhe pastaj t’i kushtojmë vëmendje këshillës së Tij.” (Rasëll M. Nelson, “Dëgjojeni Atë”, Liahona, maj 2020, f. 89)

• Çfarë di ti për Shpëtimtarin që të bën ty të duash ta mbash vesh Atë dhe të numërohesh mes deleve të Tij?

Plaku Geri E. Stivenson, i Kuorumit të Dymbëdhjetë Apostujve, tregoi disa nga bekimet që Shpëtimtari na ofron kur ne e lejojmë Atë të jetë Bariu ynë i Mirë. Lexo pohimin vijues ose shiko materialin filmik “Zemra të Thurura në Bashkim”, që është në dispozicion te ChurchofJesusChrist.org, nga kodi kohor 13:56 deri në 14:51.

“Teksa i shohim gjërat nëpërmjet thjerrave të ungjillit, ne kuptojmë që edhe ne jemi nën kujdestarinë e një kujdestari të dhembshur, i cili Vetë ndërvepron me mirësi dhe një shpirt përkujdesës. Bariu i Mirë e njeh secilin prej nesh me emër dhe ka një interesim vetjak për ne. Vetë Zoti Jezu Krisht tha: ‘Unë jam bariu i mirë, dhe i njoh delet e mia. … Dhe [do ta] lë jetën time për delet’ [Gjoni 10:14, 15].

… Unë gjej paqe të qëndrueshme në njohurinë se ‘Zoti është bariu im’ [Psalmeve 23:1] dhe në faktin që secili prej nesh njihet prej Tij dhe është nën përkujdesin e Tij dashamirës. Kur përballemi me erën dhe stuhitë, sëmundjet dhe lëndimet e jetës, Zoti – Bariu ynë, Kujdestari ynë – do të na ushqejë me dashuri e mirësi. Ai do t’i shërojë zemrat tona dhe do t’i ripërtërijë shpirtrat tanë.” (Geri E. Stivenson, “Zemra të Thurura në Bashkim”, Liahona, maj 2021, f. 23)

• Çfarë të bën përshtypje rreth arsyes përse ne dëshirojmë ta ndjekim Bariun e Mirë, Jezu Krishtin?

Mënyra se si mund ta mbani vesh zërin e Bariut të Mirë

Alma sugjeroi disa mënyra se si populli i Zarahemlës mund ta mbante vesh zërin e Bariut të Mirë. Lexo tek Alma 5:40–41, 50–51, 57 dhe kërko se çfarë këshilloi Alma.

Ndërsa nxënësit u përgjigjen pyetjeve vijuese, ju mund të doni t’i renditni përgjigjet e tyre në tabelë ose t’i ftoni nxënësit të vijnë dhe t’i shkruajnë përgjigjet e tyre.

• Çfarë mësove nga këto vargje rreth mënyrave se si mund ta mbash vesh zërin e Bariut të Mirë?

• Cilat janë disa mënyra se si ne mund të “[dalim] nga të këqijat” dhe të “mos pre[kim] gjërat e tyre të papastra”? (Vargu 57.)

Merreni parasysh t’i ftoni disa vullnetarë të tregojnë përvojat që kanë pasur në jetën e tyre kur vendosën ta mbajnë vesh zërin e Bariut të Mirë dhe çfarë bekimesh vunë re ngaqë e bënë këtë. Mund të merrni parasysh të tregoni një përvojë nga jeta juaj gjithashtu.

• Disa arsye pse dua ta ndjek Jezu Krishtin janë

• Një mënyrë se si do ta mbaj vesh zërin e Tij është

Komente dhe Informacion për Rrethanat

Si mund të përfitojmë nga dëgjimi i zërit të Jezu Krishtit?

Presidenti Rasëll M. Nelson dha idetë vijuese për dëgjimin e zërit të Jezu Krishtit:

“Ati ynë e di se, kur jemi të rrethuar nga pasiguria dhe frika, ajo që do të na ndihmojë më tepër se çdo gjë tjetër, është ta dëgjojmë Birin e Tij.

Sepse kur kërkojmë ta dëgjojmë – ta dëgjojmë vërtet – Birin e Tij, ne do të udhërrëfehemi për ta ditur se çfarë të bëjmë në çfarëdo rrethanë.

… Perëndia na jep modelin për sukses, lumturi dhe gëzim në këtë jetë. Ne duhet t’i dëgjojmë fjalët e Zotit, t’i mbajmë vesh ato dhe t’i kushtojmë vëmendje asaj që Ai na ka thënë!

Teksa kërkojmë të jemi dishepuj të Jezu Krishtit, përpjekjet tona që ta dëgjojmë Atë nevojitet të jenë përherë e më të qëllimshme. Kërkon përpjekje të ndërgjegjshme dhe të vazhdueshme që ta mbushim jetën tonë të përditshme me fjalët e Tij, mësimet e Tij, të vërtetat e Tij.” (Rasëll M. Nelson, “Dëgjojeni Atë”, Liahona, maj 2020, f. 89)

Materiali filmik vijues, “#DëgjojeAtë: Dëgjoje Zërin e Jezu Krishtit”, ilustron rëndësinë e heshtjes së zhurmës rreth nesh që të mund të dëgjojmë zërin e Jezu Krishtit.

Alma 5:57. Si i sheh Shpëtimtari gjërat e papastra në jetën tonë?

Duke e quajtur Jezusin Bariu i Mirë, Plaku Dejll G. Renland, i Kuorumit të Dymbëdhjetë Apostujve, dha mësim:

“Përderisa Perëndia e përdor sëmundjen si metaforë për mëkatin kudo në shkrimet e shenjta, është e arsyeshme të pyesim: ‘Si reagon Jezu Krishti kur përballet me sëmundjet tona metaforike – mëkatet tona?’ Në fund të fundit, Shpëtimtari tha se Ai ‘nuk mund ta shoh[ë] mëkatin as me shkallën më të vogël të lejimit’ [Doktrina e Besëlidhje 1:31]; prandaj si mund të na shohë Ai ne, të papërsosur siç jemi, pa u zmbrapsur me tmerr e neveri?

Përgjigjja është e thjeshtë dhe e qartë. Si Bariu i Mirë, Jezu Krishti e sheh sëmundjen në delet e Tij si një gjendje që ka nevojë për trajtim, përkujdesje e dhembshuri. Ky bari, Bariu ynë i Mirë, gjen gëzim duke i parë delet e Tij të sëmura të përparojnë drejt shërimit.

Shpëtimtari parashikoi se Ai do ta ‘kullosë kopenë e tij [ashtu] si një bari’ [Isaia 40:11], do ta ‘kërkoj[ë] të humburën, do ta kthej[ë] të hutuarën, … do t’i lidh[ë] plagën [dhe] do ta forcoj[ë] të sëmurën’ [Ezekieli 34:16]. Edhe pse Izraeli braktisës u përshkrua si të ishte i pushtuar nga ‘plagë, vurrata dhe plagë të hapura’ mëkatare [Isaia 1:6], Shpëtimtari nxiti, këshilloi dhe premtoi shërim [shihni tek Isaia 1:18].” (Dejll G. Renland, “Bariu Ynë i Mirë”, Liahona, maj 2017, f. 30)

Veprimtari Plotësuese të të Mësuarit

Alma 5:45–48. “Unë vetë e di se ato janë të vërteta”

Nxënësit mund t’i lexojnë këto vargje, duke kërkuar se si Alma e kishte marrë njohurinë e tij të së vërtetës. Ju mund të vini në dukje se, megjithëse Alma kishte parë një engjëll, ai ia atribuoi njohurinë dhe dëshminë e tij për të vërtetën zbulesës që kishte marrë nëpërmjet Frymës së Shenjtë. Merreni parasysh të lexoni thënien vijuese nga Presidenti Jozef Filding Smith (1876–1972).

“Kur një njeri ka një shfaqje nga Fryma e Shenjtë, kjo lë një gjurmë të pashlyeshme në shpirtin e tij, që nuk është e lehtë të fshihet. Është Shpirti që i flet shpirtit dhe kjo gjë vjen me një forcë bindëse. Shfaqja e një engjëlli, ose madje edhe e vetë Birit të Perëndisë, do të linte mbresë te syri e mendja dhe në fund do të zbehej, por mbresat e lëna nga Fryma e Shenjtë zhyten thellë në shpirt dhe janë më të vështira për t’u fshirë” (Joseph Fielding Smith, Answers to Gospel Questions, përmb. Joseph Filding Smith Jr. [1958], 2:151).

Merreni parasysh të bëni pyetje si ajo në vijim: Përse është kaq ndikuese zbulesa nëpërmjet Frymës së Shenjtë? Si mendoni, përse është e rëndësishme që secili prej nesh të marrë një dëshmi për Jezu Krishtin me anë të zbulesës nëpërmjet Frymës së Shenjtë? Si e mishëroi Alma mbajtjen vesh ndaj Bariut të Mirë?

Alma 5:53–55. “A mund t’u qëndroni këtyre fjalëve?”

Mund t’i vini nxënësit t’i lexojnë këto vargje dhe të kërkojnë qëndrimet dhe veprimet që e bëjnë të vështirë që dikush ta mbajë vesh zërin e Shpëtimtarit. Merreni parasysh t’i renditni përgjigjet në tabelë. Cila nga ato sfida duket veçanërisht e vështirë për rininë sot? Cilët janë shembujt e mënyrës se si Shpëtimtari na ka mësuar t’u përgjigjemi këtyre sfidave?