Alma 7:1–13

Që Ai të Mund të Ndihmojë Popullin e Tij

Vepra dhe lavdia e Perëndisë është “të bëj[ë] të ndodhë pavdekësia dhe jeta e përjetshme e njeriut” (Mosia 1:39). Për ta përmbushur këtë, Ai e dërgoi Birin e Tij, Jezu Krishtin, të vuante për mëkatet tona dhe të mundte vdekjen nëpërmjet Ringjalljes së Tij. Shpëtimtari vuajti me gatishmëri të gjitha gjërat për ne “që ai të mund të dijë, sipas mishit, se si të ndihmojë popullin e tij sipas dobësive të tyre” (Alma 7:12). Ky mësim mund të të ndihmojë të mbështetesh te Shpëtimtari yt dhe të ndiesh dashuri më të madhe për Të.

Ndihmojini nxënësit ta dallojnë ndikimin e Frymës së Shenjtë. Fryma e Shenjtë shpesh komunikon nëpërmjet ndjenjave të dashurisë, gëzimit dhe paqes (shihni te Galatasve 5:22–23). Ai gjithashtu dëshmon për Jezu Krishtin (shihni te Gjoni 15:26). Kërko mundësitë e natyrshme për t’i ndihmuar nxënësit ta kuptojnë marrëdhënien ndërmjet ndjenjave të tyre dhe ndikimit të Frymës së Shenjtë. Mbani në mendje se jo të gjithë nxënësit do ta ndiejnë ndikimin e Frymës së Shenjtë në të njëjtën mënyrë.

Përgatitja e nxënësve: Merreni parasysh t’i ftoni nxënësit të studiojnë tek Alma 7:11–13 dhe të kërkojnë në këto vargje atë që Jezu Krishti vuajti nëpërmjet Shlyerjes së Tij dhe pse i vuajti këto gjëra.

Veprimtari të Mundshme të të Mësuarit

Gjërat më të rëndësishme

Ju mund të krijoni listën dhe renditjet vijuese së bashku si klasë, ose mund t’i vini nxënësit të krijojnë një listë me një partner ose grup të vogël dhe t’i krahasojnë përgjigjet e ndryshme.

Krijo një listë të asaj që ti i konsideron se janë disa nga ngjarjet më të rëndësishme në historinë botërore dhe më pas renditi ato sipas radhës nga më e rëndësishmja te më pak e rëndësishmja.

• Çfarë e bën një ngjarje domethënëse ose të rëndësishme?

• Përse renditja e tyre sipas radhës së rëndësisë mund të jetë disi e vështirë për t’u bërë?

Ndërsa Alma i foli popullit në tokën e Gideonit, ai profetizoi se megjithëse “shumë gjëra do të vijnë; … një prej këtyre gjërave ka rëndësi më të madhe” nga të gjitha të tjerat (Alma 7:7).

Lexo tek Alma 7:7, duke kërkuar këtë ngjarje nga më të rëndësishmet. Merre parasysh ta shenjosh atë që gjen.

• Si mendon, përse ardhja e Shpëtimtarit është ngjarja më e rëndësishme e të gjithë kohëve?

Merreni parasysh t’i ftoni nxënësit t’i mbajnë shënim mendimet e tyre rreth sa vijon në ditarët e tyre të studimit.

Pasi Alma i foli popullit të Zarahemlës dhe e vuri në rregull Kishën në atë pjesë të vendit (shih tek Alma 6), ai udhëtoi drejt tokës së Gideonit. Alma 7 përmban mësime të rëndësishme nga Alma për popullin e Gideonit rreth Jezu Krishtit dhe Shlyerjes së Tij. Para se të fillosh të studiosh, shpenzo një çast për të menduar rreth mënyrës se si Shlyerja e Jezu Krishtit ka lidhje me jetën tënde. Me çfarë rrethanash po përballesh aktualisht në të cilat të nevojitet ndihma që sigurojnë Ati Qiellor dhe Shpëtimtari?

Ndërsa studion sot, kërko mësime rreth Jezu Krishtit dhe Shlyerjes së Tij që mund të të ndihmojnë ta kuptosh më mirë atë që Ai ka bërë për ty dhe se si Ai mund të të ndihmojë.

Alma jep mësim rreth Shlyerjes së Shpëtimtarit

Merreni parasysh t’i ftoni nxënësit ta kopjojnë grafikun vijues në ditarët e tyre të studimit. Përndryshe, ju mund ta paraqitni ose kopjoni atë në tabelë që të mund ta plotësoni së bashku si klasë.

Çfarë vuajti Shpëtimtari për mua	Përse vuajti Shpëtimtari për mua

Alma 7:11–13 është një fragment i zotërimit doktrinor. Merre parasysh t’i shenjosh fragmentet e zotërimit doktrinor në mënyrë të dallueshme që të mund t’i gjesh me lehtësi. Do të kesh mundësi në mësimin e ardhshëm që ta ushtrosh zbatimin e doktrinës që jepet mësim në këtë fragment, për një pyetje ose situatë.

Lexo tek Alma 7:11–13, duke kërkuar mësimet e Almës rreth asaj që Jezu Krishti vuajti ose mori mbi Veten e Tij për ty si pjesë e Shlyerjes së Tij. Shënoji këto në kolonën e parë të grafikut tënd. Mund të jetë e dobishme të dish se fjala dobësi iu referohet të metave dhe dobësive që përjetojmë në vdekshmëri.

Nëse zgjidhni ta përdorni grafikun në tabelë, merreni parasysh t’i ftoni nxënësit të shënojnë në të atë që gjetën nga këto vargje. Më pas, ftojini ata t’i lexojnë fragmentet vijuese të shkrimit të shenjtë dhe të mbajnë shënim hollësi të tjera që mësojnë rreth vuajtjes së Shpëtimtarit.

Lexo te 2 Nefi 9:21; Mosia 3:5–8; dhe Doktrina e Besëlidhje 19:16–19. Këto fragmente përfshijnë hollësi të tjera rreth vuajtjes së Shpëtimtarit. Shto çfarëdo fjalë ose frazë që të duket e rëndësishme në kolonën e parë në grafikun tënd. Merre parasysh të shtosh një referencë-kryq ose hallkë lidhëse nga këto fragmente tek Alma 7:11–13.

• Çfarë mendimesh apo ndjenjash pate ndërsa mësove rreth vuajtjes së Shpëtimtarit?

• Përse mendon se është e rëndësishme ta kuptosh se çfarë vuajti Shpëtimtari dhe mori mbi Vete si pjesë e flijimit të Tij shlyes?

Përse Jezu Krishti i vuajti këto gjëra

Lexo përsëri tek Alma 7:11–13, këtë herë duke kërkuar përse Shpëtimtari vuajti për ty. Përqendrohu te frazat që fillojnë me “që ai” ose “që … e tij” ndërsa lexon. Shkruaje atë që gjen, në kolonën e dytë të grafikut tënd. Mund të jetë e dobishme të dish se fjala ndihmojë do të thotë të ofrosh lehtësim ose ndihmë.

• Çfarë mësove rreth arsyes përse Jezu Krishti i vuajti këto gjëra për ty?

  Nxënësit mund t’i shënojnë përgjigjet e tyre për pyetjen e mëparshme te grafiku në tabelë.

• Si do ta përmblidhje atë që ke studiuar tek Alma 7:11–13 në një pohim të vërtete?

Nga Alma 7:11–13, ti mund të kesh përcaktuar një të vërtetë si kjo: Jezu Krishti vuajti që të më shpëtojë nga mëkati dhe vdekja dhe të më ndihmojë përmes sfidave të vdekshmërisë.

Merreni parasysh ta shkruani këtë të vërtetë në tabelë.

Presidenti Dallin H. Ouks, i Presidencës së Parë, tregoi disa nga sfidat e vdekshmërisë për të cilat Shpëtimtari mund të na ndihmojë. Lexoje pohimin vijues.ChurchofJesusChrist.org

“Shpëtimtari ynë përjetoi dhe vuajti plotësinë e të gjitha sfidave të vdekshme ‘sipas mishit’, kështu që Ai të mund të dinte ‘sipas mishit’ se si ‘të ndihmojë [që do të thotë të ofrosh lehtësim] popullin e tij sipas dobësive të tyre’. Prandaj Ai i njeh mundimet tona, pikëllimet tona, tundimet tona dhe vuajtjen tonë, sepse Ai me gatishmëri i përjetoi ato të gjitha si një pjesë thelbësore e Shlyerjes së Vet. Dhe për shkak të kësaj, Shlyerja e Tij i jep Atij fuqinë për të na ndihmuar – për të na dhënë forcën për t’i duruar të gjitha.” (Dallin H. Ouks, “Të Forcuar nga Shlyerja e Jezu Krishtit”, Liahona, nëntor 2015, f. 61)

• Çfarë të ndihmon ky pohim të kuptosh ose ndiesh rreth Shpëtimtarit?

Lidhja e tij me jetën tënde

Ndihmojini nxënësit ta lidhin atë që kanë mësuar në këtë mësim, me jetën e tyre. Një mënyrë për ta bërë këtë mund të jetë t’u jepni kohë atyre të përsiatin dhe ta plotësojnë vetë sa vijon.

Përsiat për një çast se çfarë vuajti Shpëtimtari për ty personalisht. Për shembull, çfarë hidhërimesh, tundimesh, dobësish ose vuajtjesh të veçanta je duke përjetuar ose ke përjetuar? Merre parasysh t’i shkruash mendimet e tua poshtë grafikut tënd.

Më pas, përsiat me lutje se si Shpëtimtari të ka forcuar ose mund të të forcojë në secilën nga këto vështirësi. Kërkoji Atit Qiellor të të frymëzojë ndërsa i shkruan mendimet dhe ndjenjat e tua.

Merreni parasysh të ftoni vullnetarë që të tregojnë disa nga idetë që shënuan. Pyetjet në vijim mund të përdoren gjithashtu për të udhërrëfyer një diskutim në orën mësimore. Përpara se të bëni pyetjen e parë, merreni parasysh të tregoni një shembull vetjak nga jeta juaj. Kur u kërkoni nxënësve të shprehen, kujtojuni atyre të mos tregojnë përvoja që mund të jenë tepër vetjake ose të shenjta.

• Kur e ke ndier forcën që jep Jezu Krishti nëpërmjet Shlyerjes së Tij?

• Çfarë ke mësuar apo ndier rreth Jezu Krishtit në studimin tënd sot që dëshiron ta mbash mend?

Dëshmoni për të vërtetat që keni diskutuar sot.

Komente dhe Informacion për Rrethanat

Si ndihet Zoti për mëkatet ose dobësitë që unë e kam të vështirë t’i kapërcej?

Plaku Riçard G. Skot (1928–2015), i Kuorumit të Dymbëdhjetë Apostujve, dha mësim:

“Lajmi i gëzuar për këdo që dëshiron të çlirohet nga pasojat e zgjedhjeve të dobëta të së kaluarës, është se Zoti i sheh dobësitë ndryshe nga mënyra se si e sheh rebelimin. Ndërsa Zoti paralajmëron se rebelimi pa pendesë do të sjellë ndëshkim, kur Zoti flet për dobësitë, flet gjithmonë me mëshirë.” (Riçard G. Skot, “Fuqia Vetjake nëpërmjet Shlyerjes së Jezu Krishtit”, Liahona, nëntor 2013, f. 83)

A e njeh Jezu Krishti me të vërtetë situatën time?

Plaku Xhefri R. Holland, i Kuorumit të Dymbëdhjetë Apostujve, dha mësim:

“Krishti eci në shtegun që çdo i vdekshëm thirret të ecë, me qëllim që Ai të dijë se si të na ndihmojë dhe forcojë në kohërat tona më të vështira. Ai i njeh barrët më të thella dhe më vetjake që mbartim. Ai i njeh dhembjet më të dukshme dhe më therëse që durojmë. Ai zbriti nën gjithë këtë pikëllim me qëllim që Ai të mund të na ngrinte mbi të. Nuk ka asnjë ankth ose hidhërim apo trishtim në jetë që Ai nuk e ka vuajtur për hirin tonë dhe që nuk e ka duruar mbi vetë supet e tij të guximshme dhe të dhembshura.” (Jeffrey R. Holland, Christ and the New Covenant: The Messianic Message of the Book of Mormon [1997], f. 223–224)

Plaku Methju S. Holland, i Të Shtatëdhjetëve, dha mësim:

“Për cilindo që sot ka dhembje kaq të forta ose kaq të veçanta saqë ndieni se askush nuk mund t’i vlerësojë ato plotësisht, ju mund të keni të drejtë. Mund të mos ketë asnjë pjesëtar të familjes, mik apo udhëheqës priftërie – sado i ndjeshëm dhe mirëdashës që mund të jetë secili prej tyre – që e di saktësisht atë që po ndieni ose që ka fjalët e sakta për t’ju ndihmuar që të shëroheni. Por dijeni këtë: është Dikush që e kupton përsosurisht atë që po përjetoni, i cili është ‘më i fuqishëm se e gjithë toka’ [1 Nefi 4:1] dhe i cili ‘mund të bëjë jashtë mase më tepër nga sa kërko[ni] ose mendo[ni]’ [Efesianëve 3:20]. Procesi do të shpaloset në mënyrën e Tij dhe në kohën e Tij, por Krishti qëndron gjithmonë gati për të shëruar në çdo grimë, çdo aspekt të agonisë suaj.” (Methju S. Holland, “Dhurata e Mrekullueshme e Birit”, Liahona, nëntor 2020, f. 46)

Veprimtari Plotësuese të të Mësuarit

Ndihma e Shpëtimtarit për depresionin dhe sëmundjet mendore

Ndërsa diskutoni për doktrinën se Jezu Krishti vuajti për të na shpëtuar nga mëkati dhe vdekja dhe për të na ndihmuar përmes sfidave të vdekshmërisë (shihni tek Alma 7:11–13).  ChurchofJesusChrist.org

Alma 7:13. “Vini re, kjo është dëshmia që është në mua.”

Alma i përmbylli mësimet e tij rreth Shlyerjes së Shpëtimtarit duke thënë: “Tani vini re, kjo është dëshmia që është në mua” (Alma 7:13). Mund t’i ftoni nxënësit t’i tregojnë dëshmitë e tyre vetjake për Shpëtimtarin ashtu siç bëri Alma me popullin në Gideon. Ftojini ata të mendojnë se çfarë do të tregonin nëse do t’u kërkohej të jepnin mësim mendimet dhe ndjenjat e zemrave të tyre lidhur me Shpëtimtarin. Cila është “dëshmia që është në [ta]”?