Алма 5:1–32

Өөртөө дүгнэлт хийхэд зориулагдсан Алмагийн асуултууд

Есүс Христтэй харилцах харилцааныхаа бат бөх байдлыг илүү тодорхой харахад бидэнд өөрөө өөрийгөө үнэлж дүгнэх хормууд тусалдаг. Алма бардамнал, зөрчилдөөн нь Сүмийн нэг хэсэг болсныг мэдээд, Зарахемла дахь Сүмийн гишүүдээс зүрх сэтгэлээ юун дээр төвлөрүүлж, Бурханы өмнө хэрхэн зогсож буйгаа эргэцүүлэн бодохыг урамшуулан дэмжсэн хэд хэдэн асуулт асуусан. Энэ хичээл таныг сүнслэг байдлын ахицаа үнэлж, Есүс Христэд улам хүчирхэг хөрвөхөд тань туслах зорилготой.

Суралцагчдыг хувийн илчлэлээ эрэлхийлэхэд туслах нь. Суралцагчдад судруудыг дор дороо судалж, эргэцүүлэн бодох цаг гаргаж өгөх нь Ариун Сүнсийг урихад тусалж чадна. Суралцагчид сайн мэдээний тухай ойлголт, итгэл үнэмшлээ үнэлэхийн тулд дотогшоо өнгийвөл мэддэг зүйлээ ухамсарлаж, Есүс Христэд улам ойртохын тулд юу мэдэх, мэдрэх, хийх ёстойгоо тодорхойлоход туслах Ариун Сүнсийг урьж чадна.

Суралцагчийн бэлтгэл: Суралцагчдыг Алма 5-ыг гүйлгэн уншиж, бүх асуултын тэмдгийг тэмдэглэхэд урь. Суралцагчид мөн энэ бүлэгт Алмагийн хүмүүсээсээ асуусан зарим асуултыг өөрсдөөсөө асууж болно.

Боломжит суралцах үйл ажиллагаа

Өөрөө өөрийгөө дүгнэх

Ариун сүмийн зөвшөөрлийн бичгийн ярилцлага, бишоп эсвэл салбарын ерөнхийлөгчтэй жил бүр хийх ярилцлага, ажлын ярилцлага зэрэг өөр хүнтэй ярилцлага хийх боломжуудын тухай бод.

• Ярилцлагуудын зорилго юу вэ?

• Та өөрөөсөө хэрхэн ярилцлага авч болох вэ?

Арван хоёр төлөөлөгчийн чуулгын ерөнхийлөгч М.Рассэлл Баллард сүнслэг байдлын ахиц дэвшлээ үнэлж дүгнэхэд тогтмол цаг гаргахын зарим ашиг тусын тухай ийн хуваалцсан. Та “Эргэж очоод, хүлээн ав” видеог цагийн код 8:14-өөс 8:58 хүртэл үзэж ChurchofJesusChrist.orgэсвэл доорх бичвэрийг уншиж болно.

[Бурханы оршихуйд] эргэн очих ба амлагдсан адислалуудыг хүлээн авах хоёр дээр төвлөрсөн чигээрээ байхын тулд би өөрөөсөө “Би хэр сайн байна вэ?” гэж асуух цаг гаргах хэрэгтэйг олж мэдсэн.

Энэ нь өөрөө өөртэйгөө ганцаарчлан ярилцлага хийхтэй төстэй юм. Хэрэв энэ сонин сонсогдож байвал энэ дэлхий дээр та нарыг өөрсдөөс тань илүү сайн мэдэх хүн байгаа эсэхийг бодоод үз. Та нар өөрсдийн бодол санаа, бусдын нүднээс далд үйлддэг үйлдэл, хүсэл мөрөөдөл, зорилго, төлөвлөгөөгөө мэднэ. Та нар … хэрхэн хөгжиж байгаагаа хэнээс ч илүү сайн мэднэ. (М.Рассэлл Баллард, “Эргэж очоод, хүлээн ав,” 2017 оны 4-р сарын Ерөнхий чуулган, 52)

Та сүнслэг байдлынхаа ахиц дэвшлийг үнэлж дүгнэхэд хэр их цагийг зарцуулдаг талаараа бод.

• Үүнийг тогтмол хийх нь ямар ашиг тустай вэ?

Судраа судлахдаа ашиглаж болох ур чадвар бол түр завсарлаад, судалж буй сургаал, зарчмуудынхаа дагуу хэр сайн амьдарч байгаагаа дүгнэхэд цаг гаргах явдал юм. Та өнөөдөр Алма 5-ыг судалж байхдаа үүнийг хийх боломжтой болно. Энэ бүлэгт Алмагийн хүмүүсээсээ асуусан олон асуулт багтсан. Мөн та эдгээр асуултыг өөрөөсөө асууж, сүнслэг байдлынхаа ахиц дэвшлийг дүгнэж болно. Суралцах явцдаа юуг сайн хийж байгаагаа мөн Тэнгэрлэг Эцэг таныг хэрхэн сайжруулахыг мэдэхэд туслах удирдамжийг Түүнээс эрэлхийл.

Суралцагчдад Алма 5-д агуулсан олон тооны асуултыг харахад туслахын тулд суралцагчдыг бүлгийг гүйлгэн харж, асуултын тэмдгүүдийг анзаарахад урь. Мөн суралцагчид энэ бүлгийн бүх асуултын тэмдгүүдийг хараахан тэмдэглээгүй байгаа бол тэднийг судраа хувиараа судлахдаа дугуйлахад эсвэл тэмдэглэхэд урьж болно.

Алма Зарахемлагийн хүмүүст номлов

Алма хүмүүсээсээ бардамнал болон башир аргыг олж харсныхаа дараа Бурханы үгийг заахад өөрийгөө бүрэн зориулахын тулд нифайчуудын ерөнхий шүүгчийн албан тушаалаасаа буусныг эргэн сана (Алма 4:19-ийг үзнэ үү).

Алма Зарахемлагийн нутагт номлож эхлэв. Тэрээр хүмүүстээ хаан Ноагийн үед нифайчуудад тохиолдсон сүнслэг болон бие махбодын боолчлолын тухай сануулсан (Алма 5:3–5-ыг үзнэ үү).

Алма 5:6–13-ыг уншаад, Алма өөрийн хүмүүсийг өмнөх үеийн нифайчуудын талаар юуг санаасай гэж хүссэнийг олж мэд.

• Алма яагаад өөрийн хүмүүсийг эдгээр зүйлийг санаж яваасай гэж хүссэн гэж та бодож байна вэ?

• Алма өөрийн хүмүүсийг 7-р шүлэг дэх Есүс Христийн тухай юуг мэдээсэй гэж хүссэн бэ?

Алма 5:14, 26-г уншаад, Алмагийн хүмүүстээ сүнслэг өвийг нь сануулсныхаа дараа асуусан асуултуудыг олж мэд.

• Алма эдгээр асуултыг асууснаар өөрийн хүмүүсийг юуг ойлгоосой гэж хүссэн бэ?

  Суралцагчид дараахтай адил үнэнийг хэлж хариулж болно: Их Эзэн биднийг зүрх сэтгэлийн хүчит өөрчлөлтийг мэдрээсэй хэмээн хүсдэг бөгөөд бид Бурханаас сүнслэгээр төрснийхөө дараа уг өөрчлөлтөө хадгалж үлдэхийн тулд хөдөлмөрлөх шаардлагатай.

• 14, 26-р шүлэг дээрх шиг асуултуудыг өөрөөсөө асуух нь амьдралд тань хэрхэн нөлөөлнө гэж та бодож байна вэ?

Өөрийгөө үнэлж дүгнэхдээ Алмагийн сургаалыг ашиглах нь

Дараах зааврыг үзүүлж суралцагчдад энэ үйл ажиллагааг бие даан чимээгүй хийх хангалттай хугацаа (боломжтой бол 10-15 минут) өг. Суралцагчдыг үйл ажиллагааг хийж байх хооронд дуулал эсвэл сүнслэг ая зөөлөн тоглуулж болно.

Алма 5:14–30 дээрх Зарахемлагийн хүмүүст хэлсэн Алмагийн үгийг судалж, Алмагийн дүрсэлсэн өөрчлөлт өөрт тань мэдрэгдэж байгаа эсэхийг эргэцүүлэн бод. Судлах явцдаа эдгээр шүлэг дэх Алмагийн асуусан асуултуудын заримыг эсвэл бүгдийг нь ашиглан өөрийгөө дүгнэ. Эдгээр арга замыг ашиглаж болно.

1. Хоёроос гурван шүлэг тус бүрээр Алмагийн асуултууд таны амьдралтай хэрхэн холбогдож байгааг дүгнэж, эргэцүүлэн бод.

2. Алмагийн асуултуудаас өөрт тань хамгийн утга учиртай бөгөөд танд хамааралтай гэж үзсэн цөөн хэдэн асуултыг сонго. Эдгээр асуултыг судлах тэмдэглэлдээ бичиж, асуулт бүрд өгсөн хариулт, бодол, сэтгэгдлээ бич.

3. Эдгээр шүлэг дэх Алмагийн асуусан асуултуудад хариулсны дараа өөрийн сүнслэг байдлын ахиц дэвшлийг дүгнэхэд ашиглаж болохуйц хоёр эсвэл гурван асуултыг зохио. Судлах тэмдэглэлдээ хариултаа бичиж тэмдэглэ.

Суралцагчдыг энэхүү судлах үйл ажиллагааг дуусгасны дараа, тэдэнтэй өөрсдийгөө дүгнэх явцдаа юу суралцаж, мэдэрсэн талаар нь ярилц. Дараах асуултуудыг ярилцлагынхаа нэг хэсэг болгон ашиглаж болно.

• Алмагийн ямар асуулт танд хамгийн утга учиртай санагдсан бэ? Яагаад?

• Эдгээр шүлгээс ямар үг, хэллэг танд наманчлах хүсэл, зориг өгч байна вэ?

• Та судалсан зүйлээсээ Бурханы мөн Түүний хүслийн талаар юу сурч мэдэж авсан бэ?

Өөрийн сүнслэг байдлын ахиц дэвшлийг үнэлж дүгнэхдээ Алмагийн үгсийг ашигласнаар та өнөөдөр юу сурч мэдэж эсвэл мэдэрсэн тухайгаа бод. Сурч мэдсэн зүйлсийнхээ үр дүнд өөрийн ажиллахыг хүсэж буй нэг, хоёр зүйлийг тодорхойл. Та өнөөдөр юу хийж эхлэхээ мөн ямар саад бэрхшээлтэй тулгарч болох, тухайн саад бэрхшээлээ даван туулахдаа Бурханы тусламжийг хэрхэн эрэлхийлж болох талаар бод. Төрсөн мэдрэмж, сэтгэгдлээ судлах тэмдэглэлдээ бичиж тэмдэглэ.

Тайлбар ба нөхцөл байдлын талаарх мэдээлэл

Алма 5:9, 26. Зүрх сэтгэл маань өөрчлөгдөхөд юу саад болох вэ?

Далын ахлагч Вилфорд В.Андэрсэн ийн заасан.

Бид баптисм хүртсэнийхээ дараа Ариун Сүнсний бэлгийг хүлээн авахдаа, хөрвөлтийг даган ирэх тэнгэрлэг хөгжмөөр дүүргэгддэг. Бидний зүрх сэтгэл өөрчлөгдсөн байдаг бөгөөд бид “хилэнцийг үйлдэх хүслийг үгүй болгох, харин үргэлж сайныг хийх” (Мозая 5:2) хүсэлтэй болсон байдаг. Харин Сүнс нь найрсаг бус байдал, бардамнал, атаархлыг хүлцэн тэвчдэггүй. Хэрэв бид амьдралдаа тэрхүү нарийн торгон нөлөөллийг алдвал сайн мэдээний баялаг аялгуу хөг авиагаа маш хурдан алдаж, эцэстээ чимээгүй болон замхран алга болох юм. Алма “хэрэв та нар зүрх сэтгэлийн өөрчлөлтийг эдэлсэн бол, мөн хэрэв та нар гэтэлгэх хайрын дууг дуулмаар санагдсан бол, би асууя, та нар одоо тийн мэдэрч чадна уу” хэмээн сэтгэл түгшээх нэгэн асуултыг тавьсан байдаг. (Алма 5:26). (Вилфорд В.Андэрсэн, “Сайн мэдээний хөгжим,” 2015 оны 4-р сарын Ерөнхий чуулган, 41)

Алма 5:14. Бурханаар төрөх гэдэг нь юу гэсэн утгатай вэ?

Арван хоёр төлөөлөгчийн чуулгын ахлагч Дэвид А.Бэднар ийн тайлбарласан.

Их Эзэний эрх мэдэл бүхий үйлчлэгчид мөнх бус амьдралын үндсэн зорилгуудын нэг бол Есүс Христийн Цагаатгалаар дамжуулан сүнслэг байдлын хувьд өөрчлөгдөн, хувирах явдал гэдгийг удаа дараа заасан. …

Бидэнд “Христэд ирэгтүн, мөн түүгээр төгөлдөржигтүн, мөн бүх бурханлаг бусаас [өөрсдөө] татгалзагтун” (Моронай 10:32), Христ дотор “шинэ бүтээл” болж (2 Коринт 5:17-г үзнэ үү), “төрөлх хүмүүнээ” орхиж (Мозая 3:19) мөн “хилэнцийг үйлдэх хүслийг үгүй болгох, харин үргэлж сайныг хийх болгон, бидэнд, өөрөөр хэлбэл бидний зүрх сэтгэлд хүчирхэг өөрчлөлтийг” мэдэр хэмээн зааварласан (Мозая 5:2) . Эдгээр шүлэгт дүрсэлсэн хөрвөлт нь бяцхан биш, харин сүнсээр дахин төрөх, мэдэрч, хүсэж, бодож, хийж байгаа зүйлс болон бидний мөн чанарыг үндсээр нь өөрчлөх хүчит өөрчлөлт болохыг анхаар. Үнэн хэрэгтээ, Есүс Христийн сайн мэдээний мөн чанар бол ‘Ариун Мессиагийн сайн үйл мөн нигүүлсэл, мөн ач ивээлд’ найдвар тавьснаар (2 Нифай 2:8) өөрсдийн мөн чанарыг үндсээр нь, эргэж буцалтгүй өөрчлөхийг биднээс шаарддаг. Бид Эзэнийг дагахыг сонгосноор өөрчлөгдөж, сүнсээр дахин төрөхийг сонгодог. (David A. Bednar, “Ye Must Be Born Again,” Liahona, May 2007, 19–20)

Нэмэлт суралцах үйл ажиллагаа

Алма 5:4–13. “Та нар эцэг өвгөдийнхөө боолчлолыг хангалттайгаар санасаар байдаг уу?”

Суралцагчдыг өөрсдийн өв залгамжлалыг үлдээсэн өвөг дээдсийнхээ тухай хуваалцахаар бэлтгэлтэй хичээлдээ ирэхэд урь. Алма 5:4–13-ыг ярилцаж байхдаа та суралцагчдыг түүхээ хуваалцахад урьж болно. Энэ ярилцлагын хэсэг болгон Далын ахлагч Виллиам Р.Вокэрын дараах мэдэгдлийг ашиглаж болох юм.

“Хожмын үеийн гэгээнтэн бүр өвөг дээдсийнхээ хөрвөлтийн түүхүүдийг мэддэг бол гайхалтай шүү дээ. …

“Бид зөв шударга өвөг дээдэстэйгээ холбоотой байгаагаа мэдрэхийн хэрээр илүү мэргэн болоод зөв шударга сонголтуудыг хийдэг.

“Энэ бол үнэн. Бид Их Эзэний сүмд нэгдсэн өвөг дээдсийнхээ итгэл, золиослолын түүхийг мэдэж авах юм бол бидний хүн нэг бүр агуу их адислагдах болно” (Виллиам Р.Вокэр, “Итгэлдээ үнэнч амьдрагтун,” 2014 оны 4-р сарын Ерөнхий чуулган, 117, 119).

Сүнслэг зүрхний бичлэг

Зүрхний бичлэг нь бидний зүрхний үйл ажиллагааг үнэлж, шалгахын тулд эмч нарын зарим үед ашигладаг хүснэгт гэдгийг тайлбарла. Үүний нэгэн адил Алма 5 дахь Алмагийн асуусан асуултууд нь түүний хүмүүсийн зүрх сэтгэлийн сүнслэг байдлыг үнэлж дүгнэхэд туслах зорилготой байв.

Дараах шүлгүүдийг үзүүл: Алма 5:27, 28, 29, 30–31. Суралцагчдыг шүлэг тус бүрийг эсвэл шүлгүүдийг бие даан судлахыг урьж, Алмагийн асуултууд тэдгээрийг хэр сайн тайлбарлаж байгааг дараах хэмжүүрийг ашиглан хариул: “Үргэлж”, “Бараг үргэлж”, “Ихэнхдээ”, “Заримдаа” эсвэл “Ховор тохиолдолд, бараг үгүй.” Та суралцагчдад 29-р шүлэг-ийн “Та атаа хорслоосоо ангижирсан уу?” гэх зэрэг асуултуудад хариулахыг санал болгож болно.

Суралцагчдад үйл ажиллагаагаа дуусгах хангалттай хугацаа өгсний дараа тэднийг судлах тэмдэглэл дэх бодол, сэтгэгдлээ бичихэд урь.

Дахин төрөх тухай Алмагийн сургаал

Суралцагчид Алма 5-ыг судлахдаа хөрвөлтийг илүү сайн ойлгохыг хичээх сэтгэлгээгээр судлах нь тустай. Жишээлбэл: Суралцагчид Алма 5:2–7-г судлахдаа, биднийг дахин төрөхөд мөн зүрх сэтгэлийн өөрчлөлтийг мэдрэхэд Есүс Христийн гүйцэтгэх үүрэгт анхаарлаа хандуулж болно. Тэд Алма 5:8–16, 21-ийг судалж, дахин төрж, Өөрт нь итгэх итгэлээ хөгжүүлдэг хүмүүст үзүүлэх Аврагчийн нөлөөг хайж олж болно.