Алма 7:1–13

Тэр Өөрийн хүмүүсийг халамжлахын тулд

Бурханы ажил, алдар суу бол “үхэшгүй байдал хийгээд мөнх амьдралыг хүмүүнд тохиолгон авчрах” (Moсe 1:39) явдал юм. Тэрээр үүнийг гүйцэлдүүлж, Өөрийн Хүү Есүс Христийг бидний нүглийн төлөө зовж шаналж, Амилалтаараа дамжуулан үхлийг даван туулуулахаар илгээсэн юм. Аврагч “бие махбодын дагуу өөрийн хүмүүсийг тэдний сул байдлуудынх нь дагуу хэрхэн халамжлахыг мэдэж болохын тулд” (Алма 7:12) энэ бүх зүйлд бидний төлөө Өөрийн хүслээр зовж шаналсан. Энэ хичээл Аврагчдаа найдаж, Түүнийг гэх агуу хайрыг мэдрэхэд тусална.

Суралцагчдад Ариун Сүнсний нөлөөг таньж мэдэхэд тусал. Ариун Сүнс ихэвчлэн хайр, баяр баясгалан, амар тайвнаар дамжуулан харилцдаг (Галат 5:22–23-ыг үзнэ үү). Тэр мөн Есүс Христийг гэрчилдэг (Иохан 15:26-г үзнэ үү). Суралцагчдад өөрсдийн мэдрэмж, Ариун Сүнсний нөлөөний хоорондын хамаарлыг ойлгоход туслах энгийн боломжуудыг хайж ол. Бүх суралцагч Ариун Сүнсний нөлөөг ижил байдлаар мэдрэхгүй гэдгийг санаарай.

Суралцагчийн бэлтгэл: Суралцагчдыг Алма 7:11–13-ыг судалж, эдгээр шүлгээс Есүс Христ Цагаатгалаараа дамжуулан хэрхэн мөн яагаад эдгээр зүйлд зовж шаналсан болохыг олж мэдэхэд урь.

Боломжит суралцах үйл ажиллагаа

Хамгийн чухал зүйлс

Та дараах жагсаалт болон эрэмбийг ангийнхантайгаа эсвэл суралцагчид хоёр хоёроороо эсвэл жижиг бүлгээрээ үүсгэж, ялгаатай хариултуудыг харьцуулж болно.

Дэлхийн түүхэнд тохиолдсон хамгийн чухал гэж үзэж буй үйл явдлуудын жагсаалтыг үүсгээд, дараа нь хамгийн их чухлаас бага хүртэл дарааллаар эрэмбэл.

• Үйл явдлыг ач холбогдолтой эсвэл чухал болгодог зүйл юу вэ?

• Тэдгээрийг ач холбогдлын дагуу эрэмбэлэх нь яагаад зарим талаар хэцүү байж болох вэ?

Алма Гидеоны нутаг дахь хүмүүст хандан ярихдаа “ирэх олон зүйл буй; … тэд бүгдээс илүү чухал нэгэн зүйл буй” (Алма 7:7) хэмээн бошиглосон.

Алма 7:7-г уншаад, энэ хамгийн чухал үйл явдлыг олж мэд. Олж мэдсэн зүйлээ тэмдэглэж ав.

• Аврагчийн ирэлт яагаад бүх цаг үеийн хамгийн чухал үйл явдал гэж та бодож байна вэ?

Суралцагчдыг дараах зүйлсийн талаарх бодлоо судлах тэмдэглэлдээ тэмдэглэхэд урь.

Алма Зарахемлагийн хүмүүст хандан ярьж, тэр газарт Сүмийг ёс журмаар нь тогтоосныхоо дараа (Алма 6-г үзнэ үү) Гидеоны нутаг руу аялав. Алма 7-д Алмагийн Гидеоны хүмүүст заасан Есүс Христийн тухай, Түүний Цагаатгалын талаарх чухал сургаалууд багтдаг. Судалж эхлэхээсээ өмнө Есүс Христийн Цагаатгал хэрхэн таны амьдралтай холбогдож буйг бодоход цаг гарга. Танд одоогоор Тэнгэрлэг Эцэг, Аврагч хоёрын тусламж хэрэгтэй болсон ямар нөхцөл байдал тулгараад байна вэ?

Та энэ хичээлийг судалж байхдаа Есүс Христ таны төлөө юу хийснийг, Тэр танд хэрхэн тусалж чадах талаар илүү сайн ойлгоход тань туслах Есүс Христийн тухай, Түүний Цагаатгалын талаарх сургаалуудыг олж мэд.

Алма Аврагчийн Цагаатгалын тухай зааж буй нь

Суралцагчдыг судлах тэмдэглэлдээ дараах хүснэгтийг хуулж бичихэд урь. Өөрөөр та энэ хүснэгтийг ангиараа хамт нөхөж бичихийн тулд самбар дээр харуулж эсвэл хуулж болно.

Дараах хүснэгтийг судрын тэмдэглэл дээрээ хуул.

Аврагч миний төлөө хэрхэн зовж зүдэрсэн бэ?	Аврагч яагаад миний төлөө зовж зүдэрсэн бэ?

Алма 7:11–13-ыг уншаад, Есүс Христ Цагаатгалынхаа нэг хэсэг болгон таны төлөө хэрхэн Өөр дээрээ авч эсвэл зовж шаналсан тухай Алмагийн сургаалыг олж мэд. Эдгээрийг хүснэгтийнхээ эхний баганад бич. Сул байдлууд гэдэг нь мөнх бус амьдралд бидний мэдэрдэг сул тал, дутагдлыг хэлж байгааг мэдэх нь тустай байж болно.

Хэрэв та самбар дээрх хүснэгтийг ашиглахаар сонгосон бол суралцагчдыг эдгээр шүлгээс олж мэдсэн зүйлсээ дээр нь тэмдэглэхэд урь. Дараа нь тэднийг судрын дараах хэсгүүдийг уншаад, Аврагчийн зовлон зүдгүүрийн тухай сурч мэдсэн нэмэлт мэдээллээ тэмдэглэхэд урь.

2 Нифай 9:21; Мозая 3:5–8 ба Сургаал ба Гэрээ 19:16–19-ийг унш. Эдгээр хэсэгт Аврагчийн зовлон зүдгүүрийн тухай багтсан болно. Ач холбогдолтой гэж үзсэн аливаа үг, хэллэгийг хүснэгтийнхээ эхний баганад нэм. Алма 7:11–13-т эдгээр хэсгээс холбогдох эшлэл эсвэл холбоос нэм.

• Аврагчийн зовлон зүдгүүрийн тухай сурч мэдэх үед танд ямар мэдрэмж, бодол төрсөн бэ?

• Аврагч юуг туулж зовж зүдэрч, Өөрийн цагаатгагч золиослолын нэг хэсэг болгон Өөр дээрээ авсан гэдгийг ойлгох нь яагаад чухал гэж та бодож байна вэ?

Яагаад Есүс Христ эдгээр зүйлд зовж шаналсан бэ?

Алма 7:11–13-ыг ахин уншаад, энэ удаад Аврагч яагаад таны төлөө зовж зүдэрсэн болохыг хайж ол. Уншиж байхдаа “тэр” эсвэл “түүний” гэж эхэлсэн хэллэгүүдэд анхаарлаа төвлөрүүл. Хүснэгтийнхээ хоёр дахь баганад олж мэдсэн зүйлээ бич. Халамжлах гэдэг нь тайвшруулж, тусламж үзүүлэхийг хэлж байгааг мэдэх нь тустай байж болно.

• Есүс Христ яагаад таны төлөө эдгээр зүйлд зовж зүдэрсэн талаар та юу сурч мэдсэн бэ?

  Суралцагчид өмнөх асуултын хариултаа самбар дээрх хүснэгтэд бичиж болох юм.

• Та Алма 7:11–13-аас судалсан зүйлээ хэрхэн үнэний мэдэгдэл болгож товч дүгнэх вэ?

Та Алма 7:11–13-аас Есүс Христ намайг нүгэл болон үхлээс аварч мөн мөнх бус амьдралын сорилтуудыг даван туулахад туслахын тулд зовж шаналсан гэсэн үнэнийг олж мэдсэн билээ.

Энэ үнэнийг самбар дээр бичиж болно.

Тэргүүн зөвлөлийн ерөнхийлөгч Даллин Х.Өүкс Аврагчийн бидэнд даван туулахад тусалж чадах мөнх бус амьдралын сорилтуудаас ийн хуваалцсан. Дараах мэдэгдлийг унш эсвэл Есүс Христийн Цагаатгалаар хүчирхэгжсэн видеог ChurchofJesusChrist.orgцагийн код 3:13-аас 4:01 хүртэл үзнэ үү.

Бидний Аврагч “бие махбодийн дагуу” “өөрийн хүмүүсийг тэдний сул байдлуудынх нь дагуу хэрхэн халамжлахыг [тайвшрал өгөх, туслах гэсэн утгатай]” мэдэж болохын тулд мөнх бус байдлын сорилт бэрхшээлийг бүрэн байдлаар “бие махбодийн дагуу” мэдэрч даван туулсан. Тиймээс Тэрээр бидний тэмцэж байгаа асуудал, зүрх сэтгэлийн маань шаналал, биднийг уруу татах зүйлс, өвдөлт, зовлон бүгдийг мэддэг. Учир нь Тэрээр Өөрийн хүслээр Цагаатгалын чухал хэсэг болгон энэ бүгдийг мэдэрч туулсан билээ. Үүний улмаас, Түүний Цагаатгал Түүнд биднийг халамжлах мөн энэ бүгдийг даван туулах хүчийг бидэнд өгөх боломжийг олгодог. (Даллин Х.Өүкс, “Есүс Христийн Цагаатгалаар хүчирхэгжсэн,”2015 оны 10-р сарын Ерөнхий чуулган, 50–51)

• Энэ мэдэгдэл Аврагчийн талаар юуг ойлгоход эсвэл мэдрэхэд тань туслах вэ?

Амьдралтайгаа холбон тайлбарлах нь

Суралцагчдыг энэ хичээлээс сурч мэдсэн зүйлсээ амьдралтайгаа холбон тайлбарлахад нь тусал. Үүнийг хийх нэг арга нь тэдэнд дараах зүйлсийг тунгаан бодож, гүйцээх цаг гаргаж өгөх явдал юм.

Таны хувьд Аврагч таны төлөө хэрхэн зовж шаналсан тухай хэдэн хором тунгаан бод. Жишээлбэл: Та ямар тодорхой зовлон зүдгүүр, уруу таталт, сул дорой чанар, зовлон шаналлыг туулж байгаа эсвэл туулсан бэ? Бодол санаагаа хүснэгтийнхээ доор бич.

Дараа нь эдгээр бэрхшээл бүрд Аврагч таныг хэрхэн хүчирхэгжүүлсэн эсвэл хүчирхэгжүүлж чадах талаар залбирч тунгаан бод. Бодол, мэдрэмжээ бичих үедээ Тэнгэрлэг Эцэгээс танд сүнслэг өдөөлт өгөхийг хүс.

Суралцагчдыг тэмдэглэсэн зарим ойлголтоо сайн дураараа хуваалцахад урь. Дараах асуултуудыг ангийн ярилцлагыг удирдан чиглүүлэхэд ашиглаж болно. Эхний асуултыг асуухаасаа өмнө хувийн амьдралаасаа жишээ хуваалцах талаар бодож үз. Суралцагчдаас хуваалцахыг хүсэх үед тэдэнд хэт хувийн чанартай эсвэл нэн ариун нандин байж болох зүйлсийг хуваалцах хэрэггүй гэдгийг сануул.

• Та Есүс Христийн Цагаатгалаараа дамжуулан өгдөг хүчийг хэзээ мэдэрсэн бэ?

• Өнөөдрийн хичээлээс та Есүс Христийн талаар судалж, мэдэрсэн ямар зүйлийг хойшид санахыг хүсэж байна вэ?

Өнөөдрийн ярилцсан үнэнүүдийнхээ талаар гэрчил.

Тайлбар ба нөхцөл байдлын талаарх мэдээлэл

Их Эзэн миний даван туулах гэж хичээдэг нүгэл эсвэл сул талуудын талаар юу гэж боддог вэ?

Арван хоёр төлөөлөгчийн чуулгын ахлагч Ричард Г.Скотт (1928–2015) ийн заасан.

Урьдын буруу сонголтынхоо үр дагавраас ангижрахыг хүсэгч хүмүүст дуулгах баярт мэдээ бол Их Эзэн сул дорой байдлыг эсэргүүцлээс өөрөөр авч үздэг явдал юм. Наманчлаагүй эсэргүүцэл нь ял шийтгэл авчирдгийг Их Эзэн анхааруулдаг бол харин сул дорой байдлын тухайд үргэлж нигүүлсэнгүйгээр ярьдаг билээ. (Ричард Г.Скотт, “Есүс Христийн Цагаатгалаар дамжуулан хүчирхэгжих нь,” 2013 оны 10-р сарын Ерөнхий чуулган, 94)

Есүс Христ үнэхээр миний нөхцөл байдлыг мэддэг үү?

Арван хоёр төлөөлөгчийн чуулгын ахлагч Жэффри Р.Холланд ийн заасан.

Христ хамгийн хүнд хэцүү цагт бидэнд хэрхэн тусалж, хүчирхэгжүүлэхээ мэдэхийн тулд мөнх бус бүх хүмүүний туулахаар дуудагдсан тэрхүү туршлагыг Өөрийн биеэр туулсан юм. Тэрбээр бидний хүн нэг бүрийн үүрч яваа хамгийн хүнд ачааг мэддэг. Тэрбээр бидний хүлцэн тэвчдэг хамгийн нийтлэг бөгөөд хамгийн зовуурьтай өвдөлт шаналлыг мэддэг. Тэрбээр биднийг дэмжин туслахын тулд иймэрхүү бүхий л уй гашуугаас доогуурт бууж ирсэн юм. Бидний төлөө Түүний зовж шаналаагүй, Өөрийн хүчирхэг бөгөөд нигүүлсэнгүй мөрөн дээр тавиагүй тийм зовлон шаналал, харуусал, уй гашуу гэж энэ амьдралд үгүй. (Jeffrey R. Holland, Christ and the New Covenant: The Messianic Message of the Book of Mormon [1997], 223–224)

Далын ахлагч Мэттью С.Холланд ийн заасан.

Өнөөдөр хэн нэгний зовлон шаналал хэр их бөгөөд бусдынхаас хэр өөр байснаас үүдэн тэдгээрийг өөр хэн ч бүрэн ойлгохгүй мэт санагдаж байгаа нь зарим талаараа та нарын зөв байж болох юм. Таны сайн сайхны төлөө гэсэн бодолтой байж болох ч танд яг юу мэдрэгдэж байгааг мэдэх эсвэл эдгэрэлтийг олоход тань туслах, яг таарч тохирсон үгийг хэлэх мэдрэмж сайтай гэр бүлийн гишүүн, найз нөхөд, санваарын удирдагч байхгүй байж ч мэднэ. Гэхдээ “бүхий л дэлхийнхнээс илүү чадалтай” [1 Нифай 4:1] мөн “гуйх буюу бодох бүхнээс минь илүү хэмжээлшгүй бялхлаар үйлдэх чадвартай” [Ефес 3:20] Түүнээс илүү та нарыг төгс ойлгох өөр хэн ч байхгүй гэдгийг мэдээрэй. Энэ үйл явц Христийн арга замаар Түүний хуваарийн дагуу өрнөх ч Тэрээр таны зовлон шаналлыг бүхий л талаар, өчүүхэн хэсгийг ч үлдээлгүй эдгээхэд үргэлж бэлэн байдаг. (Мэттью С.Холланд, “Хүүгийн үлэмж хурц бэлэг,” , 50–51)

Нэмэлт суралцах үйл ажиллагаа

Сэтгэл гутрал, оюун санааны өвчин зовуурьт үзүүлэх Аврагчийн халамж

Есүс Христ биднийг нүгэл ба үхлээс аварч, мөнх бус амьдралын сорилтуудыг даван туулахад туслахын тулд хэрхэн зовж шаналсан тухай сургаалыг (Алма 7:11–13-ыг үзнэ үү) ярилц.     ChurchofJesusChrist.org 

Алма 7:13. “Мөн эдүгээ болгоогтун, надад буй гэрчлэл нь энэ болой”

Алма “мөн эдүгээ болгоогтун, надад буй гэрчлэл нь энэ болой” (Алма 7:13) хэмээн хэлснээр Аврагчийн Цагаатгалын талаарх сургаалаа төгсгөв. Суралцагчдыг Алмагийн Гидеон дахь хүмүүст хэлсэн шиг Аврагчийн талаарх хувийн гэрчлэлээ хуваалцахад урьж болно. Тэднийг Аврагчийн талаарх зүрх сэтгэлийнхээ бодол, мэдрэмжийг заахыг хүсвэл юу хуваалцах байсан талаар бодоход урь. “[Тэдэнд] буй гэрчлэл нь энэ” гэж юу гэсэн үг вэ?