Алма 5:33–62

“Сайн Хоньчин та нарыг дууддаг”

Алма Зарахемлагийн сүмийн гишүүдийг Тэнгэрлэг Эцэг, Есүс Христ хоёртой хамт зогсох талаараа гүн гүнзгий эргэцүүлэн бодоход урамшуулан дэмжсэнийхээ дараа (Алма 5:1–32-ыг үзнэ үү) Түүний “нигүүлслийн мутар тэдний зүг сунгагдаж,” (Алма 5:33), “наманчлагтун, мөн би та нарыг хүлээн авах болно” (Алма 5:33), мөн “сайн хоньчин та нарыг дууддаг” (Алма 5:38) гэх мэт эелдэг үгсийг ашиглан, Христэд ирэхэд урьсан. Энэ хичээл Есүс Христэд ирэхээр гаргах хичээл зүтгэлд тань болон Түүний өгч буй адислалыг хүлээн авахад тань тусална.

Есүс Христийн үүрэг дээр төвлөрөх нь. Суралцагчдад Аврагч хэрхэн тэдний Аврагч мөн Гэтэлгэгчийн хувиар үүргээ биелүүлдгийг таньж мэдэх замаар Түүнийг хайрлаж, мэддэг болоход нь тусал. Есүс Христ хэрхэн Өөрийн хайр, халамжаа тэдэнд үзүүлсэн болохыг эргэцүүлэн бодоход урамшуулан дэмж.

Суралцагчийн бэлтгэл: Суралцагчдыг Алма 5:33–34-ийг давтаад, эдгээр шүлгээс Аврагчийн тухай юу сурч мэдсэн талаараа хичээл дээр хуваалцахаар бэлдэж ирэхэд урь.

Боломжит суралцах үйл ажиллагаа

Наманчлагтун, мөн би та нарыг хүлээн авах болно

Суралцагчдын сонирхлыг татахуйц хэд хэдэн зураг харуулж, ангийнхныг дараах онч үгс яагаад үнэн байж болох талаар ярилцахад урь.

“Нэг зураг мянган үгтэй тэнцэнэ” гэсэн эртний нэгэн үг бий.

• Энэ яагаад үнэн байж болох вэ?

Дараах зургуудыг харуулж, суралцагчдыг ярилцсан зүйлээ хуваалцахад урь.

Есүс Христийг дүрсэлсэн дараах зургуудыг үз.

• Эдгээр зураг танд ямар захиас дамжуулж байна вэ?

Алма 5 Зарахемла дахь Сүмийн гишүүдэд заасан Алмагийн сургаалуудыг агуулдаг бөгөөд тэдний зарим нь бардам болж, нүгэл үйлдсэн (Алма 4:8–12-ыг үзнэ үү) гэдгийг та санаж байгаа байх. Алма эдгээр хүнээс сүнслэг өсөлт хөгжлөө дүгнэж цэгнэхэд нь туслах цуврал асуултуудыг асуусныхаа дараа Аврагчийн тухай чухал үнэнийг заасан.

Алма 5:33–34-ийг уншаад, Алма өөрийн хүмүүст Есүс Христийн талаар юу ойлгуулахыг хүссэн болохыг хайж ол.

Энэ нь суралцагчдыг суралцагчийн бэлтгэлээс сурч мэдсэн зүйлээ хуваалцахад урих таатай боломж байж болно.

• Эдгээр шүлгийн ямар үг, хэллэг танд хамгийн утга учиртай байсан бэ? Яагаад?

• Эдгээр шүлэг, таны харсан Аврагчийн зураг хоёрын хооронд ямар ижил төстэй зүйлсийг та харж байна вэ?

• Эдгээр шүлэг дэх зарчмуудыг ойлгох нь хэн нэгний Есүс Христийг хэрхэн үзэх үзлийг яаж өөрчилж болох вэ?

Хэрэв суралцагчдад Аврагчид ирэх Түүний урилгыг гүн гүнзгий судлах нь тустай бол тэднийг дараах судруудыг бүхэлд нь эсвэл заримыг нь хоёр хоёроороо эсвэл жижиг бүлэг болон судлахад урь: Матай 11:28–30; 2 Нифай 26:33; 3 Нифай 9:14 ба Ифер 12:27. Суралцагчид мөн эдгээр хэсгийг өөрсдийн судар дахь Алма 5:33–34-т холбогдох эшлэл болгон нэмж болно. Суралцагчдыг эдгээр нэмэлт хэсгийг судалж дууссаны дараа, тэднийг тус шүлгүүдээс Есүс Христийн тухай олж авсан нэмэлт ойлголтоо сайн дураараа хуваалцахад урь.

Наманчлах мөн Есүс Христийн Өөр дээр нь ирэх урилгыг хүлээн авах одоогийн хүслээ болон Түүний дагалдагч болоход хэцүү болгож байгаа саад бэрхшээлтэй тулгарсан эсэхээ бод. Үргэлжлүүлэн судалж байхдаа эдгээр саад бэрхшээлийг даван туулах хичээл зүтгэлд болон Есүс Христийг дагахад тань туслах сургаалуудыг хайж ол.

Сайн Хоньчны дуу хоолойг сонсох нь

Наманчлах, Аврагчид ирэх Түүний урилгын талаарх сургаалуудыг заасныхаа дараа Алма хүмүүстээ Аврагчийг дагахад ятгахын тулд Есүс Христийн тухай нэмэлт сургаалуудыг хуваалцсан.

Алма 5:37–39-ийг уншаад, хүмүүстээ хүргэсэн Алмагийн захиасыг хайж ол.

Суралцагчдыг дараах асуултуудыг хамтрагчтайгаа ярилцахад урь.

• Алма энэ зүйрлэлээс хүмүүстээ Есүс Христ (Сайн Хоньчин)-ийн талаар юу мэдүүлж, мэдрүүлэхийг хүссэн гэж та бодож байна вэ?

• Алма энэ зүйрлэлээс хүмүүстээ өөрсдийнх нь (хоньд) талаар юу мэдүүлж, мэдрүүлэхийг хүссэн гэж та бодож байна вэ?

Бид эдгээр шүлгээс бид Сайн Хоньчины хоньд байхын тулд Түүний дуу хоолойг сонсох ёстой гэсэн нэг үнэнийг сурч мэдэж болно.

Ерөнхийлөгч Рассэлл М.Нэлсон сонсох гэдэг үгийн дараах тодорхойлолтыг хуваалцсан.

Энэ нь “дуулгавартай дагахаар сонсох” гэсэн утгатай. Анхааран сонсох гэдэг нь “Түүнийг сонс” буюу Аврагчийн хэлсэн үгсийг сонсож, дараа нь Түүний зөвлөгөөг чих тавин сонсох гэсэн утгатай. (Рассэлл М.Нэлсон, “Түүнийг сонс,” 2020 оны 4-р сарын Ерөнхий чуулган, 109)

• Үгийг нь сонсож, хонин сүргийнх нь дунд тоологдох хүсэл төрүүлдэг Аврагчийн тухай та юу мэдэх вэ?

Арван хоёр төлөөлөгчийн чуулгын ахлагч Гари Э.Стивэнсон бид Аврагчийг Сайн Хоньчин гэж хүлээн зөвшөөрөх үед бидэнд өгдөг Түүний зарим адислалын тухай хуваалцсан. Дараах мэдэгдлийг унш эсвэл “Зүрх сэтгэлээ нэгтгэ” видеог ChurchofJesusChrist.orgцагийн код 13:56-аас 14:51 хүртэл үзнэ үү.

Сайн мэдээний дурангаар харах юм бол, бид сайхан сэтгэлээр мөн хайр халамжийн сүнсээр Өөрийгөө бидэнд зориулдаг энэрэнгүй асран хамгаалагчийн хараа хяналтад байдгаа ухааран ойлгодог. Сайн Хоньчин бидний хүн нэг бүрийг нэрээр нь мэддэг бөгөөд биднийг хувийнхаа зүгээс харж ханддаг. “Би бол сайн хоньчин мөн. Би Өөрийнхийгөө мэднэ.” … Би хоньдын төлөө амиа өгнө [Иохан 10:14, 15] хэмээн Их Эзэн Есүс Христ Өөрөө хэлсэн билээ.

… “ЭЗЭН бол миний хоньчин” [Дуулал 23:1] бөгөөд бидний хүн нэг бүр Түүнд танигдсан, Түүний халамжит хараа хяналтад байдаг гэдгийг мэдсэнээр би удаан үргэлжлэх амар амгаланг мэдэрдэг. Амьдралын салхи шуурга, аадар бороо, өвчин зовлон, осол гэмтэлтэй нүүр тулах үед маань Их Эзэн—бидний Хоньчин, бидний Халамжлагч биднийг хайр, нинжин сэтгэлээр асарч халамжлах болно. Тэр бидний зүрх сэтгэл, бодгалийг эдгээнэ. (Гари Э.Стивэнсон, “Зүрх сэтгэлээ нэгтгэ,” 2021 оны 4-р сарын Ерөнхий чуулган, 21.)

• Бидний яагаад Сайн Хоньчин Есүс Христийг дагахыг хүсдэг хүслийн юу нь таны анхаарлыг татсан бэ?

Сайн Хоньчины дуу хоолойг сонсох арга замууд

Алма Зарахемлагийн хүмүүст Сайн Хоньчины дуу хоолойг сонсох хэд хэдэн арга замыг санал болгосон. Алма 5:40–41, 50–51, 57-г уншаад, Алма юу зөвлөсөн болохыг олж мэд.

Суралцагчдыг дараах асуултуудад хариулах үед та тэдний хариултыг самбарт жагсааж бичихэд эсвэл суралцагчдыг гарч ирэн, хариултаа бичихэд урьж болно.

• Та эдгээр шүлгээс Сайн Хоньчины дуу хоолойг сонсох арга замуудын тухай юу сурч мэдсэн бэ?

• “Ёс бусыг үйлдэгчдийн дундаас гарч ирэх, … мөн тэдний цэвэр бус зүйлүүдэд хүрэхгүй” (шүлэг 57) байх ямар арга зам байдаг вэ?

Сайн Хоньчины дуу хоолойг сонсохоор шийдсэн үед амьдралд нь тохиолдсон туршлагаасаа мөн тухайн үед ямар адислал анзаарснаа сайн дураар хуваалцахад хэдэн суралцагчийг урь. Та өөрийнхөө туршлагаас хуваалцаж болно.

Миний Есүс Христийг дагахыг хүсдэг зарим шалтгаан бол …

Миний Түүний хоолойг сонсох нэг арга зам бол …

Тайлбар ба нөхцөл байдлын талаарх мэдээлэл

Есүс Христийн дуу хоолойг сонсох нь бидэнд ямар тустай вэ?

Ерөнхийлөгч Рассэлл М.Нэлсон Есүс Христийн дуу хоолойг сонсох талаар дараах ойлголтыг өгсөн.

Тодорхой бус байдал, айдсаар хүрээлэгдэх үед бидэнд хамгийн их тус болох зүйл бол Түүний Хүүг сонсох явдал гэдгийг Тэнгэрлэг Эцэг маань мэддэг.

Яагаад гэвэл, бид Түүний Хүүг үнэхээр сонсох юм бол ямар ч нөхцөл байдалд орсон бай, юу хийхээ мэдэхээр удирдуулан чиглүүлэгдэх болно.

… Бурхан бидэнд энэ амьдралд амжилт, аз жаргал, баяр баясгаланг олж авах загварыг өгчээ. Бид Их Эзэний үгийг сонсож, анхаарч, бидэнд хандан Түүний хэлсэн зүйлсийг чих тавин сонсох ёстой.

Есүс Христийн шавь нарын хувьд бид үргэлж чин сэтгэлээсээ Түүнийг сонсохыг хичээх ёстой. Өдөр бүр амьдралаа Түүний үгс, сургаал, үнэнээр дүүргэхийн тулд чин сэтгэлээсээ, байнга хичээл зүтгэл гаргах шаардлагатай. (Рассэлл М.Нэлсон, “Түүнийг сонс,” 2020 оны 4-р сарын Ерөнхий чуулган, 108)

“#Түүнийг сонс: Есүс Христийн дуу хоолойг сонс” хэмээх дараах видео нь Есүс Христийн дуу хоолойг сонсохын тулд бидний эргэн тойрон дахь чимээ шуугианыг намжаах нь чухал болохыг харуулна.

Aлмa 5:57. Аврагч бидний амьдрал дахь цэвэр бус зүйлүүдийг хэрхэн хардаг вэ?

Арван хоёр төлөөлөгчийн чуулгын ахлагч Дэйл Г.Рэнланд Есүсийг Сайн Хоньчин гэж хэлэхдээ ийнхүү заасан.

Бурхан судруудад нүглийг өвчинтэй зүйрлэдэг болохоор “Есүс Христ бидний зүйрлэсэн өвчин буюу нүгэлтэй тулгарах үедээ хэрхэн ханддаг вэ?” гэж асуух нь үндэслэлтэй юм. Аврагч “нүглийг өчүүхэн төдий ч хүлцсэн янзаар хүлээн зөвшөөрч чадах нь үгүй” Сургаал ба Гэрээ 1:31 хэмээн хэлсэн атлаа төгс бус бидэн рүү хэрхэн жигшин зэвүүцэхгүй харж чаддаг вэ?

Хариулт нь энгийн бөгөөд тодорхой юм. Сайн Хоньчины хувьд Есүс Христ Өөрийн хонины өвчнийг эмчилгээ, асаргаа, хайр халамж хэрэгтэй нөхцөл байдал гэж үздэг. Энэ хоньчин нь бидний сайн Хоньчин бөгөөд хоньчин өвчтэй хоньдынхоо эдгэрч байгааг хараад баясдаг.

Аврагч Өөрөө “хоньчины ёсоор сүргээ хариулж,” [Исаиа 40:11] “төөрснийг нь хайн, туугдсаныг буцааж, гэмтсэнийг боож өвчтэйг тэнхрүүлнэ” [Езекиел 34:16] хэмээн урьдаас хэлсэн байдаг. Урвагч израилчуудыг нүгэлт “шарх, сорви, шалбархай яранд” [Исаиа 1:6] баригдсан гэж дүрсэлсэн байсан ч Аврагч урамшуулан, сургамжилж мөн эдгээхээ амласан [Исаиа 1:18-ыг үзнэ үү]. (Дэйл Г.Рэнланд, “Бидний сайн Хоньчин,” 2017 оны 4-р сарын Ерөнхий чуулган, 15)

Нэмэлт суралцах үйл ажиллагаа

Алма 5:45–48. “Би өөрөө тэдгээр нь үнэнийг мэднэ”

Суралцагчид эдгээр шүлгийг уншаад, Алма үнэний талаарх мэдлэгээ хэрхэн хүлээн авсныг хайж олж болно. Алма хэдийгээр тэнгэр элчийг харсан ч үнэний талаарх мэдлэг ба гэрчлэлээ Ариун Сүнсээр дамжуулан хүлээн авсан илчлэлттэй холбон тайлбарласныг та онцолж болно. Ерөнхийлөгч Жозеф Фийлдинг Смитийн (1876–1972) дараах мэдэгдлийг унш.

“Хүнд Ариун Сүнсний илэрхийлэлт байгаа үед бодгальд нь үл мартагдах сэтгэгдэл төрүүлдэг бөгөөд энэ нь амархан мартагддаггүй. Энэ нь Ариун Сүнс бидний сүнстэй ярьж байгаа нь тэр бөгөөд мөн ятгах хүчтэй ирдэг. Тэнгэр элчийн эсвэл бүр Бурханы Хүүгийн тэр илэрхийлэлт оюун санаанд болон нүдэнд сэтгэгдэл үлдээж болох хэдий ч эцэстээ бүдгэрч болох юм. Харин Ариун Сүнсний мэдрэмж бодгальд гүн гүнзгий шингэдэг ба үүнийг арилгахад хэцүү” (Answers to Gospel Questions, comp. Joseph Fielding Smith Jr. [1958], 2:151).

Дараахтай адил асуултуудыг асуу. Яагаад Ариун Сүнсээр дамжуулан хүлээн авсан илчлэлт тийм их нөлөөтэй байдаг вэ? Ариун Сүнсээр дамжуулан Есүс Христийн тухай гэрчлэл хүлээн авах нь бидэнд яагаад ач холбогдолтой байдаг вэ? Алма Сайн Хоньчиныг сонсох жишээг хэрхэн харуулсан бэ?

Алма 5:53–55. “Та нар эдгээр хэлэгдсэнийг сөрж чадна гэж үү?”

Та суралцагчдаар эдгээр шүлгийг уншуулж, хэн нэгэнд Аврагчийн дуу хоолойг сонсоход нь хүндрэлтэй болгож байгаа зан авир, үйлдлийг олуул. Тэдний хариултыг самбарт жагсаан бич. Эдгээр сорилтын аль нь өнөөгийн өсвөр үеийнхэнд илүү хэцүү санагдаж байна вэ? Аврагч бидэнд эдгээр сорилтод хэрхэн хариулахыг заасан ямар жишээ байдаг вэ?