Alma 5:1–32

Ang mga Tanong ni Alma para Masuri ang Sarili

pagbabago ng puso

Ang mga sandali ng pagsusuri sa sarili ay makatutulong sa atin na makita nang mas malinaw ang lakas ng ating kaugnayan kay Jesucristo. Si Alma, na batid kung paano naging bahagi ng Simbahan ang kapalaluan at pagtatalo, ay nagtanong sa mga miyembro ng Simbahan sa Zarahemla ng sunud-sunod na mga tanong na naghikayat sa kanila na pagnilayan ang pinagtutuunan ng kanilang puso at ang kanilang katayuan sa harapan ng Diyos. Layunin ng lesson na ito na tulungan kang suriin ang iyong espirituwal na pag-unlad at mapalakas ang iyong pagbabalik-loob kay Jesucristo.

Pagtulong sa mga mag-aaral na hangarin ang personal na paghahayag. Ang pagbibigay sa mga estudyante ng oras para tahimik na pag-aralan at pagnilayan ang mga banal na kasulatan ay makatutulong na maanyayahan ang Espiritu Santo. Kapag inasam ng mga estudyante na suriin ang kanilang pag-unawa at pananalig sa ebanghelyo, malalaman nila kung ano ang alam na nila at maaanyayahan nila ang Espiritu Santo na tulungan silang matukoy kung ano ang kailangan nilang malaman, madama, at gawin upang mas mapalapit kay Jesucristo.

Paghahanda ng estudyante: Sabihin sa mga estudyante na basahin nang mabilisan ang Alma 5 at markahan ang lahat ng tandang pananong sa kabanata. Maaari ding itanong ng mga estudyante sa kanilang sarili ang ilan sa mga itinanong ni Alma sa kanyang mga tao sa kabanatang ito.

Mga Posibleng Aktibidad sa Pag-aaral

Pagsusuri sa sarili

Isipin ang mga pagkakataon na ininterbyu ka ng ibang tao, kabilang na ang mga interbyu para sa temple recommend, mga taunang interbyu sa iyo ng inyong bishop o branch president, at mga interbyu para sa trabaho.

• Ano ang layunin ng interbyu?

• Paano ka maaaring magkaroon ng interbyu sa iyong sarili?

Ibinahagi ni Pangulong M. Russell Ballard ng Korum ng Labindalawang Apostol ang ilan sa mga pakinabang ng regular na pag-uukol ng panahon para suriin ang ating espirituwal na pag-unlad. Maaari mong panoorin ang video na “Makabalik at Makatanggap,” na matatagpuan sa ChurchofJesusChrist.org, mula sa time code na 8:14 hanggang 8:58 o basahin ang teksto sa ibaba.

Pangulong M. Russell Ballard

Nalaman ko na para manatiling nakatuon sa pagbalik [sa presensya ng Diyos] at pagtanggap ng ipinangakong mga pagpapala, kailangan kong itanong palagi sa sarili ko, “Kumusta na ako?”

Para itong personal at pribadong pag-interbyu sa sarili ninyo. At kung kakaiba iyan sa inyo, pag-isipan ninyo ito: sino sa mundong ito ang mas nakakakilala sa inyo kaysa sa sarili ninyo? Alam ninyo ang inyong mga iniisip, ginagawa, hangarin, at inyong mga pangarap, mithiin, at plano. At mas alam ninyo kaysa sinuman kung paano kayo sumusulong. (M. Russell Ballard, “Makabalik at Makatanggap,” Liahona, Mayo 2017, 64)

Isipin kung gaano kadalas ka nag-uukol ng oras para suriin ang iyong espirituwal na pag-unlad.

• Anong uri ng mga pakinabang ang maaaring magmula sa regular na paggawa nito?

Ang isang kasanayan na magagamit mo kapag nag-aaral ka ng mga banal na kasulatan ay pag-uukol ng oras na tumigil sandali at suriin kung gaano mo kahusay na naipamumuhay ang mga turo o alituntuning pinag-aaralan mo. Ngayon ay magkakaroon ka ng pagkakataong ipraktis ang kasanayang iyon habang pinag-aaralan mo ang Alma 5. Ang kabanatang ito ay naglalaman ng maraming bagay na itinanong ni Alma sa kanyang mga tao. Maaari mo ring itanong sa iyong sarili ang mga bagay na ito para masuri ang iyong espirituwal na pag-unlad. Sa iyong pag-aaral, humingi ng patnubay mula sa Ama sa Langit para matulungan kang malaman kung ano ang mahusay mong ginagawa at kung paano Niya gustong pagbutihin ka pa.

Upang matulungan ang mga estudyante na makita ang maraming tanong na nakapaloob sa Alma 5, maaari mong anyayahan ang mga estudyante na mabilis na tingnan ang kabanata at pansinin ang maraming tandang pananong. Maaari mo ring sabihin sa mga estudyante na maglaan ng ilang oras sa kanilang personal na pag-aaral ng banal na kasulatan na markahan o bilugan ang lahat ng tandang pananong sa kabanatang ito kung hindi pa nila ito nagagawa.

Nangaral si Alma sa mga tao ng Zarahemla

Alalahanin na matapos makita ang kapalaluan at kasakiman ng kanyang mga tao, nagbitiw si Alma bilang punong hukom ng mga Nephita upang ilaan ang kanyang sarili nang mas lubusan sa pagtuturo ng salita ng Diyos (tingnan sa Alma 4:19).

Sinimulan ni Alma ang kanyang pangangaral sa lupain ng Zarahemla. Ipinaalala niya sa mga taong ito ang espirituwal at pisikal na pagkabihag na naranasan ng mga Nephita noong panahon ni Haring Noe (tingnan sa Alma 5:3–5).

Basahin ang Alma 5:6–13, at alamin ang nais ni Alma na maalala ng kanyang mga tao tungkol sa nagdaang henerasyon ng mga Nephita.

• Sa iyong palagay, bakit nais ni Alma na maalala ng kanyang mga tao ang mga bagay na ito?

• Ano ang nais ni Alma na malaman ng kanyang mga tao tungkol kay Jesucristo sa talata 7?

Basahin ang Alma 5:14, 26, at alamin ang itinanong ni Alma sa kanyang mga tao matapos ipaalala sa kanila ang kanilang espirituwal na pamana.

• Ano sa palagay mo ang nais ni Alma na maunawaan ng kanyang mga tao sa pagtatanong sa kanila ng mga bagay na ito?

  Maaaring sumagot ang mga estudyante sa pamamagitan ng paglalahad ng mga katotohanang tulad ng sumusunod: Nais ng Panginoon na makaranas tayo ng malaking pagbabago ng puso at matapos tayong espirituwal na isilang sa Diyos, kailangan nating sikaping mapanatili ang pagbabago ng ating puso.

• Sa iyong palagay, paano makakaapekto sa iyong buhay ang pagtatanong sa iyong sarili ng mga tanong na gaya ng nasa talata 14 at 26?

Paggamit sa mga turo ni Alma para masuri ang sarili

Ipakita ang mga sumusunod na tagubilin at bigyan ang mga estudyante ng sapat na oras (mga 10–15 minuto, kung maaari) na tahimik na gawin ang aktibidad na ito nang mag-isa. Maaari kang mahinang magpatugtog ng mga himno o espirituwal na musika habang kinukumpleto ng mga estudyante ang aktibidad.

Mag-ukol ng oras na pag-aralan ang mga salita ni Alma sa mga tao ng Zarahemla sa Alma 5:14–30 at pag-isipan kung naranasan o nararanasan mo ang pagbabagong inilarawan ni Alma. Sa iyong pag-aaral, magsagawa ng sarili mong pagsusuri sa sarili sa pamamagitan ng paggamit ng ilan o lahat ng tanong ni Alma sa mga talatang ito. Narito ang ilang paraan upang magawa mo iyon.

1. Tumigil sandali at pagnilayan ang dalawa hanggang tatlong talata, at suriin kung paano nauugnay sa buhay mo ang mga tanong ni Alma sa mga talatang iyon.

2. Pumili ng ilan sa mga tanong ni Alma na sa palagay mo ay pinakamakabuluhan at nauugnay sa iyo. Isulat ang mga tanong na ito sa iyong study journal at itala ang iyong mga sagot sa bawat tanong at ang anumang iba pang mga ideya o impresyon na posibleng mayroon ka.

3. Matapos matukoy ang mga tanong ni Alma sa mga talatang ito, gumawa ng dalawa o tatlong tanong na magagamit mo para masuri ang sarili mong espirituwal na pag-unlad. Isulat ang mga sagot mo sa iyong study journal.

Matapos makumpleto ng mga estudyante ang aktibidad na ito sa pag-aaral, talakayin sa kanila ang natutuhan at nadama nila nang isagawa nila ang kanilang pagsusuri sa sarili. Magagamit ang mga sumusunod na tanong bilang bahagi ng talakayang ito.

• Alin sa mga tanong ni Alma ang nadama mong pinakamakabuluhan sa iyo? Bakit?

• Anong mga salita o parirala ang nahanap mo mula sa mga talatang ito na makapagbibigay sa iyo ng hangarin at lakas ng loob na magsisi?

• Ano ang natutuhan mo tungkol sa Diyos at sa Kanyang mga hangarin para sa iyo mula sa napag-aralan mo?

Isipin ang natutuhan o nadama mo ngayon nang gamitin mo ang mga salita ni Alma para suriin ang iyong espirituwal na pag-unlad. Tukuyin ang isa o dalawang bagay na gusto mong gawin dahil sa napag-aralan mo. Isipin kung ano ang sisimulan mong gawin ngayon, anong mga balakid ang maaari mong kaharapin, at kung paano mo hihingin ang tulong ng Diyos sa pagdaig sa iyong mga balakid. Isulat ang mga ideya at impresyon mo sa iyong study journal.

Komentaryo at Impormasyon ng Konteksto

Alma 5:9, 26. Ano ang makahahadlang sa atin na magpanatili ng pagbabago ng puso?

Itinuro ni Elder Wilford W. Andersen ng Pitumpu:

Elder Wilford W. Andersen

Kapag tinanggap natin ang kaloob na Espiritu Santo pagkatapos ng binyag, napupuspos tayo ng makalangit na musikang lakip ng pagbabalik-loob. Nagbago ang ating puso, at tayo ay “wala nang hangarin pang gumawa ng masama, kundi ang patuloy na gumawa ng mabuti” (Mosias 5:2). Ngunit hindi paroroon ang Espiritu kapag may kasamaan o kapalaluan o inggit. Kung mawala ang magiliw na impluwensyang iyan sa ating buhay, ang saganang himig ng ebanghelyo ay mabilis na mawawala at tuluyan nang hindi maririnig. Nakaaantig ang tanong ni Alma: “Kung inyo nang nadama ang umawit ng awit ng mapagtubos na pag-ibig, itinatanong ko, nadarama ba ninyo ang gayon ngayon?” (Alma 5:26). (Wilford W. Andersen, “Ang Musika ng Ebanghelyo,” Liahona, Mayo 2015, 55)

Alma 5:14. Ano ang ibig sabihin ng isinilang sa Diyos?

Ipinaliwanag ni Elder David A. Bednar ng Korum ng Labindalawang Apostol:

Elder David A. Bednar

Paulit-ulit na itinuturo ng mga awtorisadong tagapaglingkod ng Panginoon na isa sa mga pangunahing layunin ng ating buhay sa lupa ay espirituwal na magbago at mapanibago sa pamamagitan ng Pagbabayad-sala ni Jesucristo. …

Tinagubilinan tayong “lumapit kay Cristo, at maging ganap sa kanya, at pagkaitan ang [ating sarili] ng lahat ng kasamaan” (Moroni 10:32), upang maging “[mga] bagong nilalang” kay Cristo (tingnan sa 2 Corinto 5:17), na hubarin ang “likas na tao” (Mosias 3:19), at danasin ang “malaking pagbabago sa atin, o sa ating mga puso, na wala na tayong hangarin pang gumawa ng masama, kundi ang patuloy na gumawa ng mabuti” (Mosias 5:2). Pansinin na ang pagbabalik-loob na inilarawan sa mga talatang ito ay malaki, hindi maliit—isang espirituwal na pagsilang na muli at mahalagang pagbabago sa nadarama at hangarin natin, sa iniisip at ginagawa natin, at kung ano tayo. Sa katunayan, kaakibat ng pinakadiwa ng ebanghelyo ni Jesucristo ang isang pangunahin at permanenteng pagbabago ng ating likas na pagkatao na ginawang posible ng ating pag-asa sa “kabutihan, at awa, at biyaya ng Banal na Mesiyas” (2 Nephi 2:8). Sa pagpili nating sundin ang Panginoon, pinipili nating magbago—na espirituwal na isilang na muli. (David A. Bednar, “Kinakailangan Ngang Kayo’y Ipanganak na Muli,” Liahona, Mayo 2007, 19–20)

Mga Karagdagang Aktibidad sa Pag-aaral

Alma 5:4–13. “Napanatili ba ninyo nang husto sa inyong alaala ang pagkabihag ng inyong mga ama?”

Maaari mong anyayahan ang mga estudyante na pumasok sa klase na handang magbahagi tungkol sa isang ninuno na nag-iwan sa kanila ng pamanang susundin. Habang tinatalakay ang Alma 5:4–13, maaari mong anyayahan ang mga estudyante na ibahagi ang kanilang mga kuwento. Maaari mo ring gamitin ang sumusunod na pahayag ni Elder William R. Walker ng Pitumpu bilang bahagi ng talakayang ito:

“Maganda sana kung alam ng bawat Banal sa mga Huling Araw ang mga kuwento ng pagsapi ng kanilang mga ninuno. …

“Kapag lalo nating iniugnay ang ating nararamdaman sa ating mabubuting ninuno, mas malamang na makagawa tayo ng matatalino at mabubuting pasiya.

“[At iyan nga ang nangyayari]. Bawat isa sa atin ay lubos na pagpapalain kung alam natin ang mga kuwento ng pananampalataya at sakripisyo na umakay sa ating mga ninuno na sumapi sa Simbahan ng Panginoon” (William R. Walker, “Mamuhay nang Tapat sa Pananampalataya,” Liahona, Mayo 2014, 97, 99).

Espirituwal na cardiogram

Ipaliwanag na ang cardiogram ay isang chart na ginagamit kung minsan ng mga doktor upang masuri o ma-monitor ang kundisyon ng ating pisikal na puso. Sa gayon ding paraan, ang mga itinanong ni Alma sa Alma 5 ay nilayon upang tulungan ang kanyang mga tao na suriin ang espirituwal na kalagayan ng kanilang puso.

Maaari mong ipakita ang mga sumusunod na talata: Alma 5:27, 28, 29, 30–31. Sabihin sa mga estudyante na pag-aralan ang bawat talata o grupo ng mga talata nang mag-isa at sagutin kung gaano kahusay na nailarawan ng mga tanong ni Alma ang mga ito sa pamamagitan ng paggamit ng sumusunod: “Palagi,” “Halos palagi,” “Kadalasan,” “Kung minsan,” o “Bihira, kung sakali man.” Maaari mong imungkahi na dapat sagutin ng mga estudyante ang tanong sa talata 29 na parang mababasa nang ganito, “Naalis na ba sa iyo ang inggit?”

Matapos ang sapat na oras para makumpleto ng mga estudyante ang aktibidad, sabihin sa kanila na isulat sa kanilang study journal ang anumang ideya o impresyon nila.

Mga turo ni Alma tungkol sa pagsilang na muli

Maaaring makinabang ang mga estudyante sa pag-aaral ng Alma 5 na may hangaring sikapin na mas maunawaan ang pagbabalik-loob. Halimbawa, maaaring pag-aralan ng mga estudyante ang Alma 5:2–7, na binibigyang-pansin ang tungkulin ni Jesucristo sa pagtulong sa atin na maisilang na muli at makaranas ng pagbabago ng puso. Maaari nilang pag-aralan ang Alma 5:8–16, 21, at alamin ang magiging impluwensya ng Tagapagligtas sa mga isinilang na muli at nananampalataya sa Kanya.

Video ng Aklat ni Mormon

Bilang bahagi ng pag-aaral ng mga estudyante ng Alma 5, maaari mong ipanood ang “Isinaayos ni Alma ang Simbahan sa Zarahemla” mula sa time code na 0:00 hanggang 3:02.