Alma 7:14–27

“Ang Landas na Patungo sa Kaharian ng Diyos”

Madalas tukuyin ng mga propeta ang “makipot at makitid na landas” (2 Nephi 31:19), ang “landas ng tipan,” o “ang landas na patungo sa kaharian ng Diyos” (Alma 7:19). Natanto ni Alma na ang mga tao ng Gedeon ay nasa landas na ito at itinuro niya sa kanila kung paano ito ipagpapatuloy at magiging higit na katulad ng Diyos. Layunin ng lesson na ito na tulungan ka sa iyong mga pagsisikap na magkaroon ng mga katangiang tulad ng kay Cristo sa pagtahak mo sa landas na pabalik sa Diyos.

Bumuo ng kapaligirang puno ng pagmamahal at paggalang. Hikayatin ang mga estudyante na magpahayag ng pagmamahal at pagtanggap na tulad ng kay Cristo sa bawat miyembro ng klase. Ang paggawa nito ay makapagpapalambot sa puso ng mga miyembro ng klase na nahihirapan.

Paghahanda ng estudyante: Sabihin sa mga estudyante na isipin ang mga katangiang tulad ng kay Cristo na gusto nilang mas lubos na mapagbuti at pumasok sa klase na handang ibahagi ang dahilan.

Mga Posibleng Aktibidad sa Pag-aaral

Isang landas na tatahakin

Maaari mong ipakita ang sumusunod na larawan (o isang larawan na katulad nito) habang itinatanong ang sumusunod.

• Ano ang mga kalamangan ng pagkakaroon ng landas na susundan?

Maaari mong panoorin ang “Araw-araw na Pagbabalik-loob” mula sa time code na 1:40 hanggang 3:25 para mapanood si Elder Dieter F. Uchtdorf ng Korum ng Labindalawang Apostol na ipinapaliwanag kung ano ang nangyayari sa mga taong naglalakbay nang walang landas na sinusundan o maaasahang palatandaan. Ang video ay matatagpuan sa ChurchofJesusChrist.org.

Matapos magpropesiya sa mga tao ng Gedeon tungkol sa buhay at Pagbabayad-sala ni Jesucristo, nagbahagi si Alma ng mga salita ng panghihikayat sa kanila.

Basahin ang Alma 7:19–20 para malaman kung ano ang sinabi ni Alma tungkol sa Diyos, sa Kanyang landas, at sa mga tao ng Gedeon.

Maaari mong markahan ang pariralang “ang landas na patungo sa kaharian ng Diyos” sa talata 19. Ngayon ay mas marami ka pang matututuhan tungkol sa landas na ito.

• Sa iyong palagay, paano mo masasabi na nasa landas ka na patungo sa kaharian ng Diyos?

Maaari mong idrowing sa pisara ang sumusunod na larawan at lagyan ito ng label na “Ang landas na patungo sa kaharian ng Diyos.” Sabihin sa mga estudyante na magdrowing ng isang bagay na katulad nito sa kanilang journal.

Magdrowing ng isang larawan na katulad ng sumusunod at lagyan ito ng label na “Ang landas na patungo sa kaharian ng Diyos.”

Ang landas na patungo sa kaharian ng Diyos ay kadalasang tinutukoy bilang makipot at makitid na landas o landas ng tipan. Narito tayo sa landas na ito kapag sinusunod natin ang halimbawa at mga turo ni Jesucristo. Ang patuloy na pagtahak sa landas na ito ay aakay sa atin tungo sa buhay na walang hanggan (tingnan sa 2 Nephi 31:19–20).

Habang nag-aaral ka, pag-isipan kung nakikita mo ang iyong sarili sa landas na patungo sa kaharian ng Diyos. Maghanap ng mga turo na tutulong sa iyo na mas maunawaan ang landas na ito at ang mga pagpapalang ibinibigay sa iyo ng Panginoon kapag tinatahak mo ito.

“Ang landas na patungo sa kaharian ng Diyos”

Inilarawan ni Alma ang mga bagay na magagawa natin na aakay sa atin pabalik sa kinaroroonan ng Diyos.

Basahin ang Alma 7:14–16, at pagkatapos ay isulat ang mga bagay na ito na gagawin sa landas na iyong idinrowing o sa tabi nito.

• Ano ang ipinaunawa sa iyo ng mga talatang ito tungkol sa ibig sabihin ng pagiging nasa landas na patungo sa Diyos?

Maaari mong ipasulat sa mga estudyante ang kanilang mga sagot sa sumusunod na tanong sa pisara. Pagkatapos ay maaaring anyayahan ng mga estudyanteng ito ang iba na lumapit at bilugan ang isang sagot sa pisara na tila napakahalaga sa kanila. Pagkatapos ay maaaring sabihin sa estudyanteng bumilog sa sagot na ipaliwanag kung bakit sa palagay niya ay mahalagang gawain ito na tumutulong sa atin na makabalik sa kinaroroonan ng Diyos.

Ang isang katotohanan na matututuhan natin mula sa mga talatang ito ay kapag tayo ay nagsisisi, nakikipagtipan sa Diyos, at tumatanggap ng mga ordenansa ng ebanghelyo ni Jesucristo, tinatahak natin ang landas na patungo sa kaharian ng Diyos.

• Paano nakatutulong ang mga bagay na ito na maihanda tayong makabalik sa kinaroroonan ng Diyos?

• Anong mga pagpapala ang maaari nating maranasan sa buhay na ito sa pamamagitan ng pagtahak sa landas ng Diyos?

Maaari mong anyayahan ang mga estudyante na ibahagi ang mga pagpapalang naranasan nila sa kanilang buhay sa pamamagitan ng pagtahak sa landas ng Diyos. Maaari ka ring magbahagi ng mga halimbawa mula sa iyong personal na buhay.

Pagkakaroon ng mga katangiang tulad ng kay Cristo habang tinatahak ang Kanyang landas

Ipinaliwanag ni Elder Dale G. Renlund ng Korum ng Labindalawang Apostol na ang isang pagpapala ng pagtahak sa landas ng tipan ng Diyos ay “[pagiging] katulad Niya” (“Piliin Ninyo sa Araw na Ito,” Liahona, Nob. 2018, 104).

Maaari mong ipakita ang mga larawang ito ng Tagapagligtas (o iba pang pipiliin mo) habang itinatanong sa mga estudyante ang mga sumusunod. Maaari mong ibahagi ang mga katangian ni Jesucristo na pinakahinahangaan mo bago mo itanong ang mga ito.

• Anong mga katangian ang pinakahinahangaan ninyo kay Jesucristo? Bakit?

• Sa paanong paraan ninyo gustong maging mas katulad ng Tagapagligtas? Anong mga bagay ang nagpapahirap dito? Paano natin makakayanan ang mga paghihirap na ito sa tulong ng Panginoon?

• Kailan ninyo nadama ang pinakamatinding hangarin na maging katulad Niya? Ano ang nangyayari sa buhay ninyo nang madama ninyo iyan?

Tinukoy ni Alma ang ilan sa mga katangiang tulad ng kay Cristo na dapat nating pagsikapang taglayin habang tinatahak natin ang landas na patungo sa kaharian ng Diyos.

Basahin ang Alma 7:22–25 at alamin ang mga katangian at pag-uugali na tulad ng kay Cristo na nakita mong nakasaad o inilarawan. Maaari mong markahan ang mga ito sa iyong mga banal na kasulatan. Maaari mo ring ilista ang mga katangian at pag-uugaling ito sa landas mismo o malapit sa landas na iyong idinrowing.

Ang sumusunod na aktibidad ay naglalayong tulungan ang mga estudyante na malaman pa ang tungkol sa mga katangiang tulad ng kay Cristo na binanggit sa Alma 7:22–25 at gumawa ng plano upang magkaroon ng isa o mahigit pa sa mga katangiang ito. Maaaring makatulong sa iyo na gawin ang aktibidad na ito bago magklase para maging mas handa kang tulungan ang mga estudyante sa kanilang paggawa. Tiyaking bigyan ang mga estudyante ng sapat na oras para matapos ang aktibidad na ito.

Maaari mong ipakita ang mga sumusunod na tagubilin.

Mapanalanging pumili ng isang katangian na binanggit sa Alma 7:22–25 na sa palagay mo ay nais ng Ama sa Langit na taglayin mo, at pagkatapos ay gawin ang sumusunod na aktibidad. Isulat ang iyong mga pananaw sa ibaba ng larawan mo o sa iba pang bahagi ng iyong study journal.

1. Alamin pa ang tungkol sa katangiang ito. Maaari kang gumamit ng mga scripture resources tulad ng Gabay sa mga Banal na Kasulatan, para makatulong dito. Isulat ang natutuhan mo.

2. Ilista ang mga hamong naranasan mo sa pagsisikap na mataglay ang katangiang pinili mo at kung bakit sa palagay mo ay hinahayaan ka ng Diyos na maranasan ang mga hamong iyon.

3. Maglista ng dalawa hanggang tatlong iba’t ibang paraan kung paano mas bubuti ang iyong buhay matapos taglayin ang katangiang ito.

4. Tumukoy ng isang halimbawa mula sa buhay ng Tagapagligtas kung saan ipinakita Niya ang katangiang ito. Maaari ka ring maglista ng isang halimbawa mula sa buhay ng isang taong kilala mo kung saan ipinakita niya ang katangiang ito na tulad ng kay Cristo.

5. Tumukoy ng isa o mahigit pa ng mga bagay na magagawa mo na mag-aanyaya sa tulong ng Diyos habang sinisikap mong taglayin ang katangiang ito. Gumawa ng plano kung paano mo magagawa ang bagay na iyon sa iyong buhay. Ang isang paraan kung paano mo maaaring pagsikapang magawa ang bagay na iyon ay sa pamamagitan ng pakikipag-usap sa Ama sa Langit sa iyong araw-araw na panalangin tungkol sa iyong pag-unlad at paghingi ng Kanyang tulong kung saan ka nagkukulang.

Maaari mong hatiin ang mga estudyante sa maliliit na grupo. Maaaring maikling ipaliwanag ng bawat tao sa grupo ang natutuhan at nadama nila tungkol sa katangiang pinili nila at kung bakit gusto nila itong taglayin. Maaari din nilang ibahagi ang katangiang pinili nila at ang halimbawa mula sa buhay ng Tagapagligtas o isang halimbawa mula sa buhay ng isang taong kilala nila. Hikayatin ang mga estudyante na gawin ang kanilang mga plano. Magpatotoo na tutulungan sila ng Ama sa Langit at ni Jesucristo sa kanilang mga pagsisikap.

Komentaryo at Impormasyon ng Konteksto

Bakit ang landas na patungo sa kaharian ng Diyos ay tinatawag ding “landas ng tipan”?

Ipinaliwanag ni Elder D. Todd Christofferson ng Korum ng Labindalawang Apostol:

Ano ang landas ng tipan? Ito ang landas na humahantong sa kahariang selestiyal ng Diyos. Nagsisimula tayo sa landas papasok sa binyag at pagkatapos ay “[nagpa]patuloy sa paglakad nang may katatagan kay Cristo, na may ganap na kaliwanagan ng pag-asa, at pag-ibig sa Diyos at sa lahat ng tao [ang dalawang dakilang utos] … na walang hanggan” [2 Nephi 31:20]. Sa pagtahak sa landas ng tipan (hindi lamang sa mortalidad), tinatanggap natin ang lahat ng mga ordenansa at tipan ukol sa kaligtasan at kadakilaan. (D. Todd Christofferson, “Bakit Mahalagang Tahakin ang Landas ng Tipan,” Liahona, Mayo 2021, 116)

Paano ako magkakaroon ng mga katangiang tulad ng kay Cristo?

Ipinaliwanag ni Elder Lynn G. Robbins ng Pitumpu:

Dahil ang mga katangiang tulad ng kay Cristo ay mga kaloob mula sa Diyos at hindi ito mapauunlad kung wala ang Kanyang tulong, sa mga pampamilya at personal na panalangin, ipagdasal ang mga kaloob na iyon. (Lynn G. Robbins, “Maging Anong Uri ng mga Tao Ba Nararapat Kayo?,” Liahona, Mayo 2011, 105)

Idinagdag ni Elder L. Whitney Clayton ng Pitumpu ang mga pananaw na ito:

Natatamo ang mga katangian ni Cristo sa “paglipas ng panahon” [Moises 7:21] sa pamamagitan ng intensyonal na pagsulong sa landas ng tipan. Napapalamutian ng mga katangian na katulad ng kay Cristo ang buhay ng mga taong nagsisikap na mamuhay sa kabutihan. Pinupuno nila ang mga tahanan ng liwanag ng ebanghelyo, putik man o marmol ang sahig. Kahit pa mag-isa lamang kayo sa buong pamilya ninyo na sumusunod sa utos na “hangarin ang mga bagay na ito” [Mga Saligan ng Pananampalataya 1:13], makadaragdag kayo sa espirituwal na mga kagamitan sa tahanan ng pamilya ninyo. (L. Whitney Clayton, “Ang Pinakamatitibay na Tahanan,” Liahona, Mayo 2020, 108)

Mga Karagdagang Aktibidad sa Pag-aaral

Pagsisisi, mga ordenansa, at ang landas ng tipan

Matapos matukoy ang nakasulat na katotohanan, maaari mong bigyan ang mga estudyante ng pagkakataong ipaliwanag ang kahalagahan ng pagsisisi, mga ordenansa, at mga tipan. Maaaring isadula ng mga estudyante ang pagpapaliwanag sa isang taong hindi miyembro ng Simbahan kung ano ang ibig sabihin ng magsisi, kung ano ang mga ordenansa ng ebanghelyo ni Cristo, at kung bakit napakahalaga ng mga ito.

Maaaring sumangguni ang mga estudyante sa Gabay sa mga Banal na Kasulatan sa mga paksang “Magsisi, Pagsisisi” at “Ordenansa, Mga” kung kailangan nila ng tulong.

Pagkukumpara sa Alma 7 at sa 2 Nephi 31

Kung makikinabang ang mga estudyante sa pag-aaral pa ng tungkol sa landas na patungo sa kaharian ng Diyos, pag-isipang gawin ang sumusunod na aktibidad.

Sabihin sa mga estudyante na gumawa ng chart na katulad ng sumusunod:

Mga paglalarawan sa landas at kung paano mananatili rito ayon sa 2 Nephi 31:13–21	Mga paglalarawan sa landas at kung paano mananatili rito ayon sa 2 Nephi 31:13–21

Sabihin sa mga estudyante na gumawa nang magkakapartner. Maaaring pag-aralan ng isang kapartner ang Alma 7 at maaaring pag-aralan ng isa pa ang 2 Nephi 31. Bawat isa sa kanila ay maaaring punan ang naaangkop na bahagi ng kanilang chart. Kapag tapos na sila, maaari nilang ibahagi ang bahagi ng chart na pinunan nila habang isinusulat ng isa pang kapartner ang ibinahagi ng kapartner niya. Pagkatapos ng sapat na oras, sabihin sa mga estudyante na ibahagi sa klase ang natutuhan nila tungkol sa Tagapagligtas at sa Kanyang landas habang ginagawa nila ang aktibidad na ito. Sabihin sa kanila na tukuyin ang isang bagay na magagawa nila para makapunta o manatili sa makipot at makitid na landas na ito.