Alma 7:1–13

Upang Matulungan Niya ang Kanyang mga Tao

Ang Kanyang gawain at kaluwalhatian ay “isakatuparan ang kawalang-kamatayan at buhay na walang hanggan ng tao” (Moises 1:39). Upang maisagawa ito, isinugo Niya ang Kanyang Anak na si Jesucristo upang magdusa para sa ating mga kasalanan at madaig ang kamatayan sa pamamagitan ng Kanyang Pagkabuhay na Mag-uli. Kusang-loob na pinagdusahan ng Tagapagligtas ang lahat ng bagay para sa atin “upang malaman niya nang ayon sa laman kung paano tutulungan ang kanyang mga tao alinsunod sa kanilang mga kahinaan” (Alma 7:12). Ang lesson na ito ay makatutulong sa iyo na magtiwala at makadama ng higit na pagmamahal sa iyong Tagapagligtas.

Tulungan ang mga estudyante na mahiwatigan ang impluwensya ng Espiritu Santo. Ang Espiritu Santo ay kadalasang nakikipag-ugnayan sa pamamagitan ng pagmamahal, kagalakan, at kapayapaan (tingnan sa Galacia 5:22–23). Nagpapatotoo rin Siya tungkol kay Jesucristo (tingnan sa Juan 15:26). Maghanap ng mga pagkakataon na tulungan ang mga estudyante na maunawaan ang kaugnayan ng kanilang damdamin at ng impluwensya ng Espiritu Santo. Isaisip na hindi lahat ng estudyante ay makadarama ng impluwensya ng Espiritu Santo sa parehong paraan.

Paghahanda ng estudyante: Maaari mong sabihin sa mga estudyante na pag-aralan ang Alma 7:11–13 at alamin sa mga talatang ito ang pinagdusahan ni Jesucristo sa Kanyang Pagbabayad-sala at kung bakit Niya pinagdusahan ang mga bagay na ito.

Mga Posibleng Aktibidad sa Pag-aaral

Ang pinakamahahalagang bagay

Maaari mong gawin ang sumusunod na listahan at pagra-rank kasama ang buong klase, o maaari kang magpagawa ng listahan sa mga estudyante nang may kapartner o sa maliit na grupo at pagkumparahin ang iba’t ibang sagot.

Gumawa ng listahan ng itinuturing mong ilan sa pinakamahahalagang pangyayari sa kasaysayan ng mundo, at pagkatapos ay i-rank ang mga ito mula sa pinakamahalaga hanggang sa pinakahindi mahalaga.

• Bakit makabuluhan o mahalaga ang isang pangyayari?

• Bakit kaya medyo mahirap i-rank ang mga ito ayon sa kahalagahan?

Habang nagsasalita si Alma sa mga tao sa lupain ng Gedeon, nagpropesiya siya na bagama’t “maraming bagay ang darating; … may isang bagay na higit na mahalaga” kaysa anupaman (Alma 7:7).

Basahin ang Alma 7:7, at hanapin ang pinakamahalagang pangyayaring ito. Maaari mong markahan ang nahanap mo.

• Sa palagay mo, bakit pinakamahalagang pangyayari sa lahat ang pagparito ng Tagapagligtas?

Maaari mong ipasulat sa mga estudyante ang kanilang mga ideya tungkol sa sumusunod sa kanilang study journal.

Matapos magsalita si Alma sa mga tao ng Zarahemla at isaayos ang Simbahan sa bahaging iyon ng lupain (tingnan sa Alma 6), naglakbay siya patungo sa lupain ng Gedeon. Ang Alma 7 ay naglalaman ng mahahalagang turo mula kay Alma sa mga tao ng Gedeon tungkol kay Jesucristo at sa Kanyang Pagbabayad-sala. Bago ka magsimulang mag-aral, isipin sandali kung paano nauugnay ang Pagbabayad-sala ni Jesucristo sa iyong buhay. Anong mga sitwasyon ang nararanasan mo sa kasalukuyan kung saan kailangan mo ang tulong na ibinibigay ng Ama sa Langit at ng Tagapagligtas?

Sa iyong pag-aaral ngayon, maghanap ng mga turo tungkol kay Jesucristo at sa Kanyang Pagbabayad-sala na makatutulong sa iyo na mas maunawaan ang ginawa Niya para sa iyo at kung paano Ka Niya matutulungan.

Nagturo si Alma tungkol sa Pagbabayad-sala ng Tagapagligtas

Maaari mong anyayahan ang mga estudyante na kopyahin ang sumusunod na chart sa kanilang study journal. Maaari mo rin itong ipakita o kopyahin sa pisara para mapunan ito ng buong klase.

Ano ang pinagdusahan ng Tagapagligtas para sa akin	Bakit nagdusa ang Tagapagligtas para sa akin

Ang Alma 7:11–13 ay isang doctrinal mastery passage. Maaari mong markahan ang mga doctrinal mastery passage sa partikular na paraan upang madali mong mahanap ang mga ito. Magkakaroon ka ng pagkakataon sa susunod na lesson na magsanay na gamitin ang doktrinang itinuturo sa passage na ito sa isang tanong o sitwasyon.

Basahin ang Alma 7:11–13, at alamin ang mga itinuro ni Alma tungkol sa kung ano ang pinagdusahan o inako ni Jesucristo para sa iyo bilang bahagi ng Kanyang Pagbabayad-sala. Isulat ang mga ito sa unang column ng iyong chart.

Kung pinili mong gamitin ang chart sa pisara, maaari mong anyayahan ang mga estudyante na isulat nila rito ang nalaman nila mula sa mga talatang ito. Pagkatapos ay ipabasa sa kanila ang mga sumusunod na scripture passage at isulat ang mga karagdagang detalye na natutuhan nila tungkol sa pagdurusa ng Tagapagligtas.

Basahin ang 2 Nephi 9:21; Mosias 3:5–8; at Doktrina at mga Tipan 19:16–19. Kabilang sa mga scripture passage na ito ang iba pang mga detalye tungkol sa pagdurusa ng Tagapagligtas. Magdagdag ng anumang salita o parirala na nakita mong mahalaga sa unang column sa iyong chart. Maaari kang magdagdag ng cross-reference o link mula sa mga scripture passage na ito sa Alma 7:11–13.

• Ano ang mga naisip o nadama mo nang malaman mo ang tungkol sa pagdurusa ng Tagapagligtas?

• Sa iyong palagay, bakit mahalagang maunawaan ang pinagdusahan at inako ng Tagapagligtas bilang bahagi ng Kanyang nagbabayad-salang sakripisyo?

Bakit pinagdusahan ni Jesucristo ang mga bagay na ito

Basahing muli ang Alma 7:11–13, at alamin sa pagkakataong ito kung bakit nagdusa ang Tagapagligtas para sa iyo. Pagtuunan ang mga pariralang nagsisimula sa “upang [makalag] niya” o “upang kanyang” habang nagbabasa ka. Sa pangalawang column ng iyong chart, isulat ang nalaman mo.

• Ano ang natutuhan mo kung bakit pinagdusahan ni Jesucristo ang mga bagay na ito para sa iyo?

  Maaaring isulat ng mga estudyante sa chart na nasa pisara ang kanilang mga sagot sa naunang tanong.

• Paano mo ibubuod ang napag-aralan mo sa Alma 7:11–13 sa isang pahayag ng katotohanan?

Mula sa Alma 7:11–13, maaaring natukoy mo ang katotohanang tulad nito: Si Jesucristo ay nagdusa upang iligtas ako mula sa kasalanan at kamatayan at tulungan ako sa mga hamon ng mortalidad.

Maaari mong isulat sa pisara ang katotohanang ito.

Ibinahagi ni Pangulong Dallin H. Oaks ng Unang Panguluhan ang ilan sa mga hamon ng mortalidad kung saan tayo matutulungan ng Tagapagligtas. Basahin ang sumusunod na pahayag o panoorin ang video na “Pinalakas ng Pagbabayad-sala ni Jesucristo,” na matatagpuan sa ChurchofJesusChrist.org, mula sa time code na 3:13 hanggang 4:01.

Dinanas at pinagdusahan ng ating Tagapagligtas ang kabuuan ng lahat ng pagsubok sa buhay “ayon sa laman” para malaman Niya “ayon sa laman” kung paano “tutulungan [na ibig sabihin ay paginhawahin o saklolohan] ang kanyang mga tao alinsunod sa kanilang mga kahinaan.” Alam Niya kung gayon ang ating mga paghihirap, dalamhati, tukso, at pagdurusa, sapagkat kusang-loob Niyang dinanas ang lahat ng ito bilang mahalagang bahagi ng Kanyang Pagbabayad-sala. At dahil dito, binigyang-kapangyarihan Siya ng Kanyang Pagbabayad-sala na tulungan tayo—na bigyan tayo ng lakas na tiisin ang lahat. (Dallin H. Oaks, “Pinalakas ng Pagbabayad-sala ni Jesucristo,” Liahona, Nob. 2015, 61–62)

• Ano ang ipinauunawa o ipinadarama sa iyo ng pahayag na ito tungkol sa Tagapagligtas?

Iugnay ito sa iyong buhay

Tulungan ang mga estudyante na maiugnay sa kanilang buhay ang natutuhan nila sa lesson na ito. Ang isang paraan para magawa ito ay bigyan sila ng oras na pag-isipan at gawin nang mag-isa ang sumusunod.

Pag-isipan sandali kung ano ang pinagdusahan ng Tagapagligtas na personal para sa iyo. Halimbawa, anong mga partikular na paghihirap, tukso, kahinaan, o pagdurusa ang nararanasan mo o naranasan mo? Maaari mong isulat ang mga naisip mo sa ibaba ng iyong chart.

Pagkatapos, mapanalanging pag-isipan kung paano ka pinalakas o mapapalakas ng Tagapagligtas sa bawat isa sa mga paghihirap na ito. Hilingin sa Ama sa Langit na bigyan ka ng inspirasyon habang isinusulat mo ang iyong mga naiisip at nadarama.

Maaari kang mag-anyaya ng mga boluntaryo na ibahagi ang ilan sa mga pananaw na itinala nila. Ang mga sumusunod na tanong ay maaari ding gamitin upang gabayan ang talakayan sa klase. Bago ibigay ang unang tanong, maaari kang magbahagi ng personal na halimbawa mula sa iyong buhay. Kapag hinihiling sa mga estudyante na magbahagi, ipaalala sa kanila na huwag magbahagi ng mga karanasan na maaaring napakapersonal o napakasagrado.

• Kailan mo nadama ang lakas na ibinibigay ni Jesucristo sa pamamagitan ng Kanyang Pagbabayad-sala?

• Ano ang natutuhan o nadama mo tungkol kay Jesucristo sa iyong pag-aaral ngayon na gusto mong matandaan?

Patotohanan ang mga katotohanang tinalakay mo ngayon.

Komentaryo at Impormasyon ng Konteksto

Ano ang nadarama ng Panginoon tungkol sa mga kasalanan o kahinaan na nahihirapan akong daigin?

Itinuro ni Elder Richard G. Scott (1928–2015) ng Korum ng Labindalawang Apostol:

Ang masayang balita para sa lahat na naghahangad na iwaksi ang mga bunga ng mga maling pagpili ay na iba ang tingin ng Panginoon sa mga kahinaan kaysa paghihimagsik. Bagama’t nagbabala ang Panginoon na parurusahan ang mga naghimagsik na hindi nagsisi, kapag nagsalita ang Panginoon tungkol sa mga kahinaan, lagi itong may kahalong awa. (Richard G. Scott, “Sariling Lakas sa pamamagitan ng Pagbabayad-sala ni Jesucristo,” Liahona, Nob. 2013, 83)

Talaga bang alam ni Jesucristo ang sitwasyon ko?

Itinuro ni Elder Jeffrey R. Holland ng Korum ng Labindalawang Apostol:

Dinanas ni Cristo ang dinanas ng bawat tao upang malaman Niya kung paano tayo tutulungan at palalakasin sa ating mga pagsubok at sa mga panahong nahihirapan tayo. Alam Niya ang pinakamalalim at pinakapersonal na pasakit na nadarama natin. Alam Niya ang pinakakaraniwan at pinakamatinding pasakit na nararanasan natin. Nagpakababa-baba Siya sa lahat ng matinding pighating iyon upang maiahon tayo mula rito. Walang dalamhati o pighati o kalungkutan sa buhay na hindi Niya dinanas para sa ating kapakanan at pinasan nang buong giting at pagkahabag. (Jeffrey R. Holland, Christ and the New Covenant: The Messianic Message of the Book of Mormon [1997], 223–24)

Itinuro ni Elder Matthew S. Holland ng Pitumpu:

Sa sinumang dumaranas ngayon ng napakatindi o kakaibang pasakit na sa pakiramdam ninyo ay walang lubos na makauunawa sa mga iyon, maaaring tama kayo riyan. Maaaring walang kapamilya, kaibigan, o priesthood leader—gaano man kasensitibo at kabuti ang bawat isa—ang eksaktong nakaaalam ng inyong nararamdaman o nasasabi ang mismong mga salita na makatutulong sa inyong paggaling. Ngunit dapat ninyong malaman ito: may Isang [Nilalang na] lubos na nakauunawa sa inyong pinagdaraanan, na “higit na makapangyarihan kaysa lahat ng sangkatauhan” [1 Nephi 4:1], at “makagagawa ng higit na sagana kaysa lahat ng [inyong] hinihingi o iniisip” [Efeso 3:20]. Ang proseso ay mangyayari ayon sa Kanyang paraan at sa Kanyang panahon, gayunman laging nakahanda si Cristo na pagalingin ang bawat kaliit-liitan at aspeto ng inyong pagdurusa. (Matthew S. Holland, “Ang Walang Katulad na Kaloob ng Anak,” Liahona, Nob. 2020, 46)

Mga Karagdagang Aktibidad sa Pag-aaral

Ang pagtulong ng Tagapagligtas para sa depresyon at karamdaman sa pag-iisip

Habang tinatalakay ninyo ang doktrina na si Jesucristo ay nagdusa upang iligtas tayo mula sa kasalanan at kamatayan at tulungan tayong malampasan ang mga hamon ng mortalidad (tingnan sa Alma 7:11–13), maaari mong ipanood ang video na “Parang Basag na Sisidlan” (11:36). Sa video na ito, pinatotohanan ni Elder Jeffrey R. Holland ng Korum ng Labindalawang Apostol at ng iba pa kung paano matutulungan ng Tagapagligtas ang mga taong nakararanas ng depresyon at iba pang mga karamdaman sa pag-iisip. Ang video na ito ay matatagpuan sa ChurchofJesusChrist.org.

Alma 7:13. “Masdan, ito ang patotoo na nasa akin”

Tinapos ni Alma ang kanyang mga turo tungkol sa Pagbabayad-sala ng Tagapagligtas sa pagsasabi ng, “Ngayon masdan, ito ang patotoo na nasa akin” (Alma 7:13). Maaaring anyayahan ang mga estudyante na ibahagi ang kanilang personal na patotoo tungkol sa Tagapagligtas tulad ng ginawa ni Alma sa mga tao sa Gedeon. Sabihin sa kanila na isipin kung ano ang ibabahagi nila kung hihilingin sa kanila na ituro ang saloobin at nadarama ng kanilang puso hinggil sa Tagapagligtas. Ano “ang patotoo na nasa [kanila]”?