Aлмa 9

Их Эзэний адислалыг санагтун

Их Эзэн таныг хэрхэн адисалсан бэ? Тэрээр таныг эдгээр адислалыг хүлээн аваад юу хийгээсэй хэмээн хүсдэг вэ? Алма, Амюлек хоёр Аммонайхагийн хүмүүсийг наманчлахыг дуудахад хүмүүс тэдний сургаалаас татгалзав. Их Эзэн тэднийг үнэнийг заалгаагүй леменчүүдээс илүү зөв шударга байх болно гэж хүлээж байсан хэмээн Алма заасан. Тэрээр хүмүүст Их Эзэний адислалыг санахыг сануулсан. Энэ хичээл суралцагчдад Их Эзэний өгсөн адислалуудыг таньж мөн санахад нь туслах зорилготой.

Суралцагчдад Ариун Сүнсээр сурахад туслах асуулт тавь. Анхааралтай сонгосон цөөхөн үг асуултын нөлөөг нэмэгдүүлэх боломжтой. Сайн боловсруулсан асуулт нь суралцагчдын тань оюун ухаан, зүрх сэтгэлийг татаж, Ариун Сүнсэнд заах боломжийг олгоно.

Суралцагчийн бэлтгэл: Суралцагчдыг Тэнгэрлэг Эцэгээс болон Есүс Христээс хүлээн авсан адислалынхаа хэд хэдэн жишээг нэг юм уу хоёр минут зарцуулан бичихэд урь.

Боломжит суралцах үйл ажиллагаа

Их Эзэний танд өгч буй адислал

Судлах тэмдэглэл дээрээ Тэнгэрлэг Эцэгээс болон Есүс Христээс хүлээн авсан адислалуудынхаа жагсаалтыг гаргахад хэдэн минут зарцуул. (Та Христийн Сүмийн гишүүн учраас ирсэн адислалуудын талаар бодож үз.)

Та хэд хэдэн суралцагчийг хүлээн авсан адислалаасаа эсвэл бэлгүүдээсээ нэг юм уу хоёрыг самбар дээр бичихэд урьж болно. Суралцагчдаас эдгээр бэлгийн тухай юу мэдэрсэн, яагаад ингэж мэдэрсэн гэдгийг нь асуу. Өөрийнхөө бодож олсон адислалыг нэмж бич.

• Эдгээр адислал, бэлгийг санах нь танд хэрхэн нөлөөлдөг вэ?

• Та эдгээр адислалын талаар хэр их боддог вэ? Тэдэнд анхаарлаа илүү хандуулахын тулд хийж чадах зүйл байна уу?

Та өнөөдөр суралцаж байхдаа жагсаалтаа нэмэх боломжтой болно. Тэнгэрлэг Эцэгийн танд өгсөн адислалыг таньж, амьдралынхаа туршид хэрхэн санаж болохыг мэдэхийн тулд Түүний удирдамжийг эрэлхийл.

Алма, Амюлек хоёр Аммонайхагийн хүмүүст номлосон нь

Алма, Амюлек хоёрыг Аммонайхагийн хүмүүст Бурханы үгийг номлох үед хүмүүс хатуу зүрх сэтгэлтэй байсан.

Алмагийн Алма 9:8–11, 20–22 дахь тэдэнд хэлсэн үгийг уншаад, Их Эзэний тэр хүмүүсийн мартсан байсан адислалуудыг харуулсан үг, хэллэгийг олж мэд.

• Та юу олж мэдсэн бэ?

• 11-р шүлэг-т Алма Их Эзэний ямар шинж чанарыг онцолсон бэ? (Эдгээр үгийг судар дээрээ тэмдэглэх талаар бодож үз.)

Тэсвэр гэдэг нэр томьёо нь уурлах учир шалтгаан байгаа үед Их Эзэний тэсвэр, тэвчээрийг илэрхийлдэг гэдгийг мэдэх нь тустай байж болох юм.

Их Эзэн танд тэвчээрийг харуулсан арга замуудын талаар эргэцүүлэн тунгаан бод. Та эдгээр жишээг адислалынхаа жагсаалтад нэмж оруулахыг хүсэж болно.

Санаа бодлоо хуваалцах суралцагчдыг урь.

Хожим нь Алма өөрийнх нь захиасыг ойлгоход бидэнд туслах Их Эзэний нэмэлт шинж чанаруудын талаар гэрчилсэн. Алма 9:26-г уншаад, эдгээр шинж чанарыг тэмдэглэ. Судрууд дахь тэгш байдал гэдэг үг нь “шударга” эсвэл “тэгш” гэсэн утгатай гэдгийг мэдэх нь тустай байж болох юм.

Алма үргэлжлүүлэн номлохдоо Есүс Христ бол ач ивээл, тэгш байдал, үнэн, тэвчээр, нигүүлслээр дүүрэн, удаан тэсвэрлэдэг гэдгийг онцолсон. Алма яагаад Аммонайхагийн хүмүүсийг Аврагчийн эдгээр шинж чанарыг ойлгоосой гэж хүссэнийг тунгаан бод.

Хоёр хүнийг жишиж харьцуулах нь

Судрууд ихэвчлэн сайн мэдээний зарчмуудыг заах арга замаар санаа бодол, үйл явдал, хүмүүсийг харьцуулж буюу жишдэг. Эдгээр харьцуулалтыг эсвэл ялгаатай байдлыг хайх нь судраас суралцах хэрэгтэй ур чадвар байж болох юм. Алма өөр өөр нөхцөл байдалд байсан хоёр бүлэг хүмүүсийг буюу леменчүүд, Аммонайхагийн хүмүүсийг харьцуулсан. Судлах тэмдэглэлдээ дараах хүснэгтийг бөглө. Алма Аврагчийн зан чанарыг хэрхэн онцолсныг олж мэд.

Самбар дээр энэ хүснэгтийг үүсгэж, суралцагчдаас тэмдэглэл дээрээ дахин хийхийг хүс. Та ангийнхныг хоёр бүлэгт хуваарилж, нэг хэсгээс нь леменчүүдийг, нөгөө хэсгээс нь Аммонайхагийн хүмүүсийг судлахыг хүсэж болно. Эсвэл та ангийнхнаа жижиг бүлгүүдэд хуваарилж, хамтдаа хүснэгтийг бөглөж болно.

	Та хүмүүсийн талаар юу сурч мэдсэн бэ?	Их Эзэн эдгээр хүнд нигүүлсэл, тэгш байдал, үнэн, тэвчээр, өршөөл, удаан тэсвэрлэх зэргийг хэрхэн харуулдаг вэ?
Леменчүүд (Алма 9:14–17)
Аммонайхагийн хүмүүс (Алма 9:20–25)

Суралцагчдаас дуусах үед, сурч мэдсэн зүйлээ хуваалцахыг хүс. Их Эзэн зарлигуудыг нь үл тоомсорлодог хүмүүст нигүүлсэнгүй ханддаг хэдий ч (Алма 9:16-г үзнэ үү) мэдсээр байж сайн мэдээний эсрэг тэрсэлж, наманчлахаас татгалздаг хүмүүс илүү их зэмлэл хүлээх болно гэдгийг та онцолж болно (23–24-р шүлэг-ийг үзнэ үү). Та Сургаал ба Гэрээ 82:3-ыг эдгээр шүлэгтэй харьцуулж болно. Их Эзэний агуу нигүүлслийг наманчлах хүсэлтэй бүх хүнд үзүүлж байгааг суралцагчид мэдэрч, харж байгаа гэдгийг тайлбарла.

• Аммонайхагийн хүмүүст анхааруулж, гэрчлүүлэхээр Алма, Амюлек хоёрыг илгээсэн нь Их Эзэний нигүүлслийг хэрхэн харуулсан бэ?

• Алма 9 дэх Алмагийн Бурханы тухай сургаалыг өнөө үед бид санах нь чухал гэж яагаад бодож байна вэ?

Их Эзэн танд юу өгсөн бэ?

Аммонайхагийн хүмүүс Их Эзэний тэдэнд өгсөн адислалуудыг хэчнээн хурдан мартсанд Алма гайхширсан (Алма 9:8–11-ийг үзнэ үү). Тэднийг наманчилж, Их Эзэнд буцаж эргэхэд нь туслахын тулд Алма хүлээн авсан олон адислалыг нь тэдэнд сануулсан (20–24-р шүлэг-ийг үзнэ үү).

• Бид Их Эзэний бидний төлөө хийсэн зүйлийг мартдаг зарим шалтгаан юу вэ?

Суралцагчдад Бурханаас биечлэн хүлээн авсан адислалынхаа талаар тунгаан бодох цаг гаргаж өг. Хичээлийн эхэнд хийсэн жагсаалтаа нэмж, эдгээр адислалыг санах арга замуудын талаар бодоход нь тэднийг урамшуулан дэмж. Та суралцагчдыг чимээгүй тунгаан бодоход дараах асуултуудыг тавьж болно.

Дараах асуултуудыг уншихдаа Аммонайхагийн хүмүүсийн хүлээн авсан адислалуудын заримыг та хэрхэн хүлээн авсан тухайгаа тунгаан бод. Эдгээр адислалыг жагсаалтдаа нэмээрэй.

• Их Эзэний “[та нарын] хүсэл, мөн итгэл, мөн залбирлуудын дагуу [та нарт] юу мэдүүлэгдсэн” бэ? (Алма 9:20).

• Алма 9:21-д дурдсан Сүнсний бэлгүүд таныг хэрхэн адисалсан бэ?

• Бурхан таныг сорилт бэрхшээлээс хэрхэн аварсан бэ? (Алма 9:22-ыг үзнэ үү.)

Хэдэн суралцагчийг хариултынхаа заримыг хуваалцахад урь.

Их Эзэний танд өгсөн адислалуудыг санахад тань туслах ямар нэгэн зүйл хийхэд цаг гарга. Зарим санааг доор өгөв.

• Хичээл дээр хийсэн жагсаалтынхаа зургийг авч, утсан дээрх арын зураг гэх мэт байнга харж болох газар байрлуул.

• Мэдрэмжээ судлах тэмдэглэл дээрээ бичиж, адислалуудаа бичиж байх төлөвлөгөө гарга.

• Календарь дээрээ сануулга тохируулж, таны төлөө Их Эзэний хийсэн зүйлийг байнга тунгаан бод.

Цөөн суралцагчийг юу хийснээ, мөн юу хийхээр төлөвлөснөө болон энэ талаар юу бодож байгаагаа хуваалцахад урь. Та мөн өөрийнхөө төлөвлөгөөг хуваалцаж болно.

Энэ хичээл дээр заасан зарчмууд болон Бурханы хүүхдүүдээ хайрлах хайрын талаар гэрчлэлээ хуваалц.

Тайлбар ба нөхцөл байдлын талаарх мэдээлэл

Их Эзэний Сүмийнхээ гишүүдэд өгсөн адислалууд юу вэ?

Арван хоёр төлөөлөгчийн чуулгын ахлагч Нийл Л.Андэрсэн Их Эзэний бидэнд өгсөн бэлгүүдийн заримын талаар ийн хуваалцсан.

Зарим хүн “Христэд хайртай өөр шашны хүмүүс байдаг биз дээ?” гэж асуудаг. Мэдээж байдаг. Гэвч Есүс Христийн Хожмын Үеийн Гэгээнтнүүдийн Сүмийн гишүүдийн хувьд Түүний бодит байдлын гэрчийг зөвхөн Библиэс биш бас Мормоны Номоос авдаг учир, Түүний санваар дэлхийд дахин сэргээгдсэн гэдгийг мэддэг учир, баптисм хийлгэж, Түүнийг дагах ариун гэрээ хийж, Ариун Сүнсний бэлгийг хүлээн авсан учир, Түүний ариун сүмд санваарын хүчээр хишиг хүртсэн учир, Түүнийг дэлхийд алдар суутайгаар дахин ирэхэд нь бэлтгэхэд оролцож байгаа учир; бид хэн болохоо эдгээр үнэнийг хараахан хүлээж аваагүй тэдгээр хүмүүстэй харьцуулж болохгүй. “Учир нь их нь өгөгдсөн түүнээс их нь шаардагдах буюу’ [Сургаал ба Гэрээ 82:3].” (Нийл Л.Андэрсэн, “Түүнийг хэзээ ч бүү орхи,” 2010 оны 10-р сарын Ерөнхий чуулган, 48)

Халамжийн нийгэмлэгийн ерөнхий ерөнхийлөгчийн зөвлөлийн зөвлөхөөр үйлчилж байсан Шэри Л.Дью эгч үүнтэй төстэй адислалуудын талаар мөн гэрчилсэн.

Бид бол онцгой. Бид гэрээнүүдийнхээ учраас, сүнсний онцгой боломжуудынхаа учраас түүнчлэн энэ хоёр зүйлийн төлөө хүлээдэг үүрэг хариуцлагынхаа улмаас онцгой хүмүүс юм. Бидэнд Ариун Сүнсний хүчээр хишиг хүртээгдэж, бэлэг өгөгдсөн. Биднийг удирддаг амьд бошиглогч бидэнд байдаг. Биднийг Их Эзэнтэй болон бие биетэй маань холбох ёслолууд байдаг, мөн санваарын хүч бидний дунд бий. Бид аз жаргалын агуу төлөвлөгөөний хаана нь зогсохоо ойлгодог. Мөн бид Бурхан бол бидний Эцэг, Түүний Хүү бол бидний үнэнч Өмгөөлөгч гэдгийг мэддэг.

Эдгээр давуу эрх нь асар их үүрэг хариуцлагатай ирдэг. Учир нь “их нь өгөгдсөн түүнээс их нь шаардагдах буюу“ (Сургаал ба Гэрээ 82:3). (Sheri L. Dew, “We Are Women of God,” Ensign, Nov. 1999, 98)

Нэмэлт суралцах үйл ажиллагаа

Алма 9:1–7 Аммонайхагийн хүмүүсийн хариу үйлдэл

Хэрэгтэй бол суралцагчдыг Алма 9:1–7-г уншаад, Аммонайхагийн хүмүүс Алма, Амюлек хоёрт хэрхэн хариу үйлдэл хийснийг олж мэдэхэд урь. Дараахтай адил асуулт тавь: Тэд Бурханыг болон хүүхдүүдийнхээ дунд Түүний хэрхэн ажилладгийг ойлгоогүйг ямар үг, хэллэг харуулсан бэ? Тэдний итгэлгүй байдал Их Эзэний үйлчлэгчдийг сонсох хүсэлд нь хэрхэн нөлөөлсөн бэ? Бошиглогчдыг нь сонсоход тусалдаг Бурханы талаар та юу мэдэх вэ?

Видео

Хэрэгтэй бол “Алма, Амюлек хоёр Бурханы хүчийг хүлээн авсан нь” (22:56) видеог цагийн код 4:20-оос 6:23 хүртэл үзүүл ChurchofJesusChrist.org. Энэ видеонд, Алма Аммонайхагийн хүмүүст юу гэрчилснийг мөн тэд түүнийг хэрхэн хүлээж авсан тухай товчилсон түүхийг дүрсэлсэн болно.

Алма 10:22–23. “Зөв шударгыг үйлдэгчдийн залбирлууд”

Хэрэв таны суралцагчдад зөв шударга хүмүүсийн залбирлын хүчийг ярилцах нь тустай байх бол Алмаг зааж, гэрчилсний дараа, түүнийг баривчлах гэж байсныг тайлбарла. Амюлек өөрт нь ирж буй тэнгэр элчийн тухай яриагаа таслав. Суралцагчдыг Алма 10:22–23-ыг уншиж, зөв шударга хүмүүсийн залбирал Аммонайхагийн хүмүүст ямар нөлөө үзүүлснийг олж мэдэхэд урь. Суралцагчид мөн Алма 62:40, Хиламан 13:12–14-ийг уншиж, Ахмад Моронай, лемен үндэстэн Самуел нарын өдрүүдэд зөв шударга хүмүүсийн залбирал нифайчуудад хэрхэн нөлөөлснийг харж болно. Суралцагчдыг зөв шударга хүмүүсийн залбирал өнөөдөр биднийг болон бусдыг хэрхэн адисалж болох талаар ярилцахад урь.

Зөв шударгыг үйлдэгчдийг устгагдсаны дараа буюу тэд Аммонайхагийн нутгаас хөөгдсөний дараа зөв шударгыг үйлдэгчдийн залбирлууд уг хотыг хамгаалахаа больж, леменчүүдээр “Аммонайхачуудын амьд бодгаль бүхэн устгагдав” гэснийг тайлбарлах нь тустай байж магадгүй (Алма 16:9).