Алма 8

Тэнгэрлэг Эцэгийг сонсож, дагах нь

Тэнгэрлэг Эцэгийг дагах нь хэцүү байж болох ч энэ нь агуу аз жаргалд хүргэдэг. Алма, Амюлек хоёр итгэлтэй байж, Бурханы зааварчилгааг дагаснаар Бурхан тэднийг болон тэдний эргэн тойрны хүмүүсийг адисалсан. Энэ хичээл танд амьдралдаа Тэнгэрлэг Эцэгийг сонсож, дуулгавартай дагахад тань туслах болно.

Суралцагчдад оруулсан хувь нэмрийг нь үнэлж байгааг мэдрэхэд нь тусал. Сонсох нь багшаас дараагийн хичээлийн сэдвээс илүү суралцагчийн хэрэгцээнд анхаарлаа хандуулахыг шаарддаг. Сүнсээр хөтлүүлсэн үедээ төлөвлөсөн зүйлээ хойш тавьж, суралцагчдын санаа бодлыг сонсоход бэлэн байгаарай. Үг, үйлдлээрээ тэднийг сонсох хүсэлтэй байгаагаа харуул.

Суралцагчийн бэлтгэл: Суралцагчдыг залбирч, Тэнгэрлэг Эцэгээс Өөрийг нь илүү дагахын тулд юу хийгээсэй гэж хүсдэгийг асуухад урь.

Боломжит суралцах үйл ажиллагаа

Тэнгэрлэг Эцэгийг дагах нь

Хэрэв энэ нь доорх жишээнүүдээс илүү суралцагчдад хамааралтай бол Их Эзэний тэднээр хийлгүүлэхийг хүссэн хэцүү зүйлсийг хуваалцахад суралцагчдыг урьж эхэл.

Хэрэв Тэнгэрлэг Эцэг танаас дараах зүйлийг хийгээсэй гэж хүсвэл танд ямар мэдрэмж төрж, яагаад ингэж санагдах байсан талаар бод.

• Урьд нь таны урилгаас татгалзсан хэн нэгэнтэй сайн мэдээг хуваалц.

• Сургуулийнхаа шоовдорлогдсон эсвэл гологдсон хэн нэгэнтэй нөхөрлөж, тусал.

  Цөөн хэдэн суралцагчийг юу мэдэрч, яагаад ийм мэдрэмжтэй байгаагаа хуваалцахад урь.

• Хүлээн зөвшөөрч, дуулгавартай дагахад хэцүү байж болох өөр ямар зарлиг эсвэл зааврыг Тэнгэрлэг Эцэгээс бидэнд өгч болох вэ? Эдгээр нөхцөл байдал яагаад ийм хэцүү байж болох вэ?

Таны өнөөдөр судлах бүлэгт Бурхан Алмад дээрх эхний хувилбартай төстэй нөхцөл байдалтай тулгарна гэдгийг зааварласан бөгөөд Амюлек хоёр дахь хувилбартай төстэй нөхцөл байдалтай тулгарсан. Танд дуулгавартай дагахад хэцүү, Бурханаас ирсэн тушаал эсвэл заавар байгаа эсэхийг хэсэг зуур тунгаан бод. Суралцах явцдаа Алма, Амюлек хоёр бэрхшээлийг хэрхэн даван туулж, Бурханы зарлигуудыг дагасныг олж мэд. Тэнгэрлэг Эцэгийг хэрхэн илүү сайн сонсож, дагах талаар мэдэхийн тулд түүнээс тусламж хүс.

Суралцагчдад Алма, Амюлек хоёрын түүхийг доор тусад нь жагсааснаар уншиж, хуваалцахдаа ангийнхантайгаа хамтран ажиллах нь тустай байж болох юм. Эсвэл суралцагчдын талыг Алмагийн түүхийг, нөгөө хэсгийг нь Амюлекийн түүхийг уншихад урь. Суралцагчид дараа нь нөгөө түүхийг уншсан ангийн найзтайгаа уншсан зүйлийнхээ талаар ярилцаж, тайлбарлаж өгч болно. Дагалдах асуултуудыг үзүүлснээр суралцагчид уншиж байхдаа тэдгээр асуултаас эш татаж болно.

Алмагийн туршлага

Алма 8:8–18-ыг уншаад, Бурхан Алмаг юу хийгээсэй гэж хүссэнийг, яагаад энэ нь түүнд хэцүү байсан талаар олж мэд. Унших үедээ үйл явдлыг төсөөлөн бодохыг хичээ.   ChurchofJesusChrist.org 

• 14-р шүлэг дээрх ямар үг хэллэг Алмагийн зарлигийг хүлээн авахдаа ямар мэдрэмжтэй байсныг илэрхийлж байна вэ?

• 18-р шүлэг дээрх ямар үг хэллэг Алмагийн дагахын тулд хэр удсаныг тодорхойлж байна вэ?

• Алма гунигтай байсан ч яагаад ийм хурдан дуулгавартай дагасан гэж та нар бодож байна вэ?

Амюлекийн туршлага

Дараа нь юу болсныг харахын тулд Алма 8:19–21; 10:4–11-ийг унш. (Амюлекийн туршлага Алма 10:4–11-д хамааралтай гэдгийг мэдэх нь тустай байж магадгүй.) Унших үедээ үйл явдлыг төсөөлөн бодохыг оролд.   ChurchofJesusChrist.org 

• Бид Алма 10:4–6-аас Амюлекийн талаар юу сурч мэдсэн бэ? Эдгээр хүчин зүйл нь түүнийг Бурханыг дагахад хэрхэн төвөгтэй болгосон бэ?

• Тэнгэрлэг Эцэг яагаад урьд нь дуулгавартай дагаагүй Амюлектай үргэлжлүүлэн харьцсаар байсан гэж та бодож байна вэ?

Амюлек, Алма хоёр үйлдлийнхээ төлөө хэрхэн адислагдсаныг мэдэхийн тулд Алма 8:26–32-ыг унш.

• Та Алма, Амюлек хоёрын түүхээс ямар зарчим сурч мэдсэн бэ?

Суралцагчдын хуваалцахыг сонс. Бүх зарчмыг самбар дээр бич. Яагаад зарчмуудыг ойлгох нь чухал болохыг асуу. Суралцагчдын үгийг ашиглан, доорх зарчимтай адил зарчмыг самбар дээр бич.

Таны тодорхойлж магадгүй нэг зарчим бол бид Тэнгэрлэг Эцэгийг сонсож, дагавал Тэрээр биднийг болон бусдыг адисалдаг. Бид Бурханы үгийг янз бүрийн арга замаар сонсож болно. Жишээлбэл: Алма, Амюлек хоёр хоёулаа Бурханы үгийг тэнгэр элчээс сонссон.

Суралцагчидтай Бурханы үгийг сонсох янз бүрийн арга замын талаар ярилцах нь тустай байж болох юм. Та суралцагчдыг Судруудын удирдамж эсвэл Библийн толь бичиг-ийн “Илчлэлт” хэсгийг уншихыг хүсэж болно.

Түүнийг сонс

Доорх үйл ажиллагаа нь суралцагчдад Бурханыг сонсож, дуулгавартай дагахад тулгарч болох саад бэрхшээлийг даван туулахад нь туслах зорилготой. Үүнийг ангиараа хэлэлцэж эсвэл жижиг бүлгээр хийх нь тохиромжтой. Суралцагчид санал бодлоо хуваалцаж, самбар дээр жагсааж бичиж болно. Суралцагчдыг асуулт асууж, бие биедээ хариулт олоход нь тусал. Энэ үйл ажиллагааны нэг хэсэг болгон та доорх санаануудыг санал болгож эсвэл ашиглаж болно.

Амюлек “Би олон удаа дуудагдсан боловч би сонсохоос татгалзсан”(Алма 10:6) гэж хэлсэн. Амьдралынхаа эхэн үед Алма Бурханыг сонсоогүй (Moзая 27:8-ыг үзнэ үү).

Таны таньдаг хэн нэгэн Бурханыг сонсож, дуулгавартай дагаж чадахгүй байна гэж төсөөлөөд үз дээ. Тэр хүнийг Их Эзэнд итгэхэд юу хүргэж болох талаар санаагаа цуглуулахад хэдэн минут зарцуул. Үүнд:

• Алма, Амюлек хоёрын дуулгавартай байдлын жишээ

• Аврагчийн Эцэгтээ дуулгавартай байсны жишээ

• Хэн нэгэн Бурханыг сонсож, дуулгавартай байсан үеийн судрын бусад түүх

• Таны Бурханыг дуулгавартай дагахыг хичээхдээ мэдэрсэн адислалууд

“Итгэл нь тохиолдол биш сонголт” видеог цагийн код 1:40-өөс 4:25 хүртэл үзнэ үү ChurchofJesusChrist.org. Бичлэг дээр Арван хоёр төлөөлөгчийн чуулгын ахлагч Нийл Л.Андэрсэн тодорхой бус цаг үед нэгэн залуу эрэгтэйн сүнслэг өдөөлтийн дагуу итгэлтэй, дуулгавартай үйлдсэн тухай ярьсан.

Хэдэн суралцагчийг бодол санаагаа хуваалцахад урь. Мөн өөрийн санаа бодлыг хуваалцаж болно.

Тэнгэрлэг Эцэгээс авсан сэтгэгдлээ бичиж үлдээ. Эдгээр сэтгэгдлийн дагуу үйлдэхийн тулд юу хийж чадахаа бод. Үүнд тодорхой зарлиг, сүнслэг өдөөлтийн дагуу дуулгавартай дагах амлалт, таны хийх ёстой аливаа алхмууд багтаж болно. Хэрэв эдгээр зарлигийг дагахад хэцүү байвал Тэнгэрлэг Эцэг танд тусалж болохын тулд залбирах талаар бодоорой.

Суралцагчдыг Алма, Амюлек хоёрын жишээнээс юу санахыг хүсэж байгаагаа хуваалцахад урь.

Суралцагчдадаа Тэнгэрлэг Эцэг Өөрийг нь сонсож, дуулгавартай дагахыг хичээхэд нь тэдэнд туслах болно гэсэн гэрчлэлээ хуваалц.

Тайлбар ба нөхцөл байдлын талаарх мэдээлэл

Бурханыг дуулгавартай дагаснаар ирдэг зарим адислал юу вэ?

Ерөнхийлөгч Жорж К.Каннон (1827–1901) ийн хэлсэн.

Сайн мэдээнд дуулгавартай байх нь [хүмүүсийг] Их Эзэнтэй маш ойр дотно харилцаатай болгодог. Энэ нь дэлхий дээрх хүмүүс, тэнгэр дэх Агуу Бүтээгчийн хоорондох харилцааг ойртуулдаг. Энэ нь Бүхнийг Чадагчид болон Тэрээр Өөрт нь найддаг хүмүүсийн гуйлтыг сонсож, хариулдаг гэдэгт бүрэн найдах мэдрэмжийг хүмүүний оюун санаанд суулгадаг. Сорилт бэрхшээл, гай зовлон тулгарах үед энэ найдварыг юугаар ч үнэлэхийн аргагүй. Хэцүү зүйл хувь хүнд ч, хүмүүст ч тохиолдож болно, гамшиг хүн бүрийн найдварт заналхийлж, түүнийг ганхуулж болно, гэвч сайн мэдээнд дуулгавартай байснаар ирэх адислалыг авсан [хүмүүст] бат бөх зогсох газар байдаг төдийгүй тэдний хөл хөдөлшгүй хадан дээр байдаг. (Gospel Truth: Discourses and Writings of George Q. Cannon, sel. Jerreld L. Newquist [1987], 116)

Амюлекээс юуг сурч мэдэж болох вэ?

Ерөнхийлөгч Дийтр Ф.Угдорф Тэргүүн зөвлөлд үйлчилж байхдаа ийн заажээ.

Магадгүй, та Амюлектэй адил Их Эзэн “[таныг] олон удаа дуудахыг” зүрх сэтгэлдээ мэдэрч байсан ч “сонсоогүй” байж болох юм.

Гэсэн хэдий ч Их Эзэн Амюлекээс олж харсан зүйлийг буюу хийх чухал ажилтай, хуваалцах гэрчлэлтэй, зоригтой үйлчлэгчийн чадвар танд байгааг олж хардаг. Таныг өөр ямар ч хүн тан шиг хийж чадахгүй тийм үйлчлэл хүлээж байна. Их Эзэн танд бусдыг адисалж, дэмжих бурханлаг боломж олгодог санваарыг итгэл хүлээлгэн өгсөн. Зүрх сэтгэлээ сонсож, Сүнсний өдөөлтийг дага. (Дийтр Ф.Угдорф, “Алма, Амюлек хоёроос суралц,” 2016 оны 10-р сарын Ерөнхий чуулган, 61)

Нэмэлт суралцах үйл ажиллагаа

Тэнгэрлэг Эцэгийн төлөвлөгөөн дэх сонгох эрх

Алма Мелек болон Аммонайха дахь хүмүүст сайн мэдээг заасан ба үр дүн нь харилцан адилгүй байв. Суралцагчид Алма 8:3–5, 8–13 дахь Алмагийн захиастай холбоотой хариу үйлдлийг харьцуулж, Тэнгэрлэг Эцэг сонгох эрхийг яагаад эрхэмлэдэг тухай ярилцаж болно. Ангиараа Тэнгэрлэг Эцэгт ойртоход туслах өдөр тутмын сонголтууд, Түүнээс холдуулах сонголтуудын жагсаалтыг гаргаж болно. Тэднийг Их Эзэнд ойртохын тулд сонгох эрхээ ашиглахад урь.

Бусдыг Есүс Христэд ирэхийг урих

Алма, Амюлек хоёр бол бусдыг Есүс Христэд ирэхийг урихдаа тууштай, тэвчээртэй байсан шавь нарын сайн жишээ юм. Суралцагчдыг Алма 8:10–21, 27–32-ыг уншаад, Алма Амюлек хоёр тэвчээр болон итгэлээ хэрхэн харуулсныг олж мэдэхэд урь. Суралцагчид бусдад Есүс Христэд ирэхэд нь туслахыг эрэлхийлэхдээ тууштай, тэвчээртэй байж болох арга замуудаасаа хуваалцаж болно. Хэрэв хэн нэгэн тэдний урилгыг хүлээн авахаас татгалзвал тэд хэрхэн хайраар, тэвчээртэйгээр хариулахаа төлөвлөж эсвэл дүрд тоглож болно.

Алма сэтгэлээр унав.

Алмаг сэтгэлээр унасан үед нь Их Эзэн хэрхэн тусалсан талаар бодоход суралцагчдыг урь (Алма 8:14-ийг үзнэ үү). Их Эзэн Алмагийн санаа зовоосон асуудалд хэрхэн хариулсныг (15-р шүлэг-ийг үзнэ үү) болон дараа нь Алма юу хийснийг харах нь тустай байж болох юм (18-р шүлэг-ийг үзнэ үү). Суралцагчдыг сэтгэлээр унасан байж болзошгүй танил нэгэндээ урам зориг өгөх тэмдэглэл бичихэд урь.

Тэнгэрлэг Эцэг биднийг орхидоггүй

Суралцагчдыг дараах түүхүүдийн заримыг судлахад урих талаар бодож, Их Эзэн хүмүүст туслахын тулд үргэлж тусалдаг жишээг олж мэд.

Мелекийн хүмүүс (Алма 8:3–5)

Аммонайхагийн хүмүүс (Алма 8:8–10, 13, 16, 18, 29)

Алма (Алма 8:14–15, 30–32)

Aмюлек (Алма 10:4–7, 11, 30–32)

Суралцагчид дараа нь Их Эзэн тэдэнд хэрхэн тусалсныг эсвэл тусламжийн мутраа сунгаж байгааг бодож болно.