1 Мөн эдүгээ улиран тохиох дор Алма бичигдэж чадахааргүй олон зүйлийг Гидеоны хүмүүст зааж, тэрээр Зарахемла нутагт урьд нь хийснийхээ адилаар сүмийн журмыг тогтоосны дараа Гидеоны нутгаас эргэж ирэв, тийм ээ, тэрээр өөрийн гүйцэтгэсэн хөдөлмөрөөсөө амрахаар Зарахемла дахь гэртээ эргэж ирэв.

2 Мөн тийн Нифайн ард түмний дээрх шүүгчдийн засаглалын ес дэх жил төгсөв.

3 Мөнхүү улиран тохиох дор Нифайн ард түмний дээрх шүүгчдийн засаглалын аравдугаар жилийн эхэнд, Алма тэндээс одож мөн баруун зүгт аглаг буйдын захад байдаг, Сидон голын баруун тал дахь Мелек нутаг тийш аянаа хөөв.

4 Мөн тэрээр өөрийн дуудагдсан байсан Бурханы тэр ариун жаягийн дагуу Мелек нутаг дахь хүмүүст зааж эхлэв; мөн тэрээр Мелекийн бүх нутаг даяар хүмүүст зааж эхлэв.

5 Мөнхүү улиран тохиох дор аглаг буйдтай хиллэх нутгийн бүх хязгаараас хүмүүс түүн дээр ирэв. Мөн тэд бүх нутаг даяар баптисм хүртэв;

6 Түүнчлэн тэрээр Мелек дэх ажлаа дуусгаад тэндээс одож, мөн Мелек нутгаас умардыг зорин гурав хоног аялав; мөн тэр Аммонайха гэж нэрлэгдсэн хотод ирэв.

7 Эдүгээ өөрсдийн нутаг, өөрсдийн хот, тосгод, тийм ээ, бүх жижиг тосгоноо ч анх тэдгээрийг эзэмшиж асан түүний нэрээр нэрлэх нь Нифайн ард түмний заншил байв; мөн Аммонайха нутагт ч тийм байв.

8 Мөнхүү улиран тохиох дор Алма Аммонайха хотод ирээд, тэрээр тэдэнд Бурханы үгийг номлож эхлэв.

9 Эдүгээ Аммонайха хотын хүмүүсийн зүрх сэтгэлд Сатан агуу зайг эзэлсэн байв; тиймийн тул тэд Алмагийн үгсийг анхааран сонссон нь үгүй.

10 Гэсэн хэдий ч Бурхан Сүнсээ уг хотод байсан хүмүүсийн дээр юүлээсэй хэмээн; тэрээр түүнчлэн тэд наманчлалын төлөө баптисм хүртэж болохыг нь зөвшөөрөөсэй хэмээн Алма бодгальдаа ихэд зүдэрч, хүчит залбирлаар Бурханаас тааллыг авахаар шаргуу гуйсан болой.

11 Гэсэн хэдий ч, тэд зүрх сэтгэлээ хатууруулж, түүнд хэлсэн нь: Болгоогтун, чи бол Алма гэдгийг бид мэднэ; мөн чи бол уламжлалынхаа дагуу уг нутгийн олон хэсэгт өөрийн байгуулсан сүмийн дээрх дээд прист гэдгийг бид мэднэ; мөн бид танай сүмийнх бус, мөн бид тийм мунхаг уламжлалд итгэдэггүй.

12 Мөн эдүгээ бид танай сүмийнх биш учраас чи бидний дээр хүчгүйг чинь бид мэднэ; мөн чи шүүгчийн суудлыг Нифайхад дамжуулан өгсөн; тиймийн тул чи бидний дээрх ерөнхий шүүгч биш.

13 Эдүгээ хүмүүс ийн хэлж, мөн түүний бүх үгийг сөрж, түүнийг доромжлон, түүний дээр нулимж, мөн түүнийг хотоосоо зайлуулсны дараа, тэрээр тэндээс одож мөн Аарон гэж нэрлэгдсэн хотын зүг аянаа хөөв.

14 Мөнхүү улиран тохиох дор тэрээр Аммонайха хотод байсан хүмүүсийн ёс бусын учир их шаналал мөн сэтгэлийн тарчлалыг туулан, тэрээр харуусалдаа дарагдан цааш аялж явтал, улиран тохиох дор Алма тийн харуусалд дарагдан байтал, болгоогтун Их Эзэний тэнгэр элч түүнд үзэгдэж, өгүүлсэн нь:

15 Адислагдсан болой та, Алма; тиймийн тул, тэргүүнээ өргө мөн баясагтун, учир нь танд баясах агуу шалтгаан буй; учир нь та Бурханаас анхныхаа захиасыг хүлээн авсан тэр цагаас хойш түүний зарлигуудыг сахихад итгэлтэй байсан болой. Болгоогтун, уг захиасыг танд хүргэсэн нь би байсан билээ.

16 Мөн болгоогтун, таныг Аммонайха хотод эргэн очиж, мөн уг хотын хүмүүст дахин номло хэмээн танд зарлиглахаар илгээгдсэн болой би; тийм ээ, тэдэнд номлогтун. Тийм ээ, тэд наманчлахгүй аваас Их Эзэн Бурхан тэднийг устгах болно гэдгийг тэдэнд хэлэгтүн.

17 Учир нь болгоогтун, тэд таны хүмүүсийн эрх чөлөөг устгаж болохын тулд тэд энэ цагт бодолхийлнэ, (учир нь Их Эзэн ийн хэлнэм) энэ нь өөрийнхөө хүмүүст өгсөн түүний тогтоолууд, шүүлтүүд, мөн зарлигуудын эсрэг болой.

18 Эдүгээ улиран тохиох дор Алма Их Эзэний тэнгэр элчээс захиасыг хүлээн авсныхаа дараа тэрээр Аммонайха нутгийн зүг даруй буцаж очив. Мөн тэрээр уг хотод өөр нэг замаар, тийм ээ, Аммонайха хотын өмнөдөд байх замаар нэвтэрсэн бөлгөө.

19 Мөн тэрээр хотод орохдоо өлсөж байв, мөн тэрээр нэгэн эрд хэлэв: Бурханы даруухан үйлчлэгчид та идэх юм өгнө үү?

20 Мөн сайхь эр түүнд хэлэв: Би бол Нифай үндэстэн, мөн та бол Бурханы ариун бошиглогч гэдгийг би мэднэ, учир нь тэнгэр элчийн: Та хүлээн авах болно хэмээн үзэгдлээр хэлсэн тэр хүн бол та болой. Тиймийн тул, надтай хамт гэрт минь оч, мөн би тантай хүнсээ хуваая; мөн та надад болон миний гэрийнхэнд адислал байх болно гэдгийг би мэднэ.

21 Мөнхүү улиран тохиох дор мөнөөх хүн түүнийг гэртээ хүлээн авав; мөн тэр хүн Амюлек хэмээх нэртэй байв; мөн тэрээр талх, мах авчирч мөн Алмагийн өмнө тавив.

22 Мөнхүү улиран тохиох дор Алма талхыг идэж цадав; мөн тэрээр Амюлекийг мөн түүний гэрийнхнийг адислав, мөн тэрээр Бурханд талархал илэрхийлэв.

23 Мөн тэр идэж мөн цадсаныхаа дараа Амюлект хэлсэн нь: Би бол Алма, мөн энэ нутаг даяарх Бурханы сүмийн дээрх дээд прист.

24 Мөн болгоогтун, би илчлэлийн болон бошиглолын суу билгийн дагуу, Бурханы үгийг энэ бүх хүний дунд номлохоор дуудагдсан; мөн би энэ нутагт байсан мөн тэд намайг хүлээж аваагүй, харин тэд намайг хөөсөн ба би үүрд энэ нутагт араа харуулах гэж байв.

25 Гэвч болгоогтун, би дахин эргэж мөн энэ хүмүүст бошиглох ёстой хэмээн, тийм ээ, мөн тэдний алдсуудын талаар тэдний эсрэг гэрчлэхээр зарлигдуулсан билээ.

26 Мөн эдүгээ, Амюлек, та намайг хооллож мөн гэртээ оруулсан учир адислагдсан билээ та; учир нь би олон хоног мацаг барьснаас өлссөн байв.

27 Мөн Алма хүмүүст номлож эхлэхийн өмнө тэрээр олон хоног Амюлектэй үлдэв.

28 Мөнхүү улиран тохиох дор хүмүүс алдсууддаа улам бүр лавширч байв.

29 Мөн үг Алмад ирж хэлрүүн: Явагтун; мөн түүнчлэн миний зарц Амюлект хэл, явж мөн энэ хүмүүст ийн бошиглогтун, хэлрүүн—Наманчлагтун та нар, учир нь Их Эзэн ийн хэлнэ, та нар наманчлахгүй аваас би энэ хүмүүст уур хилэндээ зочлох болно; тийм ээ, мөн би догшин хилэнгээ холдуулах нь үгүй.

30 Мөн Алма, мөн түүнчлэн Амюлек Бурханы үгсийг тэдэнд тунхаглахаар хүмүүсийн дунд явав; мөн тэд Ариун Сүнсээр дүүргэгдсэн байв.

31 Мөн тэдэнд хүч өгөгдсөн байв, үүний хэрээр тэд гянданд хоригдох нь боломжгүй болсон аж; бас хэн ч тэднийг алах боломжгүй байсан аж; гэсэн хэдий ч тэд хүлэгдэж мөн шоронд хаягдах хүртлээ өөрсдийн хүчийг хэрэглэсэнгүй. Эдүгээ, энэ нь Их Эзэн өөрийн хүчийг тэднээр үзүүлж болохын тулд хийгдсэн бөлгөө.

32 Мөнхүү улиран тохиох дор тэд явж мөн Их Эзэний тэдэнд өгсөн тэрхүү сүнс болон хүчний дагуу хүмүүст номлож мөн бошиглож эхлэв.