1 Мөнхүү улиран тохиох дор дайны зэвсэгт хөнөөгдөөгүй тэр нифайчууд, хөнөөгдсөн тэднийг оршуулсны дараа—эдүгээ алагдагсдын тоо агуу олон байсан учир тэдний тоо тоологдоогүй байв—тэд өөрсдийн амь үрэгдэгчдийг оршуулж дууссаны дараа, тэд бүгд нутагтаа, мөн гэртээ, эхнэр, хүүхдүүддээ эргэж очицгоов.

2 Эдүгээ олон эмэгтэйчүүд мөн хүүхдүүд, мөн түүнчлэн тэдний бог болон бод малаас олон нь илдэнд алагдсан байв; мөн түүнчлэн тэдний үр тарианы талбайгаас олон нь устгагдсан байв, учир нь тэд олон хүний хөл доор гишгэгдсэн байлаа.

3 Мөн эдүгээ Сидон голын эрэг дээр алагдсан леменчүүд болон амлисайчууд бүгд Сидоны усанд хаягдав; мөн болгоогтун тэдний яс тэнгисийн гүнд буй, мөн тэдгээр нь олон болой.

4 Мөн амлисайчууд нифайчуудаас ялгагддаг байв, учир нь тэд леменчүүдийн маягаар духан дээрээ улаан тэмдэг тавьсан байв; гэсэн хэдий ч тэд леменчүүдийн адил толгойн үсээ хуссан нь үгүй.

5 Эдүгээ леменчүүд толгойн үсээ хуссан байв; мөн тэдний хэвлийн тус бүсэлсэн арьс, мөн түүнчлэн тэдний зүүсэн хуяг, мөн тэдний нум, сумнууд, мөн тэдний чулуу, дүүгүүрүүд гэхчлэнгээс бусдаар бол тэд нүцгэн байв.

6 Мөн тэдний эцэг өвгөд нь өөрсдийн дүү нар болох, шударга бөгөөд ариун хүмүүс асан Нифай, Иаков, Иосеф мөн Сэмийн эсрэг эсэргүүцэж мөн зөрчсөний улмаас тэдэнд ирсэн зүхэл болох, тэдний дээр тавигдсан тэмдгийн дагуу леменчүүдийн арьс бараан байв.

7 Мөн ах нар нь дүү нараа устгахыг эрэлхийлсэн буюу, тиймийн тул тэд зүхэгдсэн бөлгөө; мөн Их Эзэн Бурхан тэдний дээр, тийм ээ, Лемен болон Лемүел, мөн түүнчлэн Ишмэилийн хөвгүүд, мөн Ишмэил үндэстний эмэгтэйчүүдийн дээр тэмдэг тавьжээ.

8 Мөн тэдний үр удам дүү нарынх нь үр удмаас ялгагдаж болохын тулд энэ нь хийгдсэн ажгуу, тэгснээр Их Эзэн Бурхан өөрийн хүмүүсийг хадгалан үлдээж болох байв, тэгснээр тэд өөрсдийг нь устгалд хүргэх зөв бус уламжлалуудад холилдохгүй мөн итгэхгүй байж болох байв.

9 Мөнхүү улиран тохиох дор өөрийн үр удмыг леменчүүдийнхтэй холилдуулсан хэн боловч үр удмынхаа дээр нэгэн адил зүхлийг авчирсан болой.

10 Тиймийн тул, өөрийгөө леменчүүдээр удирдуулахыг зөвшөөрсөн хэн боловч тэр овгийн дор нэрлэгдэж, мөн түүний дээр тэмдэг тавигддаг байв.

11 Мөнхүү улиран тохиох дор леменчүүдийн уламжлалд үл итгэн, харин Иерусалим нутгаас авчрагдсан тэдгээр цэдэгт мөн түүнчлэн эцэг өвгөдийнхөө зөв болох тэрхүү уламжлалд итгэсэн, Бурханы зарлигуудад итгэж мөн тэдгээрийг дагасан хэн боловч, тэр цагаас хойш нифайчууд буюу Нифайн хүмүүс хэмээн нэрлэгдсэн бөлгөө—

12 Мөн өөрсдийн ард түмний, мөн түүнчлэн леменчүүдийн ард түмний үнэн болох тэрхүү цэдгүүдийг хадгалсан нь тэд болой.

13 Эдүгээ бид амлисайчуудын тухай сэдэвтээ эргэж оръё, учир нь тэд түүнчлэн дээрээ тэмдэгтэй байв; тийм ээ, тэд өөрсдийн дээр уг тэмдгийг, тийм ээ, бүр духан дээрээ улаан тэмдэг тавьсан аж.

14 Тийн Бурханы үг биелэгдсэн ажээ, учир нь Нифайд хэлсэн түүний үгс нь эдгээр болой: Болгоогтун, леменчүүдийг би зүхсэн, мөн тэд өөрсдийнхөө ёс бусыг наманчилж мөн тэдний дээр би нигүүлслийг үзүүлж болохын тул надад эргээд хандахаас бусдаар бол, энэ цагаас хойш мөн үүрд, тэд болон тэдний үр удам чамаас мөн чиний үр удмаас ялгагдаж болохын тулд тэдэн дээр би тэмдэг тавих болно.

15 Мөн үүнчлэн: Өөрийн үр удмыг ах нартай чинь холилдуулах түүний дээр, тэд түүнчлэн зүхэгдэж болохын тулд би тэмдэг тавих болно.

16 Мөн үүнчлэн: Би чиний мөн чиний үр удмын эсрэг тулалдах тэдэн дээр тэмдэг тавих болно.

17 Мөн үүнчлэн, чамаас салж одох тэрбээр чиний үр удам гэж цаашид нэрлэгдэхгүйг би хэлнэ; мөн би чамайг, мөн чиний үр удам гэж нэрлэгдэх хэнийг боловч, цаашид мөн үүрд адислах болно; мөн эдгээр нь Нифай мөн түүний үр удамд өгсөн Их Эзэний амлалтууд байв.

18 Эдүгээ амлисайчууд духан дээрээ тэмдэг тавьж эхлэхдээ Бурханы үгийг биелүүлж байснаа мэдсэнгүй; гэхдээ тэд Бурханы эсрэг илэрхий эсэргүүцэлд гарч ирсэн байв; тиймийн тул зүхэл тэдний дээр унах нь зайлшгүй байсан бөлгөө.

19 Эдүгээ тэд өөрсдийнхөө дээр зүхлийг авчирсныг та нар ойлгоосой хэмээнэ би; мөн зүхэгдсэн хүн бүр өөрийн буруутгалыг өөр дээрээ тэрчлэн авчирдаг.

20 Эдүгээ улиран тохиох дор Зарахемла нутагт леменчүүд болон амлисайчуудтай тулалдсан тэр тулаанаас тийм ч олон бус өдрийн дараа, анхны их цэрэг нь амлисайчуудын цэрэгтэй тулгарсан мөнхүү тэр газарт, леменчүүдийн өөр нэг их цэрэг Нифайн хүмүүсийн дээр ирэв.

21 Мөнхүү улиран тохиох дор тэднийг нутгаасаа хөөж гаргахын тулд их цэрэг илгээгдэв.

22 Эдүгээ Алма шархандаа шаналж байсан учир энэ удаа леменчүүдийн эсрэг тулалдаанд өөрөө явсангүй;

23 Гэвч тэр олон тооны их цэргийг тэдний эсрэг илгээв; мөн тэд өгсөн одож мөн леменчүүдээс олныг нь алж, мөн тэднээс үлдсэнийг нь нутгийнхаа хилийг давуулан хөөв.

24 Мөн тэгээд тэд дахин эргэж ирээд мөн уг нутагт амар амгаланг тогтоож эхлэв, дайснууд нь тэднийг хэсэг хугацаагаар дахин түйвүүлээгүй болой.

25 Эдүгээ эдгээр бүх зүйл тохиов, тийм ээ, эдгээр бүх дайн мөн зөрчилдөөн шүүгчдийн засаглалын тав дахь онд эхэлж мөн төгсөв.

26 Мөн тэд өөрсдийн үйлүүдийн дагуу, тэдгээр нь сайн ч бай, эсвээс тэдгээр нь муу байсан ч бай, шагналуудаа хурааж болохын тулд, тэд дагахаар шийдсэн, сайн эсвээс муу сүнс байсан ч бай, тэрхүү сүнснийхээ дагуу, мөнхийн аз жаргалыг эсвээс мөнхийн зовлонг хураан авахаар, нэгэн жилд мянга мянган мөн хэдэн арван мянган бодгаль мөнхийн оронд илгээгдэв.

27 Учир нь хүн бүр дагахаар сонгосон түүнээсээ шангаа хүлээж авдаг, мөн энэ нь бошиглолын суу билгийн үгсийн дагуу буюу; тиймийн тул энэ нь үнэний дагуу байг. Мөн тийн шүүгчдийн засаглалын тав дахь он төгсөв.