Përsëritja 11 e Zotërimit Doktrinor

Mëso Përmendsh dhe Kupto

Mësimi përmendsh i fragmenteve të zotërimit doktrinor dhe kuptueshmëria e doktrinës që ato japin mësim, mund ta ftojnë Frymën e Shenjtë në jetën tënde dhe të të ndihmojnë të bëhesh më i ngjashëm me Jezu Krishtin. Ky mësim ka për qëllim të të ndihmojë të mësosh përmendsh frazat kyç të shkrimit të shenjtë nga 12 fragmentet e para të zotërimit doktrinor të Librit të Mormonit dhe të kërkosh kuptueshmëri të mëtejshme duke bërë pyetje të frymëzuara dhe dhënë përgjigje për to.

Ndihmojini nxënësit të zhvillojnë aftësitë e studimit të shkrimeve të shenjta. Nxitini nxënësit të bëjnë pyetje në klasë dhe gjatë studimit të tyre vetjak. Të mësuarit si të bëjnë pyetje dhe të kërkojnë përgjigje nga shkrimet e shenjta mund ta përmirësojë përvojën e studimit të nxënësit. Ndihmojini nxënësit të kuptojnë se shkrimet e shenjta gjejnë zbatim te pyetjet dhe sfidat me të cilat ata po përballen aktualisht, qofshin të mëdha apo të vogla.

Përgatitja e nxënësve: Ftojini nxënësit të përzgjedhin nga 12 fragmentet e para të zotërimit doktrinor njërin rreth të cilit ata do të donin të mësonin më shumë. Nxitini ata të vijnë në orën mësimore të përgatitur për të treguar fragmentin që zgjodhën, dhe të paktën një pyetje që e ndiejnë se mund t’i ndihmojë të mësojnë më shumë rreth atij fragmenti.

Veprimtari të Mundshme të të Mësuarit

Në vend të këtij mësimi përsëritjeje mund të nevojitet të jepet një mësim për fragmentin e zotërimit doktrinor. Referojuni udhëzuesit të ritmit mësimor të ofruar nga drejtori apo bashkërenduesi zonal ose rajonal për t’u siguruar që të jepet çdo mësim për fragmentet e zotërimit doktrinor gjatë zhvillimit të seminarit.

Mësoji përmendsh referencat dhe frazat kyç të shkrimeve të shenjta

Merreni parasysh t’ua paraqitni ose jepni nxënësve fletushkën në vijim dhe t’i ftoni ata të shqyrtojnë referencat dhe frazat kyç të shkrimit të shenjtë. Pas pak minutash, shihni se sa mirë nxënësit i kanë mësuar përmendsh referencat duke lexuar një frazë kyç të shkrimit të shenjtë dhe duke i vënë ta gjejnë fragmentin në shkrimet e tyre të shenjta. Përsëriteni këtë proces me disa referenca të ndryshme. Më pas, ju mund ta lexoni me zë të lartë një nga frazat kyç të shkrimit të shenjtë, duke ndaluar me raste për t’i lejuar nxënësit të shkruajnë në ditarin e tyre të studimit fjalën ose fjalët e radhës. Përsëriteni këtë proces disa herë duke përdorur fraza kyç të ndryshme të shkrimit të shenjtë. Vërini nxënësit të mbajnë shënim se cilat fragmente të zotërimit doktrinor dëshirojnë t’i shqyrtojnë më shumë.

Përdore tabelën vijuese për të shqyrtuar 12 fragmentet e para të zotërimit doktrinor në Librin e Mormonit. Zgjidh dy deri në tri fraza kyç të shkrimit të shenjtë që nuk i ke mësuar ende përmendsh. Në një copë letër ose në ditarin tënd të studimit, shkruaje referencën e shkrimit të shenjtë dhe frazën kyç të shkrimit të shenjtë ndërkohë që i thua fjalët me zë të lartë. Përsërite këtë proces disa herë derisa të mund ta thuash përmendsh të gjithë frazën. Më pas kalo në fragmentin e radhës.

12 Fragmentet e Para dhe Frazat Kyç të Zotërimit Doktrinor

Referenca e Shkrimit të Shenjtë	Fraza Kyç e Shkrimit të Shenjtë
Referenca e Shkrimit të Shenjtë 1 Nefi 3:7	Fraza Kyç e Shkrimit të Shenjtë “Unë do të shkoj dhe do të bëj gjërat që Zoti ka urdhëruar.”
Referenca e Shkrimit të Shenjtë 2 Nefi 2:25	Fraza Kyç e Shkrimit të Shenjtë “Adami ra që njerëzit të mund të jenë; dhe njerëzit janë, që ata të mund të kenë gëzim.”
Referenca e Shkrimit të Shenjtë 2 Nefi 2:27	Fraza Kyç e Shkrimit të Shenjtë “Ata janë të lirë të zgjedhin lirinë dhe jetën e përjetshme … ose … robërinë dhe vdekjen.”
Referenca e Shkrimit të Shenjtë 2 Nefi 26:33	Fraza Kyç e Shkrimit të Shenjtë “Të gjithë janë njësoj para Perëndisë.”
Referenca e Shkrimit të Shenjtë 2 Nefi 28:30	Fraza Kyç e Shkrimit të Shenjtë Perëndia “do t’u jap[ë] fëmijëve të njerëzve rresht pas rreshti, parim pas parimi”.
Referenca e Shkrimit të Shenjtë 2 Nefi 32:3	Fraza Kyç e Shkrimit të Shenjtë “Ushqehuni me bollëk me fjalët e Krishtit; pasi, vini re, fjalët e Krishtit do t’ju tregojnë të gjitha gjërat që ju duhet të bëni.”
Referenca e Shkrimit të Shenjtë 2 Nefi 32:8–9	Fraza Kyç e Shkrimit të Shenjtë “Ju duhet të luteni gjithmonë.”
Referenca e Shkrimit të Shenjtë Mosia 2:17	Fraza Kyç e Shkrimit të Shenjtë “Kur jeni në shërbimin e bashkëqenieve tuaja, ju jeni vetëm në shërbimin e Perëndisë tuaj.”
Referenca e Shkrimit të Shenjtë Mosia 2:41	Fraza Kyç e Shkrimit të Shenjtë “At[a] që zbatojnë urdhërimet e Perëndisë … janë të bekuar në të gjitha gjërat.”
Referenca e Shkrimit të Shenjtë Mosia 3:19	Fraza Kyç e Shkrimit të Shenjtë “Zhv[ishe] njeriun e natyrshëm dhe … bëh[u] një shenjtor nëpërmjet shlyerjes së Krishtit Zot.”
Referenca e Shkrimit të Shenjtë Mosia 4:9	Fraza Kyç e Shkrimit të Shenjtë “Besoni në Perëndinë; … besoni se ai ka të gjithë diturinë.”
Referenca e Shkrimit të Shenjtë Mosia 18:8–10	Fraza Kyç e Shkrimit të Shenjtë “Pagëz[ohuni] në emrin e Zotit, si një dëshmi … që ju keni hyrë në një besëlidhje me të.”

Bërja e pyetjeve të frymëzuara

Pyetjet e frymëzuara janë një pjesë thelbësore e procesit të të mësuarit. Gjatë shërbesës së Tij në vdekshmëri, Shpëtimtari bëri shpesh pyetje që i ftonin nxënësit të mendonin, ndienin dhe vepronin sipas të vërtetave që Ai dha mësim (shih te Mateu 16:13–16; Gjoni 6:66–69). Mbase e ke vënë re një prind, mësues ose udhëheqës të Kishës të bëjë pyetje që të ndihmuan ta kuptosh ungjillin më mirë ose ta lidhësh atë që po mëson me jetën tënde. Bërja e pyetjeve të frymëzuara dhe dhënia e përgjigjeve për to mund ta bëjnë procesin e të mësuarit një përvojë më përfshirëse dhe domethënëse për ty.

Merreni parasysh t’i renditni tri kategoritë vijuese të pyetjeve në tabelë. Për t’i përgatitur nxënësit për veprimtarinë, përzgjidhni një nga 12 fragmentet e para të zotërimit doktrinor dhe formuloni një pyetje nga ai fragment për secilën kategori. Ju mund t’i ftoni nxënësit edhe të sugjerojnë pyetje për secilën kategori. Keni të dhënë shembuj pyetjesh duke përdorur vargjet 2 Nefi 32:8–9.

Ka shumë lloje të ndryshme pyetjesh. Sot ti do të kesh mundësinë të ushtrosh bërjen e pyetjeve të frymëzuara dhe dhënien e përgjigjeve për to për të të ndihmuar t’i kuptosh fragmentet e zotërimit doktrinor.

Sa vijojnë janë shembuj të llojeve të ndryshme të pyetjeve që mund të përdoren gjatë studimit të shkrimeve të shenjta. Pyetjet shembull kanë lidhje me të vërtetat e dhëna mësim në vargjet 2 Nefi 32:8–9.

Pyetje për të të ndihmuar të kuptosh kontekstin e shkrimeve të shenjta

• Kush po flet te 2 Nefi 32:8–9?

• Kujt po i drejtohet ai apo ajo? Përse?

Pyetje për të të ndihmuar të kuptosh përmbajtjen ose kuptimin e shkrimeve të shenjta

Këto pyetje mund të na ndihmojnë të përcaktojmë doktrinën dhe parimet.

• Çfarë synonte autori që të mësojmë ne?

• Çfarë mendon se do të thotë “të luteni gjithmonë dhe mos u jepni”? (2 Nefi 32:9.)

Pyetje për të të ndihmuar të kuptosh doktrinën dhe parimet në shkrimet e shenjta

• Si mendon se të luturit gjithmonë mund të ndikojë në marrëdhënien tonë me Atin Qiellor?

• Çfarë mund të na ndihmojë të kujtojmë të lutemi gjithmonë, edhe kur nuk e ndiejmë që të lutemi?

Pasi t’i bëni disa pyetje shembull me nxënësit, merreni parasysh t’i ndani ata në dyshe ose në grupe të vogla për veprimtarinë vijuese:

Në grupet e tyre, vërini nxënësit të zgjedhin njërin nga 12 fragmentet e para të zotërimit doktrinor dhe ta lexojnë të gjithë fragmentin së bashku. Më pas, ata mund të formulojnë të paktën një pyetje për secilën nga tri kategoritë në tabelë. Kur nxënësit të mbarojnë së formuluari tri pyetjet e tyre, vërini ata të kombinohen me një dyshe ose grup tjetër. Ftojeni dyshen ose grupin e parë të japë fragmentin e zgjedhur dhe pyetjet e tij dhe ftojeni dyshen ose grupin e dytë t’i përgjigjet secilës pyetje. Më pas, kërkojuni nxënësve t’i ndërrojnë rolet.

Nëse koha e lejon, përsëriteni veprimtarinë me secilin grup që zgjedh një fragment të ndryshëm nga shkrimi i shenjtë.

Nxitini nxënësit ta përdorin aftësinë e bërjes së pyetjeve gjatë studimit të tyre vetjak dhe në orën e mësimit.

Zgjidh një nga fragmentet e zotërimit doktrinor ndërmjet atij te 1 Nefi 3:7 dhe Mosia 18:8–10. Shkruaj tri pyetje – një për secilën kategori më lart – që mund ta bësh rreth fragmentit të zotërimit doktrinor. Referoju shembujve të mëparshëm nëse të nevojitet ndihmë. Përgjigjju secilës prej pyetjeve që shkrove.

Merre parasysh ta studiosh fragmentin tënd të zgjedhur të zotërimit doktrinor me një prind, motër ose vëlla, apo shok dhe t’u kërkosh atyre t’i përgjigjen pyetjeve të tua.