Alma 17

“Sipas Fjalës dhe Fuqisë së Perëndisë”

Përfytyro sikur po mundohesh t’ia predikosh ungjillin një grupi njerëzish që mund të përshkruhen si të egër, të ngurtësuar dhe mizorë. Kjo është pikërisht ajo që bijtë e Mosias zgjodhën të bënin kur shkuan në tokën e lamanitëve për t’ua predikuar ungjillin. Alma 17 përshkruan ndihmën që Amoni mori nga Perëndia ndërsa filloi shërbesën në mesin e lamanitëve në tokën e Ishmaelit. Ky mësim mund të të ndihmojë ta dallosh ndihmën dhe forcën që Zoti të jep në situatat e vështira me të cilat përballesh.

Ndihmojini nxënësit që të kuptojnë kontekstin dhe përmbajtjen. Konteksti dhe përmbajtja e shkrimeve të shenjta mund të përfshijë ndodhi të shumta rreth njerëzve dhe ngjarjeve të lidhura me to. Ndihmojini nxënësit të kuptojnë dhe bëjnë lidhjet ndërmjet këtyre rrëfimeve, në mënyrë që ta dallojnë më mirë doktrinën, parimet dhe mesazhet e frymëzuara të autorëve.

Përgatitja e nxënësve: Merreni parasysh t’i ftoni nxënësit të vijnë të përgatitur për të treguar dhe diskutuar disa probleme ose sfida tipike me të cilat përballen adoleshentët dhe përse atyre do t’u duhej ndihma dhe forca e Perëndisë në jetën e tyre. Ata mund të mendojnë edhe për raste kur e kanë marrë ndihmën e Perëndisë në jetën e tyre.

Veprimtari të Mundshme të të Mësuarit

Nevoja jonë për ndihmën e Perëndisë

Ndihmojini nxënësit të mendojnë rreth shembujve të rasteve kur adoleshentët do të kishin nevojë për ndihmën ose forcën e Perëndisë në jetën e tyre. Skenarët vijues mund të ndihmojnë me këtë ose nxënësit mund të krijojnë skenarë të ndryshëm.

Lili ka ndier nevojën për t’u penduar dhe për të ndryshuar mënyrën se si ajo e jeton jetën e saj, por gjithçka që ajo është përpjekur ta ndryshojë nuk duket se po bën një ndryshim.

Genti ndihet i frymëzuar të shërbejë në një mision, por prindërit e tij janë të mërzitur për shkak se atyre u duhet ndihma e tij me biznesin e familjes.

• Cilat janë disa mënyra se si Perëndia mund ta ndihmojë Lilin ose Gentin?

• Cilat janë disa mënyra se si ata mund ta kërkojnë ose dallojnë ndihmën e Tij?

Merreni parasysh ta paraqitni paragrafin vijues. Jepuni nxënësve kohën e përshtatshme për të përsiatur dhe shkruar në ditarët e tyre të studimit.

Gjej një çast për të përsiatur dhe shkruar në ditarin tënd të studimit se ku e ndien se ke më shumë nevojë për ndihmën ose forcën e Perëndisë në jetën tënde. Cilat janë disa mënyra se si ti shpreson që Perëndia mund të të ndihmojë? Ndërsa studion tek Alma 17 sot, kërko mënyra se si mund ta dallosh dhe ftosh forcën e Perëndisë në jetën tënde.

Bijtë e Mosias

Shpjegojuni nxënësve se gjatë dy javëve të ardhshme ata do të studiojnë rreth udhëtimit misionar të katër bijve të Mosias për te lamanitët. Për t’i ndihmuar nxënësit të shohin se si ky udhëtim misionar zë vend në kontekstin e përgjithshëm të librit të Almës, merreni parasysh ta përmblidhni paragrafin vijues.

Kapitujt 1–16 tek Alma tregojnë ngjarje në jetën e Almës gjatë 14 viteve të para të mbretërimit të gjykatësve. Tek Alma 17–27, ne mësojmë rreth udhëtimit misionar të bijve të Mosias për te lamanitët gjatë të njëjtës periudhë kohe. Alma 17 fillon me Almën dhe shokët e tij, bijtë e Mosias, që takohen për herë të parë pasi kishin qenë të ndarë për ato 14 vjet (shih tek Alma 17:2–4; 27:16). Emrat e bijve të Mosias ishin Amon, Aaron, Omner dhe Himni.

Merreni parasysh ta ndani klasën në katër grupe. Caktojini secilit grup një nga fragmentet vijuese të shkrimit të shenjtë për ta studiuar. Anëtarët nga secili grup mund t’ia tregojnë më pas pjesës tjetër të klasës atë që gjetën.

Lexoji vargjet vijuese duke kërkuar hollësi të rëndësishme rreth misionit të Amonit, Aaronit, Omnerit dhe Himnit.

• Arsyeja përse ata shkuan: Mosia 28:1–3

• Premtimi që ata morën: Mosia 28:5–7

• Çfarë bënë ata për të qenë mjete në duart e Zotit: Alma 17:2–3, 9–12

• Njerëzit të cilëve ata po u predikonin: Alma 17:13–15

• Çfarë të bie në sy rreth bijve të Mosias nga këto vargje?

• Çfarë prove gjete të ndihmës ose forcës së Perëndisë që vepron në jetën e tyre? Merre parasysh ta shenjosh këtë provë në shkrimet e tua të shenjta.

Amoni dhe mbreti Lamoni

Përpara se këta misionarë të ndaheshin për ta predikuar ungjillin në zona të ndryshme, Amoni u dha mësim dhe i bekoi ata. Më pas, Amoni shkoi në një tokë të quajtur Ishmael. Kur hyri në atë tokë, atë e kapën dhe e sollën përpara mbretit, emri i të cilit ishte Lamoni (shih tek Alma 17:17–20).

Lexo tek Alma 17:21–25, duke kërkuar ofertën që Amoni i bëri mbretit Lamoni. Nëse dëshiron, mund edhe të shohësh materialin filmik [“21 – Amoni i Shërben dhe i Jep Mësim Mbretit Lamoni” pjesën “Amoni Bëhet Shërbëtori i Mbretit Lamoni” nga kodi kohor 2:25 deri në 5:35 në dispozicion në https://www.youtube.com/@kishaejezukrishtiteshenjto9199/videos].

• Në ç’mënyrë fjalët “Unë do të jem shërbëtori yt” (Alma 17:25) që Amoni ia tha mbretit, mund ta kenë lejuar atë të ishte një misionar më i efektshëm?

Ndërkohë që Amoni dhe shërbëtorë të tjerë të mbretit po ruanin grigjat, ata u përballën me një situatë të vështirë.

Mund t’i ftoni disa nxënës të gatshëm të vijnë përpara dhomës për t’i lexuar me radhë vargjet vijuese me zë të lartë ndërkohë që pjesa tjetër e klasës i ndjek në shkrimet e tyre të shenjta.

Lexo tek Alma 17:26–39 dhe kërko se si reagoi Amoni ndaj kësaj situate. Mund të shohësh gjithashtu [“21 – Amoni i Shërben dhe i Jep Mësim Mbretit Lamoni” pjesën “Amoni Mbron Grigjat e Mbretit” nga kodi kohor 5:36 deri në 10:23, në dispozicion në https://www.youtube.com/@kishaejezukrishtiteshenjto9199/videos].

• Në ç’mënyrë mund të lidhet siguria e Amonit në këtë situatë me premtimin që Zoti i bëri babait të Amonit, Mosias, te Mosia 28:7?

• Po të kishe qenë atje, çfarë do të kishe menduar për Amonin?

Lexo tek Alma 18:1–3, duke kërkuar atë që shërbëtorët e tjerë lamanitë i treguan mbretit Lamoni rreth kësaj përvoje.

• Si e përshkruan Amonin shërbëtorët e mbretit?

Edhe pse shërbëtorët e mbretit e patën të vështirë ta përshkruanin arsyen përse Amoni ishte në gjendje t’i ruante grigjat e mbretit në një mënyrë kaq të mrekullueshme, ata e kuptuan se ai kishte qasje te një fuqi që ishte më e madhe nga ajo që mund të kishte një person i vdekshëm.

Nga përvoja e Amonit mund të mësojmë se Zoti ua jep forcën dhe fuqinë e Tij shërbëtorëve të Tij që përpiqen fort të bëjnë vullnetin e Tij.

Afër fundit të misionit të tij 14‑vjeçar, Amoni reflektoi për forcën dhe fuqinë që Perëndia i dha atij gjatë gjithë kohës që u shërbeu lamanitëve.

Lexo tek Alma 26:12, duke kërkuar atë që Amoni tha për burimin e forcës së tij.

Merreni parasysh ta ndani klasën në tri grupe dhe t’i caktoni secilit grup njërën nga pyetjet vijuese për ta diskutuar. Secili grup mund të krijojë një listë të sa më shumë përgjigjeve që mund të mendojë për një ose dy minuta dhe t’ia tregojë përgjigjet e tij klasës.

Përndryshe, ju mund t’i shkruani pyetjet në vende të ndryshme të tabelës. Nxënësit mund të vijnë në tabelë dhe t’i renditin përgjigjet për një ose më shumë nga pyetjet derisa nën çdo pyetje të ketë të shkruara përgjigje të shumta. Përgjigjet e nxënësve mund të diskutohen më pas si klasë.

• Cilët janë disa shembuj të situatave në të cilat ne kemi nevojë për ndihmën ose forcën e Zotit në jetën tonë?

• Cilat janë disa nga mënyrat se si Zoti mund të na bekojë me ndihmën ose forcën e Tij?

• Çfarë mund të bësh për ta ftuar ose për të pasur qasje te ndihma apo forca e Perëndisë në jetën tënde?

Ftojini nxënësit të mendojnë rreth asaj që kanë mësuar për Perëndinë sot, që mund t’i ndihmojë ata në jetën e tyre vetjake. Ftojini ata t’i shënojnë mendimet dhe mbresat e tyre shpirtërore në ditarët e tyre të studimit. Nxitini ata të kërkojnë ndihmë nga Ati Qiellor që të jenë në gjendje t’i përmbushin gjërat që nuk mund t’i bëjnë vetë.

Komente dhe Informacion për Rrethanat

Si mund ta marr fuqinë ose ndihmën që Perëndia mund të më ofrojë?

Presidenti Rasëll M. Nelson tregoi shumë mënyra se si ne mund të kemi qasje te fuqia e Shpëtimtarit në jetën tonë:

“Do të doja të flisja rreth mënyrës se si ne mund ta marrim në jetën tonë fuqinë e Zotit dhe Mësuesit tonë, Jezu Krishtit.

Ne fillojmë duke mësuar rreth Tij. …

Ndërsa shpenzojmë kohë për të mësuar rreth Shpëtimtarit dhe flijimit të Tij shlyes, ne tërhiqemi për të përdorur një tjetër element kyç që të kemi qasje ndaj fuqisë së Tij: ne zgjedhim që të kemi besim në Të dhe ta ndjekim Atë. …

Besimi [te] Jezu Krisht[i] na shtyn të bëjmë gjëra që përndryshe nuk do t’i bënim. Besimi që na nxit të veprojmë, na jep më shumë të drejtë përdorimi të fuqisë së Tij.

Ne e rritim gjithashtu fuqinë e Shpëtimtarit në jetën tonë kur bëjmë besëlidhje të shenjta dhe i mbajmë ato besëlidhje me saktësi. …

Një element tjetër në marrjen e fuqisë së Shpëtimtarit në jetën tonë është që të zgjatemi drejt Atij me besim. Një zgjatje e tillë kërkon përpjekje të zellshme e të përqendruar. …

Kur ju zgjateni për [ta marrë] fuqinë e Zotit në jetën tuaj me të njëjtin intensitet që ka një njeri që po mbytet, kur kapet dhe gulçon për ajër, fuqi nga Jezu Krishti do të jenë tuajat. Kur Shpëtimtari e di se ju me të vërtetë doni të zgjateni drejt Tij – kur Ai mund ta ndiejë se dëshira më e madhe e zemrës suaj është që ta merrni fuqinë e Tij në jetën tuaj – ju do të udhëhiqeni nga Fryma e Shenjtë për të ditur saktësisht atë që duhet të bëni.

Kur ju zgjateni shpirtërisht përtej çdo gjëje që keni bërë ndonjëherë më parë, atëherë fuqia e Tij do të vërshojë brenda jush. …

Ungjilli i Jezu Krishtit është i mbushur me fuqinë e Tij, e cila është në dispozicion për çdo bijë apo bir të Perëndisë që kërkon me zell. Është dëshmia ime se, kur ne e marrim fuqinë e Tij në jetën tonë, si Ai edhe ne do të gëzohemi.” (Rasëll M. Nelson, “Marrja e Fuqisë së Jezu Krishtit në Jetën Tonë”, Liahona, maj 2017, f. 39, 41, 42)

Veprimtari Plotësuese të të Mësuarit

Alma 17:2–4. “Ata ishin dhënë pas lutjeve të shumta dhe agjërimit”

Nxënësit mund të marrin dobi nga një studim më i thellë i vargjeve tek Alma 17:2–4. Pasi t’i lexojnë këto vargje, mund t’i ftoni nxënësit të përcaktojnë parimet që mësojnë prej tyre. Një e vërtetë që nxënësit mund të përcaktojnë është se ndërsa e studiojmë fjalën e Perëndisë, lutemi dhe agjërojmë, ne mund të marrim shpirtin e profecisë dhe të zbulesës dhe të japim mësim me fuqi.

Nëse mësimet nga kjo javë duhet të ndërthuren, mund t’i përdorni këto vargje për të ndihmuar që t’ua paraqitni nxënësve rrëfimet e Amonit që i jep mësim mbretit Lamoni tek Alma 18 dhe Aaronit që i jep mësim atit të Lamonit tek Alma 22. Nxënësit mund t’i studiojnë ato rrëfime dhe të kërkojnë provën që Amoni dhe Aaroni ishin të mbushur me “shpirtin e profecisë dhe shpirtin e zbulesës” dhe të dhënies së mësimit “me fuqinë dhe autoritetin e Perëndisë” (vargu 3).

Premtimet e Zotit

Merreni parasysh t’i ndihmoni nxënësit ta vendosin mirëbesimin e tyre te Perëndia duke u vënë në dukje se si Zoti i përmbushi premtimet e Tij ndaj Mosias dhe bijve të tij. Nxënësit mund të krijojnë në ditarin e tyre të studimit një shënim me titullin “Premtimet e Zotit për Bijtë e Mosias”.

Ndërsa nxënësit studiojnë kapitujt tek Alma 17–27 gjatë ditëve të ardhshme, ata mund të përcaktojnë raste kur Perëndia i përmbushi premtimet e Tij nga Mosia 28:7 dhe Alma 17:11 dhe mund t’i shënojnë këto raste në ditarët e tyre të studimit. Disa shembuj të përmbushjes së këtyre premtimeve përfshijnë vargjet tek Alma 17:34–38; 19:22–23; 20:20–30; 22:22–26; 23:5–6 dhe 26:27–31.

Pasi ta studiojnë kapitullin tek Alma 27, nxënësit mund të diskutojnë se si premtimet e Zotit u përmbushën dhe se si Ai i mban premtimet e Tij ndaj nesh sot.