Marrja e Njohurisë Shpirtërore, Pjesa 4

Gjetja e Përgjigjeve për Pyetjet Shpirtërore

Me raste, ti mund të kesh pyetje shpirtërore ose shqetësime për tema doktrinore, vetjake, shoqërore apo historike. Kur ke pyetje ose shqetësime të tilla, mund të veprosh me besim, t’i shqyrtosh konceptet dhe pyetjet me një këndvështrim të përjetshëm dhe të kërkosh kuptueshmëri të mëtejshme nëpërmjet burimeve të caktuara në mënyrë hyjnore. Ky mësim ka për qëllim të të ndihmojë t’i përsëritësh parimet e marrjes së njohurisë shpirtërore.

Mësimdhënia e parimeve të marrjes së njohurisë shpirtërore. Të mësuarit dhe përsëritja e këtyre parimeve mund t’i ndihmojë nxënësit të përgjigjen kur ngrihen pyetje shpirtërore. Përsëritja e rregullt e tyre do t’i lejojë nxënësit t’i përvetësojnë dhe përdorin më mirë këto parime çdo ditë.

Përgatitja e nxënësve: Nxënësit mund të ftohen të mendojnë për pyetjet shpirtërore që kanë pasur ose kanë aktualisht dhe për atë që kanë bërë për të gjetur përgjigje për pyetjet e tyre.

Veprimtari të Mundshme të të Mësuarit

Sfidat ndaj besimit

Lexoji skenarët vijues. Ose nëse dëshiron, mund të shohësh materialin filmik “Burimet e Caktuara në Mënyrë Hyjnore” nga kodi kohor 2:43 deri në 4:19, në dispozicion në ChurchofJesusChrist.org.

Mund të zgjidhni të përdorni një ose më shumë nga skenarët e sugjeruar ose të krijoni tuajin për t’ia treguar klasës. Merreni parasysh t’i vini nxënësit të zgjedhin një skenar për ta punuar ndërsa mësimi vazhdon ose t’u caktoni skenarë grupeve të vogla dhe t’i vini ata t’i diskutojnë pyetjet gjatë mësimit.

Maria është një e re e cila dëgjoi nga një shoqe diçka për Kishën që e shqetësoi. Ajo ndjeu se ky informacion i ishte mbajtur i fshehur dhe se e kishin gënjyer duke mos ia thënë këto gjëra më parë në jetën e saj. Ajo filloi të fliste me të tjerë që ishin njëlloj të mërzitur, si dhe lexoi komente negative për temën.

Kosta mësoi rreth një teme doktrinore sfiduese në seminar dhe u fut në internet për të mësuar më shumë. Ai pa burime që e kritikonin Kishën në lidhje me këtë temë. Nga kureshtja, ai pa një material filmik që i portretizonte negativisht mësimet e Kishës rreth kësaj teme. Kjo përvojë e bëri atë të dyshonte për vërtetësinë e Kishës për herë të parë në jetën e tij.

• Si do të ndiheshe në këto situata?

• Si mendon se do të përgjigjeshe?

Të kesh pyetje shpirtërore pa përgjigje për temat doktrinore, vetjake, shoqërore ose historike mund të jetë e vështirë. Mendo për pyetje të tilla që mund të kesh dhe merre parasysh t’i shkruash ato për këtë mësim.

Ka gjëra që mund t’i mësosh dhe bësh që mund të të ndihmojnë t’u përgjigjesh pyetjeve ose shqetësimeve me integritet dhe besim. Ndërsa e studion këtë mësim, mendo se si informacioni që mëson mund të të ndihmojë t’u përgjigjesh pyetjeve të tua me besim te Ati Qiellor dhe Jezu Krishti.

Parimet e marrjes së njohurisë shpirtërore

Parimet vijuese mund të të drejtojnë në përpjekjet e tua për të marrë drejtim dhe kuptueshmëri lidhur me pyetjet shpirtërore:

• Vepro me besim.

• Shqyrtoji konceptet dhe pyetjet me një këndvështrim të përjetshëm.

• Kërko informacion të mëtejshëm nëpërmjet burimeve të caktuara në mënyrë hyjnore.

Ju mund të zgjidhni ta përshtatni këtë mësim, në varësi të njohurisë që mund të kenë nxënësit tuaj me parimet e marrjes së njohurisë shpirtërore. Për shembull, nëse keni disa nxënës që kanë njohuri për parimet por të tjerë që nuk kanë, ju mund t’i vini ata që kanë njohuri për parimet t’ia shpjegojnë ato klasës. Nëse të gjithë nxënësit tuaj nuk kanë njohuri për këto parime, do t’ju duhet të merrni më shumë kohë për t’ua paraqitur ato. Mund të referoheni te Pjesa 1, 2 dhe 3 te “Marrja e Njohurisë Shpirtërore” nga fillimi i këtij manuali.

Vepro me besim

Lexoji skenarët vijues. Ose nëse dëshiron, mund të shohësh materialin filmik “Burimet e Caktuara në Mënyrë Hyjnore” nga kodi kohor 4:19 deri në 5:35, në dispozicion në ChurchofJesusChrist.org. Nëse dëshiron, mund edhe të lexosh paragrafët 5–7 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor (2022) përpara se t’i lexosh skenarët ose ta shohësh materialin filmik.

Një mënyrë për t’i shqyrtuar paragrafët e përmendur në fjalinë e mëparshme do të ishte t’i vini nxënësit në grupe me nga katër. Ftojini tre nga anëtarët e grupit t’ia lexojnë grupit njërin nga tre paragrafët me zë të lartë. Më pas, ftojeni anëtarin e grupit të katërt ta përmbledhë atë që tre të tjerët lexuan.

Ju mund t’i vini nxënësit t’u përgjigjen pyetjeve vijuese në bazë të skenarit që zgjodhën më lart.

Pasi e mori vesh atë gjë, Maria u mërzit aq shumë saqë nuk shkoi më në kishë. Ajo u largua nga Kisha për më shumë se një vit. Përfundimisht, një shoqe e ngushtë e pyeti se përse nuk shkonte më. Ajo i tregoi një bisedë të konferencës së përgjithshme që mendoi se do të ishte e dobishme dhe e ftoi atë të lutej për atë që lexoi.

Kosta i mbajti dyshimet dhe shqetësimet e tij për vete, por vazhdoi të merrte pjesë në kishë. Megjithatë, ndjenjat e tij të pështjellimit nuk u larguan. Në një pikë të caktuar, ai pati një ndjenjë shumë të fortë se duhej të fliste me prindërit për shqetësimet e tij. Ishte ndjenja e parë shpirtërore që kishte kuptuar që nga përvoja e tij në internet.

• Në ç’mënyrë i sheh Marien dhe Kostën të veprojnë ose të mos veprojnë me besim?

• Çfarë mund të thoshe që mund t’i nxiste ata të ktheheshin te Perëndia në përgjigje të sfidave të tyre?

• Cilat shkrime të shenjta mund ta ndihmojnë një person të veprojë me besim kur ai ose ajo ka një pyetje që nuk merr përgjigje lehtësisht?

Ju mund të doni t’u jepni nxënësve pak kohë për t’i gjetur shkrimet e shenjta në përgjigje të pyetjes së mëparshme. Këto shkrime të shenjta mund të përfshijnë vargjet te 2 Nefi 31:20 dhe Fjalët e Urta 3:5–6. Pas një kohe të mjaftueshme, ata mund t’ia tregojnë dikujt të ulur afër tyre. Përndryshe, ata mund t’i shkruajnë vargjet që gjetën në tabelë dhe shokët e tjerë të klasës mund t’i lexojnë vargjet të cilat janë të panjohura për ta. Nxënësit mund të tregojnë më pas atë që mësuan nga shkrimet e shenjta që gjetën shokët e tyre të klasës.

Shqyrtoji konceptet dhe pyetjet me një këndvështrim të përjetshëm

Një mënyrë për t’i shqyrtuar paragrafët vijues është t’i vendosni nxënësit në grupe të vogla dhe ta ftoni secilin nxënës të grupit t’i lexojë të tre paragrafët. Më pas, ftojini ata t’ia tregojnë grupit të tyre një rresht që u bëri më shumë përshtypje nga paragrafët.

Shqyrtoji paragrafët 8–10 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor.

• Si do ta ketë ndihmuar Marien ose Kostën shqyrtimi i koncepteve dhe pyetjeve me një këndvështrim të përjetshëm kur iu shfaqën dyshimet e para?

• Si mund t’i ndihmojë ata në situatat e tyre aktuale?

• Çfarë do të doje që Kosta ose Maria të kuptonte rreth Perëndisë dhe planit të Tij në këtë pikë të jetës së vet?

Ky mund të jetë një tjetër rast i mirë për t’i vënë nxënësit të ushtrojnë përdorimin e shkrimeve të shenjta. Mund t’i vini nxënësit të gjejnë shkrime të shenjta që i përkrahin përgjigjet e tyre për pyetjen e mëparshme. Për shembull, nëse një nxënës vë në dukje se Ati Qiellor nuk na jep gjithmonë një përgjigje të plotë njëherazi, ai ose ajo mund të përdorë vargun te 2 Nefi 28:30 për ta përkrahur atë pohim.

Kërko kuptueshmëri të mëtejshme nëpërmjet burimeve të caktuara në mënyrë hyjnore

Shqyrtoji paragrafët 11–12 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor.

Një mënyrë për t’i shqyrtuar paragrafët e përmendur në fjalinë e mëparshme do të ishte të ftoni dy nxënës që t’ia lexojnë klasës paragrafët me zë të lartë. Më pas, ftojeni një vullnetar të shkruajë në tabelë ndërkohë që nxënësit thonë burimet e ndryshme të caktuara në mënyrë hyjnore që i dëgjuan të përmenden.

Lexoji skenarët vijues. Ose nëse dëshiron, mund të shohësh materialin filmik “Burimet e Caktuara në Mënyrë Hyjnore” nga kodi kohor 5:35 deri në 7:01, në dispozicion në ChurchofJesusChrist.org.

Maria vendosi ta lexonte bisedën e konferencës së përgjithshme që i rekomandoi shoqja e saj. Ndërsa lexonte, ajo ndjeu një ndjenjë paqeje dhe kënaqësie që ishte shumë e ndryshme nga ajo që kishte ndier kur lexoi komentin negativ për Kishën. Ajo ndjeu një siguri vetjake se ajo çka po lexonte përmbante mirësi dhe të vërtetë. Me kalimin e kohës, nëpërmjet lutjes dhe studimit besnik, ajo ndjeu se dëshmia e saj po forcohej, megjithëse kishte ende pyetje pa përgjigje.

Kosta foli me prindërit e tij dhe zbuloi se ata ishin shumë të dashur dhe mirëkuptues ndaj shqetësimeve të tij. Ata i paraqitën atij burimin Gospel Topics [Temat e Ungjillit] në programin Gospel Library [Biblioteka e Ungjillit] dhe lexuan së bashku rreth temave që e shqetësonin atë. Ai gjeti ngushëllim në njohurinë se ka përgjigje profetike që ai mund t’i shohë si përgjigje për pyetjet e tij.

• Nga cilat burime mori informacion çdo person në skenarë? Cilat burime ishin të besueshme? Përse po ose përse jo?

  Ndërkohë që ka burime të caktuara në mënyrë hyjnore që janë qartësisht të përcaktuara, të tilla si shkrimet e shenjta, profetët dhe Fryma e Shenjtë, ka burime të tjera të besueshme që na drejtojnë gjithashtu te Jezu Krishti dhe përputhen me mësimet e profetëve bashkëkohorë.

• Ç’ndryshim solli kur Maria dhe Kosta u kthyen te burimet e caktuara në mënyrë hyjnore?

• Për cilat burime të caktuara në mënyrë hyjnore je mirënjohës/e? Përse?

Mendo për atë që mësove sot dhe se si mund të të ndihmojë me pyetjet shpirtërore ose sfidat që ti ose të tjerët kanë. Merre parasysh të shkruash në ditarin tënd të studimit atë që ke mësuar që mund të të ndihmojë të gjesh paqe dhe mirëkuptim. Ftoje ndikimin e Atit Qiellor të të frymëzojë ndërsa reflekton dhe shkruan.

Merreni parasysh të ftoni disa vullnetarë t’ia tregojnë klasës disa nga idetë e tyre. Dëshmoni për të vërtetat që keni diskutuar sot dhe nxitini nxënësit t’i përdorin këto parime kur përballen me pyetje shpirtërore.

Komente dhe Informacion për Rrethanat

Si mund t’i ndihmojë Perëndia ata që e ndiejnë se besimi i tyre tek Ai ose në ungjillin e Tij është tronditur?

Presidenti Diter F. Uhtdorf, dha mësim:

“Mësova në jetën time që nuk na nevojitet të jemi ‘më’ shumë nga ndonjë gjë, që të fillojmë të bëhemi njeriu që Perëndia kishte si qëllim që ne të bëhemi.

Perëndia do t’ju marrë siç jeni pikërisht në këtë çast dhe do të fillojë të punojë me ju. Gjithçka që ju nevojitet, është një zemër e vullnetshme, një dëshirë për të besuar dhe mirëbesim [te] Zoti. …

Teksa ushtroni pak besim dhe filloni ecjen tuaj si një pasues paqedashës i Zotit tonë [Jezu Krishtit], zemra juaj do të ndryshojë [shih te 1 Samuelit 10:9]. E tërë qenia juaj do të mbushet me dritë [shih te Mateu 6:22].

Perëndia do t’ju ndihmojë të bëheni diçka më e madhe nga ajo që e menduat ndonjëherë të mundur. Dhe do të zbuloni se ungjilli i Jezu Krishtit me të vërtetë funksionon në jetën tuaj. Funksionon.” (Diter F. Uhtdorf, “Funksionon në Mënyrë të Mrekullueshme!”, Liahona, nëntor 2015, f. 22, 23)

Veprimtari Plotësuese të të Mësuarit

Përdorimi i historisë së Jakobit dhe Sheremit për të dhënë mësim rreth të qenit i/e përgatitur për t’u përballur me mashtrimin

Mund ta përdorni këtë histori për të treguar nja dy prej parimeve që lidhen me nevojën për marrjen e njohurisë shpirtërore. Nxënësit mund të lexojnë te Jakobi [LiM] 7:1–4, duke kërkuar atë që mësojnë rreth Sheremit. Merreni parasysh t’i renditni ato që gjejnë në tabelë. Përse mund të jenë ato hollësi të rëndësishme për t’u kuptuar? Pasi Jakobi u përball me Sheremin dhe e ngatërroi atë, njerëzit arritën të kuptonin se Sheremi u mashtrua dhe po i mashtronte ata. Lexoni tek Jakobi [LiM] 7:23, duke kërkuar ide rreth bërjes rezistencë të ndikimeve mashtruese. Mund t’i pyesni nxënësit se si shkrimet e shenjta mund t’i kenë ndihmuar ta shmangin mashtrimin.

Të qenit i/e përgatitur para se të dalin sfidat ndaj besimit

Parimet e marrjes së njohurisë shpirtërore janë jo vetëm të dobishme për çastet ose situatat ku besimi sfidohet, por mund të jenë gjithashtu të dobishme në ndërtimin e besimit në çdo kohë. Mund t’i pyesni nxënësit se si parimet e marrjes së njohurisë shpirtërore mund t’i ndihmojnë ata përpara se të vijë ndonjëherë një sfidë ndaj besimit të tyre. Merreni parasysh t’i ftoni nxënësit të lexojnë tek Alma 32:37–38, duke kërkuar mënyrën se si analogjia e farës në këto vargje mund të lidhet me përdorimin e parimeve të marrjes së njohurisë shpirtërore përpara se të dalin sfidat ndaj besimit (nxehtësia e diellit).

Mbani të parat gjërat parësore

Për t’i përballuar sfidat ndaj besimit, ndihmojini nxënësit ta ruajnë përqendrimin në parimet e ungjillit lidhur me kthimin në besim. Citimi vijues mund të ndihmojë për mësimdhënien e kësaj ideje.

Ndërkohë që shërbente si anëtar i Të Shtatëdhjetëve, Plaku Lorens E. Korbrixh, dha idenë vijuese:

“Filloni duke iu përgjigjur pyetjeve parësore. Ka pyetje parësore dhe ka pyetje dytësore. Përgjigjjuni fillimisht pyetjeve parësore. Jo të gjitha pyetjet janë të barabarta dhe jo të gjitha të vërtetat janë të barabarta. Pyetjet parësore janë më të rëndësishmet. Gjithçka tjetër është dytësore. Ka vetëm pak pyetje parësore. Unë do të përmend katër prej tyre.

1. A ka një Perëndi i cili është Ati ynë?

2. A është Jezu Krishti Biri i Perëndisë, Shpëtimtari i botës?

3. A ishte Jozef Smithi një profet?

4. A është Kisha e Jezu Krishtit e Shenjtorëve të Ditëve të Mëvonshme mbretëria e Perëndisë në tokë?

Në dallim, pyetjet dytësore janë pa mbarim. …

Nëse u përgjigjeni pyetjeve parësore, edhe pyetjet dytësore mund të marrin përgjigje” (Lawrence E. Corbridge, “Stand Forever”, [takim shpirtëror në Universitetin “Brigam Jang”, 22 janar 2019], f. 2–3, speeches.byu.edu).