Alma 24

“Ibaon Pa Natin ang mga Ito Nang Malalim sa Lupa“

ibinabaon ng mga Anti-Nephi-Lehi ang kanilang mga espada

Kung minsa’y bumibigay tayo sa parehong kasalanan at nagkakaroon tayo ng masamang gawi o maging ng adiksiyon. Maaaring napakahirap madaig ang mga kasalanang ito. Marami sa mga Anti-Nephi-Lehi ang nagkaroon ng masasamang gawain bago sila nagbalik-loob sa Panginoon. Nang maranasan nila ang kapatawaran ng Tagapagligtas, sila ay nabigyang-inspirasyon na huwag nang bumalik sa mga kasalanang iyon. Ang lesson na ito ay makatutulong sa iyo na madaig ang kasalanan at masasamang gawi sa tulong ng Tagapagligtas.

Tulungan ang mga mag-aaral na maghangad ng pagbabalik-loob. Ang pagbabalik-loob ay higit pa sa pagbabago ng pag-uugali; ito ay pagbabago ng puso na hatid ng Espiritu Santo. Habang natututo at gumagawa ng epektibo at matwid na pagkilos ang mga estudyante, hikayatin silang manalangin sa Ama sa Langit para patnubay sila sa pamamagitan ng Espiritu.

Paghahanda ng estudyante: Sabihin sa mga estudyante na basahin ang Alma 24:7–16 at dumating sa klase na handang ibahagi ang natutuhan nila mula sa mga Anti-Nephi-Lehi tungkol sa Tagapagligtas, pagsisisi, at kapatawaran.

Mga Posibleng Aktibidad sa Pag-aaral

Pagdaig sa kasalanan sa tulong ng Tagapagligtas

Tandaan na ang lesson na ito ay ginawa upang ituro pagkatapos ng lesson sa Alma 23.

Basahin ang sumusunod na sitwasyon:

Nahirapan si Samantha sa isang partikular na kasalanan sa loob ng maraming taon. Nang lalo siyang magbalik-loob sa Panginoon, nagsikap siyang magsisi at humingi ng tulong sa Tagapagligtas para sa lakas na madaig ang kanyang problema. Nadama niya ang kapatawaran at pagmamahal ng Panginoon. Gayunpaman, sa mga sandali ng kahinaan, kung minsan ay bumabalik siya sa kasalanang iyon.

• Ano kaya ang mararamdaman ni Samantha sa sitwasyong ito?

Kapag may mga pagkakataon ang mga estudyante na masuri ang kanilang sarili, makatutulong ito sa kanila na mas makibahagi sa lesson at masabik na malaman ang hindi pa nila alam. Ang pag-anyaya sa mga estudyante na tahimik na pag-isipan ang sumusunod ay isang paraan na matutulungan mo ang mga estudyante na magawa ito.

Isipin kung gaano mo kaya kahusay na matutulungan si Samantha at kung ano pa ang kailangan mong malaman at maunawaan para mas matulungan siya. Isipin din ang mga isyu na sa palagay mo ay matutulungan ka ng Panginoon upang madaig ang mga ito. Habang nag-aaral ka, hanapin ang mga katotohanan na, kapag isinabuhay, ay maaaring mag-anyaya sa Tagapagligtas na tulungan kayo ni Samantha na madaig ang kasalanan.

Ang mga tao ng Anti-Nephi-Lehi

Ang mga tao ng Anti-Nephi-Lehi ay mga Lamanita na gumamit noon ng kanilang mga espada upang patayin ang iba. Gayunpaman, matapos nilang “[m]agbalik-loob sa Panginoon, “ibinaba nila ang kanilang mga sandata ng paghihimagsik“ (Alma 23:6–7).

Basahin ang Alma 24:1–4 para malaman kung paano tumugon ang ilan sa iba pang mga Lamanita.

• Kung isa ka sa mga Anti-Nephi-Lehi, ano kaya ang maiisip at madarama mo sa panahong iyon? Bakit?

Si Ammon at ang kanyang mga kapatid ay nagdaos ng isang pulong kasama si Haring Lamoni at ang kanyang kapatid, ang hari ng mga taong tinawag na Anti-Nephi-Lehi (tingnan sa Alma 24:5). Pagkatapos ay nagsalita ang hari sa kanyang mga tao.

Kung sa palagay mo ay makapagdaragdag ito sa diwa sa klase, maaari mong anyayahan ang isang estudyante na basahin nang may paggalang ang mga sumusunod na talata na para bang siya ang pinuno ng mga Anti-Nephi-Lehi. Sabihin sa mga estudyante na ipagpalagay na naririnig nila ang mensaheng ito bilang isa sa mga Anti-Nephi-Lehi at pagnilayan ang maaaring naisip at nadama nila.

Basahin ang mensahe ng hari sa Alma 24:7–16. Hanapin at pag-isipang markahan ang mga salita o parirala na naglalarawan sa mga sumusunod:

1. Ang ginawa ng Diyos para sa mga taong ito

2. Ang ginawa ng mga tao para magsisi

3. Ang ipinayo ng hari na gawin nila upang talikuran ang kanilang mga kasalanan

Ipaalala sa mga estudyante ang kanilang paghahanda para sa klase. Talakayin ang mga salita at parirala na minarkahan ng mga estudyante sa nakaraang aktibidad. Sabihin sa mga estudyante na ipaliwanag kung ano ang ibig sabihin ng mga salita at parirala at anyayahan ang klase na magtulungan upang mas maunawaan ang mga ito. Maaari mong ipaliwanag ang mga parirala na tila mahalaga at talakayin din ang mga ito.

• Ano kaya ang maiisip at madarama mo kung naroon ka at nakikinig sa mensaheng ito? Bakit?

• Anong mga salita o parirala ang makapaghihikayat sa iyo na sikaping huwag nang bumalik sa iyong mga kasalanan?

Ibinabaon ang kanilang mga sandata ng digmaan

ibinabaon ng mga Anti-Nephi-Lehi ang kanilang mga espada

Basahin ang Alma 24:17–19 at markahan kung paano tumugon ang mga tao pagkatapos ng mensaheng ito at bakit.

• Sa palagay mo, paano maiuugnay sa atin ang karanasan ng mga Anti-Nephi-Lehi?

Ang isang katotohanan na matutukoy natin mula sa salaysay na ito ay ang ating pagmamahal at katapatan kay Jesucristo ay makatutulong sa atin na talikuran ang ating mga kasalanan.

Pagnilayan sandali kung bakit totoo ang alituntuning ito.

• Kapag naghahangad na talikuran ang kasalanan, bakit maaaring makatulong na alalahanin ang pagmamahal ng Ama sa Langit at ni Jesucristo at ang nagawa Nila para sa atin? (Maaaring makatulong na pagnilayan ang mga pariralang tulad ng “kanya ring pinatawad tayo” [Alma 24:10], “kinaawaan tayo ng dakilang Diyos” [Alma 24:14], at “minamahal niya ang ating mga kaluluwa” [Alma 24:14].)

• Paano nakatulong ang pagbabaon sa kanilang mga espada “nang malalim sa lupa” (Alma 24:17) para matalikuran ng mga taong ito ang kanilang mga kasalanan?

Pansinin ang mga sumusunod na parirala sa talata 18 (idinagdag ang pagbibigay-diin):

• “Kaysa sa padanakin ang dugo ng kanilang mga kapatid ay ibibigay nila ang kanilang buhay.”

• “Kaysa sa kumuha mula sa isang kapatid sila ay magbibigay sa kanya.”

• “Kaysa sa palipasin ang kanilang mga araw sa katamaran ay masigasig silang gagawa sa pamamagitan ng kanilang mga kamay.”

Sa kabuuan, hindi lamang ibinaon ng mga Anti-Nephi-Lehi ang kanilang mga sandata ng digmaan; pinalitan din nila ng mabubuting gawa ang kanilang mga dating kasalanan.

• Paano makatutulong sa atin ang paggawa nito para matalikuran natin ang kasalanan?

• Ano ang ilang paraan na magagawa natin ito ngayon?

Para makakita ng halimbawa, panoorin ang video na “Ang Bisa ng Aklat ni Mormon sa Pagbabalik-loob” mula sa time code na 6:11 hanggang 8:12, na matatagpuan sa ChurchofJesusChrist.org.

Ang pangako ng mga tao ng Anti-Nephi-Lehi

Basahin ang Alma 24:20–27 para malaman kung paano ipinamuhay ng mga Anti-Nephi-Lehi ang kanilang pangako na talikuran ang kasalanan. Habang nagbabasa ka, ipagpalagay na naroon ka. Pag-isipan ang mga tanawin, tunog, at damdamin na maaaring nararanasan mo habang nakayuko ka at nananalangin, at nalalamang wala kang anumang pananggalang sa iyong sarili at na ikaw ay ganap na nasa mga kamay ng Panginoon.

• Ano ang hinangaan mo tungkol sa kanilang katapatan?

Inilarawan ni Elder Dale G. Renlund ng Korum ng Labindalawang Apostol kung paano maiuugnay sa atin ngayon ang mga sakripisyo ng mga Anti-Nephi-Lehi.

Elder Dale G. Renlund

Lubos na ibaon ang inyong mga sandata ng paghihimagsik nang hindi nakausli ang mga hawakan. Dahil sa Pagbabayad-sala ni Jesucristo, ang paggawa ng mga tipan nang may tunay na layunin na matapat na tuparin ang mga ito ay magpapala sa inyong buhay magpakailanman. Magiging mas katulad kayo ng Tagapagligtas kapag lagi ninyo Siyang aalalahanin, susundin, at sasambahin. Pinatototohanan ko na Siya ang matibay na pundasyon. Siya ay maaasahan, at ang Kanyang mga pangako ay tiyak. (Dale G. Renlund, “Hindi Natitinag na Katapatan kay Jesucristo,” Liahona, Nob. 2019, 25)

Nagbahagi rin si Elder Renlund ng isang napakagandang halimbawa ng katapatan ng mga Banal sa Congo. Maaari mong ibahagi sa mga estudyante ang video na “Hindi Natitinag na Katapatan kay Jesucristo“ mula sa time code na 0:00 hanggang 1:39, na matatagpuan sa ChurchofJesusChrist.org.

Paano talikuran ang kasalanan

Maaari mong anyayahan ang mga estudyante na gawin ang sumusunod na aktibidad sa maliliit na grupo upang maipamuhay nila ang natutuhan nila sa isang sitwasyon sa tunay na buhay.

Alalahanin ang sitwasyon ni Samantha sa simula ng lesson. Ipaliwanag kung paano mo imumungkahi na ipamuhay niya ang mga alituntuning napag-aralan mo ngayon. Isama ang sumusunod:

• mga paraan na maaalala niya ang pagmamahal ng Panginoon sa kanya

• mga partikular na gawain na magagawa niya upang maiwasan ang pagbabalik muli sa kanyang mga dating kasalanan

Ipabahagi sa ilang estudyante ang kanilang mga ideya. Habang nakikinig ang mga estudyante sa isa’t isa, sabihin sa kanila na pag-isipan kung paano makatutulong sa kanila ang pagsasagawa ng mga planong ito para madaig ang kanilang mga kasalanan.

Pagtalikod sa iyong mga kasalanan

Sa iyong study journal, isulat kung paano mo maipamumuhay ang natutuhan mo ngayon. Sumulat ng mga hakbang na maisasagawa mo para maalala ang pagmamahal ng Panginoon. Magsama ng mga praktikal na hakbang para talikuran ang kasalanan at mag-ingat para hindi na bumalik pa rito.

Habang sinisikap mong sundin ang iyong plano, magtiwala na mahal ka ng Tagapagligtas at tutulungan ka Niya kapag sinikap mong iwasan ang mga sitwasyon na mag-uudyok sa iyong magkasala.

Patotohanan ang pagmamahal ng Panginoon sa bawat estudyante at na tutulungan Niya sila kapag nagsikap silang maging higit na katulad Niya, kahit kung minsan ay nagkukulang sila sa kanilang mga pagsisikap.

Komentaryo at Impormasyon ng Konteksto

Bakit kailangan nating mag-ingat para hindi na tayo bumalik sa kasalanan?

Itinuro ni Elder Richard G. Scott (1928–2015) ng Korum ng Labindalawang Apostol:

Elder Richard G. Scott

[Ang] mga pagpili [natin] noong araw [ay makapaglalantad sa atin] sa makamundong hangarin na maaaring maging dahilan upang muli silang manghina na sasamantalahing kasangkapanin ni Satanas.

Tatangkain ni Satanas na ipaalala sa atin ang anumang nagawa nating kasalanan upang matukso tayong muling magpaimluwensya sa kanya. Kailangan tayong maging maingat na maiwasan ang kanyang mga panunukso. (Richard G. Scott, “Sariling Lakas sa Pamamagitan ng Pagbabayad-sala ni Jesucristo,” Liahona, Nob. 2013, 83)

Ipinaliwanag ni Elder Neil L. Andersen ng Korum ng Labindalawang Apostol:

Elder Neil L. Andersen

Ang ibig sabihin ng pagtalikod sa kasalanan ay hinding-hindi natin ito uulitin—huwag kailanman bumalik dito—sa gawa o sa salita o maging sa ating isipan. Ang pagtalikod ay nangangahulugan na ang kasalanan ay talagang nasa ating nakaraan. Ang ibig sabihin ng talikuran ang kasalanan ay hindi lamang pagdama sa pagsisisi at kalungkutang naidulot nito sa atin at sa iba pang nasaktan natin; ibig sabihin nito ay pagiging tiyak na hindi natin ilalagay ang ating sarili sa katayuan ding iyon na nagdala ng kasalanan sa atin noon. Mangangahulugan ito ng pakikisalamuha sa mapagkakatiwalaang mga kaibigan at kapamilya na tutulong sa atin na sumulong. Para sa ilan, maaaring ang ibig sabihin nito ay pagbabago ng ating mga kaibigan, marahil ay pagbabago ng ating trabaho o kung ano ang ginagawa natin sa ating oras. Ibig sabihin nito ay maging lubos na bukas at tapat sa mapagkakatiwalaang mga kasama habang sumusulong tayo. Hindi natin kailanman gustong bumalik sa dati nating mga kasalanan. (Neil L. Andersen, The Divine Gift of Forgiveness [2019], 207–8)

Mga Karagdagang Aktibidad sa Pag-aaral

Mga Sitwasyon

Maaari mong gamitin ang mga sumusunod na sitwasyon kung makikinabang ang mga estudyante sa pagsasanay sa pagsasabuhay gamit ang mga sitwasyon na may mas maraming detalye.

• Palaging nilalabag ni Kona ang Word of Wisdom.

• Palaging nakikipag-away si Audrey sa kanyang mga kapatid.

• Gumugugol ng oras si Taft sa kanyang telepono sa halip na makibahagi sa mga lesson sa simbahan, pag-aaral ng pamilya, at mga pagkakataong maglingkod.

• Nanonood si Lia ng pornograpiya kapag nadarama niyang nag-iisa siya o nababalisa.

Pag-iwas sa mga sitwasyon na humahantong sa kasalanan

Maaari mong gamitin ang sumusunod na aktibidad sa naaangkop na bahagi sa lesson. Sabihin sa mga estudyante na ipagpalagay na may isang hardin na puno ng mga damo at pagkatapos ay ilarawan sa isipan ang hardin ding iyon matapos itong tanggalan ng mga damo. Pagkatapos ay sabihin sa mga estudyante na sumagot sa mga sumusunod na tanong:

• Ano ang kailangang gawin upang matiyak na walang damong tutubo sa harding ito?

• Paano ito nauugnay sa kailangan nating gawin matapos tayong mapatawad sa kasalanan?

Alma 24:20–27. Kapag tinutupad natin ang ating mga tipan, matutulungan natin ang iba na magbalik-loob

Sabihin sa mga estudyante na basahin ang Alma 24:20–27, at alamin ang nangyari nang salakayin ng mga Lamanita ang mga Anti-Nephi-Lehi. Tulungan ang mga estudyante na matukoy at matalakay ang sumusunod na alituntunin: Kapag tinutupad natin ang ating mga tipan, matutulungan natin ang iba na magbalik-loob.

Maaari kang magtanong tulad ng “Ano ang ilang pagkakataon kung saan kailangan mong magpakita ng halimbawa sa iba sa pamamagitan ng pagtupad sa iyong mga tipan?” o “Paano makatutulong ang pagtupad sa iyong mga tipan sa mga sitwasyong ito para matulungan ang iba na magbalik-loob?”