Alma 30:1–29

Ang mga Turo ni Korihor ay Umakay sa Marami Palayo sa Tagapagligtas

Inililigaw ni Korihor ang mga tao

Isang masamang lalaking nagngangalang Korihor ang dumating sa mga Nephita. Nangaral siya laban sa mga propesiya tungkol kay Jesucristo at inakay niya ang puso ng maraming tao palayo sa Diyos. Sa ating panahon, maraming tinig na naghahangad na ilayo tayo kay Jesucristo. Ang lesson na ito ay makatutulong sa iyo na matukoy at tanggihan ang mga turo na maaaring maglayo sa iyo kay Jesucristo.

Paghahanda sa iyong sarili na maging kasangkapan ng Espiritu Santo. Ang Espiritu Santo ang tunay na guro at tunay na pinagmumulan ng pagbabalik-loob mo at ng iyong mga estudyante. Anyayahan ang Espiritu na magturo at magpabalik-loob sa pamamagitan ng pamumuhay na nagpapanatili ng Kanyang patnubay sa iyong buhay. Kapag ginawa mo ito, matatanggap mo ang Kanyang patnubay at matutulungan mo ang mga estudyante na anyayahan Siya sa kanilang pag-aaral.

Paghahanda ng estudyante: Maaaring kausapin ng mga estudyante ang isang kapamilya o lider ng Simbahan tungkol sa mga paraan para matukoy ang mga maling turo.

Mga Posibleng Aktibidad sa Pag-aaral

Ang panlilinlang ni Satanas

Simulan ang lesson sa pagtalakay sa maka-feke o iba pang uri ng patibong na ginawa para manlinlang at mambitag.  ChurchofJesusChrist.org

Ang maka-feke ay pain para sa pugita. Ang mga pain para sa pugita ay ginawa na kamukhang-kamukha ng tunay na pagkain kaya ang nalinlang na pugita ay tatangging bitawan ito kapag nasunggaban na ito. Kapag nangyari ito, madaling maihahagis ng mangingisda ang pugita sa kanyang bangka.

maka-feke

Ginamit ni Pangulong Thomas S. Monson (1927–2018) ang halimbawa ng maka-feke para ituro kung paano kumikilos si Satanas.

Pangulong Thomas S. Monson

Ngayon tayo ay naliligiran ng mga maka-feke na ipinapain ng diyablo sa ating harapan sa pagtatangkang akitin tayo at pagkatapos ay bihagin. Sa sandaling masunggaban, napakahirap—at kung minsa’y imposible pa—na bitawan ang gayong mga maka-feke. Para maging ligtas, kailangan nating matukoy ang mga ito at maging matatag tayo sa determinasyong iwasan ang mga ito. (Thomas S. Monson, “Tapat sa Pananampalataya,” Liahona, Mayo 2006, 18)

• Gaano ka kakumpiyansa sa kakayahan mong matukoy ang mga maling turo ni Satanas na maaaring “makaakit” at “makabihag” sa iyo?

Pag-iwas sa mga bagay na naglalayo sa atin sa Tagapagligtas

Pagkatapos ng matinding digmaan ng mga Nephita at ng mga Lamanita, nagkaroon ng kapayapaan sa buong lupain. Makalipas ang mga dalawang taon, isang lalaking nagngangalang Korihor ang nagsimulang mangaral sa mga tao sa Zarahemla. Sinabi ni Satanas kay Korihor kung ano ang kanyang sasabihin (tingnan sa Alma 30:53). Habang nag-aaral ka ngayon, pansinin kung paano ginamit ni Korihor ang kanyang mga salita at mga maling turo bilang maka-feke para mabitag ang mga tao.

Basahin ang Alma 30:6, 12, at maghanap ng mga salita at parirala na naglalarawan sa mensahe at misyon ni Korihor.

• Sa iyong palagay, ano ang ibig sabihin ng siya ay “Anti-Cristo”? (Alma 30:6).

Ang salitang anti-Cristo ay tumutukoy sa “sinuman o anumang bagay na nanghuhuwad sa totoong ebanghelyo ng plano ng kaligtasan at hayagan o lihim na sumasalungat kay Cristo” (Gabay sa mga Banal na Kasulatan, “Anti-Cristo,” scriptures.ChurchofJesusChrist.org). Ang isang katotohanan na matututuhan natin mula sa salaysay tungkol kay Korihor ay gumagamit si Satanas ng mga maling turo para ilayo tayo kay Jesucristo.

Mga turong anti-Cristo ni Korihor

Basahin ang Alma 30:12–18, at alamin ang mga maling turo ni Korihor. Maaari mong markahan ang mga turo ni Korihor sa paraang naiiba (halimbawa, gumamit ng kakaibang kulay o simbolo) o isulat ang mga ito sa iyong study journal.

• Ano ang ilan sa mga maling turo ni Korihor?

Maaari mong sabihin sa mga estudyante na ilista sa pisara ang mga turo ni Korihor. Kilalanin ang kanilang ginawa sa paghahanap ng mga sagot. Kung kinakailangan, maaari kang magtuon sa mga sumusunod:

• “walang taong makaaalam ng ano mang bagay na darating” (talata 13)

• [ang] “mga propesiya … ay hangal na kaugalian ng inyong mga ama” (talata 14)

• “hindi ninyo maaaring malaman ang mga bagay na hindi ninyo nakikita” (talata 15)

• “hindi ninyo maaaring malaman na magkakaroon ng isang Cristo” (talata 15)

• “ito ay likha ng isang isipang matinding nababalisa” (talata 16)

• “hindi maaaring magsagawa ng isang pagbabayad-sala para sa mga kasalanan ng tao,” (talata 17)

• “bawat tao ay namumuhay sa buhay na ito alinsunod sa pangangasiwa ng nilikha” (talata 17)

• “ang ano mang gawin ng tao ay hindi pagkakasala” (talata 17)

• “kapag ang isang tao ay patay na, iyon na ang katapusan niyon” (talata 18)

Sa pagbanggit sa mga turo ni Korihor na nakalista sa pisara, maaaring sagutin ng mga estudyante ang mga sumusunod na tanong nang magkakapartner o sa maliliit na grupo. Maaaring magtalaga sa iba’t ibang grupo ng mga estudyante ng iba’t ibang maling turo na susuriin, at pagkatapos ay maaari nilang ibahagi sa iba ang mga sagot nila.

• Paano mo maaaring ilahad muli ang mga turo ni Korihor gamit ang pananalitang mas karaniwan sa ating panahon?

• Gamit ang scale na mula 1 hanggang 10 (kung saan 10 ang pinakamatindi), sa nakikita mo, gaano katindi tinatanggap ngayon ang mga turo ni Korihor?

• Ano ang mayroon sa mga turong ito na mag-aakay sa mga tao palayo kay Jesucristo? Bakit mapanganib ang mga ideyang ito?

Hingin ang patnubay ng Espiritu at pagnilayan ang epekto ng mga turo ni Korihor sa sarili mong buhay. Mag-isip ng mga paraan na personal kang maiimpluwensyahan ng alinman sa mga maling turong ito.

Nagsalita si Elder D. Todd Christofferson ng Korum ng Labindalawang Apostol tungkol kay Korihor at sa kanyang mga turo. Maaari mong panoorin ang video na “Ang Banal na Kaloob na Pagsisisi” mula sa time code na 2:08 hanggang 2:40, na matatagpuan sa ChurchofJesusChrist.org.

Elder D. Todd Christofferson

Ang [mga taong] tulad ni Korihor, ay itinatangging mayroong Cristo at sinasabing walang kasalanan. Ang doktrina nila ay na ang mga pinahahalagahan, pamantayan, at maging ang katotohanan ay dependeng lahat sa tao. Kaya nga, anuman ang inaakala ng tao na tama para sa kanya ay hindi maaaring husgahan ng iba na mali o kasalanan.

Sa unang tingin ay tila kaakit-akit ang gayong mga pilosopiya dahil tinutulutan tayo nitong gawin ang anumang pita o nais natin anuman ang kahinatnan nito. (D. Todd Christofferson, “Ang Banal na Kaloob na Pagsisisi,” Liahona, Nob. 2011, 38)

• Sa inyong palagay, paano maaakay ng mga turong ito na magkasala ang mga tao? (Tingnan sa talata 18.)

Basahin ang Alma 30:19–21, at alamin kung paano tumugon ang mga tao ng Jerson at Gedeon sa mga turo ni Korihor.

Sa inyong palagay, bakit ang kanilang tugon ay “higit [na] matalino” (Alma 30:20) kaysa sa mga tao ng Zarahemla? (tingnan sa Alma 30:18).

Hikayatin ang maraming estudyante na sagutin ang sumusunod na tanong. Maaaring isulat ng mga estudyante ang kanilang mga sagot sa pisara o sa isang piraso ng papel na ipapasa-pasa sa buong klase. Maaaring kabilang sa talakayan kung paano makatutulong ang partikular na mabubuting gawa at pag-aalis ng masasamang impluwensya upang sila ay maging “higit [na] matalino.” Halimbawa, maaaring tingnan ng mga estudyante ang social media, musika, at mga video na regular nilang ginagamit at maaari nilang alisin ang anumang makapagpapahina ng kanilang pananampalataya kay Jesucristo at magpapalayo sa Espiritu Santo.

• Paano tayo magiging “higit [na] matalino” at makatatanggi sa mga mensaheng anti-Cristo?

• Paano makakaapekto sa inyo ang inyong kaalaman at kaugnayan sa Tagapagligtas kung gaano kalaki ang impluwensya sa inyo ng mga turong ito na anti-Cristo?

Maaari mong anyayahan ang mga estudyante na magbahagi ng patotoo o walang hanggang katotohanan tungkol kay Jesucristo. Maaari mo ring hilingin sa kanila na magbahagi ng mga banal na kasulatan o mga turo ng Tagapagligtas na sumasalungat sa mga maling ideya ni Korihor. Kabilang sa mga halimbawa ang Jacob 7:11–12; Alma 32:21; Mormon 7:3, 5–7.

Pagnilayan ang natutuhan at nadama mo mula sa iyong pag-aaral. Hingin ang patnubay ng Espiritu Santo para matulungan kang tumuon kay Jesucristo at tanggihan ang mga turong mag-aakay sa iyo palayo sa Kanya.

Komentaryo at Impormasyon ng Konteksto

Bakit mahalagang tumanggap ng payo mula sa mga makabagong propeta at apostol?

Sinabi ni Pangulong Henry B. Eyring:

Pangulong Henry B. Eyring

Ikinakatwiran ni Korihor, tulad ng maling pangangatwiran ng mga lalaki at babae mula pa noong unang panahon, na ang pagtanggap ng payo mula sa mga tagapaglingkod ng Diyos ay pagsusuko ng mga karapatan sa kalayaan na kaloob ng Diyos. Ngunit mali ang pangangatwiran dahil inihahayag nito nang mali ang katotohanan. Kapag hindi natin tinatanggap ang payo na mula sa Diyos, hindi natin pinipiling mahiwalay sa impluwensya sa labas. Ibang impluwensya ang pinipili natin. Hindi natin tinatanggap ang proteksyon ng mapagmahal, pinakamakapangyarihan, pinakamarunong sa lahat at perpektong Ama sa Langit, na ang buong layunin, tulad ng sa Kanyang Pinakamamahal na Anak, ay mapagkalooban tayo ng buhay na walang hanggan, maibigay sa atin ang lahat ng mayroon Siya, at madala tayong lahat kasama ang ating mga pamilya sa Kanyang piling. Sa hindi pagtanggap sa Kanyang payo, pinipili natin ang impluwensya ng ibang kapangyarihan, na ang layunin ay gawin tayong kaaba-aba at ang motibo ay pagkapoot. (Henry B. Eyring, “Finding Safety in Counsel,” Ensign, Mayo 1997, 25)

Paano nakakaapekto ang mga maling turo sa ating buhay?

Sinabi ni Pangulong Russell M. Nelson:

Pangulong Russell M. Nelson

Sa masigasig na pagtutuon natin sa Tagapagligtas at pagsunod sa Kanyang huwaran ng pagtutuon sa kagalakan, kailangan nating iwasan ang mga bagay na maaaring pumigil sa ating kagalakan. Naaalala ba ninyo si Korihor, ang anti-Cristo? Sa pagkakalat ng mga maling bagay tungkol sa Tagapagligtas, nagpalipat-lipat ng lugar si Korihor hanggang sa iharap siya sa isang mataas na saserdote na nagtanong sa kanya: “Bakit lumilibot ka sa pagliligaw ng mga landas ng Panginoon? Bakit nagtuturo ka sa mga taong ito na hindi magkakaroon ng isang Cristo, upang gambalain ang mga pagsasaya nila?” [Alma 30:22].

Anumang salungat kay Cristo o sa Kanyang doktrina ay pipigil sa ating kagalakan. Kabilang diyan ang mga pilosopiya ng mga tao, na napakarami online at sa blogosphere, na ginagawa ang ginawa mismo ni Korihor noon.

Kung titingnan natin ang mundo at susundin ang mga pormula nito sa kaligayahan, hindi tayo kailanman daranas ng kagalakan. (Russell M. Nelson, “Kagalakan at Espirituwal na Kaligtasan,” Liahona, Nob. 2016, 83–84)

Paano natin malalaman ang katotohanan at masusunod ang Tagapagligtas?

Itinuro ni Pangulong Russell M. Nelson:

Pangulong Russell M. Nelson

Ang mga [tinig at] impluwensiya ng mundo ay kahika-hikayat at napakarami. Ngunit napakaraming impluwensiya ang mapanlinlang, mapanukso, at makapaglalayo sa atin sa landas ng tipan. Upang maiwasan ang tiyak na pagdurusang kahahantungan nito, sumasamo ako sa inyo ngayon na labanan ang panunukso ng mundo sa pamamagitan ng paglalaan ng panahon para sa Panginoon sa inyong buhay—sa bawat araw. (Russell M. Nelson, “Maglaan ng Oras para sa Panginoon,” Liahona, Nob. 2021, 120)

Pangulong Russell M. Nelson

Sa darating na mga araw, hindi magiging posible na espirituwal na makaligtas kung walang patnubay, tagubilin, at nakapagpapanatag na impluwensya ng Espiritu Santo. (Russell M. Nelson, “Paghahayag para sa Simbahan, Paghahayag para sa Ating Buhay,” Liahona, Mayo 2018, 96)

Ano ang ilang mensaheng anti-Cristo na itinuturo sa ating panahon?

Itinuro ni Sister Julie B. Beck, dating Relief Society General President:

Pangulong Julie B. Beck

Si Korihor ay isang anti-Cristo. Ang anti-Cristo ay laban sa pamilya. Ang anumang doktrina o alituntuning naririnig ng ating mga kabataan sa mundo na laban sa pamilya ay anti-Cristo rin. Malinaw iyan. Kung titigil ang ating mga kabataan sa paniniwala sa mabubuting tradisyon ng kanilang mga ninuno … , kung hindi nauunawaan ng ating mga kabataan ang kanilang bahagi sa plano, maaari silang mailigaw. (Julie B. Beck, “Pagtuturo ng Doktrina tungkol sa Pamilya,” Liahona, Mar. 2011, 15)

Mga Karagdagang Aktibidad sa Pag-aaral

Ano ang pinagtutuunan ng mga nagtuturo ng maling doktrina?

Upang matulungan ang mga estudyante na matukoy ang mga maling turo, ipabasa sa kanila ang Alma 30:6 at pagkatapos ay 1 Nephi 11:34–36. Tulungan ang mga estudyante na maunawaan na maraming tumutuligsa sa totoong doktrina ang madalas na lantarang bumabatikos sa mga propeta. Maaari mong itanong sa mga estudyante ang tulad ng “Sa palagay ninyo, bakit gustung-gusto ng ilang tao na makahanap ng mali sa mga makabagong propeta?” o “Paano kayo tinulungan ng mga makabagong propeta na makaiwas sa panlilinlang?”

Paano nakakaapekto ang mga turong anti-Cristo sa ating kagalakan sa ebanghelyo?

Ang sumusunod ay makatutulong sa mga estudyante na maunawaan kung paanong hindi humahantong sa kagalakan ang paniniwala sa mga mensaheng anti-Cristo. Maaari mong ipabasa sa mga estudyante ang Alma 30:22. Sabihin sa kanila na isipin kung ano ang ibig sabihin ng pariralang “gambalain ang mga pagsasaya nila.” Maaaring talakayin ng mga estudyante kung paano nakagagambala ang mga turong anti-Cristo sa kanilang kagalakan. Pagkatapos ay maaari silang magbahagi ng mga turo ni Jesucristo o ng tungkol kay Jesucristo na tumutulong sa atin na makadama ng kagalakan. Maaari mo ring ibahagi ang pahayag ni Pangulong Nelson sa bahaging “Komentaryo at Impormasyon ng Konteksto” sa ilalim ng pamagat na “Paano nakakaapekto ang mga maling turo sa ating buhay?”

Pagtulong sa mga estudyante na makakonekta sa ating panahon

Upang matulungan ang mga estudyante na matukoy ang mga mensaheng anti-Cristo sa kasalukuyan, maaari mo silang pagpartner-partnerin o ilagay sa maliliit na grupo at magtalaga sa kanila ng isang paksa mula sa Para sa Lakas ng mga Kabataan (buklet, 2022). Anyayahan silang talakayin kung paano maaaring magpalaganap si Satanas ng mga mensaheng anti-Cristo tungkol sa nakatalagang paksa sa kanila.