Alma 30:30–60

“May Kataas-taasang Tagapaglikha”

Nagpatotoo si Alma na “lahat ng bagay ay nagpapatunay na may Diyos” (Alma 30:44). Ngunit bakit hindi kinikilala o tinatanggap ng lahat na may katibayan na totoo ang Diyos? Itinatwa ni Korihor na may Diyos hanggang sa siya ay mapipi sa pamamagitan ng kapangyarihan ng Diyos. Ang lesson na ito ay makatutulong sa iyo na matukoy ang katibayan na may Diyos at piliing maniwala sa Kanya.

Maghikayat ng pagsusuri at assessment. Magbigay ng mga inspiradong tanong upang matukoy ng mga estudyante ang nalalaman at pinaniniwalaan na nila. Hikayatin ang mga estudyante na anyayahan ang Espiritu Santo na tulungan silang matukoy kung ano ang kailangan nilang malaman at magpatunay tungkol sa mga katotohanang hinahanap nila.

Paghahanda ng estudyante: Ipabasa sa mga estudyante ang Alma 30:40–41 o Moises 6:63. Sabihin sa kanila na maghanap sa kanilang kapaligiran ng katibayan na may Diyos at maaaring kunan ito ng litrato para ipakita sa klase.

Mga Posibleng Aktibidad sa Pag-aaral

May Diyos

Pag-isipang magpakita ng ilang larawan na sa palagay mo ay nagpapakita ng katibayan na may Diyos. Maaari ding magbahagi ang mga estudyante tungkol sa paghahanda nila para sa klase. Talakayin ang ilan o lahat ng sumusunod na tanong.

• Sa inyong paaralan o komunidad, gaano karaniwan para sa mga tao na makakita ng katibayan na may Diyos sa mundo sa paligid nila (halimbawa, habang nakatingin sa paglubog ng araw o mga bituin)?

• Sa inyong palagay, bakit maaaring pare-pareho ang tinitingnan ng mga tao ngunit magkakaiba ang nagiging konklusyon nila tungkol sa Diyos?

• Ano ang maaaring makaimpluwensya sa kakayahan ng isang tao na matukoy ang kaugnayan ng Diyos sa kanilang buhay?

Pag-isipan kung paano kayo mapagpapala kung makikita ninyo nang mas malinaw ang Diyos at ang Kanyang kaugnayan sa inyong buhay. Sa pag-aaral mo ngayon, hangaring madagdagan ang kakayahan mong makakita ng katibayan ng Diyos sa nakikita at nararanasan mo.

Pinaratangan ni Korihor ang mga lider ng Simbahan

Si Korihor, na isang anti-Cristo, ay naging matagumpay sa pagpapalaganap ng kanyang mga mapanghibok na mensahe sa lupain ng Zarahemla (tingnan sa Alma 30:12, 17–18). Sinubukan din niyang magturo sa mga tao sa Jerson at Gedeon. Doon, sinalungat ng mga nananampalataya sa Diyos si Korihor at dinala nila siya sa harapan ng punong hukom at ni Alma, ang mataas na saserdote.

Basahin ang Alma 30:30–36, at alamin kung paano tumugon si Alma sa mga pag-atake ni Korihor sa Diyos at sa Simbahan.  ChurchofJesusChrist.org

Maaari mong sabihin sa mga estudyante na isulat ang mga kahulugan ng mga sumusunod na salita sa kanilang mga banal na kasulatan para matulungan silang maunawaan at maalala ang natutuhan nila.

Maaaring makatulong na malaman na ang ibig sabihin ng paglapastangan sa talata 30 ay kutyain ang Diyos o magsalita nang “walang pakundangan o walang pitagan sa Diyos o mga banal na bagay.” (Gabay sa mga Banal na Kasulatan, “Lapastangan, Kalapastanganan,” scriptures.ChurchofJesusChrist.org). Ang salitang pagpapakasawa sa mga talatang ito ay nagsasaad ng pagyaman dahil sa isang bagay.

• Ano ang ipinaratang ni Korihor na ginagawa ng mga lider ng Simbahan? (Tingnan sa Alma 30:31.)

Ang patotoo ni Alma tungkol sa Diyos

Nang tanungin ni Alma si Korihor kung naniniwala siya sa Diyos, sinabi ni Korihor na hindi siya naniniwala (tingnan sa Alma 30:37–38).

Basahin ang Alma 30:39–44, at alamin kung paano tumugon si Alma kay Korihor.  ChurchofJesusChrist.org

• Ano ang pinakanapansin mo mula sa tugon ni Alma?

• Anong mga katotohanan tungkol sa Diyos ang matutukoy mo sa Alma 30:41, 44?

Maaari mong sabihin sa mga estudyante na i-cross-reference ang mga talatang ito sa Moses 6:63. Hayaang ibahagi ng mga estudyante ang anumang katotohanan na sa palagay nila ay itinuro sa mga talatang ito. Maaari nilang matukoy ang mga katotohanang tulad ng sumusunod na halimbawa.

Ang isang katotohanan na maaaring matutuhan natin ay lahat ng bagay ay nagpapatunay na may Diyos.

Ang sumusunod na aktibidad ay makatutulong sa mga estudyante na matukoy ang katibayan ng Diyos sa kanilang buhay. Maghanap ng mga paraan para maisali ang bawat estudyante sa klase. Maaari kang gumawa ng listahan ng mga sagot ng mga estudyante para sa mga step 1 at 2 sa pisara. Maaari ding magsulat ang mga estudyante ng isang bagay para sa mga step 3 at 4 sa kanilang journal at pagkatapos ay magboluntaryong magbahagi. Maaaring hindi pa makatukoy ang ilang estudyante ng mga naranasan nila hanggang sa marinig nila na magbahagi ang iba.

1. Gumawa ng listahan ng sinabi ni Alma na nagbibigay ng katibayan na may Diyos.

2. Magdagdag ng anumang karagdagang katibayan na maiisip mo.

3. Maghanap ng mga bagay sa iyong listahan na nakatulong sa iyo na personal na makakita ng katibayan na may Diyos. Maaari mong isulat ang ilang detalye mula sa iyong mga karanasan.

4. Maaari ka ring pumili ng isa o mahigit pang mga bagay sa iyong listahan at ibahagi kung paano makatutulong ang mga ito sa iyo para madagdagan ang kakayahan mong makakita ng katibayan na may Diyos.

Ang sumusunod na pahayag ay makatutulong sa mga estudyante na maaaring nahihirapang matukoy ang mga naranasan niya tungkol sa Diyos. Maaari mong ibahagi ito at anyayahan ang mga estudyante na ibahagi ang natutuhan nila. Tulungan ang mga estudyante na hindi panghinaan ng loob at anyayahan silang sundin ang paanyaya ni Pangulong Nelson.

Ibinigay ni Pangulong Russell M. Nelson ang sumusunod na payo tungkol sa kaalaman na may Diyos.

Unawain na ang kawalan ng mga karanasan sa Diyos ang maaaring dahilan ng pagdududa na mayroong Diyos. Kaya, ilagay ang inyong sarili sa posisyon na masimulang magkaroon ng mga karanasan sa Kanya. Magpakumbaba. Manalangin na magkaroon ng mga mata na makakakita sa kamay ng Diyos sa inyong buhay at sa mundong nakapaligid sa inyo. Hilingin sa Kanya na sabihin sa inyo kung naroroon Siya talaga—kung nakikilala Niya kayo. Tanungin Siya kung ano ang nadarama Niya para sa inyo. At pagkatapos ay makinig. (Russell M. Nelson, “Pumarito Ka, Sumunod Ka sa Akin,” Liahona, Mayo 2019, 90)

Sa halip na manampalataya na magkaroon ng karanasan sa Diyos, nais ni Korihor na kumbinsihin siya ni Alma tungkol sa kapangyarihan ng Diyos at paulit-ulit niyang hinamon si Alma na magpakita sa kanya ng isang palatandaan (tingnan sa Alma 30:43, 45, 48).

• Ano sa palagay ninyo ang naiiba sa isang taong sumusunod sa paanyaya ni Pangulong Nelson at sa isang taong humihingi ng palatandaan?

Basahin ang Alma 30:48–53, 59–60, at alamin kung paano nakumbinsi si Korihor sa kapangyarihan ng Diyos.  ChurchofJesusChrist.org

• Ano ang matututuhan natin mula sa karanasan ni Korihor?

Pansinin ang mga aral na itinuro ni Mormon sa pariralang “sa gayon nakikita natin” sa talata 60. Isipin kung paano pa rin nililinlang ng diyablo ang mga tao ngayon at kung paano niya sila sinusubukang kumbinsihin na itatwa ang alam nilang totoo.

Magpatotoo na may Diyos at anyayahan ang mga estudyante na sikaping makita ang Diyos sa mundo sa paligid nila.

Komentaryo at Impormasyon ng Konteksto

Paano ko pa mas makikilala ang Diyos?

Ibinahagi ni Pangulong Henry B. Eyring ng Unang Panguluhan ang ginawa niya para makilala ang Diyos sa kanyang buhay:

Pinag-iisipan ko ang tanong na ito: “Nakita ko ba ang kamay ng Diyos na nakaunat para tulungan kami o ang aming mga anak o pamilya sa araw na ito?” Habang patuloy ko itong ginagawa, may nagsimulang mangyari. Habang ginugunita ko ang mga nangyari sa maghapon, nakikita ko ang katibayan ng nagawa ng Diyos para sa aming lahat na hindi ko nakita dahil sa kaabalahan sa maghapon. Nang mangyari iyon, at madalas iyong mangyari, natanto ko na sa paggunita ay naipakita sa akin ng Diyos ang Kanyang nagawa. (Henry B. Eyring, “O Tandaan, Tandaan,” Liahona, Nob. 2007, 67)

Itinuro ni Sister Susan Bednar:

Nagpapatotoo ako na kapag nagdasal tayo na makita ang Kanyang plano, makikita natin ang impluwensya ng Diyos sa ating buhay at malalaman natin na kilala Niya tayo. (Susan Bednar, “Nakita Ko na Ba ang Kamay ng Diyos sa Aking Buhay?” [Church Educational System devotional para sa mga young adult, Mar. 3, 2013], broadcasts.ChurchofJesusChrist.org)

Paano ko maaanyayahan ang Espiritu Santo na tulungan akong makita ang Diyos sa aking buhay?

Itinuro ni Elder Kim B. Clark ng Pitumpu:

Sa simpleng pagsunod, madarama natin sa ating puso ang Espiritu. Sa ating tahanan nananalangin tayo nang may pananampalataya, sinasaliksik ang mga banal na kasulatan, at pinapanatiling banal ang araw ng Sabbath. Sa ating mga chapel, tumatanggap tayo ng sakramento at gumagawa ng mga banal na pangako sa ating Ama sa Langit sa pangalan ni Cristo. Sa banal na templo ginagawan natin ng mga sagradong ordenansa ang ating mga kapatid na lalaki at babae na sumakabilang-buhay na. Sa ating pamilya at sa mga gawaing ibinigay sa atin ng Panginoon, tinutulungan natin ang iba, pinagagaan ang kanilang mga pasanin at inaanyayahan silang lumapit kay Cristo.

Mga kapatid, alam ko na kung gagawin natin ang mga bagay na ito, darating ang Espiritu Santo! Tayo ay uunlad sa espirituwal at matututo sa Espiritu Santo, at Siya ay ating makakasama. Kung tayo ay aasa kay Cristo at bubuksan ang ating mga mata at ating mga tainga, tutulungan tayo ng Espiritu Santo na makita natin ang ginagawa ng Panginoong Jesucristo sa ating buhay, pinalalakas ang ating pananampalataya sa Kanya nang may katiyakan at katibayan. (Kim B. Clark, “Mga Matang Nakakakita at mga Taingang Nakaririnig,” Liahona, Nob. 2015, 125)

Paano kung naniniwala ako sa Diyos ngunit hindi ko alam kung talagang totoo Siya?

Ibinahagi ni Elder Jeffrey R. Holland ng Korum ng Labindalawang Apostol:

Isang 14-anyos na batang lalaki ang medyo atubiling nagsabi sa akin kamakailan, “Brother Holland, hindi ko pa masabi na alam kong ang Simbahan ay totoo, pero naniniwala akong totoo ito.” Niyakap ko nang mahigpit ang batang iyon. Sinabi ko sa kanya nang buong taimtim na ang paniniwala ay mahalagang salita, mas mahalaga pa kung ipapakita, at hindi niya kailangang humingi ng paumanhin sa “paniniwala lamang.” Sinabi ko sa kanya na sinabi ni Cristo mismo, “Huwag kang matakot, manamplataya ka lamang” [Marcos 5:36] . … Sinabi ko sa batang ito na paniniwala palagi ang unang hakbang sa pananalig. … At sinabi ko sa kanya kung gaano ko siya ipinagmamalaki sa katapatan ng kanyang hangarin. (Jeffrey R. Holland, “Panginoon, Nananampalataya Ako,” Liahona, Mayo 2013, 94–95)

Mga Karagdagang Aktibidad sa Pag-aaral

Pag-anyaya sa mga kabataan na pag-aralan at patotohanan ang tungkol sa Diyos

Pagkatapos tumukoy ng katotohanan tungkol sa lahat ng bagay na nagpapatunay na may Diyos (tingnan sa Alma 30:41, 44), maaari mong anyayahan ang mga estudyante na pag-aralan ang ilan sa mga sumusunod na banal na kasulatan, himno, o bahagi ng mga mensahe sa pangkalahatang kumperensya. Maaari mong anyayahan ang mga estudyante na palakasin ang kanilang patotoo sa pamamagitan ng pag-aaral, pagkilos ayon sa natutuhan nila, at pagpapatotoo sa iba. Pag-isipang anyayahan ang ilang boluntaryo na ibahagi sa klase ang natutuhan nila. Maaari mo ring anyayahan ang mga estudyante na magbahagi sa kanilang pamilya.

• Alma 30:44

• Moises 6:63

• “Ako ay Anak ng Diyos,” Mga Himno, blg. 189

• “Dakilang Diyos,” Mga Himno, blg. 48

• Kim B. Clark, “Mga Matang Nakakakita at mga Taingang Nakaririnig,” Liahona, Nob. 2015, 124–126

Pagtulong sa iba na nag-aalinlangan na may Diyos

Maaaring makinabang ang mga estudyante sa pagsasadula ng isang sitwasyon kung saan matutulungan nila ang isang taong mahal nila na nag-aalinlangan na may Diyos. Halimbawa, maaari mong sabihin sa mga estudyante na isadula ang pakikipag-usap sa isang kapamilya na nagbasa o nanood ng isang bagay na naging dahilan ng pagdududa nila na may Diyos. Bigyan ng oras ang mga estudyante na maihanda ang kanilang sagot, at sabihin sa kanila na magsama ng isa o dalawang bagay na nagpapatotoo sa kanila na tunay na may Diyos.