Almà 31:12–38

Ny fitsaohantsika ny Ray any An-danitra sy an’i Jesoa Kristy

Ny fitsaohana ny Ray any An-danitra sy an’i Jesoa Kristy dia natao hitondra antsika hanakaiky kokoa Azy Ireo. Saingy inona no miseho raha hadinontsika ny tena antony itsaohana? Ny Zôramita izay mpikambana teo aloha tao amin’ny Fiangonana marin’ Andriamanitra dia nanomboka nino fampianaran-diso. Ny fomba fitsaohana diso teo anivon’izy ireo dia nampiala ny fon’izy ireo tamin’ Andriamanitra ary nahatonga azy ireo hitsara tsy ara-drariny sy hifampitondra amin’ny fomba tsy araka ny tokony ho izy. Ity lesona ity dia afaka manampy anao hanatsara ny fifandraisanao amin’ny Ray any An-danitra sy i Jesoa Kristy rehefa manombana ny fiantraikan’ny avonavona sy fanetrentena eo amin’ny fifandraisanao amin’Izy Ireo sy amin’ny hafa ianao.

Mampitaha sy mampifanohitra. Ao amin’ny soratra masina, matetika ny fotopampianarana na fitsipika iray no voazava amin’ny alalan’ny fampitahana na fampifanoherana azy amin’ny zavatra hafa. Ny fandinihana ireo fitoviana sy ireo fahasamihafana eo amin’ireo fampianarana,na ny olona, na ireo zava-niseho dia afaka manazava lalina kokoa fahamarinana ao amin’ny filazantsara. Miezaha manasongadina ohatra rehefa mampiditra fampitahana toy izany ny mpanoratra izay nentanim-panahy.

Fanomanana ny mpianatra: Mba hiomanana amin’ny fandalinana ny Almà 31, dia asao ny mpianatra hivavaka ka hifantoka amin’ny zavatra ilain’ny hafa.

Ireo sahanasa fianarana azo atao

Manombana ny vokatry ny fitsaohantsika

Mba hanampiana ny mpianatra hieritreritra ny fitsaohana ho fomba iray anehoana fitiavana sy fanolorantena ho an’ Andriamanitra, dia hevero ny hampiseho ireto sary manaraka ireto na sary hafa izay safidinao. Asao ny mpianatra hisaintsaina ny mety ho fiantraikan’ny fitsaohana tamin’ny alalan’ireo fomba ireo teo amin’ny fifandraisan’izy ireo amin’ Andriamanitra.

Azo atao ny mangataka ny mpianatra hisaintsaina ireto fanontaniana manaraka ireto sy hanoratra ao amin’ny diary fandalinan’izy ireo ny eritreritra rehetra momba ny fanatsarana ny fifandraisan’izy ireo manokana amin’ Andriamanitra amin’ny alalan’ny fitsaohana. Aza asaina mizara ny valintenin’izy ireo ny mpianatra.

• Impiry ianao no mahatsapa fa miezaka amin-kitsimpo maneho ny fitiavanao an’ Andriamanitra amin’ny alalan’ny fitsaohanao?

• Amin’ny lafiny inona, raha misy, no ahatsapanao hoe mety tsy dia amin-kitsimpo loatra na mifantoka amin-javatra tsy izy ny fitsaohanao?

Ny Zôramita dia nitsaoka tao amin’ny Rameomtôma

Rehefa hitan’i Almà sy ny rahalahiny fa namilivily ny lalan’ny Tompo ny Zôramita, dia nandeha nankany Antiônôma izy ireo. Tany no nahitan’izy ireo ny Zôramita nitsaoka tamina fomba mbola tsy hitan’izy ireo hatramin’izay (jereo ny Almà 31:12).

Hevero ny hampiseho ity sary manaraka ity sy hanasa ny mpianatra hanazava ny zavatra nataon’ny olona. Azon’ny mpianatra atao ny mamaky ny Almà 31:21 mba hahitana ny anaran’ilay fijoroana nivavahan’izy ireo.

Ampio ny mpianatra hampivelatra ilay fahaiza-manao amin’ny fandalinana soratra masina dia ny mampitaha sy mampifanohitra izany. Azo atao ny mizara ny mpianatra ho vondrona sy manasa azy ireo hanao fampitahana ny vavaky ny Zôramita sy ny vavaka natolotr’i Almà. Azonao atao ny manao tabilao toy ity manaraka ity eny amin’ny solaitrabe sy manasa ny mpianatra hanoratra ny zavatra hitan’izy ireo mandritra ny lesona. Ampio izy ireo hanao fampitahana ny (1) zavatra ifantohan’ilay vavaka, (2) ny zavatra voalaza, ary (3) ny antony.

Ny vavaky ny Zôramita	Ny vavak’i Almà

Vakio ny Almà 31:13–23, ary fenoy amin’ny zavatra nanaitra anao momba ny fomba nitsaohan’ny Zôramita ny tsanganana havia amin’ilay tabilao. Azonao atao ihany koa ny mijery ilay horonan-tsary hoe “Alma et ses frères prêchent la parole de Dieu parmi les Zoramites” manomboka eo amin’ny mari-potoana 0:22 hatramin’ny 3:58, ao amin’ny ChurchofJesusChrist.org.

• Inona no tsikaritrao momba ny fomba nitsaohan’ny Zôramita? Inona araka ny eritreritrao no fiantraikan’izany tamin’ny fifandraisan’izy ireo tamin’ Andriamanitra?

Nivavaka ho an’ny Zôramita i Almà

Rehefa nahita ny zavatra tsy mety teo anivon’ny Zôramita i Almà, dia nivavaka ho azy ireo.

Vakio ny Almà 31:24–38 hitadiavana ny zavatra nifantohan’i Almà, ny zavatra tsapany, ary ny faniriany tao anatin’ny vavaka nataony. Fenoy miainga amin’ny zavatra hitanao ny tsanganana havanana amin’ilay tabilao. Izany dia afaka manampy anao hampifanohitra ny vavak’i Almà amin’ny vavaky ny Zôramita.

Azonao atao ny mijery ilay horonan-tsary hoe “Alma et ses frères prêchent la parole de Dieu parmi les Zoramites” manomboka eo amin’ny mari-potoana 4:03 hatramin’ny 5:55, ao amin’ny ChurchofJesusChrist.org. Ao amin’io ampahany amin’ilay horonan-tsary io dia haheno ny vavak’i Almà ianao eo am-pahitana ny ezaka nataon’i Almà sy ny namany mba hampianatra ny Zôramita.

Hevero ny hanasa ny mpianatra hampiasa ilay tabilao mba hizarana ny zavatra ianaran’izy ireo amin’ny alalan’ny fampifanoherana ny vavak’i Almà amin’ny an’ny Zôramita.

Azonao atao ny manomana ny mpianatra hianatra avy amin’ity teny nataon’ny Filoha Uchtdorf manaraka ity amin’ny alalan’ny fametrahana fanontaniana toy ny hoe “Inona no fiantraikan’ny avonavona tamin’ny Zôramita?” sy ny hoe “Inona no zavatra nampiavaka ny fihetsika nasehon’i Almà?”

Nampianatra izao ny Filoha Dieter F. Uchtdorf, izay tao amin’ny Fiadidiana Voalohany tamin’izany:

Rehefa rakotry ny fieboeboana ny fontsika dia manao fahotana goavana isika, satria mandika ilay didy roa lehibe isika. Raha tokony hitsaoka an’ Andriamanitra sy hitia ny hafa isika dia mamoaka fa ny tena tanjontsika mazava dia ny hitsaoka sy hitia—ny endrika hitantsika momba antsika eo amin’ny fitaratra. Ota lehiben’ny fanambonian-tena ny fieboeboana. Toy ny Rameomtôma manokana izany, ho an’ny maro, izay toerana masina hanamarin-tena amin’ny fitsiriritana, fahalianan-karena ary fieboeboana. (Dieter F. Uchtdorf, “Ny fieboeboana sy ny fisoronana,” Liahona, nôv. 2010, 56)

Vakio ny Almà 32:1–5 hitadiavana ny fomba nitondran’ny Zôramita olona.

• Ahoana no fomba nitondran’ny Zôramita ny hafa?

• Ahoana no fahatsapan’i Almà momba ny hafa sy ny fomba nitondrany azy ireo? (jereo ny Almà 31:1–2, 24–25, 34–35).

• Inona avy ireo fitsipika azontsika ianarana momba ny vokatry ny avonavona na ny fanetrentena?

Fitsipika iray azontsika ianarana ny hoe misy fiantraikany amin’ny fifandraisantsika amin’ Andriamanitra sy ny hafa ny avonavona na ny fanetrentenantsika.

• Ahoana araka ny eritreritrao no ahafahan’ny avonavona na ny fanetrentenantsika hisy fiantraikany amin’ny fomba fitsaohantsika ny Ray any An-danitra sy an’i Jesoa Kristy?

• Nahoana araka any eritreritrao no misy fiantraikany amin’ny fomba itondrantsika ny hafa ny avonavontsika na ny fanetrentenantsika?

• Inona no ianaranao avy amin’i Almà momba ny fanetrentena? Inona no nampianarin’i Jesoa Kristy anao momba ny fanetrentena?

Misafidiana fomba roa na telo mety ho azontsika anehoana fanetrentena amin’ny fomba itsaohantsika an’ Andriamanitra. Soraty tsirairay ao amin’ny diary fandalinanao izany.

Asao hisaintsaina ity manaraka ity ny mpianatra. Mety ho azonao atao ny mamporisika azy ireo hanoratra ao amin’ny diary fandalinan’izy ireo na hampiditra fanamarihana ao amin’ny soratra masina amin’ny endrika nomerikan’izy ireo.

Makà fotoana hanombanana ny fomba itsaohanao manokana ny Ray any An-danitra sy an’i Jesoa Kristy ary ny fiantraikan’ny fitsaohanao eo amin’ny fifandraisanao amin’Izy Ireo. Saintsaino ihany koa ny fiantraikan’ny avonavona sy ny fanetrentena amin’ny fomba itondranao ny hafa. Manapaha hevitra raha misy fanovana tianao hatao.

Hevero ny hizara fijoroana ho vavolombelona momba ny fiantraikan’ny fitsaohanao tamin’ny fahatsapanao momba an’ Andriamanitra sy ny fomba itondranao ny hafa.

Fanazavana sy fampahalalana avy amin’ny zava-miseho

Nahoana Andriamanitra no manasa antsika hitia sy hitsaoka Azy?

Nampianatra izao ny Filoha Dieter F. Uchtdorf, izay tao amin’ny Fiadidiana Voalohany tamin’izany:

Andriamanitra ilay Ray Mandrakizay dia tsy nanome izany didy lehibe voalohany izany satria ilainy hitia Azy isika. Ny heriny sy ny voninahiny dia tsy mihena raha toa ka tsinontsinoavintsika, na lavintsika, na tsiratsiraina mihitsy aza ny anarany. Ny fitaomany sy ny fanapahany dia miitatra mihoatra ny fotoana sy ny habaka, tsy miankina amin’ny fanekentsika, ny fankatoavantsika, na ny fiderantsika Azy.

Tsia, tsy mila antsika mitia Azy Andriamanitra. Saingy isika kosa dia tena mila mitia an’ Andriamanitra!

Satria ny zavatra tiantsika no mamaritra ny zavatra katsahintsika.

Ny zavatra katsahintsika dia mamaritra ny zavatra eritreretintsika sy ataontsika.

Ny zavatra eritreretintsika sy ataontsika dia mamaritra ny hoe iza isika—ary ho lasa inona isika. (Dieter F. Uchtdorf, “The Love of God,” Liahona, Nov. 2009, 21–22)

Ahoana no ahafahantsika mitsaoka amin’ny lafiny rehetra eo amin’ny fiainantsika?

 topics.ChurchofJesusChrist.org.

Ahoana no ahafahako manatsara ny vavaka ataoko?

Ny Loholona Joseph B. Wirthlin (1917–2008) tao amin’ny Kolejin’ny Apôstôly Roambinifolo, dia nametraka fanontaniana tena tsara maromaro ary nanome ity torohevitra ity:

Toa renao sy tsapanao ho mitovy foana izany ve ireo vavaka ataonao indraindray? Efa nanao vavaka tsy natao tamim-piheverana tsara ve ianao, ary voalaza toy ny avoakan’ny milina izany ireo teny? Leo amin’ny vavaka ataonao ve ianao indraindray?

Mendrika ny horaharahian’ny Ray any An-danitra ve ny vavaka izay tsy nifantohana firy nataonao? Rehefa hitanao fa mivavaka amim-pahazarana fotsiny ianao dia miatoa ary mieritrereta. Saintsaino kely ireo zavatra izay tena anananao fankasitrahana. Tadiavo izy ireo. Tsy voatery ho lehibe sy manan-daza izy ireo. Indraindray dia tokony haneho ny fankasitrahantsika amin’ireo zavatra kely sy tsotra toy ny fofon’ny orana, ny tsiron’ny sakafo tianao indrindra, na ny feon’ny olona akaikin’ny fo iray isika (Joseph B. Wirthlin, “Improving Our Prayers,” Ensign, Mar. 2004, 26)

Nahoana no zava-dehibe ny mivavaka ho an’ny hafa?

Nampianatra izao ny Loholona David A. Bednar ao amin’ny Kôlejin’ny Apôstôly Roambinifolo:

Tsara sy azo atao ny mangataka amin’ny Ray any An-danitra ireo fitahiana irintsika eo amin’ny fiainantsika manokana. Kanefa ny mivavaka amim-pahazotoana ho an’ny hafa, na ireo izay tiantsika na ireo izay maneho toetra ratsy amintsika, dia singa iray lehibe amin’ny vavaka manan-danja ihany koa. … Mampitombo ny fahaizantsika mandre sy mihaino ny feon’ny Tompo ny fivavahana ho an’ny hafa amin’ny fahavitrihan’ny fanahintsika manontolo. (David A. Bednar, “Pray Always,” Liahona, Nov. 2008, 43).

Sahanasa fianarana fanampiny

Mitsaoka amin’ny fomban’ny Tompo

Ao amin’ny Toriteny teo an-Tendrombohitra sy tao amin’ny tempolin’i Soafeno, i Jesoa Kristy dia nampianatra ny fomba (sy ny fomba tsy tokony hatao) mahakasika ny fitsaohana (jereo ny Matio 6:1–18; 3 Nefia 13:1–18). Azon’ny mpianatra atao ny mampitaha ny fampianaran’i Jesoa Kristy amin’ny zavatra nataon’ny Zôramita. Hevero ny hangataka ny mpianatra hitady ny “valisoa” izay miaraka amin’ny fomba safidintsika hitsaohana.

Ny ohatra iray amin’ny fitsaohana mety amin’ny andro maoderina dia nozarain’ny Loholona Dean M. Davies (1951–2021) tao amin’ny Fitopololahy ao amin’ny “Ireo fitahiana entin’ny fitsaohana” (Liahona, nôv. 2016, 93–95.) Azonao atao ny manasa ny mpianatra hitady ny zavatra tsikaritry ny Loholona Davies raha teo am-panatrehana fivoriana fanasan’ny Tompo izy.

Manatsara ny vavaka ataontsika manokana

Mety hahasoa ny mpianatra ny fanombanana ny vavak’izy ireo manokana. Hevero ny hangataka azy ireo hisaintsaina ny hatetiky ny fifantohan’ny vavak’izy ireo amin’ny tenan’izy ireo sy ny hatetiky ny fivavahan’izy ireo ho an’ny hafa. Azo atao ihany koa ny mangataka ny mpianatra hieritreritra momba ny fahasamihafan’ny vavaka ataon’izy ireo isaky ny mivavaka. Rehefa avy mahazo fotoana hisaintsainana izy ireo, dia hevero ny hampiseho sy hamaky teny nambara momba ny vavaka mba hanampiana azy ireo hisaintsaina izay fiovana rehetra mety ho azon’izy ireo atao. Ny teny ambara azonao ampiasaina dia hita ao amin’ny fizarana hoe “Fanamarihana sy fampahalalana avy amin’ny zava-miseho”. Azonao atao ihany koa ny manasa ny mpianatra hamaky ny Matio 6:9–13 sy hitady ny zavatra nanasan’i Jesoa Kristy ny mpianany mba hampidirina ao amin’ny vavak’izy ireo.