Алма 34:17–41

Энэ амьдрал бол Бурхантай уулзахаар бэлтгэх үе юм

элсэн цаг

Та энэ амьдралын дараа Тэнгэрлэг Эцэгтэй уулзвал ямар байх бол гэж бодож байсан уу? Амюлек зорамчуудад “энэ амьдрал бол … Бурхантай уулзахаар бэлтгэх үе юм” (Алма 34:32) гэдгийг сануулж, наманчлах өдрөө хойшлуулахгүй байхыг тэднээс гуйсан. Энэ хичээл Бурхантай уулзахаар бэлтгэх хичээл зүтгэлд тань туслах зорилготой.

Суралцагчдад сайн мэдээний зарчмууд тэднийг Есүс Христ рүү хэрхэн чиглүүлж байгааг олж харахад тусал. Сайн мэдээний сургаал, зарчмуудыг заахдаа эдгээр үнэнийг Тэнгэрлэг Эцэг, Есүс Христтэй холбо. Сайн мэдээний зарчмуудын дагуу амьдрах нь суралцагчдад Аврагчийн хүч, нигүүлсэл, ач ивээлийг олж авахад хэрхэн тусалж болох жишээг өг. Тэднийг итгэлээр үйлдэж, эдгээр үнэнээр амьдрахыг сонгоход урамшуулан дэмж.

Суралцагчийн бэлтгэл: Суралцагчдыг Алма 34:32-ыг уншаад, шүлэг дэх зөвлөгөөг дагах арга замуудын талаар бодоход урь. Тэд Бурханы оршихуйд эргэж очиход бэлтгэх зарим арга замыг болон илүү сайн бэлтгэлтэй байхад нь тусалж болох өөрчлөлтүүдийг бичиж болно.

Боломжит суралцах үйл ажиллагаа

Бэлтгэлийн ач холбогдол

Шалгалт, тоглолт, спортын арга хэмжээ зэрэг амьдралдаа бэлдэх шаардлагатай байсан зүйлийнхээ талаар бод.

Суралцагчдыг дараах асуултуудыг хамтрагчтайгаа эсвэл жижиг бүлгээрээ ярилцахад урь.

• Бэлтгэлтэй байхад тань тусалсан ямар арга хэрэглэсэн бэ?

• Бэлтгэлийг хэцүү болгосон эсвэл хэцүү болгох зарим зүйл нь юу байсан бэ?

Ядуугаасаа болж сүмээс хөөгдсөн хэсэг зорамчуудад Алма, Амюлек хоёрын номлож байсныг сана. Эдгээр зорам хүн өмнө нь Есүс Христэд итгэдэггүй байсан (Алма 31:16-г үзнэ үү) учраас Алма, Амюлек хоёр Аврагчийн тухай гэрчлэлийг ургуулж болохын тулд зүрх сэтгэлдээ зай гаргаж өгөхийг тэдэнд уриалав (Алма 32:27–28; 34:4–6-г үзнэ үү). Амюлек хүмүүст зааж байхдаа бид бүгдийн бэлэн байх ёстой зүйлийг хуваалцсан.

Алма 34:32-ыг уншаад, Амюлекийн юу заасныг олж мэд.

Та дараах тодруулсан мэдэгдлийг самбар дээр бичиж болно. Суралцагчдыг 32-р шүлэг дэх үнэнийг тэмдэглэхэд урамшуулан дэмж.

Амюлекийн сургаалаас бид Энэ амьдрал бол Бурхантай уулзахаар бэлтгэх үе юм гэдгийг сурч мэдсэн.

• Та Бурхантай уулзахаар бэлтгэж байгаа хүнээс ямар хандлага, зан авирыг хүлээж болох вэ?

Суралцагчдад дараах санаануудыг бодож, өөрийгөө үнэлэх цаг гаргаж өг. Суралцагчид бодлоо хуваалцах шаардлагагүй.

Бурханы оршихуйд эргэж очих мэдрэмжээ тунгаан бодоход хэдэн хором зарцуул. Та Түүний оршихуйд зохистой эргэж очихыг хичээж байгаа эсэхээ, тэр зорилгод тань юу саад болж болох талаар бод. Үргэлжлүүлэн судалж байхдаа Бурхантай уулзахаар илүү сайн бэлтгэхэд тань туслах Алма 34-ийн сургаалыг ашиглах арга замуудын талаар бод.

Бурхантай уулзахаар бэлтгэх арга замууд

Алма 34 дэх Амюлекийн ихэнх сургаал Бурхантай уулзахаар хэрхэн одоо бэлтгэх талаар ойлгоход бидэнд тусалдаг.

Суралцагчдыг дараах шүлгийг судлаад, Бурхантай уулзахаар бэлтгэхэд туслах сургаалуудыг олж мэдэхэд урь. Суралцагчдыг жижиг бүлгүүдэд хуваагаад, бүлэг тус бүрд хамтдаа судлах шүлгийн хэсгийг оноож өг. Жишээлбэл: Нэг бүлэг нь 17–27-р шүлэг-ийг, нөгөө бүлэг нь 28–34, өөр нэг бүлэг нь 37–41-ийг судалж болно.

Дараах шүлгүүдээс дор хаяж гурвыг нь сонгон судлаад, Бурхантай уулзахаар бэлтгэхэд туслах сургаалыг олж мэд.

Алма 34:17–27

Алма 34:28–29

Алма 34:30–31

Алма 34:33–34

Алма 34:37–39

Алма 34:40–41

Эдгээр шүлгийг судалж байхдаа юу сурч мэдсэн талаар нь суралцагчидтай ярилц. Дараах асуултуудыг ярилцлагынхаа нэг хэсэг болгон ашиглаж болно.

• Амюлек эдгээр шүлэгт Бурхантай уулзахаар бэлтгэхэд тань туслах юуг заасан бэ?

• Эдгээр сургаалыг дагах нь Бурханы оршихуйд үнэ цэнтэйгээр эргэж очиход хэрхэн илүү бэлтгэж, тусалдаг вэ?

• Та эдгээр шүлгээс Тэнгэрлэг Эцэг, Есүс Христ хоёрын зан чанар, хүслийн талаар юу сурч мэдсэн бэ?

Жишээлбэл: Суралцагчид өмнөх асуултад “бид хаана ч байсан, юу хүсэхээс үл хамааран Бурханд хандаж болно” (17–27-р шүлэг-ийг үзнэ үү) хэмээн хариулж болно. Мөн биднийг наманчлахад Аврагч тэр даруй адислахыг тэд онцолж болно (31-р шүлэг-ийг үзнэ үү).

Наманчлахаа бүү хойшлуул

33-р шүлэг дэх Амюлекийн хэлсэн “эцсийг хүртэл наманчлалын өдрөө бүү хойшлуулаасай” хэмээх мэдэгдлийг үзнэ үү. Судар дээрээ энэ үг хэллэгийг тэмдэглэж ав.

• Зарим хүн яагаад наманчлалаа хойшлуулахад уруу татагддаг вэ?

Алма 34:33–35-ыг уншаад, Амюлек биднийг наманчлахаа бүү хойшлуулаасай гэж хүссэн шалтгааныг олж мэд.

Суралцагчдыг эдгээр шүлгийг уншсаны дараа хэн нэгэнд төрөх асуулт, санаа зовоосон асуудлыг тодорхойлоход урих нь тустай байж болно. Суралцагчдын хариултыг самбарт жагсаан бич. Суралцагчид дараах эх сурвалжийг судлахдаа тэдгээр асуулт, санаа зовоосон асуудлыг шийдэхэд туслах сургаалуудыг тодорхойлж болно.

Бидэнд сүнсний дэлхийд наманчлах боломжтой гэж заасан (Сургаал ба Гэрээ 138:31, 33, 58-ыг үзнэ үү). Гэвч бид мөнх бус амьдралд наманчлах нь ямар чухал болохыг судрын болон хожмын үеийн бошиглогчид онцолсон байдаг. Арван хоёр төлөөлөгчийн чуулгын ахлагч Мэлвин Ж.Баллард [1873–1939] дараах удирдамжийг өгсөн.

Ахлагч Мэлвин Ж.Баллард

Махан бие, сүнс хоёр нэгдмэл байх үед ялан дийлж, Их Эзэнд үйлчлэхэд илүү амар хялбар байдаг. Энэ үед хүн илүү зөөлөн, мэдрэмтгий байдаг юм. … Энэ амьдрал бол наманчлах хугацаа болой. (Melvin J. Ballard: Crusader for Righteousness (1966), 212–213-ыг Даллин Х.Өүкс, “Наманчлалаар цэвэршүүлэгдсэн нь,” 2019 оны 4-р сарын Ерөнхий чуулган, 111-д эш татсан)

• Наманчлахаа хойшлуулах ёсгүйг ойлгоход танд 33–35-р шүлэг болон энэ мэдэгдэл хэрхэн тусалж байна вэ?

Наманчлах нь Бурханы оршихуйд эргэж очиход бэлтгэх чухал хэсэг юм. Зарим нүглээ ялан дийлэхэд хэцүү байсан ч наманчлахыг хичээдэг хүмүүст Их Эзэн хайраар дүүрэн нигүүлсэл үзүүлдгийг сана.

Арван хоёр төлөөлөгчийн чуулгын ахлагч Нийл Л.Андэрсэн ийн заасан.

Ахлагч Нийл Л.Андэрсэн

Заримдаа бид наманчлалдаа болон Христтэй улам илүү адилхан болох өдөр тутмын хүч чармайлтдаа адил нийтлэг хүндрэл бэрхшээлтэй тулгардаг. … Санаагаар бүү уна. Хэрэв та наманчлахыг чармайж, хичээл зүтгэл гарган хөдөлмөрлөж байгаа бол, наманчлах үйл явцад байгаа нь тэр. (Нийл Л.Андэрсэн, “Наманчил….” би та нарыг эдгээж болохын тулд,” 2009 оны 10-р сарын Ерөнхий чуулган, 48)

Дараах асуултуудыг асуухаасаа өмнө суралцагчдыг ичиж зовсон эсвэл өөрчлөгдөх хүсэлгүй байгаа зэрэг янз бүрийн шалтгааны улмаас наманчлахаас зайлсхийдэг найзтай байна гэж төсөөлөхөд урь.

Эдгээр асуултыг ангиараа ярилцахын өмнө суралцагчид судлах тэмдэглэл дээрээ асуултад хариулж бодлоо цэгцлэх нь тустай байж болно.

• Та Алма 34:30–38 дээрх Амюлекийн сургаалаас амьдралынхаа төгсгөлд наманчилж, өөрчлөгдөхийг хүсэж буй хүнд тусалж болох юуг хуваалцаж болох вэ?

• Энэ хүн үүнийг хийхгүй байх шалтгаан байж болох ч гэсэн наманчлалыг яагаад үнэ цэнтэй гэж та бодож байна вэ?

• Энэ хүнийг эртхэн, үе үе наманчлахад урамшуулж чадах Тэнгэрлэг Эцэг, Есүс Христ хоёрын талаар та юу мэдэх вэ?

Суралцагчдыг Бурхантай уулзахад илүү бэлтгэлтэй байхыг хичээх үед Аврагчийн тэдэнд өгч чадах тусламжийн мөн өнөөдөр ярилцсан үнэнүүдийн талаар гэрчил.

Бурхантай уулзахаар бэлтгэж мөн наманчлахаа хойшлуулахгүй байх талаар өнөөдөр сурч мэдэж, мэдэрсэн зүйлээ эргэцүүлэн бод. Та өнөөдөр сурч мэдсэн зүйлийнхээ ачаар юу хийхийг хүсэж байгаагаа бод. Төрсөн бодол, сэтгэгдлээ судлах тэмдэглэлдээ бичиж тэмдэглэ.

Тайлбар ба нөхцөл байдлын талаарх мэдээлэл

Наманчлахаа хойшлуулах хүслээ хэрхэн ялан дийлж болох вэ?

   

Миний хайртай хүмүүс үнэнээс болоод бүү гомдоосой гэж хүсдэг болохоор би наманчлахаас айдаг бол яах вэ?

Далын ахлагч Маттью Л.Карпэнтэр ийн тайлбарласан.

Ахлагч Маттью Л.Карпэнтэр

Би наманчлахыг эрэлхийлж буй хүмүүстэй зөвлөлдөж байхдаа, гэм нүгэл дотор амьдарч байгаа хүмүүст зөв шийдвэр гаргахад хэцүү байдгийг мэдсэн. … Хайртай хүмүүс нь өөрсдийнх нь юу хийснийг мэдвэл хайрлахаа болино эсвэл орхин явна гэж айж явдгаа хуваалцаж байхыг би заримдаа сонсдог. Тэд ийм бодолтой үедээ зүгээр л чимээгүй өнгөрч, наманчлахаа хойшлуулах шийдвэр гаргадаг. Тэд хайртай хүмүүсээ цаашид гомдоохгүйн тулд наманчлахгүй байх нь илүү дээр гэж буруу байдлаар мэдэрдэг. Тэд оюун бодолдоо одоо наманчлалын үйл явцаар явснаас энэ амьдралынхаа дараа шаналах нь дээр гэж үздэг. Ах, эгч нар аа, наманчлахаа хойшлуулах нь хэзээ ч зөв санаа байдаггүй. Дайсан ихэнхдээ биднийг Есүс Христэд итгэх итгэлийнхээ дагуу үйлдэхээс сэрэмжлүүлэхийн тулд айдсыг ашигладаг.

Хайртай хүмүүс нь нүгэлт үйлдлийн талаарх үнэнтэй тулгарах үедээ маш их зовж шаналж магадгүй ч чин сэтгэлээсээ наманчлагч нүгэлтэнд өөрчлөгдөхөд, мөн Бурхантай эвлэрэхэд нь туслахыг ихэнхдээ хүсдэг. Үнэндээ, гэм нүгэл үйлдсэн хүнийг буруугаа хүлээхэд хайрладаг хүмүүс нь тойрон хүрээлж, гэм нүглээсээ ангижрахад нь тусалснаар сүнслэг эдгээлт хурдасдаг. (Маттью Л.Карпэнтэр, “Чи эрүүл болохыг хүсэж байна уу?” 2018 оны 10-р сарын Ерөнхий чуулган, 103–104).

Алма 34:34. Энэ амьдралаас гарах цагт “мөнхүү тэр сүнс” та нарын биеийг эзэмшинэ гэдэг нь юу гэсэн утгатай вэ?

Сүнснүүд дэлхийгээс өөрсдийн сүсэг бишрэлтэй байх төрх байдлаа эсвэл зөв шударгын эсрэг байх дайсагналаа хамт авч явдаг (Aлмa 34:34-ийг үзнэ үү). Тэд дэлхий дээр амьдарч байсан шигээ адил хүсэл эрмэлзэл, тэмүүлэлтэй байдаг. (Сайн мэдээний сэдвүүд, “Сүнсний дэлхий,” topics.ChurchofJesusChrist.org)

Нэмэлт суралцах үйл ажиллагаа

Хичээлийг эхлүүлэх өөр хувилбар: Энэ бол таны дөрвөн минут

Энэ амьдралд бэлтгэхийн чухлыг үзүүлэхийн тулд “Таны дөрвөн минут” видеог цагийн код 0:53-аас 4:01 хүртэл хуваалц. Арван хоёр төлөөлөгчийн чуулгын ахлагч Гари Э.Стивэнсон Олимпын тамирчин Ноэлл Пикус-Пэйсийн түүхийг мөн түүний олон жилийн болгоомжтой, хүнд хэцүү бэлтгэл сургуулилт дөрвөн минутад гүйцэтгэгддэг талаар хуваалцжээ. Хэрэв видеог үзэх боломжгүй бол суралцагчид ахлагч Стивэнсоны (“Таны дөрвөн минут,” 2014 оны 4-р сарын Ерөнхий чуулган, 101–104) дээр хэлсэн үгийн 3-11-р догол мөрийг уншиж болно.

Өөр эхлэл: Та бэлэн үү?

Далын ахлагч Жэк Н.Жэрард Бурхантай уулзахад бэлэн эсэхээ эргэцүүлэн бодох хэрэгтэй болсон туршлагаа хуваалцжээ. “Цаг нь ирлээ” видеог цагийн код 0:00-ээс 1:41 хүртэл үз. Хэрэв видеог үзэх боломжгүй бол суралцагчид ахлагч Жэрардын (“Цаг нь ирлээ,” 2018 оны 10-р сарын Ерөнхий чуулган, 110–112) дээр хэлсэн үгийн эхний гурван догол мөрийг уншиж болно.

• Тэр мөчид танд ямар бодол, мэдрэмж, асуулт төрж болох вэ?

• Тийм зүйлийг даван туулах нь хүний амьдралд хандах хандлагыг хэрхэн өөрчилнө гэж та бодож байна вэ?

Алма 34:31. Тэр даруй мэдэрсэн тайвшрал

Суралцагчдыг 31-р шүлэг дээрх “тэр даруй” гэсэн үгийг тэмдэглэхэд урь. Суралцагчид энэ үгийг 33–34-р шүлэгт бичигдсэн, зарим хүн наманчлахаа хойшлуулахад уруу татагддаг гэсэнтэй харьцуулж болно. Хүн наманчилж, Аврагчид хандахаар сонгоход Түүний Цагаатгал амьдралд нь тэр даруй хэрэгжиж эхэлдэг гэдгийг ойлгоход суралцагчдад тусал. Хүмүүсийг Аврагчид хандах үед Тэрээр тэр даруй үйлдэл хийж байгаа талаарх нэмэлт цэдгийг Алма 36:16–21; Матай 8:2–3; 14:25–31; 20:30–34-ийг эсвэл Иохан 5:2–9-өөс суралцагчдад харуулах талаар бодож үз.