Alma 36

“Hindi Ko na Naalaala pa ang Aking mga Pasakit”

Ang pagbabahagi ng mga espesyal na espirituwal na karanasan sa mga mahal natin sa buhay ay maaaring pagmulan ng lakas para sa kanila at sa atin. Sa pakikipag-usap sa kanyang anak na si Helaman, isinalaysay ni Alma ang kanyang karanasan na nakakita siya ng isang anghel, ang pagdurusang naramdaman niya dahil sa kanyang mga kasalanan, at nakahanap ng kaligtasan sa pamamagitan ni Jesucristo. Ang lesson na ito ay naglalayong tulungan kang bumaling kay Jesucristo nang may pananampalataya at madama ang kagalakan ng Kanyang pagliligtas.

Kasanayan sa pag-aaral—pagmamarka ng mga passage. Ang pagmamarka ng mga banal na kasulatan ay makatutulong sa mga estudyante na magkaroon ng mga makabuluhang ugnayan at mapanatili ang natutuhan nila. Maaari nilang salungguhitan, i-shade, o i-outline ang mahahalagang salita o parirala. Ang mga electronic version ng mga banal na kasulatan ay may kasamang mga makatutulong na tool para sa pagmamarka ng mga banal na kasulatan.

Paghahanda ng estudyante: Sabihin sa mga estudyante na dumating na handang magbahagi ng halimbawa ng isang taong nakatagpo ng kapayapaan kay Cristo pagkatapos magdusa nang ilang panahon. Ano ang nakatulong sa taong ito na makatagpo ng kapayapaan?

Mga Posibleng Aktibidad sa Pag-aaral

Mga Kabaligtaran

Para simulan ang lesson na ito, tulungan ang mga estudyante na pag-isipan ang espirituwal na pagbabago at kung ano ang nagpapadali rito. Ang isang paraan para magawa ito ay isulat sa pisara ang mga sumusunod na salita at ipasulat sa mga estudyante ang kabaligtaran ng bawat isa.

Kopyahin ang sumusunod sa iyong study journal. Pagkatapos ng arrow, isulat kung ano sa palagay mo ang kabaligtaran ng bawat isa.

• Pasakit →

• Pighati →

• Kalungkutan →

Isipin kung kailan ka nagkasala at naramdaman ang nasa kaliwa. Ang damdamin bang iyon ay humantong sa inilista mo sa kanan? Ano ang nangyari para maging posible iyon?

Pagkatapos talakayin ang nasa itaas, maaari mong ipaliwanag na kapag ang mga negatibong damdamin ay sanhi ng kasalanan, tanging ang Panginoon lang ang makatutulong sa atin na mabago ang mga damdaming iyon para maging mga positibong kabaligtaran ng mga iyon.

Bigyan ang mga estudyante ng pagkakataon na tahimik na pag-isipan kung paano sila natulungan ng Panginoon na magbago noong nagkasala sila. Ipakita ang sumusunod na self-assessment at sabihin sa mga estudyante na isulat sa kanilang journal ang anumang impresyon nila habang pinag-iisipan nila ito. Maaaring ang mga ito ay mga tanong, damdamin, o pahiwatig na kumilos.

Kapag ang mga negatibong damdamin ay sanhi ng kasalanan, tanging ang Panginoon lang ang makatutulong sa atin na mabago ang mga damdaming iyon para maging mga positibong kabaligtaran ng mga iyon.

Pag-isipan kung gaano katotoo para sa iyo ang mga sumusunod na pahayag:

• Kapag nagkasala ako, alam ko kung paano bumaling sa Panginoon upang makatanggap ng kapatawaran, kapayapaan, at pag-asa.

• Tiwala ako na sa tulong ng Panginoon ay magagawa kong magbago.

• Regular akong bumabaling sa Panginoon para sa tulong na ito.

Pag-aaralan mo ngayon kung paano nabago ang matinding pagdurusa ng Nakababatang Alma sa kanyang mga kasalanan at naging kagalakan at kapayapaan nang magsumamo siya sa Tagapagligtas. Sa iyong pag-aaral, alamin kung paano ka hihingi ng tulong sa Panginoon na madaig ang kasalanan at ang mga epekto nito at makaranas ng kagalakan sa pamamagitan ni Jesucristo.

Ang malaking pagbabago ni Alma

Pagkatapos tanggihan ang ebanghelyo na itinuro sa kanila, sumama ang mga Zoramita sa mga Lamanita upang pukawin sila sa galit laban sa mga Nephita. Pagkatapos ay sinalakay ng mga Zoramita at Lamanita ang mga Nephita, na humantong sa malaking digmaan. Marami rin sa mga puso ng mga Nephita ang “nagsimulang maging matigas” laban sa salita ng Diyos (Alma 35:15). Bilang tugon sa espirituwal na paghina ng mga Nephita, sama-samang tinipon ni Alma ang kanyang mga anak upang “maibigay niya sa bawat isa sa kanila ang kani-kanyang tungkulin, nang magkakahiwalay, hinggil sa mga bagay na nauukol sa kabutihan” (Alma 35:16). Una niyang kinausap ang kanyang anak na si Helaman at ibinahagi niya ang kanyang karanasan sa pagbabalik-loob.

Ipakita ang sumusunod na larawan. Anyayahin ang mga estudyante na makipagtulungan sa ka-partner para sagutin ang sumusunod na tanong.

Ang isa pang opsiyon ay magsulat sa pisara ng mga salitang tulad ng sumusunod: Alma, mga anak ni Mosias, wasakin ang simbahan, anghel, tatlong araw. Pagkatapos ay sabihin sa magkaka-partner na ibahagi ang kuwento gamit ang bawat isa sa mga salita o parirala.

• Ano ang naaalala mo tungkol sa Nakababatang Alma at ano ang ipinapakita sa larawang ito?

Basahin ang Alma 36:6–11 at maghanap ng mga detalye na maaaring hindi mo nakita.

• Sa iyong palagay, bakit napakalakas ng epekto ng mga salita ng anghel kay Alma?

• Bukod sa pagkakita sa isang anghel, ano ang maaaring magpaunawa sa isang tao na kailangan niyang magbago?

Maaari mong tulungan ang mga estudyante na maunawaan ang kahalagahan ng pagmamarka ng mga banal na kasulatan at hikayatin silang gawin ang kasanayang ito sa lesson na ito. Kung available ang opsiyon, maaari kang magpakita ng electronic version ng mga banal na kasulatan o isang set ng papel at magpakita ng mga paraan para markahan ang mga scripture passage.

Para sa sumusunod na aktibidad, maaari mong sabihin sa mga estudyante na markahan ang mga salita at parirala sa iba’t ibang paraan. Maaaring gawin ng buong klase ang unang set ng mga talata, at ipakita sa kanila kung paano gawin ang aktibidad. Pagkatapos ay maaaring gawin ng mga estudyante ang pangalawa at pangatlong set ng mga talata nang mag-isa. Kapag tapos na sila, maaari nilang ibahagi sa kanilang ka-partner o sa klase ang nalaman nila at kung paano nila ito minarkahan.

Ang pagmamarka ng mga scripture passage ay makatutulong sa iyo na mas maunawaan at matandaan kung ano ang itinuturo ng mga banal na kasulatan. Matutulungan ka nitong ilarawan sa isipan ang mga pattern o paghahambing sa mga banal na kasulatan nang mas madali. Makatutulong din ito para mas madaling mahanap ang mahahalagang passage sa ibang pagkakataon. Maaaring kasama sa pagmamarka ang pagsalungguhit, pagbibilog, at pag-highlight ng mga salita at parirala.

Basahin ang paglalarawan ni Alma sa naranasan at nadama niya sa loob ng tatlong araw na hindi siya makagalaw sa mga sumusunod na set ng mga talata. Maaari mong markahan ang iminumungkahi.

Alma 36:12–16: mga salita o parirala na naglalarawan ng nadama ni Alma tungkol sa kanyang mga kasalanan

Alma 36:17–18: mga salita o parirala na nagsasaad ng naalala at ginawa ni Alma na humantong sa kanyang pagbabago

Alma 36:19–21: mga salita o parirala na naglalarawan sa nadarama ni Alma na kabaligtaran o salungat sa naranasan niya noong una

Bigyan ang mga estudyante ng pagkakataong ibahagi ang napansin o natutuhan nila sa pag-aaral nila ng mga talata 12–21. Kung kinakailangan, maaari mong itanong ang tulad ng “Ano ang napansin mo sa paghahambing ng damdamin ni Alma bago at pagkatapos ng kanyang pagbabago?” Maaari mong itanong ang ilan sa mga sumusunod.

• Ano ang tumimo sa iyo sa kung ano ang naging dahilan ng pagbabago ni Alma?

• Anong mga katotohanan ang matututuhan natin mula sa kanyang karanasan?

Ang isang katotohanan na matututuhan natin ay may kapangyarihan si Jesucristo na iligtas tayo mula sa pasakit ng ating mga kasalanan at puspusin tayo ng kagalakan.

• Paano inanyayahan ni Alma ang kapangyarihang magligtas ng Tagapagligtas?

Ang mga sumusunod na pahayag ay makatutulong sa mga estudyante na mas maunawaan pa ang katotohanan na nakasulat sa mga bold letter. Maaari mo ring sabihin sa mga estudyante na pag-aralan ang mga talata 24–26, at alamin kung paano nanampalataya si Alma kay Jesucristo.

Basahin ang mga sumusunod na pahayag, at pag-isipan kung paano ka matutulungan ng mga ito na mas maunawaan ang mga katotohanang natutuhan natin mula sa karanasan ni Alma. Maaari mong kopyahin ang isang parirala na gusto mong matandaan sa mga tala o margin ng iyong mga banal na kasulatan.

Ipinaliwanag ni Pangulong Boyd K. Packer (1924–2015) ng Korum ng Labindalawang Apostol:

Hindi ninyo kailangang malaman ang lahat bago magkaroon ng epekto sa inyo ang Pagbabayad-sala. Manampalataya kay Cristo; magkakaroon ito ng epekto sa araw na humiling kayo! (Boyd K. Packer, “Washed Clean,” Ensign, Mayo 1997, 10)

Itinuro ni Elder Neil L. Andersen ng Korum ng Labindalawang Apostol:

Kapag taos[-puso] nating ipinagtapat ang ating mga kasalanan, ibinalik ang kaya nating ibalik sa taong nasaktan, at tinalikuran ang ating mga kasalanan sa pamamagitan ng pagsunod sa mga utos, nasa proseso tayo ng pagtanggap ng kapatawaran. Sa paglipas ng panahon, madarama nating nababawasan ang hapis ng ating kalumbayan, napapawi “ang pagkakasala sa ating mga puso” at nagkakaroon tayo ng “katahimikan ng budhi.” (Neil L. Andersen, “Magsisi … Upang Mapagaling Ko Kayo,” Liahona, Nob. 2009, 42)

• Anong mga karagdagang kaalaman ang natamo mo mula sa mga pahayag?

Maaaring makatulong na ipaliwanag na ang tulong ni Jesucristo ay magsisimula sa sandaling hilingin natin ito ngunit ang proseso ng pagsisisi at pagpapatawad ay maaaring mas unti-unti.

Maaari mong sabihin sa mga estudyante na talakayin sa maliliit na grupo o magka-partner kung paano sila tutugon sa mga sumusunod na sitwasyon.

Ano ang sasabihin mo sa isang tinedyer na:

• Nakadarama ng matinding pighati at pasakit dahil sa kanyang mga kasalanan.

• Nakadarama na hindi matindi ang kanyang mga kasalanan at malulutas ang mga ito nang mag-isa sa paglipas ng panahon nang walang pagsisisi.

Pag-isipan sandali ang iyong sariling sitwasyon at kung paano maiaangkop ang lesson ngayon sa iyong buhay. Isipin ang isang bagay na maaari mong gawin ngayon para bumaling sa Tagapagligtas at anyayahan ang Kanyang kapangyarihang magligtas sa iyong buhay.

Maaari mong ibahagi ang iyong patotoo kung paano ka napagpala ng nagpapagaling na kapangyarihan ng Tagapagligtas at ang pagtitiwala mo sa Kanyang hangarin na maghatid ng kapayapaan at kagalakan sa buhay ng iyong mga estudyante.

Komentaryo at Impormasyon ng Konteksto

Alma 36:12–16. Ano ang ibig sabihin ng ilan sa mga salitang ginamit ni Alma?

Itinuro ni Pangulong Boyd K. Packer (1924–2015) ng Korum ng Labindalawang Apostol:

Ang salitang giniyagis ay nangangahulugang “pinahirapan.” Noong unang panahon ang bastidor ay isang framework kung saan pinahihiga ang biktima na ang bawat bukung-bukong at pulsuhan ay nakatali sa isang kidkirang naiikot upang humatak at magdulot ng di-makakayanang sakit.

Ang suyod ay isang frame na may mga pakong nakatusok. Kapag hinihila sa lupa, nakakayod nito ang lupa. Madalas na binabanggit sa mga banal na kasulatan ang tungkol sa mga kaluluwa at isipan na “sinasaktan” ng kasalanan.

Ang ibig sabihin ng pagdurusa ay “pinipilipit,” na isang paraan ng pagpaparusa na napakasakit kaya maging ang walang kasalanan ay magtatapat. (Boyd K. Packer, “The Touch of the Master’s Hand,” Ensign, Mayo 2001, 23)

Alma 36:19. Kung magsisisi ako, malilimutan ko ba ang aking mga kasalanan?

Patungkol sa alaala ng ating mga kasalanan, ipinaliwanag ni Elder Dieter F. Uchtdorf ng Korum ng Labindalawang Apostol:

Sisikapin ni Satanas na papaniwalain tayo na hindi napatawad ang ating mga kasalanan dahil naaalaala natin ang mga ito. Sinungaling si Satanas; pinalalabo niya ang ating paningin at inaakay tayo palayo sa landas ng pagsisisi at kapatawaran. Hindi nangako ang Diyos na hindi na natin maaalaala ang ating mga kasalanan. Ang pag-alaala ay makatutulong sa atin upang hindi na natin maulit pa ang gayunding pagkakamali. Ngunit kung mananatili tayong totoo at tapat, ang alaala ng ating mga kasalanan ay unti-unting malilimutan sa paglipas ng panahon. Bahagi ito ng kinakailangang proseso ng pagpapagaling at pagpapadalisay. Nagpatotoo si Alma na matapos siyang magsumano kay Jesus para humingi ng awa, natatandaan pa rin niya ang kanyang mga kasalanan, ngunit ang alaala ng kanyang mga kasalanan ay hindi na nakabagabag at nagpahirap sa kanya, dahil alam niyang napatawad na siya (tingnan sa Alma 36:17–19). (Dieter F. Uchtdorf, “Hangganan ng Ligtas na Pagbalik,” Liahona, Mayo 2007, 101)

Paano maihahambing ang pagdurusa sa pagsisisi sa pagdurusang mararanasan natin kung hindi tayo magsisisi?

Itinuro ni Elder D. Todd Christofferson ng Korum ng Labindalawang Apostol:

Ang anumang pasakit na nagtulak sa atin na magsisi ay di-mapapantayan ang pagdurusang kailangan upang matugunan ang hinihingi ng katarungan para sa mga kasalanang hindi pa napagsisihan. Bahagyang nangusap ang Tagapagligtas tungkol sa dinanas Niya upang matugunan ang hinihingi ng katarungan at mabayaran ang ating mga kasalanan, gayunman ito ang Kanyang ipinahayag:

“Sapagkat masdan, ako, ang Diyos, ay pinagdusahan ang mga bagay na ito para sa lahat, upang hindi sila magdusa kung sila ay magsisisi;

“Subalit kung hindi sila magsisisi sila ay kinakailangang magdusa na katulad ko;

“Kung aling pagdurusa ay dahilan upang ang aking sarili, maging ang Diyos, ang pinakamakapangyarihan sa lahat, na manginig dahil sa sakit, at labasan ng dugo sa bawat pinakamaliit na butas ng balat, at magdusa kapwa sa katawan at sa espiritu—nagnais na kung maaari ay hindi ko lagukin ang mapait na saro” (D&T 19:16–18). (D. Todd Christofferson, “Ang Banal na Kaloob na Pagsisisi,” Liahona, Nob. 2011, 40)

Mga Karagdagang Aktibidad sa Pag-aaral

Chiasmus

Maaari mong tulungan ang mga estudyante na maunawaan na ang Alma 36 ay halimbawa ng isang anyo ng literatura ng mga Hebreo na kilala bilang chiasmus. Sa chiasmus, ang mga salita o ideya ay inaayos ayon sa pagkakasunud-sunod nito at pagkatapos ay inuulit nang pabaliktad. Binibigyang-diin ng pag-uulit na ito ang mahahalagang ideya at salita, at kadalasan, ang pangunahing ideya ng manunulat ay nasa sentro ng chiasmus.

Sa chart sa ibaba, pansinin na ang pinakamahalagang mensahe ng chiasmus ay matatagpuan sa Alma 36:17–18, nang bumaling si Alma kay Jesucristo para sa kaligtasan.

Kung pipiliin mong isama ang impormasyong ito sa lesson, mag-ingat na hindi nito mapapalitan ang pangunahing nilalaman ng Alma 36.

Alma 36:2–3, 27–29. Kung magtitiwala tayo sa Diyos, susuportahan Niya tayo sa ating mga pagsubok

Kung matutukoy ng mga estudyante ang katotohanang ito, tulungan silang palalimin ang kanilang pagkaunawa rito sa pamamagitan ng paghiling sa kanila na maghanap ng iba pang mga salaysay sa banal na kasulatan na idaragdag sa mga binanggit ni Alma na nagpapatibay sa katotohanang ito. Pagkatapos ay sabihin sa mga estudyante na magsanay gamit ang isa o mahigit pa sa mga salaysay na ito para ipaliwanag sa ibang tao kung paano sila matutulungan ng Diyos sa kanilang mga pagsubok. Maaari kang maglahad ng isang sitwasyon sa mga estudyante tungkol sa isang taong pinanghihinaan ng loob dahil sa mga pagsubok na kinakaharap niya.

Labis na kagalakan

Maaari mong sabihin sa mga estudyante na basahin ang Alma 36:25–26, at alamin kung paano nakaimpluwensya kay Alma at sa iba pa ang pagsisikap niya na ituro ang ebanghelyo. Maaaring ibahagi ng mga estudyante ang nalaman nila. Tulungan ang mga estudyante na maunawaan na makatatanggap tayo ng malaking kagalakan kapag sinikap natin na madala ang iba kay Cristo.