Doctrinal Mastery: Alma 39:9

“Huwag nang Sundin pa ang Pagnanasa ng Iyong mga Mata”

nadaanan ni Isabel si Corianton

Sa iyong pag-aaral ng Alma 39, nalaman mo ang kahalagahan ng pagsunod sa batas ng kalinisang-puri at kung paano labanan ang tukso sa pamamagitan ng pag-asa kay Jesucristo. Ang lesson na ito ay makatutulong sa iyo na maisaulo ang doctrinal mastery passage at ang mahalagang parirala ng banal na kasulatan para sa Alma 39:9, maipaliwanag ang doktrinang itinuro sa passage na ito, at magamit ang mga alituntunin ng pagtatamo ng espirituwal na kaalaman sa mga sitwasyon sa tunay na buhay.

Hikayatin ang mga mag-aaral na patuloy na magsikap na maging katulad ni Jesucristo. Habang sinisikap ng mga estudyante na maging higit na katulad ni Jesucristo, tulungan silang makilala ang mga pahiwatig mula sa Espiritu Santo upang matukoy ang mga paraan na magiging mas mabuti pa sila. Hikayatin ang mga estudyante na mapanalanging pag-isipan ang mga partikular na hakbang na magagawa nila sa kanilang pagsisikap na maging higit na katulad ng Tagapagligtas.

Paghahanda ng estudyante: Sabihin sa mga estudyante na simulang isaulo ang mahalagang parirala ng banal na kasulatan para sa Alma 39:9. Maaari mo rin silang hikayatin na subukang isaulo ang buong talata.

Mga Posibleng Aktibidad sa Pag-aaral

Ang doctrinal mastery passage lesson na ito ay ginawa upang ituro pagkatapos ng lesson na “Alma 39,” na siyang kontekstuwal na lesson para sa doctrinal mastery passage na Alma 39:9. Kung kailangang ilipat ang doctrinal mastery passage lesson na ito sa ibang linggo, tiyaking ituro din ang kaukulang kontekstuwal na lesson sa linggong iyon.

Ipaliwanag at isaulo

Ang mahalagang parirala ng doctrinal mastery para sa Alma 39:9 ay “Huwag nang sundin pa ang pagnanasa ng iyong mga mata.” Gamitin ang sumusunod na paraan, o iba pa na pipiliin mo, para matulungan kang isaulo ang reperensya at mahalagang parirala ng banal na kasulatan.

isang pares ng mata sa loob ng na-cross-out na bilog

Sa pisara, maaari mong isulat ang Alma 39:9 at idrowing ang isang pares ng mata sa loob ng na-cross-out na bilog. Bigyan ang mga estudyante ng ilang minuto para pag-aralan ang mahalagang parirala ng banal na kasulatan, pagkatapos ay sabihin sa ilang estudyante na pumunta sa pisara at isulat ang parirala sa paligid ng drowing. Bigkasin nang malakas ang scripture passage at mahalagang parirala nang ilang beses sa klase hanggang sa maisaulo ito ng mga estudyante.

Pagkatapos ay anyayahan ang ilang estudyante na pumunta sa harapan ng klase para isadula ang sumusunod na sitwasyon.

Isipin kunwari na isa kang missionary na nagtuturo sa isang tao tungkol sa batas ng kalinisang-puri sa unang pagkakataon. Maikling ilarawan kung ano ang batas ng kalinisang-puri, at gamitin ang Alma 39:9 upang maipaliwanag kung paano ito susundin.

Pagsasanay para sa pagsasabuhay

Bigyan ang mga estudyante ng pagkakataong rebyuhin ang mga alituntunin ng pagtatamo ng espirituwal na kaalaman sa talata 5–12 sa bahaging “Pagtatamo ng Espirituwal na Kaalaman” ng Doctrinal Mastery Core Document (2022). Pagkatapos nilang magrebyu, sabihin sa kanila na pumili ng mahalagang salita mula sa bawat alituntunin na sa palagay nila ay pinakamainam na naglalarawan nito. Pagkatapos ay maaaring ibahagi ng mga estudyante ang salitang pinili nila at kung bakit.

Gamitin ang sumusunod na sitwasyon, o maaari mo itong iangkop para matugunan nang husto ang mga pangangailangan ng mga estudyante, upang matulungan sila na maipamuhay ang mga alituntunin ng pagtatamo ng espirituwal na kaalaman.

Nasisiyahan si Ivan sa paggugol ng oras sa social media. Siya ay malikhain at gumagamit ng iba’t ibang social media platform para magbahagi ng mga positibong mensahe. Gayunpaman, nakakakita rin siya ng maraming content na hindi angkop at kung minsan ay pornograpiko pa nga. Noong una, nakakabagabag ito sa kanya, ngunit sa paglipas ng panahon ay nasisiyahan na siya rito. Nitong mga nakaraan, naghahanap na siya ng ganitong uri ng content. Sa kasalukuyan, hindi siya nag-aalala sa mga pagpiling ginagawa niya.

Pag-isipan kung paano makatutulong ang pag-unawa at paggamit ng mga alituntunin ng pagtatamo ng espirituwal na kaalaman para makita ni Ivan ang mga nakababahala sa kanyang mga ginagawa sa kasalukuyan. Maaaring makatulong ang mga sumusunod na tanong at resources.

Maaari mong isulat sa pisara ang unang tanong ng bawat bahagi sa ibaba at sabihin sa mga estudyante na talakayin ang kanilang mga sagot nang magkaka-partner o sa maliliit na grupo. Sa paggawa ng mga estudyante sa mga grupo, maglakad-lakad at makinig sa tinatalakay nila. Magdagdag ng mga tanong at resources na nakalista sa ibaba kung kinakailangan upang matulungan ang mga estudyante na mas magamit pa ang mga alituntunin ng pagtatamo ng espirituwal na kaalaman.

Suriin ang mga konsepto at tanong nang may walang-hanggang pananaw

• Paano masusuri ni Ivan ang kanyang sitwasyon nang may walang-hanggang pananaw?

• Paano makagagawa ng kaibhan ang kanyang pagsisikap na panatilihing malinis ang kanyang isipan sa buong buhay niya sa lupa at sa kabilang buhay?

• Paano maaaring makaapekto ang kanyang mga pagsisikap sa kanyang kaugnayan sa Ama sa Langit?

Hangaring mas makaunawa sa pamamagitan ng sources na itinalaga ng Diyos

• Ano ang ilang halimbawa ng sources na itinalaga ng Diyos na makatutulong kay Ivan? Paano tayo matutulungan ng Alma 39:9?

Kung kailangan ng tulong ng mga estudyante sa paghahanap ng sources na itinalaga ng Diyos, maaari mong ibahagi ang sumusunod na resources.

• Para sa Lakas ng mga Kabataan: Isang Gabay sa Paggawa ng mga Pagpili (buklet, 2022), “Ano ang gagawin sa sandaling iyon”

• Mosias 4:30; 3 Nephi 12:28–30; Doktrina at mga Tipan 42:23; 121:45

• Mga mensahe sa pangkalahatang kumperensya tungkol sa kadalisayan ng puri, pornograpiya, o social media na makikita mo sa Gospel Library app o ChurchofJesusChrist.org

Kumilos nang may pananampalataya 

• Ano ang magagawa ni Ivan para kumilos nang may pananampalataya at “huwag nang sundin pa ang pagnanasa ng [kanyang] mga mata”? (Alma 39:9).

• Paano makatutulong sa kanyang mga pagsisikap ang pagpupursiging bumaling kay Cristo?

• Anong doktrina mula sa plano ng Ama sa Langit ang makatutulong kay Ivan at bakit?

• Sa iyong palagay, paano makatutulong kay Ivan ang mga alituntunin ng pagtatamo ng espirituwal na kaalaman para matukoy niya ang panganib ng mga ginagawa niya sa kasalukuyan?

• Ano ang magagawa niya para magkaroon ng patuloy na pagbabago?

Kapag tapos nang magtalakayan ang mga grupo, anyayahan silang ibahagi sa klase ang natutuhan nila. Habang nagbabahagi ang mga estudyante, kilalanin ang kahalagahan ng kanilang mga komento. Maaari ka ring magtanong ng mga bagay na makatutulong sa mga estudyante na makisalamuha sa klase, tulad ng “Sa palagay ninyo, bakit mahalaga ang ibinahagi ng kaklase ninyo? o “Paano makatutulong kay Ivan ang pagsasagawa ng ibinahagi ng kanyang kaklase?”

Pagrerebyu ng doctrinal mastery

Sa isang lesson sa hinaharap, ipakita sa mga estudyante ang larawan ng isang pares ng mata sa loob ng na-cross-out na bilog at sabihin sa kanila na alalahanin kung aling doctrinal mastery passage ang kasama rito. Bigkasin nang magkakasama ang mahalagang parirala ng banal na kasulatan nang ilang beses para marebyu.