Alma 39

“Pigilin mo ang Iyong Sarili sa mga Bagay na Ito”

Sa lahat ng panahon, napaniwala ni Satanas ang maraming tao na ang seksuwal na relasyon ng hindi mag-asawa ay katanggap-tanggap. Ibinigay sa atin ng Ama sa Langit at ni Jesucristo ang batas ng kalinisang-puri para sa ating proteksyon, kapayapaan, at kaligayahan. Mapagmahal na pinayuhan ng propetang si Alma ang kanyang anak na si Corianton na talikuran at pagsisihan ang kanyang mga kasalanan, kasama na ang paglabag sa batas ng kalinisang-puri. Ang lesson na ito ay makatutulong sa iyo na maunawaan ang bigat ng kasalanang seksuwal at kung paano labanan ang tuksong labagin ang batas ng kalinisang-puri.

Tulungan ang mga mag-aaral na maunawaan at hangarin ang pagbabalik-loob. Ang pagbabalik-loob ay tuluy-tuloy na proseso ng pagbabago at espirituwal na pag-unlad na ipinapakita natin sa pamamagitan ng matwid na pagsisikap sa buong buhay natin. Maghanap ng mga pagkakataong makapagbigay ng mga karanasan kung saan makikilala, mamahalin, at masusunod ng mga estudyante si Jesucristo at ang Kanyang ipinanumbalik na ebanghelyo.

Paghahanda ng estudyante: Sabihin sa mga estudyante na isipin ang nalalaman nila tungkol sa batas ng kalinisang-puri, kung ano ang nadarama nila tungkol dito, at anumang tanong na maaaring mayroon sila.

Mga Posibleng Aktibidad sa Pag-aaral

Ang batas ng kalinisang-puri

Maaari mong isulat sa pisara ang mga sumusunod na pahayag. Magbago o magdagdag ng mga pahayag na mas makapaghahanda sa iyong mga estudyante na matutuhan ang tungkol sa batas ng kalinisang-puri.

Basahin ang mga sumusunod na pahayag at alamin kung alin sa mga sumusunod ang pinakamainam na naglalarawan sa nadarama mo:

• Hindi ako sumasang-ayon

• Hindi ako lubos na sumasang-ayon

• Lubos akong sumasang-ayon

• Sumasang-ayon ako

1. Malinaw na nauunawaan ng mga kabataan sa Ang Simbahan ni Jesucristo ng mga Banal sa mga Huling Araw ang batas ng kalinisang-puri, o ang batas ng Panginoon sa kadalisayan ng puri.

2. Nauunawaan nila kung bakit ito mahalaga at kung bakit nais ng Panginoon na ipamuhay natin ito.

3. Maaaring mahirap sundin ang batas ng kalinisang-puri sa mundo ngayon.

4. Nalalaman ng mga kabataan sa Simbahan kung paano labanan ang tukso at panatilihing dalisay ang kanilang puri.

Sabihin sa mga estudyante na ibahagi kung sila ay sumasang-ayon o hindi sumasang-ayon sa mga pahayag sa itaas at kung bakit.

Ang batas ng kalinisang-puri ay ang batas ng Panginoon sa kadalisayan ng puri. Ang ibig sabihin ng pagsunod sa batas ng kalinisang-puri ay panatilihing malinis ang iyong sarili sa isip, salita, at gawa, kasama na ang paglayo sa anumang bagay na pornograpiko. Nangangahulugan din ito ng pag-iwas sa anumang seksuwal na relasyon bago ikasal at pagiging lubos na tapat sa iyong asawa. “Tulad ng iba pang mga paglabag sa batas ng kalinisang-puri, ang homoseksuwal na gawain ay isang mabigat na kasalanan. Salungat ito sa mga layunin ng seksuwalidad ng tao” (Mga Paksa ng Ebanghelyo, “Kalinisang-puri,” topics.ChurchofJesusChrist.org).

Pag-isipan sandali ang sarili mong pag-unawa at damdamin tungkol sa batas ng kalinisang-puri. Ano ang mga tanong mo? Bakit mahalaga ito sa iyo? Anong mga tukso tungkol sa kalinisang-puri ang nararanasan mo? Habang pinag-aaralan mo ang lesson na ito, maghanap ng mga sagot sa iyong mga tanong at ng tulong para mapaglabanan ang iyong mga tukso.

Pinayuhan ni Alma ang kanyang anak na si Corianton

Ang Alma 39 ang una sa apat na kabanata na naglalaman ng mga payo, kautusan, at turo ni Alma sa kanyang anak na si Corianton. Sinamahan ni Corianton ang kanyang ama at kapatid na si Siblon upang ipangaral ang ebanghelyo sa mga Zoramita. Gayunpaman, sa misyong ito, nakagawa si Corianton ng ilang mabibigat na kasalanan.

Basahin ang Alma 39:1–5, at hanapin ang mga pagkakamaling nagawa ni Corianton at kung ano ang nadama ni Alma at ng Panginoon tungkol sa mga ito. (Ang salitang patutot sa talata 3 ay tumutukoy sa isang imoral na babae o prostitute.)

Sabihin sa mga estudyante na magbahagi ng mga salita o parirala sa banal na kasulatan na nagsasaad ng ginawa ni Corianton at kung ano ang nadama ni Alma at ng Panginoon tungkol dito.

Para matulungan kang maisip kung bakit ang paglabag sa batas ng kalinisang-puri ay “nakasasakit” sa isang ama at isang propeta (Alma 39:3) at “karumal-dumal sa paningin ng Panginoon” (Alma 39:5), makatutulong na maunawaan ang mga pagpapala ng pagsunod dito. Basahin ang tungkol sa mga pagpapala at kapangyarihan sa “Pagsunod sa batas ng kalinisang-puri” sa pahina 26 sa Para sa Lakas ng mga Kabataan: Isang Gabay sa Paggawa ng mga Pagpili (buklet, 2022).

Hayaan ang mga estudyante na ibahagi ang nahanap nila.

• Paano tayo inihahanda ng pagsunod sa batas ng kalinisang-puri sa pagtanggap ng malalaking pagpapala mula sa Panginoon sa buhay na ito at sa kabilang buhay?

Maaari mong ilista sa pisara ang sumusunod na dalawang tanong at sabihin sa mga estudyante na magpartner-partner o magtulungan sa maliliit na grupo para mahanap ang mga sagot sa mga banal na kasulatan. Pagkatapos ay talakayin sa klase ang sumusunod na dalawang tanong.

• Ano ang mangyayari kung hindi pagsisisihan ng isang tao ang kasalanang seksuwal? (Alma 39:7–9)

• Ano ang kadalasang nakakaligtaang bunga ng paglabag sa batas ng kalinisang-puri? (Alma 39:11–13)

• Batay sa natutuhan mo, bakit maaaring madama ng isang magulang, propeta, at ng Panginoon ang gayon kasidhing damdamin tungkol sa kalinisang-puri?

• Paano ipinapakita ng batas ng kalinisang-puri ang pagmamahal ng Diyos para sa Kanyang mga anak?

“Huwag nang sundin pa ang pagnanasa ng iyong mga mata”

Bukod pa sa pagtuturo sa kanyang anak tungkol sa kabigatan ng kasalanang seksuwal, itinuro din ni Alma kay Corianton kung paano maiiwasan ang gayon ding pagkakamali sa hinaharap.

Rebyuhin ang Alma 39:9 at Alma 39:13, at maghanap ng mga salita o parirala na makatutulong sa iyo na mapaglabanan ang tukso at sundin ang batas ng kalinisang-puri. (Ang ibig sabihin ng pariralang “pigilin mo ang iyong sarili” sa talata 9 ay disiplinahin ang sarili o kontrolin ang sarili.)

Ang Alma 39:9 ay isang doctrinal mastery passage. Maaari mong markahan ang mga doctrinal mastery passage sa partikular na paraan upang madali mong mahanap ang mga ito. Magkakaroon ka ng pagkakataon sa susunod na lesson na magamit ang doktrinang itinuro sa passage na ito sa isang tanong o sitwasyon.

Sabihin sa mga estudyante na ibahagi ang nahanap nila.

• Anong alituntunin ang itinuro ni Alma kay Corianton sa mga talatang ito?

Ang isang posibleng alituntunin mula sa mga talatang ito ay kapag kinokontrol natin ang ating sarili at bumabaling tayo sa Panginoon, mapaglalabanan natin ang tuksong labagin ang batas ng kalinisang-puri ng Diyos.

Ang pagkontrol sa sarili at pagbaling sa Panginoon upang mapaglabanan ang tukso ay maaaring mahirap kung minsan. Makatutulong na mag-isip ng iba’t ibang paraan para magawa ito at pagkatapos ay sundin ang mga pahiwatig ng Espiritu tungkol sa kung ano ang lubos na makatutulong sa iyo.

Bago gawin ang sumusunod na aktibidad, pag-isipang anyayahan ang mga kabataan na talakayin ang mga paraan at magpalitan ng mga ideya kung paano sila makababaling sa Panginoon at kung paano nila mapaglalabanan ang mga tuksong labagin ang batas ng kalinisang-puri. Pagkatapos ay maaari nilang gawin ang dalawa sa mga sumusunod para mapagtibay o madagdagan ang kanilang mga ideya.

Maaari mong ilista sa pisara ang sumusunod. Maaari mong alisin ang video sa listahan at itanong sa klase pagkatapos ng kanilang pag-aaral kung gusto nila itong panoorin.

1. Basahin ang natitirang bahagi ng payo tungkol sa kadalisayan ng puri sa Para sa Lakas ng mga Kabataan: Isang Gabay sa Paggawa ng mga Pagpili (tingnan sa “kadalisayan ng puri” sa bahaging “Paano naman ang … ?”). Para sa karagdagang payo mula sa mga miyembro ng Korum ng Labindalawang Apostol, pag-isipang basahin ang “Naniniwala Kami sa Pagiging Malinis” (David A Bednar, Liahona, Mayo 2013, 41–44).

2. Maghanap ng mga banal na kasulatan na sa palagay mo ay makapagpapalakas sa iyo laban sa mga tuksong labagin ang batas ng kalinisang-puri. Maaari ka ring maglista ng mga himno, o mga awitin sa Primary na maaari mong pakinggan para mabigyan ka ng lakas kapag natutukso ka.

3. Maglista ng mga paraan na mapagsisikapan mong “bumaling sa Panginoon” nang iyong “pag-iisip, kakayahan at lakas” (Alma 39:13). Isama ang mga nagawa mo noon na sa palagay mo ay nagpalakas sa iyo.

4. Isulat ang payo na natanggap mo mula sa mga magulang at lider ng Simbahan na makatutulong sa iyo laban sa tukso.

5.  ChurchofJesusChrist.org

   Chastity: What Are the Limits?

   Latter-day Saint teens are counseled to stay sexually pure, but what exactly are the limits? Using teachings of modern prophets, this presentation shows how we can find happiness and peace through staying chaste.

Pagkaraan ng ilang minuto, maaari mong anyayahan ang maraming estudyante na ibahagi ang kanilang mga ideya at kung paano makatutulong sa kanila ang mga ideyang ito na mapaglabanan ang tukso. Kung sa palagay mo ay maaaring mahirapan ang klase mo na talakayin nang hayagan ang paksang ito, sabihin sa mga estudyante na ibahagi ang kanilang mga ideya sa isang pirasong papel nang hindi nagpapakilala. Tipunin ang mga papel at basahin ang mga ito sa klase.

Personal na pagninilay

Pag-isipan sandali kung bakit gusto mong manatiling dalisay ang iyong puri. Pagkatapos ay itala ang mga hakbang na gagawin mo para patuloy na masunod ang batas ng Panginoon sa kalinisang-puri. Isipin kung ano ang maaaring ipahiwatig ng Espiritu Santo na gawin mo, at itala ang anumang mga karagdagang ideya sa iyong study journal. Kung ikaw o ang isang taong kilala mo ay lumabag sa batas ng kalinisang-puri, alalahanin na si Jesucristo ay “paparito upang alisin ang mga kasalanan ng sanlibutan” (Alma 39:15) at patatawarin ang lahat ng taong taos-pusong nagsisi at tumalikod sa kanilang mga kasalanan (tingnan sa Mosias 26:30, Alma 39:9).

Maaari mong ibahagi ang iyong patotoo.

Komentaryo at Impormasyon ng Konteksto

Alma 39:5. Bakit ang mga kasalanang seksuwal ay mabigat na kasalanan kasunod ng pagpaslang?

Habang naglilingkod bilang miyembro ng Pitumpu, itinuro ni Elder Bruce C. Hafen:

Marahil ay may karaniwang elemento sa dalawang bagay na iyon—kahalayan at pagpaslang. Kapwa ito may kinalaman sa buhay, na hinggil sa pinakamataas sa mga banal na kapangyarihan. Ang pagpaslang ay kinabibilangan ng di-matwid na pagkitil ng buhay; ang seksuwal na kasalanan ay maaaring kabilangan ng di-matwid na pagbibigay ng buhay, o di matwid na paghadlang sa mga sagradong bukal ng kapangyarihang nagbibigay-buhay. (Bruce C. Hafen, “The Gospel and Romantic Love,” New Era, Peb. 2002, 10)

Alma 39:6. Ano ang ibig sabihin ng itatwa ang Espiritu Santo?

Itinuro ni Propetang Joseph Smith (1805–44):

Ano ang kailangang gawin ng isang tao upang magawa ang kasalanang walang kapatawaran? Kailangan niyang tanggapin ang Espiritu Santo, mabuksan sa kanya ang kalangitan, at makilala ang Diyos, at pagkatapos ay magkasala laban sa kanya. Matapos magkasala ang isang tao laban sa Espiritu Santo, wala nang pagsisisi sa kanya. Sasabihin na niya na hindi sumisikat ang araw habang nakikita niya ito; itatatwa niya si Jesucristo kahit nabuksan na sa kanya ang kalangitan, at itatatwa ang plano ng kaligtasan gayong nalalaman niya ang katotohanan nito. (Joseph Smith, sa History, 1838–1856 [Manuscript History of the Church], volume E-1, 1976, josephsmithpapers.org, ginawang makabago ang pagbabantas at paggamit ng malalaking titik; tingnan din sa “Accounts of the ‘King Follett Sermon,’” josephsmithpapers.org).

Alma 39:13. Paano ko mas makokontrol ang aking mga iniisip at maiiwasan ang mga hangaring may pagnanasa?

Itinuro ni Elder Ulisses Soares ng Korum ng Labindalawang Apostol:

Pinatototohanan ko na kapag umasa tayo sa bato ng kaligtasan, ang Tagapagligtas ng ating mga kaluluwa, … talagang mag-iibayo ang kakayahan nating kontrolin ang mga iniisip natin. … Kaya, ang mga tukso ng kaaway ay unti-unting mawawalan ng kapangyarihan sa atin, na hahantong sa mas masaya at mas dalisay at nakalaan na buhay. (Ulisses Soares, “Saliksikin si Cristo sa Bawat Pag-iisip,” Liahona, Nob. 2020, 84)

Mga Karagdagang Aktibidad sa Pag-aaral

Alternatibong simula

Pag-isipang maglista sa pisara ng mga kasinungalingan tungkol sa batas ng kalinisang-puri tulad ng sumusunod:

1. Ang batas ng kalinisang-puri ay hindi masyadong magiging mahalaga kung napakaraming tao sa mundo ang hindi ito ipinamumuhay.

2. Ang paggawa ng kasalanang seksuwal ay hindi gaanong mabigat na kasalanan.

3. Maaari kong gawin ang kasalanang seksuwal nang hindi ito nakakaapekto sa iba.

Itanong sa mga estudyante kung alin sa mga ito o kung anong iba pang mga kasinungalingan ang narinig na nila tungkol sa kalinisang-puri at kung bakit maaaring paniwalaan ang mga ito ng ilang tao. Sabihin sa mga estudyante na hangarin na mas makaunawa at iwasto ang mga pahayag na ito habang pinag-aaralan nila ang Alma 39.

Video

Kung mas gugustuhin mong ipanood ang isang video na nagpapakita ng Alma 39, maaari mong panoorin ang “Pinayuhan ni Alma ang Kanyang Anak na si Corianton na Magsisi” mula sa time code na 0:23 hanggang 2:40.

Alma Admonishes His Son Corianton to Repent | Alma 39

Alma the younger’s son Corianton did not keep God’s commandments. Alma helps him understand how serious it is to commit sexual sin. He pleads with Corianton to repent.

Sagradong musika

Habang tinatalakay ng mga estudyante ang mga paraan na mapaglalabanan at madaraig nila ang tukso, pag-isipang kantahin o pakinggan ang mga himnong tulad ng “Kailangan Ko Kayo” (Mga Himno, blg. 54) o “Jesus, ang Inyong Alaala” (Mga Himno, blg. 83). Sabihin sa mga estudyante na pag-isipan at talakayin kung paano makatutulong sa kanila ang sagradong musika para mapanatiling dalisay ang kanilang isipan.