Алма 37–38

“Насны залууд суралц”

Та нар ямар сургамжийг эцэг, эх, Сүмийн удирдагчдаас авсан бэ? Та хэзээ нэгэн цагт хүүхэдтэй болох үедээ тэдэндээ ямар зүйлийг зааж өгөхийг хүсэж байна вэ? Эцэг эхчүүд хүүхдүүдээ сургах ариун үүрэгтэй гэдгийг Алма ойлгов. Алма зорамчуудад номлосныхоо дараа хөвгүүддээ зааж, урамшуулан дэмжихийн тулд цуглуулав. Тэрээр тэдэнд Бурханы зарлигуудыг дагахыг зөвлөжээ. Энэ хичээл одоо зарлигуудыг дагаж амьдрах нь таныг насан туршид тань адислах болно гэдгийг сурч мэдэхэд танд тусална.

Суралцагчдыг хувийн илчлэлээр үйлдэхэд чиглүүл. Суралцагчдад юу хийх ёстойг хэлж өгөхийн оронд “Суралцагчдыг бие даан суралцаж байхдаа Ариун Сүнсний тусламжийг эрэлхийлэхэд нь урамшуулан дэмжих ямар зүйлд би тэднийг урьж болох вэ?” эсвэл “Би суралцагчдыг хүлээн авч буй өдөөлтүүдийнхээ дагуу ажиллахын төлөө юу хийхэд урьж болох вэ?” гэж өөрөөсөө асуу.

Суралцагчийн бэлтгэл: Суралцагчдыг Алма 37:35-ыг унших юм уу цээжлэхэд мөн “[өөрсдийн] насны залууд Бурханы зарлигуудыг дагаж сурах” нь яагаад чухал гэж бодож байгаагаа хуваалцахаар ангидаа бэлтгэлтэй ирэхэд урь.

Боломжит суралцах үйл ажиллагаа

Эцэг эхийн зөвлөгөө

Дараах түүхийг эсвэл суралцагчдад илүү хамааралтай байж болох өсвөр үеийнхэн эцэг эх, Сүмийн удирдагчаас авсан зөвлөгөөг жишээ болгон хуваалц.

Ерөнхийлөгч Томас С.Монсон (1927–2018) дараах түүхийг хуваалцсан.

Үндэсний сэтгүүлд нийтлэгдсэн ярилцлагад олны танил, Америкийн Үндэсний Коллежуудын Спортын Холбооны сагсан бөмбөгийн тоглогч, сүмийн гишүүн Жабари Паркер ааваасаа авсан хамгийн сайн зөвлөгөөгөө хуваалцсан байна. Жабари “[Миний аав], харанхуйд ч гэсэн гэрэлд байдаг шигээ хүн бай гэж хэлсэн” хэмээн хэлжээ. Бид бүгдэд … маш их хэрэгтэй чухал зөвлөгөө юм шүү. (Томас С.Монсон, “Хүчтэй бөгөөд зоригтой бай,” 2014 оны 4-р сарын Ерөнхий чуулган, 87)

Суралцагчдыг дараах асуултуудыг тунгаан бодоход урь. Хангалттай хугацаа өнгөрсний дараа суралцагчдыг хоёр хоёроор нь эсвэл жижиг бүлгүүдэд хуваарилж, асуултын хариултаа хуваалцахад урь.

Танаас ярилцлага авч байна гэж төсөөл. Ярилцлага авч буй хүн танаас дараах асуултуудыг асууна.

• Эцэг эхээсээ эсвэл Сүмийн удирдагчаас авч байсан хамгийн сайн зөвлөгөө тань юу вэ?

• Энэ зөвлөгөө таныг хэрхэн адисалсан бэ?

Алма 36–42-д Алмагийн, зорамчуудад номлолоо дуусгасныхаа дараа хөвгүүддээ өгсөн зөвлөгөөг тэмдэглэсэн байдаг. Та түүний хүү Хиламандаа заасан зүйлсийн ихэнхийг аль хэдийн судалсан (Алма 36–37). Энэхүү хичээлээр та түүний хүү Хиламандаа өгсөн зөвлөгөөний үлдсэн хэсгийг мөн хүү Шиблондоо заасан зарчмуудыг судлах болно (Алма 38). Алма 37–38-ыг судалж байхдаа, амьдралдаа ашиглаж болох эсвэл бусад өсвөр үеийнхэнтэй хуваалцаж болох Алмагийн зөвлөгөөг олж мэд.

“Насны залууд мэргэн ухаанд суралц”

Алма 37:35-ыг уншаад, Алма Хиламаныг насны залууд юуг сураасай гэж хүсэж байсныг олж мэд. Олж мэдсэн зүйлээ тэмдэглэж ав.

• Алма Хиламаныг юуг мэдэж мөн хийгээсэй гэж хүссэн бэ?

  Суралцагчдыг хариулах үед та самбар дээр дараахыг бичиж болно: Бид насны залууд Бурханы зарлигуудыг сахихад суралцах ёстой.

• Та яагаад нас ахих хүртлээ хүлээхийн оронд “Насныхаа залууд Бурханы зарлигуудыг сахихад суралцах” нь дээр гэж бодож байна вэ?

Ерөнхийлөгч Гордон Б.Хинкли (1910–2008) мод тарих талаар дараах туршлагыг хуваалцжээ.

Би [модоо] хавцлаас зүүн тийш салхи хамгийн хүчтэй үлээж байсан буланд тавьсан. Би нүх ухан, нүцгэн үндсийг суулгаад, эргэн тойронд нь хөрс асгаж, услаад бараг л мартаж орхив. Энэ бол ганцхан нарийхан, голчоороо инчийн дөрөвний гурвын хэмжээтэй саваа байв. Тэр модыг би хаашаа ч нугалж болохоор тийм туяхан байв. Он жилүүд улиран өнгөрөх тусам би модондоо улам бага анхаарал тавьдаг болсон.

Тэгтэл нэгэн өвлийн өдөр … мод баруун тийшээ нахийж, хэлбэргүй, тэнцвэрээ алдсан байхыг би анзаарав. … Би гарч, модыг биеэрээ тулан, тэгшлэхээр түлхэв. Гэвч мод одоо голчоороо бараг тохой орчим болсон байлаа. Миний хүч тамир хүрэхээргүй болсон байв. Би багажийн хайрцгаасаа хаалт, багаж гарган авав. Нэг үзүүрийг модонд, нөгөө үзүүрийг нь сайн бэхэлсэн шонд бэхлээд, олсыг татав. Дамар нь бага зэрэг хөдөлж, модны их бие үл ялиг чичирч байв. Ингээд л болов. …

Би эцэст нь цөхрөнгөө барсандаа хөрөөгөө барьж аваад, баруун талын том хүнд мөчрийг нь тасалж орхив. Хөрөөгөөр 8 инч гаруй урттай муухай гэгчийн сорви үлдээжээ. Би нэг алхам ухарч, юу хийж орхисноо шинжлэн харав. Би модны ихэнх хэсгийг огтолжээ. Зөвхөн нэг мөчир л тэнгэрт өөд ургасаар байв. …

Энэ модыг анх тарих үед жижигхэн уяа л үүнийг салхины хүчнээс хамгаалж чадах байсан юм. Би өчүүхэн хүчин чармайлт гарган модыг уяж болох байв. Тэгэх ч ёстой байсан. Гэвч би тэгээгүй бөгөөд мод өөрийнх нь эсрэг ирсэн хүчнүүдэд бөхийжээ. (Gordon B. Hinckley, “Bring Up a Child in the Way He Should Go,” Ensign, Nov. 1993, 59)

• Зарлигуудыг дагах нь салхинаас үл хамааран шулуун, хүчтэй ургах залуу модыг дэмжихтэй ямар байдлаар адил байх вэ?

• Амьдралынхаа хожуу үе хүртэл зарлигуудыг үл тоомсорлох нь бидэнд хэрхэн нөлөөлж болох вэ?

Суралцагчдад Алма 37:35-д заасан үнэнийг илүү сайн ойлгоход нь туслахын тулд тэднийг жижиг бүлгүүдэд хуваарилж, нэг нь насны залууд Бурханы зарлигуудыг дагахыг хичээдэг, нөгөө нь насны залууд Бурханы зарлигуудыг дагадаггүй хоёрын бодит жишээг бүтээхэд урь. Суралцагчид Бурханыг хайрлах, судраас суралцах эсвэл мэргэн ухааны үгийг дагах гэх зэрэг зарим зарлигын дагуу амьдрахыг хүмүүс хэрхэн хичээж эсвэл хичээхгүй байгаа зэргийг багтааж болно. Энэ хоёр хүн 5-10 жилийн дараа ямар ялгаатай байж болохыг тусга. Суралцагчдыг өөрсдийн жишээг болон олж мэдсэн зүйлээ хуваалцахад урь.

Алмад залуу байхад нь тохиолдсон туршлагын талаар суралцагчдад сануул. “Алма яагаад хүүдээ ийм зөвлөгөө өгсөн гэж та нар бодож байна вэ?” гэж асуу.

ChurchofJesusChrist.org дээрээс Амлалт ба гэрээнийхээ дагуу тууштай байх нь видеог цагийн код 7:29-өөс 8:25 хүртэл үзнэ үү. Арван хоёр төлөөлөгчийн чуулгын ахлагч Роналд А.Расбанд Бурханы зарлигуудыг насны залуудаа хэрхэн дагахаар шийдсэн талаараа хуваалцжээ.

Бурханы зарлигуудыг дагах талаар олж мэдсэн зүйлээ тэмдэглэлдээ бичихэд хэдэн хормыг зарцуул. Зарлигуудыг дагасныхаа төлөө хэрхэн адислагдсанаа мэдэхийн тулд залбирч эрэлхийл.

Өөрсдийн бодол, сэтгэгдлийг сайн дураараа хуваалцахыг хүсэж буй суралцагчид байгаа эсэхийг асуу. Та мөн өөрт төрсөн бодол, сэтгэгдлээ хуваалцаж болно.

Өсвөр насандаа Их Эзэний зарлигуудад дуулгавартай байдлаа сайжруулах нэг арга зам бол зорилго тавих юм. Энэ зорилгоо биелүүлэхдээ Ариун Сүнсний удирдамжийг эрэлхийл.

Өсвөр үеийнхэнд зориулсан зөвлөгөө

Алма бидэнд тустай байж болох нэмэлт зөвлөгөөг хөвгүүддээ өгчээ.

Дараах судрын хэсгүүдийг судал. Өнөөгийн өсвөр үеийнхэнд, тэр тусмаа өөрт тань тустай гэж бодож байгаа зөвлөгөөг тэмдэглэж ав. Доорх асуултуудад хариулт бэлд.

1. Алма 37:33–37 (“даруу, номхон дөлгөөн байх” = даруу, дуулгавартай, зөв шударга)

2. Алма 38:1–5 (“түүний дэргэдээс тусгаарлагдах” = бие махбодын болон сүнслэг байдлын хувьд Бурханаас тусгаарлагдах)

3. Алма 38:6–9 (“Бурханаар төрөх”= Их Эзэний Сүнс хүний ​​зүрх сэтгэлд хүчтэй өөрчлөлтийг бий болгох)

4. Алма 38:10–15 (“өөрийгөө захирах чадвар” = хүлээцтэй байдал эсвэл өөрийгөө хянах чадварыг харуулах; “дээрэлхэх” = давамгайлах зан үйл; “хазаарлах” = хянах)

5. Алмагийн хөвгүүдээрээ хийлгэхийг эсвэл тэдэнд мэдүүлэхийг хүсдэг байсан нэг зүйл юу вэ? Та үүнийг аль шүлгээс олж мэдсэн бэ?

6. Энэ зарчмыг мэдэх эсвэл дагах нь өсвөр үеийнхэнд Есүс Христийг илүү сайн дагахад хэрхэн туслах вэ?

7. Энэ сургаал өсвөр үеийнхний амьдралд хэрхэн хэрэгжиж болох вэ? Танд үүнийг өөрийн амьдралдаа ашиглаж байсан ямар нэг жишээ бий юү? (Хэт хувийн шинжтэй зүйлийг бүү хуваалц.)

Суралцагчдыг асуултуудад хариулсны дараа Алмагийн зөвлөгөөг ангиараа ярилцах үеэр тэднийг бие биеэ харахын тулд тойрог болон суухыг хүс. Аль болох олон суралцагчийг сурч мэдсэн зүйлээ хуваалцахад урь. Бүх суралцагчийг анхааралтай сонсож, бие биеэсээ суралцахад урамшуулан дэмж. Суралцагчдаас үе тэнгийнхнээсээ юу суралцаж байгааг нь асуухын тулд хааяа нэг түр зогс.

Хэсэг хугацаанд тунгаан бодож, өнөөдөр сурч мэдсэн зөвлөгөөгөө ашиглах нэмэлт аргуудын талаар төрсөн бодол, сэтгэгдлээ тэмдэглэ. Жишээлбэл: Эцэг эх эсвэл Сүмийн удирдагч таныг хийж эхлэхийг эсвэл зогсоохыг саяхан урамшуулан дэмжсэн ямар нэг зүйлийн талаар та бодож магадгүй юм. Эсвэл та Их Эзэнтэй зөвлөлдөж, Түүний удирдамжийг эрэлхийлэхийг хүсэж болно.

Тайлбар ба нөхцөл байдлын талаарх мэдээлэл

Алма 38:10. Өөрийгөө захирах гэдэг нь ямар утгатай вэ?

Далын ахлагч Кэнт Д.Ватсон ийн хуваалцсан.

Бутардаг шил нь бутардаг гангийн адил хүчдэлийг ихэсгэдэг халалтын процессыг сайн хянах боломжийг олгодог байна. Бутардаг шил нь хүний биед гэмтэл учруулахуйц хурц ирмэгтэй хэсгүүд болж хагардаггүй ажээ.

Үүн лүгээ адил даруу бөгөөд хайраар дүүрэн, биеэ барих чадвартай хүний сүнсний хүч чадал өндөр байдаг. Бид сүнсний хүч чадлаа өсгөн нэмэгдүүлснээр өөрийгөө захирах чадвартай байж, төлөв төвшин амьдарч чадна. Бид биеэ барьж сурснаар уур уцаар, хоосон бардамнал, сайрхлаас ангид байж чадна. Бид сүнсний хүч чадлаа өсгөн нэмэгдүүлснээр өнөөгийн дэлхийн их аюул, сүйрүүлэгч донтолтоос өөрсдийгөө хамгаалж чадна (Кэнт Д.Ватсон, “Бүх зүйлд тэвчээртэй хандах нь,” 2009 оны 10-р сарын Ерөнхий чуулган, 38)

Алма 38:12. Хүслээ хазаарлах нь намайг хэрхэн хайраар дүүргэх вэ?

Арван хоёр төлөөлөгчийн чуулгын ахлагч Дэвид А.Бэднар ийн заасан.

Алма өөрийн хүү Шиблонд “хайраар дүүргэгдэж болохын тулд бүх хүслээ хазаарлахыг мэдээрэй” хэмээн зөвлөсөн (Алма 38:12). Бидний хүн нэг бүрийн дотор буй эгэл хүнийг хянах аваас Бурханыг болон Түүний хүүхдүүдийг хайрлахдаа илүү их, улам гүн гүнзгий, илүү тэвчээртэй хайраар хайрлах болно. Зөвт байдлаар өөрийгөө хориход хайр ихсэж, хүсэл шуналдаа автахад хайр багасдаг. (Дэвид А.Бэднар, “Бид ариун явдалд итгэдэг,” 2013 оны 4-р сарын Ерөнхий чуулган, 52)

Нэмэлт суралцах үйл ажиллагаа

Аврагчид чөлөөлөх хүч бий.

Алма Шиблонд тэд хоёулаа Аврагчийн чөлөөлөх хүчийг мэдэрснээ сануулав. Суралцагчдыг Алма 38:4–5 дахь Шиблоны туршлагыг Алма 38:6–9 дэх Алмагийн туршлагатай харьцуулахад урь. Суралцагчдаас цэдэг бүрийн ижил төстэй талыг олж мэдэхийг хүс. Дараа нь Аврагч тэднийг нүгэл, сорилт бэрхшээлээс нь хэрхэн чөлөөлсөн эсвэл чөлөөлж чадах талаар бодоход урь.

Хүсэл тэмүүллээ хазаарлах нь

Суралцагчдад хазаарын зураг үзүүл. Тэгээд энэ нь амьтныг удирдахад эсвэл чиглүүлэхэд ашиглагддаг гэдгийг тайлбарла. Дараа нь та “Хүслээ хазаарлана гэдэг нь юу гэсэн үг вэ?” болон “Хүслээ хазаарлах нь биднийг ‘хайраар дүүргэгдэхэд’ хэрхэн туслах вэ?” гэж асууж болно. Бид хүсэл тэмүүллийг хааж, устгах шаардлагагүй. Харин тэднийг хянах хэрэгтэй гэдгийг ойлгоход суралцагчдад тусал. Та мөн тайлбар болон үндсэн мэдээлэл хэсэгт ахлагч Бэднарын мэдэгдэл-ийг суралцагчидтай хамт давтаж болно.

Заах тухай зөвлөгөө

Суралцагчдыг Алма 37:33–34, 38:10–15-ыг уншиж, Алмагийн хөвгүүддээ үргэлжлүүлэн номлож байх үедээ тэдэнд өгсөн зөвлөгөөг олж мэдэхэд урь. Суралцагчдаас сайн мэдээний итгэл үнэмшлийнхээ талаар бусадтай ярилцаж байхдаа номлогч, эцэг эхийн үүрэгт эсвэл бусад нөхцөл байдалд энэ зөвлөгөө тэдэнд хэрхэн тус болно гэж бодож байгаагаа хуваалцахыг хүс.