Alma 40

Bota e Shpirtrave dhe Ringjallja

Krishti në botën e shpirtrave

Pasi i ati e ftoi të pendohej, Koriantoni pati disa pyetje rreth planit të Perëndisë, duke përfshirë atë që na ndodh pasi vdesim. Ati i tij, Alma, iu përgjigj pyetjeve të tij dhe dëshmoi për rolin qendror të Jezu Krishtit në planin e Atit Qiellor. Ky mësim mund të të ndihmojë ta thellosh vlerësimin tënd për atë që Shpëtimtari ka bërë për ty dhe do të të japë mundësinë të shpjegosh se çfarë ndodh pasi vdesim.

Ndihmojini nxënësit të përqendrohen te Jezu Krishti. Mësuesit mund të kalojnë në mënyrë jo të qëllimshme shumë kohë duke përshkruar hollësitë që lidhen me të vërtetat e ungjillit. Kjo mund të çojë në humbjen e mundësive për t’i ndihmuar nxënësit që të arrijnë ta njohin dhe duan Shpëtimtarin në mënyrë më të plotë. Gjeni kohë për të dhënë mësim dhe dëshmuar për fuqinë, dashurinë dhe mëshirën e Jezu Krishtit dhe rolin e Tij qendror në planin e Atit Qiellor për shpëtimin.

Përgatitja e nxënësve: Ftojini nxënësit të përsiatin për pyetjet që mund të kenë rreth asaj se çfarë ndodh pasi vdesim dhe të vijnë të përgatitur për t’i treguar.

Veprimtari të Mundshme të të Mësuarit

Pyetjet

Historia vijuese nga jeta e Motrës Aburto mund t’i ndihmojë nxënësit të përgatiten për të studiuar kapitullin tek Alma 40. Përndryshe, nxënësit mund të renditin në tabelë disa nga pyetjet që kanë rreth jetës pas vdekjes.

Motra Reina I. Aburto, këshilltare në Presidencën e Përgjithshme të Shoqatës së Ndihmës, tregoi një përvojë vetjake që i ilustron pyetjet që mund të kemi rreth asaj se çfarë ndodh pasi vdesim. Shikoje materialin filmik “Varri Nuk Ka Fitore”, në dispozicion në ChurchofJesusChrist.org, nga kodi kohor 4:21 deri në 5:13, ose lexoje thënien vijuese:

Motra Reina I. Aburto

“Kur isha nëntë vjeçe, humba vëllanë tim më të madh gjatë një tërmeti shkatërrues. Për shkak se ai ndodhi papritur, m’u desh njëfarë kohe që ta kuptoja realitetin e asaj që kishte ndodhur. Isha zemërthyer nga hidhërimi dhe e pyesja veten: ‘Çfarë i ndodhi vëllait tim? Ku është ai? Ku shkoi ai? A do ta shoh vallë sërish?’

Në atë kohë, ende nuk dija gjë rreth planit të Perëndisë për shpëtimin dhe kisha dëshirën ta dija se nga erdhëm, cili është qëllimi i jetës dhe çfarë na ndodh pasi vdesim. A nuk i kemi të gjithë këto dëshira të shpirtit kur humbasim një njeri të dashur ose kur kalojmë vështirësi në jetën tonë?” (Reina I. Aburto, “Varri Nuk Ka Fitore”, Liahona, maj 2021, f. 86)

I biri i Almës, Koriantoni, pati gjithashtu shqetësime rreth jetës pas vdekjes.

Lexo tek Alma 40:1, duke kërkuar se çfarë e shqetësonte Koriantonin.

• Si mendon, pse mund të jetë shqetësuar ai për këtë?

Kujto që Koriantoni i kishte shkelur urdhërimet e Perëndisë, duke përfshirë ligjin e dëlirësisë. Për shkak të zgjedhjeve të tij, ai mund të jetë shqetësuar për gjendjen e tij pas kësaj jete. Për të trajtuar shqetësimet e Koriantonit dhe për ta ndihmuar atë të pendohej, Alma i dha mësim doktrinën. Përgjigjja e Almës për shqetësimet e Koriantonit mund të ndihmojë edhe dikë që ka pyetje si Motra Aburto.

Motra Aburto mori më pas mësimet nga misionarët që e ndihmuan të gjente përgjigje për pyetjet e saj. Përfytyro sikur je një nga ata misionarë dhe po përgatitesh për t’i dhënë mësim asaj. Përdori burimet vijuese për të përgatitur një shpjegim të shkurtër për të ndihmuar të jepen përgjigje për pyetjet e Motrës Aburto.

Ndajeni klasën në dyshe që të përgatiten për të dhënë mësim sikur të ishin misionarë. Caktojini secilës dyshe të studiojë ose botën e shpirtrave, ose ringjalljen, dhe jepini secilës dyshe fletushkën përkatëse.

Si një alternativë ndaj përgatitjes sikur do t’i jepnin mësim Motrës Aburto, nxënësit mund të kërkojnë përgjigje për pyetjet e anëtarëve të klasës.

Bota e Shpirtrave

Manual i Mësuesit për Librin e Mormonit (2024) – “Alma 40: Bota e Shpirtrave dhe Ringjallja”

Lexo tek Alma 40:6–7, 11–14 për të parë atë që Alma i dha mësim Koriantonit. Më pas përdori burimet vijuese për të të ndihmuar ta përgatitësh më tej atë që do të japësh mësim.

• Doktrina e Besëlidhje 138:11–13, 18–22, 57

• Udhëzuesi për Shkrimet e Shenjta, “Parajsë”, scriptures.ChurchofJesusChrist.org

Presidenti Dallin H. Ouks, i Presidencës së Parë, dha mësim:

Presidenti Dallin H. Ouks

“Nga shkrimet e shenjta ne dimë se pasi trupat tanë vdesin, ne vazhdojmë të jetojmë si shpirtra në botën e shpirtrave. Shkrimet e shenjta gjithashtu japin mësim se kjo botë e shpirtrave ndahet midis atyre që kanë qenë ‘të drejtë’ ose ‘të vërtetë’ gjatë jetës dhe atyre që kanë qenë të ligj. Ato gjithashtu përshkruajnë mënyrën se si disa shpirtra besnikë ua mësojnë ungjillin atyre që kanë qenë të ligj apo rebelë (shih 1 Pjetër 3:19; Doktrina e Besëlidhje 138:19–20, 29, 32, 37).” (Dallin H. Ouks, “Ki Besim tek Zoti”, Liahona, nëntor 2019, f. 26)

Përgatit se si do t’i shpjegoje përgjigjet për pyetjet vijuese:

• Çfarë ndodh me shpirtrat tanë kur vdesim?

• Si është në parajsë? Si është në zonën që Alma e quan “errësir[a] e mëtejshme”, por që gjithashtu quhet burgu i shpirtrave (1 Pjetër 3:19) ose ferri (2 Nefi 9:12)?

• Si mund ta rritë të mësuarit rreth parajsës dhe burgut mirënjohjen tonë për Shpëtimtarin?

• Si mund të na bekojë njohuria jonë për botën e shpirtrave gjatë jetës sonë në vdekshmëri?

Kur jep mësim, sigurohu që ta bësh të qartë se midis vdekjes dhe ringjalljes, shpirtrat e të drejtëve banojnë në parajsë dhe shpirtrat e të ligjve banojnë në burgun e shpirtrave. Trego se si kuptueshmëria jote për këtë të vërtetë ndikon në zgjedhjet që bën në këtë jetë.

© 2023 by Intellectual Reserve, Inc. All rights reserved.

Ringjallja

Manual i Mësuesit për Librin e Mormonit (2024) – “Alma 40: Bota e Shpirtrave dhe Ringjallja”

Lexo tek Alma 40:2–5, 23–24 për të parë atë që Alma i dha mësim Koriantonit. Më pas përdori burimet vijuese për të të ndihmuar ta përgatitësh më tej atë që do të japësh mësim.

• Alma 11:42–45

• Udhëzuesi për Shkrimet e Shenjta, “Ringjallje”, scriptures.ChurchofJesusChrist.org

Presidenti Dallin H. Ouks, i Presidencës së Parë, dha mësim:

Presidenti Dallin H. Ouks

“Ne kremtojmë realitetin e Ringjalljes në këtë periudhë Pashke. Kjo na jep perspektivën dhe forcën për t’i duruar sfidat e vdekshmërisë, me të cilat përballen secili prej nesh dhe njerëzit që i duam, gjëra të tilla si mangësitë fizike, mendore ose emocionale që i marrim në lindje ose që i përjetojmë gjatë jetës sonë në vdekshmëri. Për shkak të Ringjalljes, ne e dimë se këto mangësi të vdekshmërisë janë vetëm të përkohshme!” (Dallin H. Ouks, “Plani i Madh”, Liahona, maj 2020, f. 94–95)

Përgatit se si do t’i shpjegoje përgjigjet për pyetjet vijuese:

• Çfarë është ringjallja? Kush do të ringjallet?

• Sipas vargjeve tek Alma 40:2–3, çfarë e bën Ringjalljen të mundur?

• Si mund të na bekojë njohuria jonë për Ringjalljen gjatë jetës sonë në vdekshmëri?

Kur jep mësim, sigurohu që ta bësh të qartë se për shkak se Jezu Krishti u ringjall, të gjithë ne gjithashtu do të ringjallemi. Jep një arsye përse je mirënjohës për premtimin e ringjalljes.

© 2023 by Intellectual Reserve, Inc. All rights reserved.

Kur nxënësit të kenë mbaruar së përgatituri, ftojini t’i japin mësim një dyshe nxënësish që përgatitën një temë të ndryshme. Merreni parasysh të siguroni ndihmë nëse u duhet ndërsa japin mësim.

Pasi nxënësit t’i kenë dhënë mësimet e tyre, merreni parasysh të drejtoni një diskutim të shkurtër me klasën duke përdorur disa ose të gjitha pyetjet vijuese.

• Përse është e rëndësishme për ty ajo që mësove rreth botës së shpirtrave dhe ringjalljes?

• Si ndikon kjo njohuri te ndjenjat e tua kundrejt Atit Qiellor dhe Jezu Krishtit?

• Cilat janë disa pyetje që pate që e morën përgjigjen sot?

• Për çfarë pyetjesh dëshiron të vazhdosh të kërkosh përgjigje?

Kujtojuni nxënësve se ne nuk i kemi ende të gjitha përgjigjet dhe se nuk ka problem të kenë pyetje pa përgjigje. Ftojini ata t’i ndjekin parimet e marrjes së njohurisë shpirtërore ndërsa kërkojnë përgjigje.

Merreni parasysh të jepni dëshminë tuaj për dhuratën e Ringjalljes dhe për paqen që mund të marrim në botën e shpirtrave për shkak të Shlyerjes së Jezu Krishtit.

Komente dhe Informacion për Rrethanat

Alma 40:16–20. Çfarë është Ringjallja e Parë?

Plaku Brus R. Mek-Konki (1915–1985), i Kuorumit të Dymbëdhjetë Apostujve, dha mësim:

Plaku Brus R. Mek‑Konki

“Ata që ngrihen në mëngjesin e kësaj ringjalljeje e bëjnë këtë me trupa qiellorë dhe do të trashëgojnë një lavdi qiellore; këta janë ata që janë frytet e para të Krishtit. Ata që ngrihen në pasditen e kësaj ringjalljeje e bëjnë këtë me trupa terrestrialë dhe, si rrjedhojë, do ta trashëgojnë atë mbretëri; ata përshkruhen sikur janë të Krishtit në këtë ngritje. Të gjithë ata që janë ringjallur deri tani kanë marrë trupa qiellorë; ngritja e qenieve terrestriale nuk fillon deri pas Ardhjes së Dytë. (Doktrina e Besëlidhje 76:50–80; 88:95–99.)” (Bruce R. McConkie, Doctrinal New Testament Commentary [1965], 1:196)

Alma 40:21–22. Çfarë do të thotë “të sillen për të qëndruar para Perëndisë”?

Plaku D. Tod Kristoferson, i Kuorumit të Dymbëdhjetë Apostujve, dha mësim:

Plaku D. Tod Kristoferson

“Me anë të Shlyerjes dhe Ringjalljes së Tij, Jezu Krishti i ka mposhtur të gjitha anët e Rënies. Vdekja fizike do të jetë e përkohshme dhe madje vdekja shpirtërore ka një fund, në atë që të gjithë do të kthehen në praninë e Perëndisë, të paktën përkohësisht, për t’u gjykuar. Ne mund të kemi mirëbesim e siguri përfundimtare në fuqinë e Tij për ta mposhtur gjithçka tjetër e për të na dhuruar jetë të përjetshme.” (D. Tod Kristoferson, “Ringjallja e Jezu Krishtit”, Liahona, maj 2014, f. 112)

Alma 40:23. Si do të jetë një trup i ringjallur?

Plaku Pol V. Xhonson, i Të Shtatëdhjetëve, dha mësim:

Plaku Pol V. Xhonson

“Ringjallja bën të mundur që shpirti dhe trupi i një individi të bashkohen sërish, vetëm se këtë herë trupi do të jetë i pavdekshëm dhe i përkryer – jo i nënshtruar ndaj dhembjes, sëmundjes apo problemeve të tjera [shih [tek] Alma 11:43]. …

Secili prej nesh ka kufizime dhe dobësi fizike, mendore dhe emocionale. Këto sfida, disa prej të cilave tani duken kaq të vështira, përfundimisht do të gjejnë zgjidhje. Asnjëri prej këtyre problemeve nuk do të na mundojë pasi të ringjallemi.” (Pol V. Xhonson, “Dhe Vdekja Nuk Do Të Jetë Më”, Liahona, maj 2016, f. 121, 122)

Veprimtari Plotësuese të të Mësuarit

Radha e ngjarjeve

Ndihma ndaj nxënësve që të dinë se çfarë do të përjetojë kushdo pasi të vdesë, mund t’i ndihmojë ata të kenë një këndvështrim të përjetshëm dhe mund ta largojë një pjesë të frikës që lidhet me vdekjen. Merreni parasysh të shkruani vdekje, bota e shpirtrave, ringjallje dhe gjykim përfundimtar në copa letre dhe t’i vendosni ato në tabelë sipas një rendi rastësor. Ftojini nxënësit të lexojnë tek Alma 40:6–7, 11–14, 21–23 dhe kërkojuni atyre t’i vendosin ngjarjet në tabelë në rendin sipas të cilit ndodhin. Merreni parasysh gjithashtu të diskutoni se çfarë nënkuptojnë ngjarjet dhe rolin që secili ka në planin e Atit Qiellor.

Njohuri për t’u penduar

Fjalët e Almës tek Alma 40:11–26 mund t’i ndihmojnë nxënësit ta ndiejnë rëndësinë e ardhjes te Shpëtimtari dhe të pendimit për mëkatet tona në këtë jetë. Merreni parasysh të shkruani Të drejtët (Të penduar) dhe Të ligjtë (Të papenduar) në tabelë dhe t’i ftoni nxënësit të kërkojnë tek Alma 40:11–26 dhe të renditin në tabelë fjalët ose frazat që përdori Alma për të përshkruar gjendjen e secilit prej këtyre grupeve pasi të vdesin. Më pas ftojini anëtarët e klasës ta analizojnë pyetjen “Si mund të na frymëzojnë këto mësime për t’u penduar?”

(Mund t’i ndihmojë nxënësit të kuptojnë se nëpërmjet Shpëtimtarit, ka ende shpresë për të dashurit që kanë ndërruar jetë përpara se të pendoheshin. Merreni parasysh t’i ftoni nxënësit t’i lexojnë dhe diskutojnë të vërtetat që gjenden te 1 Pjetër 3:18–20; 4:6 dhe Doktrina e Besëlidhje 138:29–37.)

Marrja e njohurisë shpirtërore

Merreni parasysh ta përdorni kapitullin tek Alma 40 për t’i ndihmuar nxënësit t’i shqyrtojnë parimet e marrjes së njohurisë shpirtërore. Filloni duke i ndihmuar nxënësit ta përcaktojnë pyetjen e Almës tek Alma 40:1–3, 9, më pas ftojini ata të kërkojnë vargje që e shpjegojnë se si Alma veproi me besim (Alma 40:5–6), e shqyrtoi pyetjen e tij me një këndvështrim të përjetshëm (Alma 40:9–13, 23–26) dhe u drejtua te burimet e caktuara në mënyrë hyjnore për kuptueshmëri më të mirë (Alma 40:3).

Ndihmojini nxënësit ta zbatojnë atë që mësuan duke i ftuar ta analizojnë pyetjen “Si mund ta ndiqni shembullin e Almës të zbatimit të parimeve të marrjes së njohurisë shpirtërore ndërsa kërkoni përgjigje për pyetjet tuaja?”

Pyetje të cilave Alma u jep përgjigje

Merreni parasysh t’u caktoni nxënësve një grup vargjesh nga Alma 40 dhe t’i ftoni t’i hulumtojnë ato vargje duke kërkuar pyetje rreth botës së shpirtrave dhe ringjalljes të cilave Alma u jep përgjigje. Nxënësit mund t’i tregojnë më pas pyetjet dhe përgjigjet që gjetën.

handout the spirit world

handout resurrection