Alma 42, Pjesa 1

“Një Perëndi i Përsosur, i Drejtë dhe Gjithashtu një Perëndi i Mëshirshëm”

Të jetuarit në një botë të rënë me këndvështrimin tonë të kufizuar, të vdekshëm mund ta bëjë të vështirë ta kuptojmë natyrën e plotë dhe të përsosur të Atit tonë Qiellor dhe planin e Tij. Edhe Koriantoni e pati të vështirë ta kuptonte realitetin e drejtësisë dhe mëshirës së Perëndisë. Alma e ndihmoi ta zgjeronte këndvështrimin e tij për Atin tonë të dashur Qiellor dhe planin e Tij për ne. Ky mësim ka për qëllim të të ndihmojë ta kuptosh më mirë natyrën e Atit Qiellor si një qenie edhe e drejtë, edhe e mëshirshme.

Lutuni për nxënësit tuaj. Një mënyrë për ta shtuar dashurinë tuaj për nxënësit është të luteni për ta. Ashtu si Shpëtimtari u lut vetë për Pjetrin (shihni te Lluka 22:32), ju mund t’i luteni Atit Qiellor për nxënës individualë me emër. Ftojeni Atë t’ju ndihmojë t’i kuptoni më mirë nevojat e tyre dhe mënyrat se si mund të afroheni me ta.

Përgatitja e nxënësve: Merreni parasysh t’i ftoni nxënësit të bëjnë një bashkëbisedim me një pjesëtar të familjes ose shok rreth disa prej ideve të ndryshme që kanë njerëzit rreth karakterit të Perëndisë.

Veprimtari të Mundshme të të Mësuarit

Për ta filluar këtë mësim, merreni parasysh t’i vendosni nxënësit në dyshe. Jepini secilit partner njërin nga skenarët vijues. Ftojini të dy t’i lexojnë skenarët e tyre dhe më pas të diskutojnë se çfarë mund të kenë të gabuar supozimet e Gimit dhe Elsës.

Drejtësia dhe mëshira e Perëndisë

Lexoji skenarët vijues:

• Gimi po bën zgjedhje për t’i shkelur urdhërimet e Perëndisë. Në fillim ai u ndje pak fajtor, por vendosi se, nëse Ati Qiellor i do fëmijët e Tij kaq shumë, Ai nuk do ta ndëshkonte atë për mëkatet e tij.

• Elsa është në një gjendje dëshpërimi për shkak se qe penduar për një mëkat që kreu, u ndje e falur, më pas e katranosi përsëri. Ajo beson se nuk ka shpresë për të për shkak se ndien se e ka gënjyer Perëndinë për pendimin e saj.

Ka shumë vetë që e keqkuptojnë ekuilibrin e dashur e të përsosur mes drejtësisë dhe mëshirës së Atit Qiellor dhe Jezu Krishtit. Ndërsa e studion mësimin e sotëm, mendo rreth asaj se si je bekuar për shkak se Perëndia është i drejtë dhe i mëshirshëm.

Alma e ndihmoi Koriantonin ta kuptonte planin e Perëndisë

Merreni parasysh t’i ftoni nxënësit t’i shqyrtojnë shqetësimet e Koriantonit nga Alma 40–41. Nëse nuk i mbajnë mend, drejtojini tek Alma 40:1; 41:1. Ju mund t’i renditni shqetësimet e Koriantonit në tabelë ndërsa nxënësit i përmendin ato.

Ndërsa Alma vazhdoi të këshillohej me Koriantonin, ai e kuptoi se i biri kishte një shqetësim rreth Perëndisë dhe planit të Tij.

Lexo tek Alma 42:1 dhe kërkoje shqetësimin e Koriantonit.

Merreni parasysh t’ia shtoni këtë shqetësim listës në tabelë. Nën këtë shqetësim, ju mund të renditni përgjigjet e nxënësve për pyetjet vijuese.

• Cilat janë disa supozime që mund ta shtyjnë dikë të mendojë se është e padrejtë që Perëndia t’i ndëshkojë mëkatarët?

• Cili është rreziku i këtij lloj keqkuptimi?

• Në ç’mënyrë i sheh sot keqkuptime të ngjashme?

Kjo mund të jetë një mundësi e mirë që nxënësit ta tregojnë atë që mësuan gjatë përgatitjes së tyre për orën mësimore.

Alma u përpoq ta ndihmonte Koriantonin duke i treguar atij një këndvështrim më të gjerë për Perëndinë dhe planin e Tij. Ai filloi duke i shpjeguar se Rënia e Adamit dhe Evës në Kopshtin e Edenit solli vdekjen shpirtërore (ndarjen nga Perëndia) dhe vdekjen fizike (vdekjen e trupit të vdekshëm) (shih tek Alma 42:2–8). Më pas ai i mësoi Koriantonit se si lidhet Rënia me drejtësinë dhe mëshirën e Perëndisë.

Lexo tek Alma 42:9–12 dhe kërko pasojat e Rënies.

• Cilat pasoja të Rënies gjete?

Përgjigjet e nxënësve për pyetjen e mëparshme mund të sqarojnë se çfarë ata kuptojnë dhe çfarë mund t’u duhet ndihmë për të kuptuar. Ndihmojini nxënësit të kuptojnë se, për shkak të Rënies, njerëzimi u bë “[i] mishit, [i] epsheve dhe djallëzor” (Alma 42:10) dhe “[u] përjashtua nga prania e Zotit” (Alma 42:11). Ne nuk mund ta kapërcejmë këtë ndarje nga Perëndia të vetëm.

Më pas, për t’i përgatitur nxënësit që të mësojnë më shumë rreth drejtësisë dhe mëshirës në pjesën tjetër të mësimit, merreni parasysh t’i ftoni që t’i shkruajnë përkufizimet e tyre të të dyja fjalëve me një ose dy fjali. Më pas lexojini përkufizimet vijuese dhe vërini nxënësit t’i krahasojnë përkufizimet e tyre me përkufizimet te Gospel Topics [Tema të Ungjillit]. Lejojini nxënësit të bëjnë çdo pyetje që mund të kenë.

• Drejtësia: “Sipas termave në shkrimet e shenjta, drejtësia është ligji i pandryshueshëm që sjell pasoja për veprimet. Për shkak të ligjit të drejtësisë, ne marrim bekime kur u bindemi urdhërimeve të Perëndisë. Ligji i drejtësisë kërkon gjithashtu që të paguhet një gjobë për çdo mëkat që kryejmë” (Gospel Topics [Tema të Ungjillit], “Justice” [“Drejtësi”], topics.ChurchofJesusChrist.org).

• Mëshira: “Mëshira është trajtimi me dhembshuri i një personi, shumë më tepër nga sa meritohet dhe bëhet i mundur nëpërmjet Shlyerjes së Jezu Krishtit” (Gospel Topics [Tema të Ungjillit], “Mercy” [“Mëshirë”], topics.ChurchofJesusChrist.org).

Lexo tek Alma 42:13–15, duke kërkuar atë që Alma dha mësim rreth Perëndisë dhe planit të Tij.

• Çfarë mëson rreth planit të Perëndisë?

• Çfarë të vërtetash mëson rreth Perëndisë nga këto vargje?

Ndër të vërtetat e tjera, ndihmojini nxënësit ta kuptojnë rëndësinë e të diturit se Perëndia është i përsosur, i drejtë dhe i mëshirshëm. Ndonëse në këto vargje përmenden të vërteta të rëndësishme rreth Shlyerjes së Jezu Krishtit dhe rolit të pendimit, ato tema do të eksplorohen më shumë në mësimin e ardhshëm.

Drejtësia dhe mëshira e Perëndisë

Plaku D. Tod Kristoferson, i Kuorumit të Dymbëdhjetë Apostujve, dha mësim rreth drejtësisë dhe mëshirës së Perëndisë:

“Drejtësia është një tipar thelbësor i Perëndisë. Ne mund të kemi besim te Perëndia, sepse Ai është përsosurisht i besueshëm. Shkrimet e shenjta na mësojnë se: ‘Perëndia nuk ecën në shtigje të tërthorta, as nuk kthehet në të djathtë apo në të majtë, as nuk ndryshon nga ajo që ka thënë, si rrjedhim, shtigjet e tij janë të drejta dhe udha e tij është një rreth i përjetshëm’ [Doktrina e Besëlidhje 3:2] dhe se ‘Perëndia nuk tregohet i anshëm’ [Veprat e Apostujve 10:34]. Ne mbështetemi te tipari hyjnor i drejtësisë që të kemi besim, vetëbesim dhe shpresë.

Por, si pasojë e të qenit përsosurisht i drejtë, ka disa gjëra që Perëndia nuk mund t’i bëjë. Ai nuk mund të jetë i paarsyeshëm në shpëtimin e disave dhe në ndëshkimin e të tjerëve. Ai ‘nuk mund ta shoh[ë] mëkatin as me shkallën më të vogël të lejimit’ [Doktrina e Besëlidhje 1:31]. Ai nuk mund ta lejojë mëshirën që ta grabitë drejtësinë [shih [tek] Alma 42:25].

Është provë bindëse e drejtësisë së Tij që Perëndia e ka farkëtuar parimin shoqërues të mëshirës. Është ngaqë Ai është i drejtë, që Ai krijoi mënyrën se si mëshira ta luajë rolin e saj të pazëvendësueshëm në fatin tonë të përjetshëm.” (D. Tod Kristoferson, “Të Lirë Përgjithmonë, që të Veprojnë për Veten e Tyre”, Liahona, nëntor 2014, f. 17–18)

• Çfarë të ndihmon kjo thënie të kuptosh rreth Perëndisë?

Merreni parasysh t’i ftoni nxënësit t’i shkruajnë përgjigjet e tyre për pyetjen vijuese dhe t’i plotësojnë pohimet vijuese të vetëm dhe më pas t’u kërkoni t’ia tregojnë një partneri, grupi të vogël ose klasës.

Përfytyro sikur ke një shok ose shoqe që ka të njëjtin shqetësim si Koriantoni. Ai ose ajo të pyet se si është e drejtë që Perëndia i ndëshkon mëkatarët.

• Çfarë do t’i thoshe shokut ose shoqes sate për ta ndihmuar ta kuptojë drejtësinë dhe mëshirën e Perëndisë? (Përfshi vargje ose fraza nga Alma 42:9–15.)

Përfundoji pohimet vijuese:

• Drejtësia e Perëndisë më bekon për shkak se

• Mëshira e Perëndisë më bekon për shkak se

Merreni parasysh të jepni dëshminë tuaj për drejtësinë dhe mëshirën e Perëndisë.

Komente dhe Informacion për Rrethanat

Në ç’mënyrë tjetër drejtësia dhe mëshira e Perëndisë mund të jetë një bekim për ne?

Plaku D. Tod Kristoferson, i Kuorumit të Dymbëdhjetë Apostujve, dha mësim:

“Duke qenë se i përmbushi kërkesat e drejtësisë, Krishti tani hyn në vendin e drejtësisë; ose mund të themi, Ai është drejtësia, pikërisht siç Ai është dashuria [shih te 1 Gjon 4:8]. Po ashtu, përveç të qenit një Perëndi ‘i përsosur e i drejtë’, Ai është një Perëndi i përsosur e i mëshirshëm [Alma 42:15; shih edhe te Mosia 15:8–9]. Ndaj, Shpëtimtari i rregullon të gjitha gjërat. Asnjë padrejtësi në vdekshmëri nuk është e përhershme, madje as vdekja, sepse Ai e rikthen jetën sërish. Asnjë dëmtim, paaftësi, tradhti apo shpërdorim nuk kalon pa u dëmshpërblyer në fund për shkak të drejtësisë dhe mëshirës së Tij përfundimtare.” (D. Tod Kristoferson, “Ringjallja e Jezu Krishtit”, Liahona, maj 2014, f. 112)

Plaku Gerit W. Gong, i Kuorumit të Dymbëdhjetë Apostujve, dha mësim:

“Fatmirësisht, mund t’i mirëbesojmë drejtësisë së përsosur dhe mëshirës së përsosur të Perëndisë për t’i gjykuar përsosurisht synimet dhe veprimet tona”. (Gerit W. Gong, “Mirëbesoni Sërish”, Liahona, nëntor 2021, f. 99)

Plaku Riçard G. Skot (1928–2015), i Kuorumit të Dymbëdhjetë Apostujve, shpjegoi:

“Kërkesat e drejtësisë për ligjet e thyera mund të kënaqen nëpërmjet mëshirës, të arritur nëpërmjet pendesës dhe bindjes tuaj të vazhdueshme ndaj ligjeve të Perëndisë. Një pendesë dhe bindje e tillë janë absolutisht thelbësore për Shlyerjen që ajo të realizojë mrekullinë e saj të plotë në jetën tuaj. Shëlbuesi mund ta vendosë përgjegjësinë tuaj vetjake me drejtësi dhe t’ju falë me zemërgjerësi në rrugën tuaj të pendesës. Nëpërmjet Shlyerjes ju mund të jetoni në një botë ku drejtësia siguron që ju do të ruani atë që keni arritur nëpërmjet bindjes. Nëpërmjet mëshirës së Tij[,] ju mund [t’u jepni zgjidhje] pasoja[ve të] ligjeve të shkelura.” (Riçard G. Skot, “Shlyerja Mund të Sigurojë Paqen dhe Lumturinë Tuaj”, Liahona, nëntor 2006, f. 42; Konferenca e Përgjithshme, tetor 2006, f. 59)

Veprimtari Plotësuese të të Mësuarit

Titujt e planit të Atit Qiellor

Një mënyrë tjetër për t’i ndihmuar nxënësit ta kuptojnë më tej natyrën e Perëndisë është duke studiuar titujt e planit të Tij. Ftojini nxënësit të kërkojnë nëpër vargjet tek Alma 42:5, 8, 11 dhe 15 dhe t’i përcaktojnë katër mënyrat se si i referohet Alma planit të Perëndisë. Merreni parasysh t’i ftoni nxënësit t’i shenjojnë ato në shkrimet e tyre të shenjta. Pyetini nxënësit se çfarë na mësojnë këto mënyra të ndryshme të referimit ndaj planit të Perëndisë rreth Tij dhe planit të Tij. Merreni parasysh t’i ftoni nxënësit të mendojnë për situata kur të diturit e këtyre titujve të ndryshëm të planit mund t’i ndihmojë njerëzit të ecin përpara në jetën e tyre me shpresë.

Ku tjetër na mëson Libri i Mormonit rreth drejtësisë dhe mëshirës së Perëndisë?

Mund të jetë e dobishme t’i përdorni referencat‑kryq vijuese për t’i ndihmuar nxënësit ta kuptojnë më tej drejtësinë dhe mëshirën e Perëndisë: 2 Nefi 9:17, 19; Jakobi [LiM] 4:10; Mosia 5:15; Alma 34:15–16; 41:14.